1 Nim no tau muaj tias thaum Maulaunais tau txais tsab ntawv no nws haj yam npau taws, vim nws paub lawm tias Amauloos yeej paub zoo tag nrho txog nws txoj kev dag; muaj tseeb tiag, nws paub tias Amauloos yeej paub tias qhov ntawd tsis yog ib qho ncaj uas tsim nyog kom nws ua ib npluav rog tawm tsam Nifais cov neeg.

2 Thiab nws hais tias: Saib seb, kuv yuav tsis kam pauv cov neeg raug txim nrog Amauloos tsuas yog nws yuav thim nws lub tswv yim, ib yam li uas kuv tau hais nyob hauv kuv tsab ntawv lawm; vim kuv yuav tsis pub rau nws kom nws muaj hwj chim ntau tshaj qhov uas nws twb muaj lawm.

3 Saib seb, kuv paub qhov chaw uas cov Neeg Lamas zov kuv cov neeg uas lawv tau txhom mus ua neeg raug txim; thiab ib yam li Amauloos tsis kam ua raws li kuv tsab ntawv, saib seb, kuv yuav ua rau nws raws li kuv tej lus; muaj tseeb tiag, kuv yuav nrhiav txoj kev tuag rau lawv kom txog thaum lawv yuav thov txoj kev thaj yeeb.

4 Thiab nim no tau muaj tias thaum Maulaunais hais tej lus no tas lawm, nws hais kom nrhiav hauv nws cov neeg, saib puas muaj ib tug neeg uas yog Lamas ib tug xeeb ntxwv nyob hauv lawv.

5 Thiab tau muaj tias lawv nrhiav tau ib tug, uas npe hu ua Lamas; thiab nws yog ib tug ntawm tus vaj ntxwv uas Amalikhaiyas muab tua lawm cov tub qhe.

6 Nim no Maulaunais tau hais kom Lamas thiab nws cov neeg ob peb tug tawm mus rau tom cov neeg uas zov cov Neeg Nifais.

7 Nim no cov Neeg Lamas tau zov cov Neeg Nifais nyob hauv lub nroog Nkis; yog li ntawd Maulaunais thiaj tsa Lamas thiab hais kom ob peb tug neeg mus nrog nws.

8 Thiab thaum txog yav tsaus ntuj Lamas mus cuag cov neeg zov uas saib xyuas cov Neeg Nifais, thiab saib seb, lawv pom nws tuaj thiab lawv hu nws; tiam sis nws hais rau lawv tias: Tsis txhob ntshai; saib seb, kuv yog ib tug Neeg Lamas. Saib seb, peb khiav dim ntawm cov Neeg Nifais los, thiab lawv tsaug zog; thiab saib seb peb tau haus lawv cov cawv txiv hmab thiab muab nqa los nrog peb.

9 Nim no thaum cov Neeg Lamas hnov tej lus no lawv xyiv fab heev tos txais nws; thiab lawv hais rau nws tias: Muab koj cov cawv txiv hmab rau peb, xwv kom peb tau haus; peb zoo siab tias koj tau nqa cov cawv txiv hmab nrog koj los li no vim peb sab sab.

10 Tiam sis Lamas hais rau lawv tias: Cia peb ceev peb cov cawv txiv hmab kom txog thaum peb mus ua rog tawm tsam cov Neeg Nifais tso. Tiam sis cov lus no tsuas yog ua rau lawv haj yam xav haus cov cawv txiv hmab;

11 Vim, lawv hais tias: Peb sab sab, yog li ntawd cia peb haus cov cawv txiv hmab me ntsis, thiab tsis ntev twb yuav muab cov cawv txiv hmab faib rau peb thaum faib mov, qhov ntawd yuav ua rau peb muaj zog mus tawm tsam cov Neeg Nifais.

12 Thiab Lamas hais rau lawv tias: Nej yeej meem ua raws li nej siab nyiam.

13 Thiab tau muaj tias lawv haus cov cawv txiv hmab ntau heev; thiab cov cawv txiv hmab qab heev rau lawv, yog li ntawd lawv haus ntau heev ntxiv; thiab cov cawv ntawd muaj zog heev, vim cov Neeg Nifais ua kom cov cawv ntawd muaj zog.

14 Thiab tau muaj tias lawv haus thiab zoo siab heev, thiab tsis ntev lawv txhua tus qaug cawv tas.

15 Thiab nim no thaum Lamas thiab nws cov neeg pom tias lawv qaug cawv tas, thiab tsaug zog looj lom, lawv rov qab los cuag Maulaunais thiab qhia nws txhua yam uas tau tshwm sim.

16 Thiab nim no qhov no yog raws li Maulaunais lub tswv yim. Thiab Maulaunais twb npaj txhij nws cov neeg nrog tej cuab yeej ua rog; thiab nws mus rau hauv lub nroog Nkis, thaum cov Neeg Lamas tseem pw tsaug zog looj lom thiab qaug cawv, thiab muab tej cuab yeej ua rog pov rau cov neeg raug txim, ua rau lawv txhua tus puav leej muaj cuab yeej ua rog;

17 Muaj tseeb tiag, twb muab rau lawv cov poj niam, thiab tag nrho lawv cov me nyuam, tag nrho cov uas muaj peev xwm siv tau cuab yeej ua rog, thaum Maulaunais muab cuab yeej ua rog rau tag nrho cov neeg raug txim; thiab txhua yam ntawd puav leej ua tau yam ntsiag to.

18 Tiam sis yog hais tias lawv ho ua rau cov Neeg Lamas sawv los, saib seb lawv qaug cawv thiab cov Neeg Nifais yeej tua tau lawv.

19 Tiam sis saib seb, Maulaunais tsis xav ua li no; nws tsis nyiam tua neeg los sis ua kom nqaij ntuag ntshav nrog, tiam sis nws nyiam cawm nws cov neeg dim ntawm txoj kev puas tsuaj; thiab vim li no nws thiaj tsis coj txoj kev tsis txim lij los rau nws, nws tsis kam tua cov Neeg Lamas thiab ua kom lawv puas tsuaj thaum lawv qaug cawv.

20 Tiam sis nws twb ua tau raws li nws siab xav; vim nws twb muab tau cuab yeej ua rog rau cov Neeg Nifais uas raug txim nyob sab ntsa loog sab hauv ntawm lub nroog, thiab muab tau lub zog rau lawv kom muaj cuab kav txeeb tau tej feem uas yog nyob sab ntsa loog sab haud.

21 Thiab tom qab ntawd nws hais kom cov tub rog uas nrog nws thim rov mus ib nyuag ntu ntawm lawv, thiab vij ncig cov Neeg Lamas cov tub rog.

22 Nim no saib seb tau ua tej yam no nyob rau thaum tsaus ntuj, xwv kom thaum cov Neeg Lamas tsim los thaum sawv ntxov lawv pom tias cov Neeg Nifais muab lawv vij tag nyob rau sab nraud, thiab pom tias lawv cov neeg raug txim uas nyob sab hauv puav leej muaj cuab yeej ua rog.

23 Thiab yog li ntawd lawv pom tias cov Neeg Nifais muaj zog tshaj lawv lawm; thiab nyob hauv tej xwm txheej no lawv pom tias tsis tsim nyog rau lawv sib ntaus sib tua nrog cov Neeg Nifais; yog li ntawd lawv cov thawj hau rog thiaj txib kom lawv txo lawv tej cuab yeej ua rog, thiab lawv nqa tej cuab yeej ua rog los thiab muab pov rau ntawm cov Neeg Nifais ko taw, thov kev hlub tshua.

24 Nim no saib seb, qhov no yog qhov uas Maulaunais xav tau. Nws muab cov Neeg Lamas ua neeg raug txhom hauv hav rog, thiab txeeb tau lub nroog, thiab hais kom tso tag nrho cov Neeg Nifais uas raug txhom; thiab lawv los koom nrog Maulaunais cov tub rog, thiab ntxiv dag zog ntau heev rau nws cov tub rog.

25 Thiab tau muaj tias nws hais kom cov Neeg Lamas, cov uas nws txhom tau los ua neeg raug txim, kom lawv pib ua hauj lwm ua kom tej chaw tiv thaiv ncig lub nroog Nkis muaj zog tuaj.

26 Thiab tau muaj tias thaum nws ua tau rau lub nroog Nkis muaj zog tuaj, raws li nws siab xav lawm, nws hais kom coj nws cov neeg raug txim mus rau tom lub nroog Huaj Vam; thiab nws kuj zov lub nroog ntawd nrog ib pab tub rog uas muaj zog heev.

27 Thiab tau muaj tias, txawm tias cov Neeg Lamas muaj tswv yim dag ntxias ntau los, cov Neeg Nifais tseem ceev tau thiab tsom kwm tau tag nrho cov neeg raug txim uas lawv txhom tau, thiab kuj tswj tuav tau tag nrho tej av thiab tej yam uas lawv rov qab txeeb tau.

28 Thiab tau muaj tias cov Neeg Nifais pib rov qab muaj yeej, thiab rov qab txeeb tau lawv tej kev muaj cai thiab lawv tej kev muaj sam xeeb.

29 Muaj ntau zaus thaum tsaus ntuj cov Neeg Lamas sim vij lawv, tiam sis hais txog tej kev sim no muaj coob leej neeg raug txim tuag.

30 Thiab muaj ntau zaus cov Neeg Lamas sim muab lawv tej cawv txiv hmab rau cov Neeg Nifais haus, xwv kom lawv yuav ua tau rau lawv puas tsuaj los ntawm qhov muab tshuaj lom lawv los sis ua rau lawv qaug cawv.

31 Tiam sis saib seb, nyob hauv lawv lub sij hawm txom nyem no, cov Neeg Nifais twb tsis qeeb nco txog tus Tswv lawv tus Vajtswv. Cov Neeg Lamas tej ntxiab cuab tsis tau lawv; muaj tseeb tiag, lawv tsis kam haus cov Neeg Lamas tej cawv txiv hmab, tsuas yog lawv xub muab rau ib co Neeg Lamas raug txim haus tso.

32 Thiab lawv tau ceev faj xws li no kom tsis txhob muaj tshuaj lom tau lawv; vim tias yog lawv cov cawv txiv hmab lom tau ib tug Neeg Lamas ces kuj yuav lom tau ib tug Neeg Nifais thiab; thiab cov Neeg Nifais sim tag nrho lawv tej cawv txiv hmab zoo li no.

33 Thiab nim no tau muaj tias Maulaunais yuav tsum npaj mus tawm tsam lub nroog Mauli-atoos; vim saib seb, los ntawm lawv tej hauj lwm, cov Neeg Lamas ua tau rau lub nroog Mauli-atoos ruaj khov tuaj mus txog thaum lub nroog ntawd tau hloov los ua ib lub uas ruaj khov heev.

34 Thiab lawv coj cov tub rog tshiab tuaj rau hauv lub nroog ntawd tsis tu ncua, thiab tej khoom noj khoom siv tshiab.

35 Thiab xyoo thib nees nkaum cuaj ntawm cov neeg txiav txim txoj kev kav Nifais cov neeg tau xaus li no.