1 Nim no tau muaj tias tom qab Khaulihos tas sim neej, Amas tau txais xov tias cov Neeg Xaulas ntxeev tus Tswv tej kev, thiab Xaulas, tus uas yog lawv tus thawj, coj cov neeg lub siab mus pe hawm tej mlom tsis txawj hais lus thiab tsis muaj sia, nws lub siab rov pib mob dua vim yog cov neeg txoj kev ua phem.

2 Vim thaum Amas paub txog nws cov kwv tij txoj kev ua phem ua rau nws tu siab heev; yog li ntawd nws tu siab heev kawg nkaus vim yog txoj kev sib cais ntawm cov Neeg Xaulas thiab cov Neeg Nifais.

3 Nim no cov Neeg Xaulas tau sau lawv tus kheej tuaj ua ke nyob hauv ib thaj av uas lawv hu ua Eethi-onas, uas nyob sab hnub tuaj ntawm thaj av Xalahelas, uas nyob ze ciam teb ntawm ntug dej hiav txwv, uas nyob rau sab nram hav ntawm thaj av Yesoos, uas kuj nyob ntawm ciam teb uas nyob ze koog hav zoov sab qab teb, koog hav zoov uas muaj cov Neeg Lamas nyob puv nkaus.

4 Nim no cov Neeg Nifais ntshai heev tias tsam cov Neeg Xaulas ho pib sib tham nrog cov Neeg Lamas, thiab ntshai tias tsam qhov ntawd ho ua ib qho kev swb loj heev rau cov Neeg Nifais.

5 Thiab nim no, vim txoj kev qhia txog txoj lus muaj hwj chim coj tau cov neeg mus ua tej yam uas ncaj ncees—muaj tseeb tiag, txoj kev qhia txog txoj lus muaj hwj chim hloov cov neeg lub siab xav tshaj rab ntaj, los sis tshaj lwm yam huv tib si, uas tau tshwm sim rau lawv—yog li ntawd Amas thiaj xav tias tsim nyog rau lawv sim lub hwj chim ntawm Vajtswv txoj lus.

6 Yog li ntawd nws coj Amoos, thiab Aloos, thiab Oonaws; thiab nws tso Heenais nyob rau hauv lub koom txoos hauv Xalahelas; tiam sis thawj peb tug nws coj nrog nws, thiab kuj coj Amulej thiab Xi-elas, uas nyob hauv Melej; thiab nws kuj coj nws ob tug tub thiab.

7 Nim no nws tsis coj nws tus tub hlob nrog nws, thiab nws lub npe hu ua Hilamas; tiam sis ob tug tub uas nws coj nrog nws npe hu ua Sinploos thiab Khali-atoos; thiab tej no yog tej lub npe ntawm cov uas nrog nws mus rau hauv cov Neeg Xaulas, mus tshaj tawm txoj lus rau lawv.

8 Nim no cov Neeg Xaulas yog ib co uas khiav tawm ntawm cov Neeg Nifais mus; yog li ntawd Vajtswv cov tub qhe twb tau tshaj tawm Vajtswv txoj lus rau lawv.

9 Tiam sis lawv twb tau poob mus rau hauv tej kev yuam kev loj, vim lawv tsis mob siab ua raws li Vajtswv tej lus txib, thiab tej kev cai, raws li Mauxes txoj kev cai.

10 Thiab lawv kuj tsis kam ua raws li lub koom txoos tej kab ke, kom taij thiab thov Vajtswv tsis tu ncua thiab txo hwj chim rau Vajtswv txhua hnub, xwv kom lawv thiaj tsis pib ua raws li txoj kev ntxias.

11 Muaj tseeb tiag, lub ntsiab yog li no, lawv ua ntau yam ntxeev tus Tswv tej kev; yog li ntawd, vim qhov no, Amas thiab nws cov kwv tij thiaj mus rau hauv thaj av mus tshaj tawm txoj lus rau lawv.

12 Nim no, thaum lawv tau tuaj rau hauv thaj av lawm, saib seb, ua rau lawv xav tsis thoob thaum lawv pom tias cov Neeg Xaulas tau ua tej tsev sab laj, thiab lawv sib sau lawv tus kheej tuaj ua ke nyob rau ib hnub ntawm lub lim tiam, hnub uas lawv muab hu ua tus Tswv hnub; thiab lawv teev tiam raws li ib tug txheej txheem uas Amas thiab nws cov kwv tij tsis tau pom dua;

13 Vim lawv ua ib qho chaw nyob hauv nruab nrab ntawm lawv lub tsev teev ntuj, ib qho chaw sawv ntsug, uas siab tshaj taub hau, thiab saum qhov chaw saud tsuas yog txaus ib tug neeg xwb.

14 Yog li ntawd, tus uas xav teev tiam yuav tsum mus thiab sawv rau saum qhov chaw saud, thiab tsa nws ob txhais tes rau saum ntuj, thiab thov nrog ib lub suab nrov nrov, hais tias:

15 Dawb huv, Vajtswv tus uas dawb huv; peb ntseeg tias koj yog Vajtswv, thiab peb ntseeg tias koj dawb huv, thiab yav tas los koj yog ib tug ntsuj plig, thiab nim no koj yog ib tug ntsuj plig, thiab koj yuav yog ib tug ntsuj plig mus ib txhis.

16 Vajtswv tus uas dawb huv, peb ntseeg tias koj tau cais peb tawm ntawm peb cov kwv tij; thiab peb tsis ntseeg peb cov kwv tij tej kab lis kev cai, uas yog muab cev los rau lawv los ntawm lawv cov yawg koob txoj kev tsis paub qab hau; tiam sis peb ntseeg hais tias koj tau xaiv peb los ua koj cov me nyuam dawb huv; thiab koj kuj tau ua rau peb paub tias yuav tsis muaj Khetos.

17 Tiam sis koj yeej zoo ib yam nag hmo, hnub no, thiab mus ib txhis li; thiab koj tau xaiv peb kom peb yuav txais kev cawm dim, tiam sis koj tau xaiv txhua tus uas nyob ib ncig peb los ntawm koj txoj kev npau taws pov lawv mus rau hauv ntuj txiag teb tsaus; auj Vajtswv es, peb ua koj tsaug rau txoj kev dawb huv no; thiab peb kuj ua koj tsaug uas koj tau xaiv peb, kom peb thiaj tsis raug coj mus ua raws li peb cov kwv tij tej kab lis kev cai ruam, uas muab lawv khi kom lawv ntseeg Khetos, uas coj lawv lub siab mus ua loj leeb deb ntawm koj, peb tus Vajtswv.

18 Thiab peb ua koj tsaug ntxiv, auj Vajtswv es, hais tias peb yog ib co neeg dawb huv uas koj xaiv tseg. Amees.

19 Nim no tau muaj tias tom qab Amas thiab nws cov kwv tij thiab nws ob tug tub tau hnov tej kev thov Vajtswv no tas lawm, lawv xav tsis thoob tshaj li qhov ntseeg tau.

20 Vim saib seb, txhua tus neeg mus thiab hais tej lus thov Vajtswv zoo tib yam nkaus.

21 Nim no lawv muab qhov chaw no hu ua Lamiyatoos, uas txhais hais tias, qhov chaw sawv dawb huv.

22 Nim no, nyob ntawm qhov chaw sawv no lawv, txhua tus neeg, siv tib co lus thov Vajtswv, ua lawv tus Vajtswv tsaug tias nws tau xaiv lawv, thiab nws tsis coj lawv mus ua raws li lawv cov kwv tij txoj kab lis kev cai, thiab hais tias lawv lub siab tsis tau raug nyiag mus ntseeg tej uas yuav muaj los, uas lawv tsis paub txog ib nyuag qhov li.

23 Nim no, tom qab cov neeg txhua tus tau ua tsaug raws li tus txheej txheem no tas lawm, lawv rov qab mus rau tom lawv tej tsev, tsis hais txog lawv tus Vajtswv ntxiv txog rau thaum lawv rov qab sib sau lawv tus kheej tuaj ua ke rau ntawm qhov chaw sawv dawb huv, tuaj ua tsaug raws li lawv tus txheej txheem.

24 Nim no thaum Amas pom li no mob nws lub siab heev; vim nws pom tias lawv yog ib co neeg uas phem thiab tsis yuav lus; muaj tseeb tiag, nws pom tias lawv tso siab ntso rau kub, thiab rau nyiaj dawb, thiab rau txhua yam uas tsim nuj.

25 Muaj tseeb tiag, thiab nws kuj pom tias lawv lub siab muaj plhus rau txoj kev khav theeb, nrog lawv txoj kev muab hlob.

26 Thiab nws tsa nws lub suab rau saum ntuj, thiab thov, hais tias: Auj tus Tswv es, koj yuav cia koj cov tub qhe nyob ntev npaum li cas ntawm cev nqaij daim tawv hauv ntiaj teb no, pom tej kev phem loj heev nyob hauv noob neej?

27 Saib seb, auj Vajtswv es, lawv thov rau koj, tiam sis lawv txoj kev muab hlob puv lawv lub siab lawm. Saib seb, auj Vajtswv es, lawv thov rau koj nrog lawv qhov ncauj, thaum lawv muaj plhus heev, xav tias lawv zoo heev, vim yog los ntawm tej yam tsis muaj nuj nqis ntawm lub ntiaj teb.

28 Saib seb, auj kuv tus Vajtswv es, lawv tej khoom kim kim, thiab lawv tej nplhaib, thiab lawv tej saw tes, thiab lawv tej saw kub, thiab tag nrho lawv tej khoom muaj nqis uas lawv coj ua saw; thiab saib seb, lawv tso lawv lub siab rau tej khoom no, thiab lawv tseem thov rau koj thiab hais tias—Peb ua koj tsaug, auj Vajtswv es, vim peb yog ib co neeg uas koj pom zoo xaiv tseg, tiam sis lwm cov yuav piam sij.

29 Muaj tseeb tiag, thiab lawv hais tias koj tau ua rau lawv paub tias yuav tsis muaj Khetos.

30 Auj tus Tswv uas yog Vajtswv es, koj yuav cia tej kev phem thiab kev tsis muaj kev ntseeg no nyob nrog cov neeg no ntev npaum li cas ntxiv? Auj tus Tswv es, thov koj muab lub zog rau kuv, xwv kom kuv yuav nyiaj tau kuv tej kev ntxhov siab. Vim kuv mob, thiab txoj kev phem zoo li no nyob hauv cov neeg no ua rau kuv tus ntsuj plig mob.

31 Auj tus Tswv es, tu kuv lub siab heev kawg nkaus; thov koj nplij kuv tus ntsuj plig los ntawm Khetos. Auj tus Tswv es, thov koj pub rau kuv kom kuv yuav muaj taus zog, kom kuv yuav ua tau siab ntev nyiaj tej kev txom nyem no uas yuav los rau kuv, vim yog txoj kev ua phem ntawm cov neeg no.

32 Auj tus Tswv es, thov koj nplij kuv tus ntsuj plig, thiab muab txoj kev vam meej rau kuv, thiab rau kuv cov phooj ywg ua hauj lwm uas nyob nrog kuv—muaj tseeb tiag, Amoos, thiab Aloos, thiab Oonaws, thiab Amulej thiab Xi-elas thiab kuv ob tug tub—muaj tseeb tiag, thov koj nplij tag nrho lawv cov no, auj tus Tswv es. Muaj tseeb tiag, thov koj nplij lawv tus ntsuj plig los ntawm Khetos.

33 Thov koj pub rau lawv kom lawv yuav muaj zog, kom lawv yuav nyiaj tau lawv tej kev txom nyem uas yuav los rau lawv vim yog tej kev ua phem ntawm cov neeg no.

34 Auj tus Tswv es, thov koj pub rau peb kom peb yuav muaj kev vam meej los ntawm txoj kev coj lawv rov qab los cuag koj los ntawm Khetos los.

35 Saib seb, auj tus Tswv es, lawv tus ntsuj plig yeej muaj nqis, thiab coob tus ntawm lawv yog peb cov kwv tij; yog li ntawd, auj tus Tswv es, muab hwj chim thiab laj lim tswv yim rau peb xwv kom peb yuav coj tau, peb cov kwv tij no, rov qab los rau koj.

36 Nim no tau muaj tias thaum Amas hais tej lus no tas lawm, nws muab nws txhais tes tso rau saum lawv txhua tus uas nrog nws. Thiab saib seb, thaum nws tso nws txhais tes rau saum lawv, lawv muaj tus Ntsuj Plig Dawb Huv puv npo.

37 Thiab tom qab ntawd lawv sib ncaim nyias mus nyias, tsis txhawj txog lawv tus kheej tias lawv yuav noj dab tsi, los sis lawv yuav haus dab tsi, los sis lawv yuav hnav dab tsi.

38 Thiab tus Tswv pub rau lawv xwv kom lawv tsis tshaib, thiab xwv kom lawv tsis nqhis; muaj tseeb tiag, thiab nws kuj muab zog rau lawv, xwv kom lawv txhob raug ib yam kev txom nyem dab tsi, tsuas yog txoj kev xyiv fab los ntawm Khetos kov yeej tej kev txom nyem ntawd. Nim no qhov no raws nraim li Amas txoj kev thov Vajtswv; thiab tau muaj li no vim yog nws thov Vajtswv nrog txoj kev ntseeg.