1 Saib seb, nim no tau muaj tias tom qab Amoos cov neeg mus nyob tus rau hauv thaj av Yesoos, muaj tseeb tiag, thiab tom qab cov Neeg Lamas raug raws khiav tawm ntawm thaj av, thiab cov neeg ntawm thaj av muab lawv cov tuag coj mus—

2 Nim no tsis suav lawv cov tuag vim yog muaj coob heev; thiab kuj tsis suav cov Neeg Nifais cov tuag ib yam—tiam sis tau muaj tias tom qab lawv muab lawv cov tuag faus tas, thiab tom qab lub caij yoo mov, thiab lub caij quaj ntsuag, thiab lub caij thov Vajtswv, (thiab yog xyoo thib kaum rau ntawm cov neeg txiav txim txoj kev kav Nifais cov neeg) pib muaj kev thaj yeeb tsis tu ncua thoob plaws hauv thaj av.

3 Muaj tseeb tiag, thiab cov neeg twb mob siab ua raws li tus Tswv tej lus txib; thiab lawv coj raws nraim li Vajtswv tej kab ke, raws li Mauxes txoj kev cai; vim lub Koom Txoos cov thawj coj qhia kom lawv ua raws li Mauxes txoj kev cai kom txog thaum yuav muaj raws li txoj kev cai tiav lawm.

4 Thiab xws li no cov neeg tsis muaj kev kub ntxhov nyob hauv tag nrho xyoo thib kaum rau ntawm cov neeg txiav txim txoj kev kav cov Neeg Nifais.

5 Thiab tau muaj tias muaj kev thaj yeeb tsis tu ncua nyob rau thaum pib ntawm xyoo thib kaum xya ntawm cov neeg txiav txim txoj kev kav.

6 Tiam sis tau muaj tias thaum yuav kawg ntawm xyoo thib kaum xya, muaj ib tug txiv neej tuaj rau hauv thaj av Xalahelas, thiab nws yog ib tug Tawm Tsam Khetos, vim nws pib qhuab qhia rau cov neeg tawm tsam cov yaj saub tej lus qhia tej uas yuav muaj los yav tom ntej, ntsig txog Khetos txoj kev los.

7 Nim no twb tsis muaj ib txoj kev cai tawm tsam ib tug neeg txoj kev ntseeg; vim yog ib qho uas ua txhaum Vajtswv tej lus txib yog muaj ib txoj kev cai uas ua rau tib neeg tsis sib npaug.

8 Vim vaj lug kub hais li no: Nej cia li xaiv hnub no saib nej yuav teev tiam leej twg.

9 Nim no yog tias ib tug neeg xav teev tiam Vajtswv, nws yeej muaj cai ua li ntawd; los sis, yog tias nws ntseeg Vajtswv nws yeej muaj cai teev tiam Vajtswv; tiam sis yog nws tsis ntseeg Vajtswv yeej tsis muaj kev cai los rau txim rau nws.

10 Tiam sis yog nws tua neeg nws yuav raug txim tuag; thiab yog nws ua tub nyiag nws kuj yuav raug txim; thiab yog nws ua tub sab nws kuj yuav raug txim; thiab yog nws deev luag poj luag txiv nws kuj yuav raug txim; muaj tseeb tiag, rau tag nrho tej kev phem no lawv yuav raug txim.

11 Vim muaj ib txoj kev cai hais tias tib neeg yuav raug txiav txim raws li lawv tej kev txhaum kev cai. Txawm li ntawd los, twb tsis muaj ib txoj kev cai tawm tsam ib tug neeg txoj kev ntseeg; yog li ntawd, ib tug neeg tsuas yog raug txim rau tej yam nws ua kom txhaum kev cai; yog li ntawd txhua tus tib neeg puav leej nyob sib npaug.

12 Thiab tus uas Tawm Tsam Khetos no, uas npe hu ua Khaulihos, (thiab txoj kev cai tsis muaj peev xwm tswj tau nws) pib qhuab qhia rau cov neeg tias yeej yuav tsis muaj Khetos. Thiab nws qhuab qhia li no, hais tias:

13 Auj nej cov uas raug khi los ntawm ib txoj kev cia siab ruam thiab tsis muaj qab hau es, vim li cas nej thiaj li quab nej tus kheej nrog tej yam ruam ua luaj li no? Vim li cas nej thiaj li tos ib tug Khetos? Vim yeej tsis muaj ib tug neeg paub tau tej uas yuav muaj los.

14 Saib seb, tej yam no uas nej hais tias yog tej kev qhia tej yuav muaj los yav tom ntej, uas nej hais tias yog cov yaj saub dawb huv muab cev los, saib seb, tej no yog nej cov yawg koob tej kab lis kev cai ruam heev.

15 Ua li cas nej ho paub hais tias tej no muaj tseeb? Saib seb, nej yeej tsis muaj peev xwm paub txog tej uas nej tsis pom; yog li ntawd nej yeej tsis muaj peev xwm paub tias yuav muaj ib tug Khetos.

16 Nej tos ntsoov thiab hais tias nej pom ib txoj kev zam txim rau nej tej kev txhaum. Tiam sis saib seb, qhov ntawd tsuas yog qhov uas tshwm sim los ntawm ib txoj kev xav vwm xwb; thiab muaj txoj kev xav vwm no los twb vim yog nej cov yawg koob tej kab lis kev cai, uas coj tau nej mus kom nej ntseeg txog tej uas tsis muaj tseeb.

17 Thiab nws hais ntau yam zoo li ntawd ntxiv rau lawv, qhia rau lawv hais tias yuav tsis muaj txoj kev theej txhoj rau tib neeg tej kev txhaum, tiam sis txhua tus neeg ua neej nyob hauv lub neej no raws li nws txoj kev tswj hwm nws tus kheej; yog li ntawd txhua tus neeg vam meej raws li nws txoj kev txawj ntse, thiab hais tias txhua tus neeg tau kav raws li nws lub zog; thiab txawm ib tug neeg ua dab tsi los nws yeej tsis txhaum kev cai.

18 Thiab xws li no nws qhuab qhia rau lawv, thiab coj tau ntau tus lub siab mus, thiab ua rau lawv tsa lawv lub taub hau nrog lawv txoj kev phem, muaj tseeb tiag, coj tau ntau tus poj niam, thiab txiv neej, mus sib daj sib deev—thiab qhia rau lawv tias thaum ib tug neeg tuag, qhov ntawd yog qhov kawg ntawm nws.

19 Nim no tus txiv neej no kuj tau mus rau tom thaj av Yesoos, mus tshaj tawm tej yam no nyob hauv Amoos cov neeg, uas thaum xub thawj yog cov Neeg Lamas.

20 Tiam sis saib seb lawv ntse dua cov Neeg Nifais; vim lawv muab nws txhom, thiab muab nws khi, thiab cab nws mus rau Amoos, tus uas yog ib tug pov thawj hlob rau cov neeg ntawd.

21 Thiab tau muaj tias Amoos hais kom muab nws coj tawm ntawm thaj av mus. Thiab nws los rau hauv thaj av Nkide-oos, thiab pib qhuab qhia rau lawv; thiab nyob ntawm qhov chaw no nws tsis vam meej pes tsawg, vim nws raug txhom thiab raug khi thiab raug cab mus cuag tus pov thawj hlob, thiab tus thawj txiav txim hauv thaj av.

22 Thiab tau muaj tias tus pov thawj hlob hais rau nws tias: Vim li cas koj thiaj mus ncig ntxeev tus Tswv tej kev? Vim li cas koj thiaj qhia cov neeg no tias yuav tsis muaj Khetos, kom tab kaum lawv tej kev zoo siab? Vim li cas koj thiaj hais lus tawm tsam tag nrho cov yaj saub dawb huv tej kev qhia tej yuav muaj los yav tom ntej?

23 Nim no tus pov thawj hlob lub npe hu ua Nkidaunas. Thiab Khaulihos hais rau nws tias: Vim kuv tsis qhia nej cov yawg koob tej kab lis kev cai ruam, thiab vim kuv tsis qhia cov neeg no kom khi lawv tus kheej ua raws li tej kab ke thiab tej kab lis kev cai uas cov pov thawj thaum ub tau ua tseg, kom siv tau hwj chim thiab txoj cai los kav lawv, kom ceev tau lawv kom lawv tsis paub, xwv kom lawv txhob tsa lawv taub hau, tiam sis kom lawv raug tso qis raws li nej tej lus.

24 Nej hais tias cov neeg no yog ib co neeg nyob ywj siab. Saib seb, kuv hais tias lawv ua qhev. Nej hais tias tej lus qhia tej yuav muaj los yav tom ntej thaum ub muaj tseeb. Saib seb, kuv hais tias nej yeej tsis paub tias tej ntawd muaj tseeb.

25 Nej hais tias cov neeg no yog ib co uas muaj txim thiab ib co neeg uas poob lawm, vim yog txoj kev ua txhaum ntawm ib nkawm niam txiv. Saib seb, kuv hais tias ib tug me nyuam yeej tsis muaj txim vim yog nws niam thiab txiv.

26 Thiab nej kuj hais tias Khetos yuav los. Tiam sis saib seb, kuv hais tias nej yeej tsis paub tias yuav muaj ib tug Khetos. Thiab nej kuj hais tias nws yuav raug tua kom theej neeg ntiaj teb tej kev txhaum—

27 Thiab xws li no nej ntxias dag cov neeg no kom ua raws li nej cov yawg koob tej kab lis kev cai ruam, thiab raws li nej lub siab xav; thiab nej ceev lawv nyob qis, twb ib yam li lawv ua qhev, xwv kom nej tus kheej tau noj tau haus los ntawm lawv txhais tes txoj kev khwv, xwv kom lawv tsis txhob muaj peev xwm ua siab loj tsa hau ntsia, thiab xwv kom lawv tsis txhob zoo siab rau lawv tej kev muaj cai thiab tej sam xeeb.

28 Muaj tseeb tiag, lawv tsis kam siv tej uas yog lawv tug ntshai tsam lawv ho ua rau lawv cov pov thawj tu siab, cov uas quab lawv raws li cov pov thawj siab nyiam, thiab tau coj lawv los ntseeg, los ntawm cov pov thawj tej kab lis kev cai thiab lawv tej npau suav thiab lawv tej kev xav ruam thiab lawv tej kev ua yog toog thiab lawv tej kev ua txuj tias muaj tej uas neeg paub tsis txog, ntseeg hais tias, yog lawv tsis ua raws li cov pov thawj tej lus, ces lawv ua txhaum rau tus uas tsis muaj leej twg paub, tus uas lawv hais tias yog Vajtswv—ib tug uas tsis tau muaj neeg pom dua los sis paub dua, tus uas yeej ib txwm tsis muaj thiab yeej yuav tsis muaj li.

29 Nim no thaum tus pov thawj hlob thiab tus thawj txiav txim pom txoj kev tawv ntawm nws lub siab, muaj tseeb tiag, thaum nkawd pom tias txawm yog Vajtswv los nws tseem cem thiab, nkawd tsis teb nws cov lus ib los li; tiam sis nkawd hais kom muab nws khi; thiab nkawd coj nws mus rau hauv cov tub ceev xwm txhais tes, thiab muab nws xa mus rau tom thaj av Xalahelas, xwv kom yuav coj nws mus cuag Amas, thiab tus thawj txiav txim uas yog tus tswv xeev rau tag nrho thaj av.

30 Thiab tau muaj tias thaum coj nws mus cuag Amas thiab tus thawj txiav txim, nws hais tib yam li uas nws tau hais nyob hauv thaj av Nkide-oos; muaj tseeb tiag, nws hais lus saib tsis taus Vajtswv.

31 Thiab nws tsa suab nrov zuj zus rau Amas, thiab hais lus cem tawm tsam cov pov thawj hlob thiab cov xib hwb, liam hais tias lawv coj cov neeg mus ua raws li lawv cov yawg koob tej kab lis kev cai ruam, kom lawv yuav tau noj tau haus los ntawm cov neeg tej kev khwv.

32 Nim no Amas hais rau nws hais tias: Koj yeej paub hais tias peb tsis tau noj tau haus los ntawm cov neeg no tej kev khwv; vim saib seb kuv twb pib khwv txij thaum pib cov neeg txiav txim txoj kev kav los txog rau nim no, nrog kuv tus kheej ob txhais tes rau kuv txoj kev noj kev haus, txawm hais tias kuv tau ncig mus thoob hauv thaj av ntau zaus mus tshaj tawm Vajtswv txoj lus rau kuv cov neeg.

33 Thiab txawm hais tias kuv tau ua tej hauj lwm ntau nyob hauv lub koom txoos, kuv twb tsis tau txais ib nyuag xinais rau kuv txoj hauj lwm; thiab kuv cov kwv tij los twb tsis muaj ib tug tau, tsuas yog thaum nyob hauv lub rooj txiav txim; thiab thaum ntawd peb tsuas tau txais raws li txoj kev cai rau peb lub sij hawm.

34 Thiab nim no, yog peb tsis tau txais ib yam dab tsi rau peb tej hauj lwm nyob hauv lub koom txoos, yuav muaj nuj nqis dab tsi rau peb mus ua hauj lwm nyob hauv lub koom txoos tsuas yog mus tshaj tawm qhov tseeb, xwv kom peb yuav zoo siab txog peb cov kwv tij txoj kev xyiv fab?

35 Yog li ntawd vim li cas koj ho hais tias peb qhuab qhia rau cov neeg no kom peb nplua nuj, thaum koj tus kheej, twb paub tias peb tsis tau txais kev nplua nuj? Thiab nim no, koj puas ntseeg tias peb dag ntxias cov neeg no, uas ua rau peb muaj kev xyiv fab li ntawd nyob hauv lawv lub siab?

36 Thiab Khaulihos teb nws tias, Muaj tseeb tiag.

37 Thiab tom qab ntawd Amas hais rau nws tias: Koj puas ntseeg tias muaj ib tug Vajtswv?

38 Thiab nws teb tias, Tsis ntseeg.

39 Nim no Amas hais rau nws tias: Koj puas yuav xyeej dua hais tias tsis muaj ib tug Vajtswv thiab xyeej tus Khetos thiab? Vim saib seb, kuv hais rau koj tias, kuv paub tias muaj ib tug Vajtswv, thiab paub tias Khetos yuav los.

40 Thiab nim no koj muaj pov thawj dab tsi uas hais tias tsis muaj Vajtswv, los sis hais tias Khetos yuav tsis los? Kuv hais rau koj tias koj yeej tsis muaj dab tsi, tsuas yog koj tej lus xwb.

41 Tiam sis, saib seb, kuv muaj txhua yam ua tim khawv tias tej yam no muaj tseeb; thiab koj kuj muaj txhua yam ua tim khawv rau koj tias tej yam no muaj tseeb; thiab koj puas yuav xyeej tej yam no? Koj puas ntseeg tias tej yam no muaj tseeb?

42 Saib seb, kuv paub tias koj yeej ntseeg, tiam sis muaj ib tug ntsuj plig dag los nyob rau hauv koj, thiab koj tau tso Vajtswv tus Ntsuj Plig tseg ua rau nws tsis muaj chaw nyob hauv koj; tiam sis tus dab phem muaj hwj chim kav koj, thiab nws cab koj mus rau ub rau no, ua hauj lwm dag ntxias xwv kom nws ua tau rau Vajtswv cov me nyuam puas tsuaj.

43 Thiab nim no Khaulihos hais rau Amas tias: Yog koj ua ib lub cim rau kuv saib, xwv kom ua tau rau kuv ntseeg tias muaj ib tug Vajtswv, muaj tseeb tiag, ua rau kuv pom tias nws muaj hwj chim, thiab tom qab ntawd kuv mam ntseeg tias koj tej lus yeej muaj tseeb.

44 Tiam sis Amas hais rau nws tias: Koj twb muaj tej cim txaus lawm; koj tseem yuav sim koj tus Vajtswv thiab los? Koj tseem hais tias, Ua ib lub cim rau kuv saib, thaum koj twb muaj tej lus tim khawv ntawm tag nrho koj cov kwv tij no, thiab tag nrho cov yaj saub dawb huv? Tej vaj lug kub muaj nyob ntawm koj xub ntiag, muaj tseeb tiag, thiab txhua yam qhia tias muaj ib tug Vajtswv; muaj tseeb tiag, tsis hais lub ntiaj teb, thiab txhua yam uas nyob hauv lub ntiaj teb, muaj tseeb tiag, thiab lub ntiaj teb txoj kev tig, muaj tseeb tiag, thiab tag nrho tej ntiaj teb uas txav li ib txwm txav twb ua tim khawv tias muaj ib tug Tsim Siab Kawg Nkaus.

45 Thiab koj tseem mus rau ub rau no, mus dag ntxias cov neeg no lub siab, ua tim khawv rau lawv tias tsis muaj Vajtswv los? Thiab tsis tas li ntawd koj tseem yuav xyeej Vajtswv tawm tsam tag nrho tej uas ua tim khawv no los? Thiab nws hais tias: Muaj tseeb tiag, kuv yeej yuav xyeej, tsuas yog koj yuav ua ib lub cim rau kuv pom xwb.

46 Thiab nim no tau muaj tias Amas hais rau nws tias: Saib seb, kuv tu siab heev vim yog txoj kev tawv ntawm koj lub siab, muaj tseeb tiag, vim koj tseem yuav tawm tsam tus ntsuj plig ntawm qhov tseeb, kom koj tus ntsuj plig yuav raug puas tsuaj.

47 Tiam sis saib seb, yuav zoo dua yog tias koj tus ntsuj plig ploj mus tshaj qhov uas koj ua kom ntau tus ntsuj plig mus rau kev puas tsuaj, los ntawm koj tej lus dag thiab los ntawm koj tej lus ntxias; yog li ntawd yog koj yuav xyeej dua, saib seb Vajtswv yuav qhuab koj, xwv kom koj hais tsis tau lus, xwv kom koj qhib tsis tau koj lub qhov ncauj ib zaug ntxiv li lawm, xwv kom koj tsis tau ntxias cov neeg no ntxiv.

48 Nim no Khaulihos hais rau nws tias: Kuv tsis xyeej qhov uas hais tias muaj ib tug Vajtswv, tiam sis kuv tsis ntseeg tias muaj ib tug Vajtswv; thiab kuv kuj hais tias, koj yeej tsis paub tias muaj ib tug Vajtswv; thiab tsuas yog koj ua ib lub cim rau kuv pom xwb, tsis li ces kuv yuav tsis ntseeg.

49 Nim no Amas hais rau nws tias: Kuv yuav muab qhov no ua ib lub cim rau koj tias, koj yuav raug qhuab ua rau koj hais tsis tau lus, raws li kuv cov lus; thiab kuv hais tias, los ntawm Vajtswv lub npe, koj yuav raug qhuab ua rau koj hais tsis tau lus, xwv kom koj hais tsis tau lus ntxiv lawm.

50 Nim no thaum Amas hais tej lus no tas lawm, Khaulihos raug qhuab ua rau nws hais tsis tau lus, ua rau nws tsis muaj peev xwm hais lus, raws li Amas tej lus.

51 Thiab nim no thaum tus thawj txiav txim pom qhov no, nws ncav nws txhais tes thiab sau ntawv rau Khaulihos, hais tias: Koj puas ntseeg Vajtswv lub hwj chim lawm? Koj xav kom Amas ua nws lub cim rau leej twg? Koj puas xav kom nws ua rau lwm tus raug kev kub ntxhov, ua kom koj pom ib lub cim? Saib seb, nws twb ua ib lub cim rau koj pom; thiab nim no koj puas yuav cam ntxiv?

52 Thiab Khaulihos ncav nws txhais tes thiab sau ntawv, hais tias: Kuv paub tias kuv hais tsis tau lus, vim kuv tsis muaj peev xwm hais lus; thiab kuv paub tias yeej tsis muaj dab tsi yuav muaj peev xwm ua rau kuv raug qhov no tsuas yog Vajtswv lub hwj chim xwb; muaj tseeb tiag, thiab kuv yeej ib txwm paub tias muaj ib tug Vajtswv.

53 Tiam sis saib seb, tus dab phem tau dag ntxias kuv; vim nws tshwm sim los rau kuv zoo li ib tug tim tswv, thiab hais rau kuv tias: Cia li mus thiab coj cov neeg no rov qab los, vim lawv txhua tus tau mus yuam kev mus raws ib tug Vajtswv uas tsis muaj leej twg paub. Thiab nws hais rau kuv tias: Yeej tsis muaj Vajtswv; muaj tseeb tiag; thiab nws qhia rau kuv tej uas kuv yuav tsum hais. Thiab kuv tau qhia nws tej lus; thiab kuv qhia nws tej lus vim yog tej lus ntawd ua rau tus uas nyiam sab cev nqaij daim tawv zoo siab; thiab kuv qhia tej lus ntawd, txog rau thaum uas kuv vam meej heev, ua rau kuv ntseeg tias tej lus ntawd yeej muaj tseeb; thiab vim qhov no kuv thiaj tsis ntseeg qhov tseeb, txog rau thaum uas kuv coj tau txoj kev foom tsis zoo loj heev no los rau kuv.

54 Nim no thaum nws hais li no tas lawm, nws thov kom Amas thov Vajtswv, xwv kom muab txoj kev foom tsis zoo tshem ntawm nws mus.

55 Tiam sis Amas hais rau nws tias: Yog muab txoj kev foom tsis zoo no tshem tawm ntawm koj mus ces koj yuav rov qab mus ntxias cov neeg no lub siab; yog li ntawd, yuav ua rau koj raws li tus Tswv lub siab xav.

56 Thiab tau muaj tias twb tsis muab txoj kev foom tsis zoo ntawd tshem tawm ntawm Khaulihos; tiam sis nws raug ntiab tawm, thiab mus thov mov noj rau ub rau no ntawm ib lub tsev mus rau ib lub tsev.

57 Nim no tej uas tau tshwm sim rau Khaulihos raug muab tshaj tawm tam sim ntawd mus thoob plaws rau txhua thaj av; muaj tseeb tiag, tus thawj txiav txim muab zaj lus tshaj tawm mus rau tag nrho cov neeg nyob hauv thaj av, tshaj tawm rau cov uas tau ntseeg Khaulihos tej lus kom lawv cia li hloov siab lees txim sai sai, tsis li ntawd ces tib txoj kev rau txim yuav los rau lawv.

58 Thiab tau muaj tias ua rau lawv txhua tus ntseeg tias Khaulihos ua phem; yog li ntawd lawv txhua tus rov hloov siab los ntseeg tus Tswv; thiab qhov no tau xaus txoj kev phem raws li Khaulihos tus yam ntxwv. Thiab Khaulihos mus thov mov noj rau ub rau no ntawm ib lub tsev mus rau ib lub tsev.

59 Thiab tau muaj tias thaum nws tawm mus rau hauv cov neeg, muaj tseeb tiag, rau hauv ib co neeg uas tau faib lawv tus kheej tawm ntawm cov Neeg Nifais thiab muab lawv tus kheej hu ua cov neeg Xaulas, vim yog tus txiv neej uas coj lawv lub npe hu ua Xaulas—thiab thaum Khaulihos tawm mus rau hauv lawv, saib seb, nws raug luam thiab raug tsuj, txog rau thaum uas nws tuag.

60 Thiab yog li no peb pom qhov kawg ntawm tus uas ntxeev tus Tswv tej kev; thiab yog li no peb pom tias tus dab phem twb tsis pab nws cov me nyuam thaum txog hnub kawg, tiam sis muab lawv cab nrawm nroos mus rau hauv ntuj txiag teb tsaus.