1 Thiab saib seb, nim no tau muaj tias peb lub hom phiaj tom ntej yog txeeb kom tau lub nroog Meethais; tiam sis saib seb, twb tsis muaj kev uas peb pab tub rog tsawg yuav coj tau cov Neeg Lamas tawm ntawm lub nroog. Vim saib seb, lawv nco ntsoov tej uas peb tau ua yav tas los; yog li ntawd peb tsis muaj peev xwm ntxias tau lawv tawm ntawm lawv tej chaw muaj zog.

2 Thiab lawv muaj coob tshaj peb cov tub rog yog li ntawd peb thiaj tsis kam tawm mus thiab tawm tsam lawv nyob hauv lawv tej chaw muaj zog.

3 Muaj tseeb tiag, thiab tsim nyog uas peb yuav tsum siv peb cov neeg mus tswj tuav tej feem av uas peb rov txeeb tau los ua peb tug; yog li ntawd tsim nyog uas peb yuav tsum tos, kom peb tau txais zog ntxiv thiab ib co khoom noj khoom siv tshiab los ntawm thaj av Xalahelas tso.

4 Thiab tau muaj tias kuv thiaj li xa ib pab neeg xa xov mus rau tus tswv xeev ntawm peb thaj av, mus qhia rau nws ntsig txog peb cov neeg tej xwm txheej. Thiab tau muaj tias peb nyob tos tej khoom noj khoom siv thiab zog los ntawm thaj av Xalahelas.

5 Tiam sis saib seb, qhov no tsuas pab peb me me xwb; vim ib hnub dhau ib hnub cov Neeg Lamas kuj tau txais zog loj ntxiv, thiab kuj tau txais tej khoom noj khoom siv ntau; thiab peb tej xwm txheej zoo li no nyob rau lub sij hawm no.

6 Thiab tej lub sij hawm cov Neeg Lamas maj nrawm nroos tuaj tawm tsam peb, thiab siv tom txwv ua kom peb puas tsuaj; txawm li ntawd los peb tsis muaj cuab kav tuaj ua rog nrog lawv, vim yog lawv tej chaw nkaum thiab lawv tej chaw muaj zog.

7 Thiab tau muaj tias peb nyob tos hauv tej xwm txheej nyuaj no tau ntau lub hlis, twb mus txog rau thaum peb twb yuav luag piam sij vim tsis muaj zaub mov noj.

8 Tiam sis tau muaj tias peb tau txais zaub mov, uas yog ib pab tub rog muaj ob txhiab leej nqa tuaj pab rau peb; thiab tej kev pab rau peb ces tsuas yog tas li no xwb, kom tiv thaiv peb tus kheej thiab peb lub teb chaws kom dim ntawm txoj kev poob rau hauv peb tej yeeb ncuab txhais tes, muaj tseeb tiag, kom tawm tsam ib co yeeb ncuab uas suav tsis txheeb.

9 Thiab nim no lub ntsiab ntawm peb tej kev nyuaj no, los sis vim li cas cov nom tswv tom Xalahelas ho tsis xa zog ntxiv tuaj rau peb, peb tsis paub; yog li ntawd peb tu siab thiab kuj muaj kev ntshai puv npo, ntshai tsam muaj dab tsi ua rau Vajtswv tej kev txiav txim los rau peb thaj av, ua rau peb poob thiab puas tsuaj huv si mus.

10 Yog li ntawd peb tau thov Vajtswv kawg peb lub siab lub ntsws, kom nws txhawb peb lub zog thiab pab peb dim ntawm peb cov yeeb ncuab txhais tes, muaj tseeb tiag, thiab muab zog rau peb xwv kom peb rov txeeb tau peb tej nroog, thiab peb tej av, thiab tej uas peb muaj, los txhawb peb cov neeg.

11 Muaj tseeb tiag, thiab tau muaj tias tus Tswv peb tus Vajtswv tau los xyuas peb nrog kev paub tseeb tias nws yuav cawm peb; muaj tseeb tiag, nws twb hais txoj kev kaj siab lug rau peb lub siab, thiab pub txoj kev ntseeg uas muaj zog rau peb, thiab ua rau peb kom peb cia siab tias nws yuav tso peb dim.

12 Thiab peb thiaj ua siab loj nrog peb pab tub rog tsawg uas peb tau txais, thiab txiav txim siab ruaj nrees tias yuav ua kom yeej peb cov yeeb ncuab, thiab mus tswj tuav peb tej av, thiab tej uas peb muaj, thiab peb cov poj niam, thiab peb cov me nyuam, thiab lub ntsiab ntawm peb txoj kev ywj pheej.

13 Thiab yog li ntawd peb siv tag nrho peb lub zog tawm mus tawm tsam cov Neeg Lamas, uas yog nyob hauv lub nroog Meethais; thiab peb rub peb tej tsev pheeb suab ntaub ze rau ntawm ntug hav zoov, uas yog nyob ze ntawm lub nroog.

14 Thiab tau muaj tias nyob rau hnub tom qab, thaum cov Neeg Lamas pom tias peb nyob ntawm ntug hav zoov uas yog nyob ze ntawm lub nroog, lawv xa lawv cov neeg soj xyuas tuaj ncig peb kom lawv paub tias peb cov tub rog muaj coob thiab muaj zog npaum li cas.

15 Thiab tau muaj tias thaum lawv pom tias peb tsis muaj zog, xws li ntawm cov neeg uas peb muaj, thiab vim lawv ntshai tias yog lawv tsis tawm tuaj ua rog tawm tsam peb thiab tua peb tsam peb yuav txiav lawv tawm ntawm lawv txoj kev txhawb pab, thiab vim lawv kuj xav tias yuav yooj yim rau lawv ua kom peb puas tsuaj los ntawm lawv cov tub rog coob coob, yog li ntawd lawv thiaj pib npaj tawm tuaj ua rog tawm tsam peb.

16 Thiab thaum peb pom tias lawv tab tom npaj tuaj tawm tsam peb, saib seb, kuv hais kom Nkis, nrog rau ib pab tub rog tsawg, mus nkaum rau hauv hav zoov, thiab Thi-onaws thiab ib pab tub rog tsawg mus nkaum rau hauv hav zoov thiab.

17 Nim no Nkis thiab nws cov tub rog nkaum nyob sab xis thiab lwm cov nkaum nyob sab laug; thiab thaum lawv tau mus nkaum li no lawm, saib seb, kuv nyob twj ywm, nrog kuv cov tub rog uas tseem tshuav, rau hauv tib qho chaw uas peb xub rub peb tej tsev pheeb suab ntaub npaj tos thaum cov Neeg Lamas tawm tuaj ua rog.

18 Thiab tau muaj tias cov Neeg Lamas tawm nrog lawv pab tub rog coob coob tuaj tawm tsam peb. Thiab thaum lawv tuaj thiab tab tom yuav luag xuas ntaj tua peb, kuv hais kom kuv cov tub rog, cov uas nrog kuv, thim mus rau hauv hav zoov.

19 Thiab tau muaj tias cov Neeg Lamas raws peb qab ceev heev, vim lawv xav caum kom tau peb heev kom lawv tua tau peb; yog li ntawd lawv thiaj raws peb qab mus rau hauv hav zoov; thiab peb hla mus hauv nruab nrab ntawm Nkis thiab Thi-onaws, cov Neeg Lamas thiaj tsis pom lawv.

20 Thiab tau muaj tias thaum cov Neeg Lamas hla los dhau, los sis thaum cov tub rog hla los dhau, Nkis thiab Thi-onaws sawv hauv lawv tej chaw nkaum los, thiab txiav tau cov Neeg Lamas cov neeg soj xyuas kom lawv rov qab tsis tau mus rau tom lub nroog.

21 Thiab tau muaj tias thaum lawv txiav tau lawv lawm, Nkis thiab Thi-onaws nrog rau nkawd cov tub rog khiav mus rau tom lub nroog thiab tawm tsam cov neeg saib xyuas uas tau muab tso zov lub nroog, npaum li uas lawv ua rau cov saib xyuas puas tsuaj thiab txeeb tau lub nroog.

22 Nim no tau muaj li no los twb vim yog cov Neeg Lamas cia tag nrho lawv pab tub rog raug cov Neeg Nifais coj mus rau hauv hav zoov, tsuas yog tshuav ob peb tug neeg zov xwb.

23 Thiab tau muaj tias Nkis thiab Thi-onaws siv txoj kev no kom txeeb tau cov Neeg Lamas tej chaw muaj zog. Thiab tau muaj tias tom qab peb tau mus ntev nyob hauv hav zoov peb thiaj taug peb txoj kev mus rau tom thaj av Xalahelas.

24 Thiab thaum cov Neeg Lamas pom tias lawv tab tom taug kev mus rau tom thaj av Xalahelas, lawv ntshai heev, nyob tsam muaj ib lub tswv yim coj tau lawv mus rau kev puas tsuaj; yog li ntawd lawv thiaj pib thim rov qab mus rau hauv hav zoov, muaj tseeb tiag, twb rov qab mus txoj qub ke uas lawv tuaj.

25 Thiab saib seb, twb tsaus ntuj thiab lawv rub lawv tej tsev pheeb suab ntaub, vim cov Neeg Lamas cov thawj hau rog xav tias cov Neeg Nifais sab lim heev vim yog lawv taug kev deb; thiab vim xav tias lawv twb raws tag nrho cov Neeg Nifais pab tub rog lawm yog li ntawd lawv thiaj tsis xav ntsig txog lub nroog Meethais.

26 Nim no tau muaj tias thaum tsaus ntuj, kuv hais kom kuv cov tub rog tsis txhob pw, tiam sis kom lawv taug kev mus lwm txoj kev rau tom thaj av Meethais.

27 Thiab vim yog peb taug kev mus thaum hmo ntuj li no, saib seb, hnub tom qab peb twb tau cov Neeg Lamas ntej, peb thiaj xub mus txog tom lub nroog Meethais ua ntej lawv.

28 Thiab yog li ntawd tau muaj tias, los ntawm lub tom txwv no peb thiaj txeeb tau lub nroog Meethais yam tsis muaj ntshav nrog.

29 Thiab tau muaj tias thaum cov Neeg Lamas cov tub rog los txog ze ntawm lub nroog, thiab pom tias peb twb npaj txhij ntsib lawv, lawv xav tsis thoob kiag li thiab ntshai kawg nkaus, ua rau lawv cia li khiav mus rau hauv hav zoov.

30 Muaj tseeb tiag, thiab tau muaj tias cov Neeg Lamas cov tub rog tau khiav tawm ntawm tag nrho ces kaum av no mus. Tiam sis saib seb, lawv tau coj nrog lawv coob leej poj niam thiab me nyuam tawm ntawm thaj av mus.

31 Thiab cov nroog uas cov Neeg Lamas txeeb tau, nyob rau lub sij hawm no peb puav leej rov qab txeeb tau tag nrho los; thiab peb cov txiv thiab peb cov poj niam thiab peb cov me nyuam tau rov qab mus rau lawv lub tsev, tag nrho txhua tus tsuas yog tshuav cov uas raug txhom ua neeg raug txim thiab raug cov Neeg Lamas coj nrog lawv mus.

32 Tiam sis saib seb, peb cov tub rog tsawg heev yuav kom tswj tuav ntau lub nroog thiab tej av uas loj dav.

33 Tiam sis saib seb, peb tso siab rau peb tus Vajtswv uas tau muab txoj kev yeej tej av ntawd rau peb, ua rau peb rov txeeb tau tej nroog thiab tej av ntawd, uas yeej yog peb li.

34 Nim no peb tsis paub vim li cas cov nom tswv tsis xa zog ntxiv tuaj rau peb; thiab cov tub rog uas tau tuaj pab peb los kuj tsis paub tias vim li cas peb thiaj tsis tau txais zog ntau ntxiv.

35 Saib seb, peb twb tsis paub tiam sis tsuas yog xav tias nej ua tsis tau xwb, thiab tias koj tau sau cov tub rog mus rau ces kaum av tom ko lawm; yog muaj tseeb li ntawd, peb tsis xav yws yws.

36 Thiab yog tias tsis yog li ntawd, saib seb, peb ntshai tsam muaj kev ntxeev siab nyob hauv lub tsoom fwv, es lawv thiaj tsis kam xa tub rog ntxiv tuaj pab peb; vim peb paub tias lawv yeej muaj coob tshaj li uas lawv tau xa tuaj.

37 Tiam sis, saib seb, tsis ua li cas—peb tso siab Vajtswv yuav cawm peb dim, txawm tias peb cov tub rog tsis muaj zog, muaj tseeb tiag, thiab yuav cawm peb dim ntawm peb cov yeeb ncuab tes.

38 Saib seb, qhov no yog thaum yuav kawg, xyoo thib nees nkaum cuaj, thiab peb twb txeeb tau peb tej av; thiab cov Neeg Lamas twb khiav mus rau thaj av Nifais lawm.

39 Thiab cov neeg Amoos cov tub, cov uas kuv pheej nquag hais txog ntawd, kuj nrog kuv nyob hauv lub nroog Meethais; thiab tus Tswv tau txhawb lawv, muaj tseeb tiag, thiab tau ceev lawv kom txhob raug tua los ntawm ntaj, thiaj tsis muaj ib tug uas raug tua li.

40 Tiam sis saib seb, lawv twb raug tej qhov txhab ntau; txawm li ntawd los lawv tseem nyob ruaj nrees rau ntawm txoj kev ywj pheej uas yog qhov uas Vajtswv tau ua rau lawv dim; thiab lawv rau siab nco ntsoov tus Tswv lawv tus Vajtswv ib hnub dhau ib hnub; muaj tseeb tiag, lawv mob siab ua raws li nws tej kev cai, thiab nws tej kev txiav txim, thiab nws tej lus txib tsis tu ncua; thiab lawv txoj kev ntseeg yeej muaj zog ntseeg tej kev qhia txog tej yuav muaj los yav tom ntej.

41 Thiab nim no, kuv tus tij laug Maulaunais uas kuv hlub es, thov tus Tswv peb tus Vajtswv, tus uas tau txhiv peb thiab ua rau peb dim, ceev koj tsis tu ncua nyob hauv nws xub ntiag; muaj tseeb tiag, thiab thov nws foom koob hmoov rau cov neeg no, kom nej yuav rov qab txeeb tau tag nrho tej uas cov Neeg Lamas tau txeeb ntawm peb mus lawm, tej uas yog siv los txhawb peb. Thiab nim no, saib seb, kuv xaus kuv tsab ntawv. Kuv yog Hilamas, Amas tus tub.