Phau Ntawv Amas
Amas tus Tub

1 Nim no tau muaj tias nyob hauv thawj xyoo ntawm cov neeg txiav txim txoj kev kav cov Neeg Nifais, txij li lub sij hawm no mus lawm yav tom ntej, vaj ntxwv Mauxiyas tau mus rau txoj kev uas tag nrho neeg ntiaj teb mus, tau ua ib lub neej tsim nyog, thiab taug kev ncaj ncees rau ntawm Vajtswv, thiab tsis muaj leej twg pauv nws qhov chaw los kav; tiam sis nws tau txhim tsa tej kev cai, thiab cov neeg txais yuav tej kev cai ntawd; yog li ntawd lawv yuav tsum coj raws li tej kev cai uas nws tau tsim.

2 Thiab tau muaj tias nyob hauv thawj xyoo ntawm Amas txoj kev kav nyob hauv lub rooj txiav txim, cov neeg coj ib tug txiv neej tuaj rau nws txiav txim, ib tug txiv neej uas loj, thiab muaj suab npe nrov vim nws muaj zog heev.

3 Thiab nws tau mus ncig hauv cov neeg, qhia rau lawv tej uas nws hais tias yog Vajtswv txoj lus, tawm tsam lub koom txoos; tshaj tawm rau cov neeg tias txhua tus pov thawj thiab xib hwb tsim nyog muaj koob muaj npe; thiab tsis tsim nyog uas lawv yuav siv lawv txhais tes los khwv, tiam sis cov neeg yuav tsum khwv kom lawv tau noj tau haus.

4 Thiab nws kuj ua tim khawv rau cov neeg hais tias tib neeg txhua tus yuav txais kev cawm dim thaum txog hnub kawg, thiab hais tias lawv tsis tas ntshai los sis tshee, tiam sis xav kom lawv tsa lawv lub taub hau thiab zoo siab; vim tus Tswv tau tsim neeg txhua tus, thiab kuj tau txhiv neeg txhua tus dim; thiab, txog thaum kawg, neeg txhua tus yuav muaj txoj sia nyob mus ib txhis.

5 Thiab tau muaj tias nws tau qhia tej yam no heev kawg nkaus ua rau coob leej ntseeg nws tej lus, muaj coob leej heev uas lawv pib txhawb nws thiab muab nyiaj rau nws.

6 Thiab nws pib khav theeb vim nws lub siab muab hlob, thiab hnav tej ris tsho uas kim heev, muaj tseeb tiag, thiab nws twb pib txhim tsa ib lub koom txoos raws li nws txoj kev qhuab qhia.

7 Thiab tau muaj tias thaum nws tseem tab tom mus, qhuab qhia rau cov uas ntseeg nws txoj lus, nws ntsib ib tug txiv neej uas zwm rau Vajtswv lub koom txoos, muaj tseeb tiag, twb yog ib tug ntawm lawv cov xib hwb; thiab nws pib sib cav heev heev nrog tus txiv neej ntawd, xwv kom nws yuav coj tau cov neeg hauv lub koom txoos mus; tiam sis tus txiv neej ntawd tiv tau nws, siv Vajtswv tej lus los qhuab ntuas nws.

8 Nim no tus txiv neej ntawd lub npe yog Nkide-oos; thiab nws twb yog ib rab cuab yeej nyob hauv Vajtswv txhais tes uas coj tau Leehais cov neeg dim ntawm kev ua qhev.

9 Nim no, vim Nkide-oos siv Vajtswv tej lus los tiv tau nws, nws npau taws rau Nkide-oos, thiab rho nws rab ntaj thiab pib muab nws tua. Nim no vim Nkide-oos laus heev lawm, yog li ntawd nws thiaj tiv tsis tau nws tej kev ntaus, yog li ntawd Nkide-oos thiaj raug tua los ntawm rab ntaj.

10 Thiab cov neeg ntawm lub koom txoos txhom tus txiv neej uas tua Nkide-oos thiab coj nws tuaj rau Amas, kom txiav txim rau nws raws li tej kev txhaum uas nws tau ua.

11 Thiab tau muaj tias nws sawv ntsug ntawm Amas xub ntiag thiab thov rau nws tus kheej yam tsis ntshai dab tsi li.

12 Tiam sis Amas hais rau nws tias: Saib seb, zaum no yog thawj zaug uas tswv yim xib hwb cuav tau muaj nyob rau hauv cov neeg no. Thiab saib seb, koj tsis yog muaj txim ntawm tswv yim xib hwb cuav xwb, tiam sis koj tseem siv ntaj los yuam tej tswv yim xib hwb cuav ntawd; thiab yog hais tias tseem muab tej tswv yim xib hwb cuav los yuam rau cov neeg no ces lawv yuav puas tsuaj tag nrho mus.

13 Thiab koj tau ua rau ib tug neeg ncaj ncees nqaij ntuag ntshav nrog, muaj tseeb tiag, ib tug txiv neej uas tau ua ntau yam zoo nyob hauv cov neeg no; thiab yog peb tseg koj txoj sia ces nws cov ntshav yuav los rau peb rau txoj kev pauj.

14 Yog li ntawd koj yuav raug txim tuag, raws li txoj kev cai uas Mauxiyas, uas yog peb tus vaj ntxwv kawg, tau muab rau peb; thiab cov neeg no tau txais yuav txoj kev cai ntawd; yog li ntawd cov neeg no yuav tau coj raws li txoj kev cai.

15 Thiab tau muaj tias lawv coj nws mus; thiab nws lub npe yog Nihos; thiab lawv coj nws mus rau saum lub pov roob Meethais, thiab nyob rau saud cov neeg ua rau nws, los sis nws kam lees, nyob nruab nrab ntawm lub ntuj thiab lub ntiaj teb, hais tias yam uas nws tau qhia rau cov neeg yeej tsis raws li Vajtswv txoj lus; thiab nyob rau saud nws tuag yam li ib tug neeg txhaum.

16 Txawm li ntawd los, qhov no tsis tau xaus txoj kev nthuav ntawm tej tswv yim xib hwb cuav nyob thoob hauv thaj av; vim muaj coob leej uas nyiam tej yam tsis muaj nuj nqis ntawm lub ntiaj teb, thiab lawv tawm mus qhia txog tej lus qhuab qhia cuav; thiab lawv ua li no rau tej kev nplua nuj thiab tau ntsej tau muag.

17 Txawm li ntawd los, lawv tsis kam dag, tsam cov neeg txiav txim paub, vim kev ntshai txoj kev cai, vim cov neeg dag yuav raug txim; yog li ntawd lawv ua txuj qhuab qhia raws li lawv txoj kev ntseeg; thiab nim no txoj kev cai tsis muaj hwj chim kav ib tug neeg vim yog nws txoj kev ntseeg.

18 Thiab lawv tsis kam ua tub sab, vim ntshai txoj kev cai, vim cov ua li ntawd yuav raug txim; thiab lawv kuj tsis kam ua tub nyiag, los sis tua neeg, vim tus uas tua neeg yuav raug txim tuag.

19 Tiam sis tau muaj tias txhua tus uas tsis zwm rau Vajtswv lub koom txoos pib tsim txom cov uas zwm rau Vajtswv lub koom txoos, thiab cov uas tau ris Khetos lub npe.

20 Muaj tseeb tiag, lawv tsim txom lawv, thiab siv txhua yam lus hais kom lawv raug kev kub ntxhov, thiab lawv ua li no los vim yog lawv txoj kev txo hwj chim; vim lawv tsis muab hlob ntawm lawv qhov muag, thiab vim lawv faib Vajtswv txoj lus, ib leeg rau ib leeg, tsis them nyiaj thiab tsis tshuav nqi.

21 Nim no tau muaj ib txoj kev cai nruj nyob hauv cov neeg ntawm lub koom txoos, txwv tsis pub ib tug neeg twg, uas zwm rau lub koom txoos, sawv thiab tsim txom cov uas tsis zwm rau lub koom txoos, thiab txwv tsis pub muaj kev tsim txom nyob hauv lawv.

22 Txawm li ntawd los, tseem muaj coob leej nyob hauv lawv uas pib khav txiv, thiab pib sib cav muaj ceem nrog lawv cov yeeb ncuab, twb mus txog thaum uas sib ntaus; muaj tseeb tiag, lawv xuas nrig ib leeg ntaus ib leeg.

23 Nim no qhov no yog nyob hauv xyoo thib ob ntawm Amas txoj kev kav, thiab qhov no yog ib qho ua rau lub koom txoos muaj kev nyuaj siab ntau; muaj tseeb tiag, qhov no yog qhov ua rau lub koom txoos muaj kev sim siab ntau.

24 Vim muaj coob leej lub siab tawv qhwb qhawv, thiab lawv tej npe raug muab rho tawm, xwv kom Vajtswv cov neeg txhob nco qab txog lawv ntxiv lawm. Thiab kuj muaj coob leej tau thim lawv tus kheej tawm ntawm lawv.

25 Nim no qhov no yog ib qho kev sim siab loj rau cov uas sawv khov kho muab siab rau ntseeg; txawm li ntawd los, lawv tseem nyob khov kho thiab ruaj nrees coj Vajtswv tej lus txib, thiab lawv ua siab ntev nyiaj tej kev tsim txom uas cov neeg tau muab los tsuam lawv.

26 Thiab thaum cov pov thawj tso lawv txoj hauj lwm tseg es mus faib Vajtswv txoj lus rau cov neeg, cov neeg los kuj tso lawv tej hauj lwm tseg es los mloog Vajtswv txoj lus thiab. Thiab thaum cov pov thawj faib Vajtswv txoj lus rau lawv tas lawm lawv rov qab mus rau siab ntso ua lawv tej hauj lwm; thiab tus pov thawj, twb tsis saib nws tus kheej siab tshaj cov uas mloog nws, vim tus qhuab qhia twb tsis zoo tshaj tus uas mloog, thiab tus xib hwb los twb tsis zoo tshaj tus uas kawm; thiab yog li ntawd lawv txhua tus puav leej sib txig, thiab txhua tus puav leej ua hauj lwm, txhua tus neeg raws li nws lub zog.

27 Thiab lawv faib lawv tej khoom, txhua tus neeg raws li tej uas nws muaj, rau cov neeg pluag, thiab cov neeg txom nyem, thiab cov neeg muaj mob, thiab cov uas muaj kev nyuaj siab; thiab lawv tsis hnav tej ris tsho uas kim kim, tiam sis lawv yeej huv si thiab txaus nyiam.

28 Thiab yog li ntawd lawv txhim tsa lub koom txoos tej dej num; thiab zoo li no lawv rov pib muaj kev thaj yeeb tsis tu ncua, txawm tias lawv muaj kev tsim txom txhua yam.

29 Thiab nim no, vim txoj kev nyob ruaj nrees ntawm cov ntseeg lawv pib nplua nuj heev, muaj nplua mias txhua yam uas lawv yuav tsum muaj—muaj tej pab yaj thiab tsiaj txhu, thiab txhua yam tsiaj uas rog nplua mias, thiab kuj muaj noob qoob loos nplua mias, thiab muaj kub, thiab muaj nyiaj dawb, thiab tej yam uas muaj nuj nqis, thiab muaj ntaub kab nplua mias thiab ntaub npuag, thiab txhua yam ntaub uas zoo.

30 Thiab zoo li no, nyob hauv lawv tej kev vam meej, lawv tsis ntiab tawm tus uas liab qab, los sis tus uas tshaib plab, los sis tus uas nqhis dej, los sis tus uas muaj mob, los sis tus uas tsis tau kev pab; thiab lawv tsis muab lawv lub siab tso rau tej kev nplua nuj; yog li ntawd lawv ua siab dawb rau txhua tus, tag nrho tus laus thiab tus hluas, tag nrho tus ua qhev thiab tus ywj pheej, tag nrho txiv neej thiab poj niam, txawm hais tias nyob sab nraum lub koom txoos los sis nyob hauv lub koom txoos, thiab lawv tsis xaiv neeg ntsej muag ntawm cov neeg txom nyem.

31 Thiab zoo li no lawv tau vam meej thiab nplua nuj tshaj cov uas tsis zwm rau lawv lub koom txoos.

32 Vim cov uas tsis zwm rau lawv lub koom txoos pub lawv tus kheej ua neeb ua yaig, thiab pe dab pe mlom los sis ua tub nkeeg, thiab taug xaiv, thiab ntshaw luag tug thiab sib cav sib ceg; lawv hnav tej ris tsho kim kim; khav theeb vim lawv qhov muag muab hlob; tsim txom lwm tus, hais lus dag, ua tub sab tub nyiag, sib daj sib deev, thiab tua neeg, thiab ua txhua yam kev phem; txawm li ntawd los, tau muab txoj kev cai yuam rau cov uas tau ua txhaum, ntau npaum li uas ua tau.

33 Thiab tau muaj tias los ntawm kev yuam txoj kev cai rau lawv, xwv kom txhua tus neeg raug txim raws li tej uas nws tau ua, lawv nyob tus zog, thiab tsis kam ua ib yam kev phem dab tsi tsam cov neeg txiav txim paub; yog li ntawd, tau muaj kev thaj yeeb ntau nyob hauv cov Neeg Nifais mus txog xyoo tsib ntawm cov neeg txiav txim txoj kev kav.