1 Thiab ntxiv, kuv, Amas, vim Vajtswv tau txib kom kuv coj Amulej thiab tawm mus thiab qhuab qhia cov neeg no ntxiv, los sis cov neeg uas nyob hauv lub nroog Amoonaihas, tau muaj tias thaum kuv pib qhuab qhia lawv, lawv pib cav nrog kuv, hais tias:

2 Koj yog leej twg? Koj puas xav tias peb yuav ntseeg ib tug neeg cov lus pov thawj, txawm tias nws yuav qhia rau peb tias lub ntiaj teb yuav dhau mus?

3 Nim no lawv tsis to taub tej lus uas nkawd tau hais; vim lawv tsis paub tias lub ntiaj teb twb yuav dhau mus.

4 Thiab lawv kuj hais tias: Peb yuav tsis ntseeg koj tej lus txawm tias koj yuav qhia tej yuav muaj los yav tom ntej tias, ib hnub xwb, lub nroog loj no yuav raug puas tsuaj tas.

5 Nim no lawv tsis paub tias Vajtswv muaj peev xwm ua tau tej yam zoo kawg nkaus li ntawd, vim lawv yog ib co neeg siab tawv thiab tawv ncauj.

6 Thiab lawv hais tias: Vajtswv yog leej twg, es ho tsis xa lub hwj chim loj tshaj los rau cov neeg no tsuas yog ib tug neeg xwb los tshaj tawm qhov tseeb ntawm tej yam tseem ceeb thiab zoo kawg nkaus rau lawv?

7 Thiab lawv sawv los xuas tes ntsiab nthos kuv; tiam sis saib seb, lawv tsis nthos. Thiab kuv sawv ua siab tuab tshaj tawm rau lawv, muaj tseeb tiag, kuv muaj siab tuab ua tim khawv rau lawv hais tias:

8 Saib seb, auj tiam niag neeg uas phem thiab tsis yuav lus es, nej twb hnov qab nej cov yawg koob txoj kab lis kev cai tag nrho; muaj tseeb tiag, nej twb hnov qab Vajtswv tej lus txib sai ua luaj li.

9 Nej tsis nco qab txog peb tus yawg koob, Lihais, uas Vajtswv txhais tes coj tawm ntawm Yeluxalees tuaj los? Nej tsis nco qab tias twb yog nws coj lawv tag nrho mus dhau hauv tej hav zoov los?

10 Thiab nej puas hnov qab sai ua luaj tias muaj pes tsawg zaus uas nws cawm peb cov yawg koob tawm ntawm lawv cov yeeb ncuab txhais tes, thiab tshwj lawv tseg kom tsis txhob puas tsuaj, twb yog los ntawm lawv cov kwv tij kiag txhais tes los?

11 Muaj tseeb tiag, thiab yog hais tias tsis muaj nws lub hwj chim uas loj tshaj txhua yam, thiab nws txoj kev hlub tshua, thiab nws txoj kev ua siab ntev nyiaj rau peb, ces ntshe peb twb raug txiav tawm ntawm lub ntiaj teb thaum ntxov ua ntej lub caij no lawm, thiab tej zaum twb raug txib mus nyob hauv qhov chaw nyuaj siab thiab txom nyem uas tsis txawj kawg.

12 Saib seb, nim no kuv hais rau nej tias nws txib kom nej hloov siab lees txim; thiab tsuas yog nej hloov siab lees txim xwb, tsis li ces nej yeej yuav tsis tau txais Vajtswv lub nceeg vaj los ua nej tug. Tiam sis saib seb, tsis tas li no xwb—nws tau txib kom nej hloov siab lees txim, tsis li ces nws yuav ua kom nej puas tsuaj tag huv tib si tawm ntawm lub ntiaj teb mus; muaj tseeb tiag, nws yuav los xyuas nej nrog nws txoj kev npau taws, thiab nrog nws txoj kev npau taws heev nws yuav tsis tig mus li.

13 Saib seb, nej puas nco ntsoov cov lus uas nws hais rau Lihais, hais tias: Npaum li uas nej ua raws li kuv tej lus txib, nej yuav vam meej nyob rau hauv thaj av? Thiab hais ntxiv hais tias: Npaum li uas nej tsis ua raws li kuv tej lus txib nej yuav raug txiav tawm ntawm tus Tswv xub ntiag mus.

14 Nim no kuv xav kom nej nco ntsoov tias, npaum li uas cov Neeg Lamas tsis ua raws li Vajtswv tej lus txib, lawv twb raug txiav tawm ntawm tus Tswv xub ntiag mus. Nim no peb twb pom tias hais txog tej yam no tus Tswv txoj lus yeej muaj tseeb tiag, thiab cov Neeg Lamas twb raug txiav tawm ntawm nws xub ntiag mus, txij li thaum lawv pib ua txhaum nyob hauv thaj av.

15 Txawm li ntawd los kuv hais rau nej tias, lawv yuav nyiaj taus zoo dua nej nyob rau hnub txiav txim, yog hais tias nej tseem muaj nej tej kev txhaum, muaj tseeb tiag, thiab lawv twb yuav nyiaj taus zoo dua nej nyob hauv lub neej no, tsuas yog nej hloov siab lees txim xwb.

16 Vim muaj ntau lo lus cog tseg uas tau muab mus rau cov Neeg Lamas; vim twb yog lawv cov yawg koob tej kab lis kev cai uas tau ua rau lawv nyob tsis paub; yog li ntawd tus Tswv yuav hlub tshua lawv thiab cia lawv nyob hauv thaj av ntxiv mus.

17 Thiab nyob rau ib lub sij hawm tus Tswv yuav coj lawv los ntseeg nws txoj lus, thiab los paub txog lawv cov yawg koob tej kab lis kev cai uas tsis yog; thiab lawv coob leej yuav txais kev cawm dim, vim tus Tswv yuav hlub tshua txhua tus uas hu txog nws lub npe.

18 Tiam sis saib seb, kuv hais rau nej tias yog nej tseem pheej ua phem ces tus Tswv yuav tsis cia kom nej txoj sia ntev nyob hauv thaj av, vim nws yuav xa cov Neeg Lamas tuaj tawm tsam nej, thiab yog tias nej tsis kam hloov siab lees txim lawv yuav tuaj thaum ib lub sij hawm uas nej tsis paub, thiab txoj kev puas tsuaj yuav xyuas kom nej raug puas tsuaj tag nrho; thiab yuav muaj raws li tus Tswv txoj kev npau taws heev.

19 Vim nws yuav tsis cia kom nej ua neej nyob ua phem, ua kom nws cov neeg puas tsuaj. Kuv hais rau nej tias, nws tsis cia kom muaj li ntawd; nws xum cia cov Neeg Lamas ua kom tag nrho nws cov neeg uas hu ua Nifais cov neeg puas tsuaj huv tib si mus, yog hais tias ntxim lawv yuav poob mus rau hauv kev ua txog ua txhaum, tom qab tus Tswv lawv tus Vajtswv tau muab txoj kev kaj ntau heev thiab txoj kev txawj ntse ntau heev rau lawv;

20 Muaj tseeb tiag, tom qab lawv los ua ib co neeg uas tus Tswv foom koob hmoov ntau heev rau; muaj tseeb tiag, tom qab tus Tswv foom koob hmoov rau lawv ntau tshaj lwm haiv neeg, lwm xeem neeg, lwm yam lus, los sis lwm yam neeg; tom qab tus Tswv tau muab txhua yam ua rau lawv paub, raws li lawv siab xav, thiab lawv txoj kev ntseeg, thiab tej kev thov Vajtswv, ntawm tej uas tau muaj los lawm, thiab tab tom muaj, thiab tej uas yuav muaj los;

21 Tom qab Vajtswv tus Ntsuj Plig tau los saib xyuas lawv; tom qab lawv tau hais lus nrog tej tim tswv, thiab tom qab tus Tswv lub suab tau hais lus rau lawv; thiab tom qab lawv tau lub txiaj ntsim qhia tau tej yuav muaj los yav tom ntej, thiab lub txiaj ntsim txais tau kev tshwm sim, thiab ntau yam txiaj ntsim, thiab lub txiaj ntsim txawj hais lwm yam lus, thiab lub txiaj ntsim txawj qhuab qhia, thiab lub txiaj ntsim Vaj Ntsuj Plig Dawb Huv, thiab lub txiaj ntsim txawj txhais lus;

22 Muaj tseeb tiag, thiab tom qab Vajtswv txhais tes tau coj lawv dim ntawm thaj av Yeluxalees; tom qab tus Tswv tau cawm lawv dim ntawm kev tshaib nqhis, thiab ntawm kev mob nkeeg, thiab txhua yam kab mob kev nkeeg; thiab tom qab tus Tswv tau ua rau lawv muaj zog thaum lawv ua rog, xwv kom lawv thiaj tsis raug puas tsuaj; tom qab tus Tswv tau coj lawv tawm ntawm kev ua qhev ib lub sij hawm dhau ib lub sij hawm, thiab tom qab tus Tswv tau ceev thiab tsom kwm lawv los txog nim no; thiab tus Tswv tau ua rau lawv vam meej txog rau thaum lawv nplua nuj nyob hauv txhua yam—

23 Thiab nim no saib seb kuv hais rau nej tias, yog tias cov neeg no, cov uas tau txais koob hmoov ntau heev los ntawm tus Tswv txhais tes, yuav ua txhaum ua tsis raws li txoj kev kaj thiab txoj kev txawj ntse uas lawv tau, kuv hais rau nej tias yog muaj zoo li no, hais tias yog lawv poob mus rau kev ua txhaum, ces cov Neeg Lamas yuav nyiaj taus zoo dua lawv.

24 Vim saib seb, twb muab tus Tswv cov lus cog tseg rau cov Neeg Lamas, tiam sis tsis muab rau nej yog nej ua txhaum; tus Tswv puas tau cog lus ncaj nraim thiab ruaj khov hais tias, yog nej yuav ntxeev siab tawm tsam nws ces nej yuav raug puas tsuaj huv tib si tawm ntawm lub ntiaj teb mus?

25 Thiab nim no vim yog qhov no, xwv kom nej tsis txhob raug puas tsuaj, tus Tswv tau xa nws tus tim tswv los saib xyuas coob leej ntawm nws cov neeg, tshaj tawm rau lawv tias lawv yuav tsum tawm mus thiab hais nrov nrov rau cov neeg no, hais tias: Nej cia li hloov siab lees txim, vim twb yuav txog lub sij hawm rau lub nceeg vaj ceeb tsheej lawm;

26 Thiab tsis ntau hnub txij no mus Vajtswv Leej Tub twb yuav los nrog nws lub yeeb koob; thiab nws lub yeeb koob yog lub yeeb koob ntawm Leej Txiv Tib Leeg Tub, uas muaj kev tshav ntuj puv npo, kev ncaj, thiab kev tseeb, muaj kev siab ntev, kev hlub tshua, thiab kev ua siab ntev nyiaj puv npo, nrawm hnov nws cov neeg tej lus thov thiab teb lawv tej lus thov Vajtswv.

27 Thiab saib seb, nws yuav los muab cov uas yuav ua kev cai raus dej rau txoj kev hloov siab lees txim txhiv dim, los ntawm txoj kev ntseeg nws lub npe.

28 Yog li ntawd, nej cia li npaj tus Tswv txoj kev, vim twb yuav txog lub sij hawm lawm uas neeg txhua tus yuav tau sau nqi zog raws li tej yam lawv ua, raws li tej uas lawv tau ua los lawm—yog lawv tau ua ncaj ncees lawv yuav sau txoj kev cawm seej ntawm lawv tus ntsuj plig, raws li Yexus Khetos lub hwj chim thiab txoj kev cawm dim; thiab yog lawv ua phem lawv yuav sau txoj kev raug txim ntawm lawv tus ntsuj plig, raws li tus dab phem lub hwj chim thiab kev ua qhev.

29 Nim no saib seb, qhov no yog tus tim tswv lub suab, uas hais nrov nrov rau cov neeg.

30 Thiab nim no, kuv cov kwv tij uas kuv hlub es, vim nej yog kuv cov kwv tij, thiab tsim nyog rau kuv hlub nej, thiab nej yuav tsum ua tej yam uas tsim nyog rau kev hloov siab lees txim, vim yog twb pom tias nej lub siab tau tawv heev tawm tsam Vajtswv txoj lus, thiab vim yog twb pom tias nej yog ib co neeg uas yuam kev thiab poob lawm.

31 Nim no tau muaj tias thaum kuv, Amas, tau hais tej lus no tas lawm, saib seb, cov neeg npau taws rau kuv vim kuv hais rau lawv tias lawv yog ib co neeg siab tawv thiab tawv ncauj.

32 Thiab vim kuv kuj hais rau lawv tias lawv yog ib co neeg uas yuam kev thiab poob lawm lawv npau taws rau kuv, thiab nrhiav kev xuas tes nthos kuv, xwv kom lawv yuav muab kuv tso rau hauv lub tsev kaw.

33 Tiam sis tau muaj tias tus Tswv tsis cia lawv txhom kuv lub sij hawm no thiab muab kuv tso rau hauv lub tsev kaw.

34 Thiab tau muaj tias Amulej tau mus thiab sawv nres nroos, thiab pib qhuab qhia rau lawv thiab. Thiab nim no tsis tau muab tag nrho Amulej cov lus sau tseg, txawm li ntawd los tau muab ib txhia ntawm nws cov lus sau rau hauv phau ntawv no.