1 Thiab saib seb, nim no tau muaj tias cov Neeg Lamas ntawd npau taws heev ntxiv vim lawv tau tua lawv cov kwv tij; yog li ntawd lawv cog lus yuav ua pauj rau cov Neeg Nifais; thiab nyob rau lub sij hawm ntawd lawv tsum tsis tua cov neeg Eethais-Nifais-Lihais ntxiv lawm.

2 Tiam sis lawv coj lawv cov tub rog thiab mus rau hauv tej ciam teb ntawm thaj av Xalahelas, thiab tawm tsam cov neeg nyob hauv thaj av Amaunaihas, thiab ua rau lawv puas tsuaj.

3 Thiab tom qab ntawd, lawv muaj ntau npluav rog nrog cov Neeg Nifais, qhov uas lawv raug cov Neeg Nifais muab raws thiab muab tua.

4 Thiab ntawm cov Neeg Lamas uas raug tua, yuav luag tag nrho yog Amuloos cov tub ki thiab nws cov kwv tij, uas yog Nau-as cov pov thawj, thiab lawv raug tua los ntawm cov Neeg Nifais txhais tes;

5 Thiab cov tseem tshuav, tom qab lawv khiav mus rau hauv koog hav zoov sab hnub tuaj, thiab tom qab lawv siv hwj chim thiab txoj cai los caij tsuj cov Neeg Lamas, lawv ua rau cov Neeg Lamas coob leej raug hluav taws hlawv kom piam sij vim yog lawv txoj kev ntseeg—

6 Vim lawv coob leej, tom qab lawv raug kev txom nyem ntau thiab lawv cov kwv tij coob leej raug tua, pib raug txhaub kom nco txog tej lus uas Aloos thiab nws cov kwv tij tau tshaj tawm rau lawv nyob hauv lawv thaj av; yog li ntawd lawv pib tsis ntseeg tej kab lis kev cai ntawm lawv cov yawg koob, thiab pib los ntseeg tus Tswv, thiab ntseeg tias nws muab hwj chim loj rau cov Neeg Nifais; thiab yog li ntawd muaj lawv coob leej hloov siab los ntseeg nyob hauv hav zoov.

7 Thiab tau muaj tias cov thawj coj uas yog cov seem tshuav ntawm Amuloos cov me nyuam hais kom muab lawv tua tuag, muaj tseeb tiag, tag nrho cov uas ntseeg tej yam no.

8 Nim no txoj kev tua cov neeg ntseeg no txhaub lawv cov kwv tij coob leej kom lawv npau taws; thiab pib muaj kev sib cav sib ceg nyob hauv hav zoov; thiab cov Neeg Lamas pib caum Amuloos thiab nws cov kwv tij cov tub ki thiab pib muab lawv tua; thiab lawv khiav mus rau hauv koog hav zoov sab hnub tuaj.

9 Thiab saib seb niaj hnub no cov Neeg Lamas muab lawv caum. Xws li no tau muaj raws li Anpinadais tej lus, uas nws tau hais txog cov pov thawj cov tub ki uas tau ua rau nws raug hluav taws hlawv.

10 Vim nws hais rau lawv tias: Qhov uas nej ua rau kuv yog ib lub cim rau tej yam uas yuav muaj los.

11 Thiab nim no Anpinadais yog thawj tug uas raug hluav taws hlawv vim yog nws txoj kev ntseeg Vajtswv; nim no qhov uas nws hais yog txhais li no tias, muaj coob leej yuav raug hluav taws hlawv, ib yam li nws raug.

12 Thiab nws hais rau Nau-as cov pov thawj tias lawv cov tub ki yuav ua rau coob leej raug tua, ib yam li nws raug, thiab hais tias lawv yuav tawg khiav ri niab rau txhia qhov chaw thiab raug tua, twb zoo li ib tug yaj uas tsis muaj neeg yug yaj raug tej tsiaj qus raws thiab tua; thiab nim no saib seb, tej lus no twb muaj tseeb, vim lawv raug cov Neeg Lamas raws, thiab lawv raug caum, thiab lawv raug tua.

13 Thiab tau muaj tias thaum cov Neeg Lamas pom tias lawv kov tsis yeej cov Neeg Nifais lawv rov qab mus rau tom lawv thaj av; thiab lawv muaj coob leej los nyob rau hauv thaj av Ixama-ees thiab thaj av Nifais, thiab los koom rau Vajtswv cov neeg, uas yog cov neeg Eethais-Nifais-Lihais.

14 Thiab lawv kuj faus lawv tej cuab yeej ua rog, ib yam li lawv cov kwv tij tau ua, thiab lawv pib ua ib co neeg ncaj ncees; thiab lawv taug mus raws tus Tswv tej kev, thiab mob siab ua raws li nws tej lus txib thiab nws tej kev cai.

15 Muaj tseeb tiag, thiab lawv coj Mauxes txoj kev cai; vim tsim nyog uas lawv tseem yuav coj Mauxes txoj kev cai, vim tseem tsis tau muaj raws li txoj kev cai tag nrho. Txawm hais tias muaj Mauxes txoj kev cai los, lawv yeej tos ntsoov Khetos txoj kev los, vim lawv xav hais tias Mauxes txoj kev cai yog ib lub cim ntawm nws txoj kev los, vim lawv ntseeg tias lawv yuav tsum coj tej kev cai ntawm sab cev nqaij daim tawv kom txog rau thaum nws yuav tshwm sim los rau lawv.

16 Nim no lawv yeej tsis xav tias kev cawm seej yog los ntawm Mauxes txoj kev cai los; tiam sis Mauxes txoj kev cai pab kom lawv txoj kev ntseeg Khetos muaj zog; thiab xws li no lawv thiaj tseem muaj kev cia siab rau txoj kev cawm seej uas nyob mus ib txhis, los ntawm txoj kev ntseeg, thiab lawv vam khom rau lub txiaj ntsim qhia tau tej yuav muaj los yav tom ntej, uas qhia txog tej uas yuav muaj los.

17 Thiab nim no saib seb, Amoos, thiab Aloos, thiab Oonaws, thiab Heenais, thiab lawv cov kwv tij zoo siab heev, rau txoj kev vam meej uas lawv muaj nyob hauv cov Neeg Lamas, vim lawv pom tias tus Tswv tau pub rau lawv raws li lawv tej lus thov, thiab pom tias nws kuj tau ua rau lawv paub tseeb txog txhua nqe ntawm nws txoj lus.