1 Thiab nim no tau muaj tias Amas rov qab tom thaj av Nkide-oos los, tom qab nws tau qhia cov neeg Nkide-oos ntau yam uas tsis muaj peev xwm muab sau cia, thiab tau txhim tsa tus txheej txheem ntawm lub koom txoos ib yam li nws twb tau ua nyob hauv thaj av Xalahelas, muaj tseeb tiag, nws rov qab los rau hauv nws lub tsev nyob hauv Xalahelas los so ntawm tej hauj lwm uas nws tau ua.

2 Thiab xyoo thib cuaj ntawm cov neeg txiav txim txoj kev kav cov neeg Nifais xaus li no.

3 Thiab tau muaj tias thaum pib xyoo thib kaum ntawm cov neeg txiav txim txoj kev kav cov neeg Nifais, Amas ncaim ntawm qhov chaw ntawd thiab mus ncig rau hauv thaj av Melej, nyob sab hnub poob ntawm tus dej Xidoos, nyob sab hnub poob ze ntawm tej ciam teb ntawm hav zoov.

4 Thiab nws pib qhia cov neeg nyob hauv thaj av Melej raws li Vajtswv tus txheej txheem dawb huv, uas Vajtswv tau hu nws los qhia; thiab nws pib qhia cov neeg thoob plaws hauv thaj av Melej.

5 Thiab tau muaj tias cov neeg thoob plaws ntawm tej ciam teb hauv thaj av uas nyob ze rau hav zoov tuaj ntsib nws. Thiab lawv tau ua kev cai raus dej thoob plaws hauv thaj av;

6 Thaum nws ua tiav nws txoj hauj lwm nyob hauv Melej nws ncaim qhov chaw ntawd mus, thiab mus tau peb hnub ke rau sab qaum teb ntawm thaj av Melej; thiab nws mus txog rau ib lub nroog uas hu ua Amoonaihas.

7 Nim no raws li cov Neeg Nifais txoj kab lis kev cai, lawv tis npe rau lawv tej thaj av thiab tej nroog, thiab lawv tej zos, muaj tseeb tiag, txawm hais tias lawv tej zos me, raws li tus uas xub xub mus nyob qhov chaw ntawd lub npe; thiab thaj av Amoonaihas los twb yog tis npe raws li ntawd.

8 Thiab tau muaj tias thaum Amas tuaj txog hauv lub nroog Amoonaihas nws pib tshaj tawm Vajtswv txoj lus rau lawv.

9 Nim no Dab Ntxwg Nyoog tuav tau cov neeg ntawm lub nroog Amoonaihas lub siab ruaj heev; yog li ntawd lawv tsis kam mloog Amas tej lus.

10 Txawm li ntawd los Amas sib zog ua hauj lwm ntawm sab ntsuj plig, sib zog thov Vajtswv kawg siab kawg ntsws, xwv kom nws yuav pub nws tus Ntsuj Plig nplua mias rau cov neeg uas nyob hauv lub nroog; xwv kom nws yuav cia Amas muab lawv ua kev cai raus dej rau txoj kev hloov siab lees txim.

11 Txawm li ntawd los, lawv ua lawv lub siab tawv qhawv, hais rau nws tias: Saib seb, peb paub tias koj yog Amas; thiab peb paub tias koj yog tus pov thawj hlob saib xyuas lub koom txoos uas koj tau txhim tsa nyob ntau qhov chaw ntawm thaj av, raws li koj txoj kab lis kev cai; thiab peb twb tsis yog cov neeg ntawm koj lub koom txoos, thiab peb tsis ntseeg tej kab lis kev cai ruam li ntawd.

12 Thiab nim no peb paub tias vim peb tsis yog cov neeg ntawm koj lub koom txoos peb paub tias koj tsis muaj hwj chim kav peb; thiab koj twb muab lub rooj txiav txim rau Nifaihas lawm; yog li ntawd koj tsis yog tus thawj txiav txim kav peb.

13 Nim no thaum cov neeg tau hais li no, thiab tawm tsam tag nrho nws tej lus, thiab thuam nws, thiab nto qaub ncaug rau nws, thiab ua kom nws raug ntiab tawm ntawm lawv lub nroog mus, nws tau ncaim ntawm qhov chaw ntawd thiab mus rau lub nroog uas hu ua Aloos.

14 Thiab tau muaj tias thaum nws tseem tab tom taug kev mus tid, nws nyuaj siab heev nrog kev tu siab, vim nws tau tiv ntau yam kev txom nyem thiab kev ntxhov siab ntawm sab ntsuj plig, vim yog txoj kev phem ntawm cov neeg uas nyob hauv lub nroog Amoonaihas, tau muaj tias thaum Amas tseem tab tom nyuaj siab heev nrog kev tu siab zoo li no, saib seb tus Tswv ib tug tim tswv tshwm sim los rau nws, hais tias:

15 Koj tau koob hmoov, Amas; yog li ntawd, cia li tsa koj lub taub hau thiab cia li zoo siab, vim muaj ntau yam uas tsim nyog ua rau koj zoo siab; vim koj twb rau siab hlo ua raws li Vajtswv tej lus txib txij thaum koj txais koj thawj zaj xov los ntawm nws. Saib seb, kuv twb yog tus uas hais zaj xov ntawd rau koj.

16 Thiab saib seb, Vajtswv xa kuv los txib kom koj rov qab mus rau hauv lub nroog Amoonaihas, thiab rov qhuab qhia dua rau cov neeg ntawm lub nroog; muaj tseeb tiag, qhuab qhia rau lawv. Muaj tseeb tiag, hais rau lawv tias, tsuas yog lawv hloov siab lees txim xwb tsis li ntawd tus Tswv uas yog Vajtswv yuav ua kom lawv puas tsuaj.

17 Vim saib seb, lub sij hawm no lawv tab tom nrhiav tswv yim los rhuav koj cov neeg txoj kev ywj pheej, (vim tus Tswv hais li no) uas tsis raws li tej kev cai, thiab tej kev txiav txim, thiab tej lus txib uas nws tau muab rau nws cov neeg.

18 Nim no tau muaj tias tom qab Amas tau txais nws zaj xov los ntawm tus Tswv tus tim tswv lawm nws rov qab nrawm nroos mus rau tom thaj av Amoonaihas. Thiab nws siv lwm txoj kev nkag mus rau hauv lub nroog, muaj tseeb tiag, siv txoj kev uas nyob rau sab qab teb ntawm lub nroog Amoonaihas.

19 Thiab thaum nws nkag mus rau hauv lub nroog nws tshaib plab heev, thiab nws hais rau ib tug txiv neej tias: Koj puas muaj dab tsi rau Vajtswv ib tug tub qhe uas txo hwj chim noj?

20 Thiab tus txiv neej hais rau nws tias: Kuv yog ib tug Neeg Nifais, thiab kuv paub tias koj yog Vajtswv ib tug yaj saub dawb huv, vim koj yog tus txiv neej uas tus tim tswv tau hais nyob hauv ib txoj kev ua yog toog hais tias: Koj yuav tau txais tos. Yog li ntawd, cia li nrog kuv mus lawm tom kuv tsev thiab kuv mam faib kuv tej zaub mov rau koj; thiab kuv paub tias koj yuav ua rau kuv thiab kuv tsev neeg tau koob hmoov.

21 Thiab tau muaj tias tus txiv neej txais tos Amas mus rau hauv nws tsev; thiab tus txiv neej hu ua Amulej; thiab nws nqa mov mog thiab nqaij thiab muab tso rau ntawm Amas xub ntiag.

22 Thiab tau muaj tias Amas noj mov mog thiab tsau plab; thiab nws foom koob hmoov rau Amulej thiab nws tsev neeg, thiab nws ua Vajtswv tsaug.

23 Thiab tom qab nws noj tas thiab tsau plab lawm nws hais rau Amulej tias: Kuv yog Amas, thiab yog tus pov thawj hlob saib xyuas Vajtswv lub koom txoos thoob plaws hauv thaj av.

24 Thiab saib seb, Vajtswv tau hu kom kuv tuaj tshaj tawm Vajtswv txoj lus rau hauv tag nrho cov neeg no, raws li lub txiaj ntsim txais tau kev tshwm sim thiab qhia tau tej yuav muaj los yav tom ntej; thiab kuv twb los rau hauv thaj av no thiab lawv tsis kam txais tos kuv, tiam sis lawv muab kuv ntiab tawm thiab kuv twb yuav luag tig kuv lub nraub qaum rau thaj av no mus ib txhis.

25 Tiam sis saib seb, Vajtswv tau txib kom kuv rov qab los thiab qhia tej yuav muaj los yav tom ntej rau cov neeg no, muaj tseeb tiag, thiab ua tim khawv nkaug lawv ntsig txog lawv tej kev ua phem.

26 Thiab nim no, Amulej, koj tau koob hmoov vim yog koj tau pub kuv noj thiab tau coj kuv los tsev; vim kuv tshaib plab heev, vim kuv tau yoo mov tau ntau hnub.

27 Thiab Amas nyob nrog Amulej tau ntau hnub ua ntej nws pib qhuab qhia cov neeg.

28 Thiab tau muaj tias cov neeg ua tej kev phem loj zuj zus ntxiv tuaj.

29 Thiab txoj lus los rau Amas hais tias: Cia li mus; thiab hais rau kuv tus tub qhe Amulej, cia li mus thiab qhia tej yuav muaj los yav tom ntej rau cov neeg no, hais tias—Nej cia li hloov siab lees txim, vim tus Tswv hais li no, tsuas yog nej hloov siab lees txim xwb tsis li ntawd kuv yuav los xyuas cov neeg no nrog kuv txoj kev npau taws; muaj tseeb tiag, thiab kuv yuav tsis tig kuv txoj kev npau taws heev mus li.

30 Thiab Amas tawm mus, thiab Amulej thiab, mus rau hauv cov neeg, mus tshaj tawm Vajtswv tej lus rau lawv; thiab nkawd muaj tus Vaj Ntsuj Plig Dawb Huv puv npo.

31 Thiab Vajtswv muab hwj chim rau nkawd, npaum li uas cov neeg tsis muaj cuab kav ceev nkawd rau hauv tej qhov taub; thiab tsis muaj ib tug neeg twg uas yuav muaj peev xwm tua tau nkawd; txawm li ntawd los nkawd tsis tau siv nkawd lub hwj chim txog rau thaum cov neeg muab nkawd khi thiab tso rau hauv lub tsev kaw. Nim no, tau ua li no xwv kom tus Tswv yuav qhia tau nws lub hwj chim los ntawm nkawd.

32 Thiab tau muaj tias nkawd tawm mus thiab pib qhuab qhia thiab qhia tej yuav muaj los yav tom ntej rau cov neeg, raws li tus ntsuj plig thiab lub hwj chim uas tus Tswv tau muab rau nkawd.