1 Thiab nim no, kuv tus me tub, kuv muaj ntau yam hais rau koj dua li tej uas kuv tau hais rau koj tus tij laug; vim saib seb, koj puas tau pom koj tus tij laug txoj kev ruaj nrees, nws txoj kev ntseeg, thiab nws txoj kev rau siab ntso coj Vajtswv tej lus txib los? Saib seb, nws puas tau ua ib tug yam ntxwv zoo rau koj?

2 Vim koj tsis ua zoo mloog kuv tej lus npaum li koj tus tij laug, nyob rau hauv cov Neeg Xaulas. Nim no qhov no yog qhov uas kuv muaj tawm tsam koj; koj rau rau siab hais lus txog rau thaum koj khav theeb txog koj lub zog thiab koj lub tswv yim.

3 Thiab tsis tas li no xwb, kuv tus me tub es. Koj tau ua tej uas ua rau kuv tu siab heev; vim koj tau tso txoj kev qhuab qhia tseg, thiab mus rau hauv thaj av Sailas, uas nyob ntawm cov Neeg Lamas tej ciam teb, mus caum tus niam ntiav Ixanpaus.

4 Muaj tseeb tiag, nws twb nyiag tau coob leej neeg lub siab; tiam sis siv tsis tau qhov no los zam txim rau koj, kuv tus me tub es. Tsim nyog koj rau siab qhuab qhia li uas tau muab rau koj ua.

5 Koj tsis paub los, kuv tus me tub es, hais tias tus Tswv pom tej yam no yog kev qias; muaj tseeb tiag, txaus ntxub tshaj txhua yam kev txhaum tsuas yog tsis npaum li ua rau ib tug neeg tsis muaj txim nqaij ntuag ntshav nrog los sis xyeej tus Vaj Ntsuj Plig Dawb Huv xwb?

6 Vim saib seb, yog tias koj xyeej tus Vaj Ntsuj Plig Dawb Huv uas ua ntej ntawd nws twb muaj chaw nyob hauv koj, thiab koj paub tias koj xyeej nws, saib seb, yus yeej zam txim tsis tau rau kev txhaum no; muaj tseeb tiag, thiab txhua uas tua neeg tsis raws li txoj kev kaj thiab kev txawj ntse uas yog los ntawm Vajtswv, yuav tsis yooj yim rau nws txais tau kev zam txim; muaj tseeb tiag, kuv tus me tub, kuv hais rau koj tias, yuav tsis yooj yim rau tus ntawd txais tau ib txoj kev zam txim.

7 Thiab nim no, kuv tus me tub, kuv cia siab rau Vajtswv tias kheev lam koj tsis tau muaj txim vim ua ib txoj kev txhaum loj npaum li no. Kuv yuav tsis hais txog koj tej kev txhaum, kom ua rau koj tus ntsuj plig ntxhov siab, yog tias ua li ntawd tsis zoo rau koj.

8 Tiam sis saib seb, koj tsis muaj peev xwm zais koj tej kev txhaum ntawm Vajtswv; thiab tsuas yog koj hloov siab lees txim xwb tsis li ntawd tej ntawd yuav nyob ruaj nrees ua tim khawv nkaug koj thaum txog hnub kawg.

9 Nim no kuv tus me tub, kuv xav kom koj hloov siab lees txim thiab tso koj tej kev txhaum tseg, thiab tsis txhob mus nrhiav tej uas koj lub qhov muag ntshaw ntxiv lawm, tiam sis tseg kiag koj tus kheej kom tsis ua txhua yam no; yog koj tsis ua li no koj yeej yuav tsis tau Vajtswv lub nceeg vaj los ua koj tug. Auj, nco ntsoov, thiab cia li muab qhov no ris, thiab tseg kiag koj tus kheej kom tsis ua tej yam no.

10 Thiab kuv txib kom koj los sab laj nrog koj ob tug tij laug ua txhua yam uas koj yuav ua; vim saib seb, koj tseem hluas, thiab tsim nyog kom koj ob tug tij laug pab tu koj. Thiab cuab pob ntseg rau nkawd tej lus ntuas.

11 Tsis txhob cia koj tus kheej raug tej yam tsis muaj qab hau los sis ruam ntxias tau; tsis txhob cia tus dab phem rov qab ntxias tau koj lub siab mus caum tej niam ntiav phem ntawd. Saib seb, auj kuv tus me tub es, koj coj tau txoj kev ua phem loj los rau cov Neeg Xaulas; vim thaum lawv pom koj coj yam ntxwv li cas lawv tsis kam ntseeg kuv tej lus.

12 Thiab nim no tus Tswv tus Ntsuj Plig hais rau kuv tias: Txib koj cov me nyuam kom ua zoo, tsam lawv coj tau coob leej neeg lub siab mus rau kev puas tsuaj; yog li ntawd kuv txib koj, kuv tus me tub, los ntawm kev hwm Vajtswv, kom koj tso koj tej kev ua phem tseg.

13 Kom koj tig mus rau tus Tswv nrog tag nrho koj lub siab, thiab lub dag lub zog; kom koj txhob coj tau neeg lub siab mus ua phem ntxiv lawm; tiam sis rov qab mus cuag lawv, thiab lees koj tej kev txhaum thiab tej uas yuam kev ntawd uas koj tau ua.

14 Tsis txhob nrhiav kev nplua nuj los sis tej uas tsis muaj nuj nqis ntawm lub ntiaj teb no; vim saib seb, koj nqa tsis tau tej ntawd nrog koj mus.

15 Thiab nim no, kuv tus me tub, kuv xav hais tej yam rau koj ntsig txog Khetos txoj kev los. Saib seb, kuv hais rau koj tias, twb yog nws tiag tiag uas yuav los tshem neeg ntiaj teb tej kev txhaum mus; muaj tseeb tiag, nws yuav los tshaj tawm tej moo zoo siab ntawm kev cawm seej rau nws cov neeg.

16 Thiab nim no, kuv tus me tub, qhov no yog txoj kev qhuab qhia uas Vajtswv tau hu koj mus qhia, mus tshaj tawm tej moo zoo siab no rau cov neeg no, kom npaj lawv lub siab; los sis kom txoj kev cawm seej yuav los rau lawv, xwv kom lawv yuav npaj lawv cov me nyuam lub siab los hnov txoj lus nyob rau lub sij hawm thaum nws los.

17 Thiab nim no kuv yuav nplij koj lub siab me ntsis txog qhov no. Saib seb, koj xav tsis thoob hais tias yog vim li cas ho yuav tsum paub txog tej no ntev ua luaj ua ntej thaum yuav muaj los. Saib seb, kuv hais rau koj tias, puas yog tias ib tug neeg nyob rau lub sij hawm no yeej muaj nuj nqis rau Vajtswv ib yam li ib tug neeg uas nyob rau lub sij hawm thaum nws yuav los?

18 Puas tsim nyog kom muab txoj hau kev txhiv dim ua rau cov neeg no paub ib yam li muab ua rau lawv cov me nyuam paub?

19 Puas yog tias lub sij hawm no, los sis lub sij hawm uas tom qab tus Tswv los, yeej yooj yim ib yam rau tus Tswv xa nws tus tim tswv los tshaj tawm tej moo zoo siab no rau peb ib yam li rau peb cov me nyuam?