1 Saib seb, nim no tau muaj tias Nifais cov neeg xyiv fab heev, vim tus Tswv tau coj lawv dim ntawm lawv cov yeeb ncuab txhais tes ib zaug ntxiv; yog li ntawd lawv ua tsaug rau tus Tswv lawv tus Vajtswv; muaj tseeb tiag, thiab lawv yoo mov heev thiab thov Vajtswv heev, thiab lawv teev tiam Vajtswv xyiv fab heev kawg nkaus li.

2 Thiab tau muaj tias nyob rau hauv xyoo thib kaum cuaj ntawm cov neeg txiav txim txoj kev kav Nifais cov neeg, Amas los cuag nws tus tub Hilamas thiab hais rau nws tias: Koj puas ntseeg tej lus uas kuv hais rau koj ntsig txog cov ceev xwm txheej uas tau muab ceev tseg?

3 Thiab Hilamas hais rau nws tias: Muaj tseeb, kuv yeej ntseeg.

4 Thiab Amas rov hais dua tias: Koj puas ntseeg Yexus Khetos, tus uas yuav los?

5 Thiab nws hais tias: Muaj tseeb, kuv ntseeg tag nrho tej lus uas koj tau hais.

6 Thiab Amas rov hais dua rau nws tias: Koj puas yuav ua raws li kuv tej lus txib?

7 Thiab nws hais tias: Muaj tseeb, kuv yeej yuav ua raws li koj tej lus txib kom tag nrho kuv lub siab.

8 Ces Amas hais rau nws tias: Koj tau koob hmoov; thiab tus Tswv yuav ua kom koj vam meej nyob hauv thaj av no.

9 Tiam sis saib seb, kuv muaj tej yam yuav qhia tej yuav muaj los yav tom ntej rau koj; tiam sis tej uas kuv yuav qhia tej yuav muaj los yav tom ntej rau koj koj yuav tsum tsis txhob qhia tawm; muaj tseeb tiag, tej uas kuv yuav qhia tej yuav muaj los yav tom ntej rau koj yuav tsum tsis txhob qhia tawm, kom txog thaum twb muaj raws li tej ntawd; yog li ntawd cia li sau cia tej lus uas kuv yuav hais.

10 Thiab yog tej lus no hais tias: Saib seb, kuv pom tias cov neeg no ntag, uas yog cov Neeg Nifais, raws li lub txiaj ntsim txais tau kev tshwm sim uas nyob hauv kuv, plaub puas xyoo tom qab Yexus Khetos yuav ua nws tus kheej tshwm los rau lawv pom, lawv yuav tso kev ntseeg tseg zuj zus.

11 Muaj tseeb tiag, thiab thaum ntawd lawv yuav pom tej kev ua rog thiab tej kab mob phem, muaj tseeb tiag, tej kev tshaib nqhis thiab kev nqaij ntuag ntshav nrog, mus txog thaum Nifais cov neeg yuav tu noob—

12 Muaj tseeb tiag, thiab muaj li no los twb vim yog lawv yuav tso txoj kev ntseeg tseg zuj zus thiab poob mus ua tej yam hauv kev tsaus ntuj, thiab kev xav tau daj tau deev, thiab txhua yam kev phem; muaj tseeb tiag, kuv hais rau koj tias, vim lawv yuav ua txhaum tawm tsam txoj kev kaj thiab txoj kev txawj ntse uas tseem ceeb, muaj tseeb tiag, kuv hais rau koj tias, txij hnub ntawd, mus txog rau thaum tiam neeg thib plaub twb tsis tau dhau mus ua ntej txoj kev ua phem no yuav los.

13 Thiab thaum hnub tseem ceeb ntawd los, saib seb, lub caij yuav los sai sai uas cov uas nim no, los sis cov tub ki ntawm cov uas nim no muab suav nrog Nifais cov neeg, yuav tsis muab suav nrog Nifais cov neeg ntxiv lawm.

14 Tiam sis txhua tus uas tseem tshuav, thiab tsis raug puas tsuaj nyob rau hauv hnub tseem ceeb thiab txaus ntshai ntawd, yuav raug muab suav nrog cov Neeg Lamas, thiab yuav hloov los ua zoo li lawv, txhua tus, tsuas yog tshuav cov uas yuav muab hu ua tus Tswv cov thwj tim; thiab lawv yuav raug cov Neeg Lamas muab raws kom txog thaum lawv tu noob. Thiab nim no, vim yog kev ua phem, yeej yuav muaj raws li txoj kev qhia tej yuav muaj los yav tom ntej no.

15 Thiab nim no tau muaj tias tom qab nws tau hais tej yam no rau Hilamas, nws foom koob hmoov rau Hilamas, thiab rau nws lwm cov tub; thiab nws kuj foom koob hmoov rau thaj av pub rau cov neeg ncaj ncees.

16 Thiab nws hais tias: Tus Tswv uas yog Vajtswv tau hais li no tias—Thaj av yuav raug foom tsis zoo, muaj tseeb tiag, thaj av no, rau txhua haiv neeg, txhua xeem neeg, txhua yam lus, thiab txhua yam neeg, cov uas ua phem, thaum lawv siav tas lawm, rau txoj kev puas tsuaj; thiab ib yam li kuv tau hais ces yuav muaj zoo li ntawd; vim qhov no yog Vajtswv txoj kev foom tsis zoo thiab foom koob hmoov rau thaj av, vim tus Tswv ntsia tsis taus kev txhaum txawm hais tias yog qhov me dua ntais.

17 Thiab nim no, thaum Amas tau hais tej lus no tas lawm nws foom koob hmoov rau lub koom txoos, muaj tseeb tiag, tag nrho cov uas yuav sawv khov kho muab siab rau ntseeg txij li lub sij hawm ntawd mus lawm yav tom ntej.

18 Thiab thaum Amas tau ua tej no tas lawm nws tawm ntawm thaj av Xalahelas mus, zoo li yuav mus rau hauv thaj av Melej. Thiab tau muaj tias cia li tsis hnov txog nws ntxiv lawm; hais txog ntawm nws txoj kev tuag los sis txoj kev faus peb twb tsis paub txog li.

19 Saib seb, qhov no peb paub tias, nws yog ib tug neeg ncaj ncees; thiab muaj lus nrov ncha mus thoob lub koom txoos hais tias tus Ntsuj Plig coj nws mus lawm, los sis tus Tswv txhais tes tau muab nws faus, ib yam li Mauxes. Tiam sis saib seb, vaj lug kub hais tias tus Tswv tau coj Mauxes mus rau nws tus kheej; thiab peb xav tias tus Tswv, los ntawm tus ntsuj plig, kuj tau txais Amas mus rau nws tus kheej; yog li ntawd, vim li no peb thiaj tsis paub dab tsi ntsig txog nws txoj kev tuag thiab txoj kev faus.

20 Thiab nim no tau muaj tias nyob rau thaum pib ntawm xyoo thib kaum cuaj ntawm cov neeg txiav txim txoj kev kav Nifais cov neeg, Hilamas tau tawm mus rau hauv cov neeg mus tshaj tawm txoj lus rau lawv.

21 Vim saib seb, vim yog lawv tej kev ua rog nrog cov Neeg Lamas thiab tej kev tsis sib haum xeeb dog dig uas muaj ntau thiab tej kev kub ntxhov uas muaj nyob hauv cov neeg, yeej tsim nyog kom muab Vajtswv txoj lus tshaj tawm nyob hauv lawv, muaj tseeb tiag, thiab tsim nyog kom muaj ib txoj kev cai nyob thoob plaws hauv lub koom txoos.

22 Yog li ntawd, Hilamas thiab nws cov kwv tij tau tawm mus txhim tsa lub koom txoos dua nyob thoob plaws hauv thaj av, muaj tseeb tiag, nyob txhua txhia lub nroog thoob plaws hauv thaj av uas Nifais cov neeg nyob. Thiab tau muaj tias lawv tsa cov pov thawj thiab cov xib hwb thoob plaws hauv thaj av, los saib xyuas tag nrho tej koom txoos.

23 Thiab nim no tau muaj tias tom qab Hilamas thiab nws cov kwv tij tau tsa cov pov thawj thiab cov xib hwb los saib xyuas tej ceg koom txoos, pib muaj kev tsis sib haum xeeb nyob hauv lawv, thiab lawv tsis kam mloog Hilamas thiab nws cov kwv tij tej lus.

24 Tiam sis lawv los ua neeg muab hlob, vim lawv khav theeb nyob hauv lawv lub siab, vim yog lawv tej kev nplua nuj heev; yog li ntawd lawv saib lawv tus kheej nplua nuj, thiab tsis kam mloog Hilamas thiab nws cov kwv tij tej lus, kom taug kev ncaj ncees rau Vajtswv.