1 Thiab nim no tau muaj tias nyob hauv lub kaum ib hlis ntawm xyoo thib kaum cuaj, nyob rau hnub xiab kaum ntawm lub hli, cov Neeg Nifais pom cov Neeg Lamas cov tub rog tab tom mus yuav txog rau tom thaj av Amoonaihas.

2 Thiab saib seb, lub nroog twb raug kho dua tshiab, thiab Maulaunais tau tso ib pab tub rog nyob ntawm ntug nroog, thiab lawv tau khawb av ib ncig ua kwj thaiv lawv ntawm cov Neeg Lamas tej xub thiab tej pob zeb; vim saib seb, cov Neeg Lamas siv pob zeb thiab siv xub los sib tua.

3 Saib seb, kuv hais tias twb tau muab lub nroog Amoonaihas kho dua tshiab. Kuv hais rau nej tias, muaj tseeb tiag, twb tau muab ib feem ntawm lub nroog kho dua tshiab; thiab vim cov Neeg Lamas tau ua rau lub nroog puas tsuaj ib zaug vim yog cov neeg txoj kev phem, lawv thiaj xav tias ntshe lub nroog yuav yooj yim rau lawv ua kom puas tsuaj dua.

4 Tiam sis saib seb, ua rau lawv poob siab kawg nkaus; vim saib seb, cov Neeg Nifais tau khawb puab ib phab ntsa av ncig lawv, uas siab heev ua rau cov Neeg Lamas tsis muaj peev xwm txawb lawv tej pob zeb thiab tua lawv tej xub kom tuaj raug lawv, thiab cov Neeg Lamas nkag tsis tau los tawm tsam lawv tsuas yog nkag ntawm lawv qhov chaw nkag los xwb.

5 Nim no nyob rau lub sij hawm no cov Neeg Lamas cov thawj hau rog yoob tag li, vim yog cov Neeg Nifais txoj kev txawj ntse npaj lawv tej chaw kom ruaj khov.

6 Nim no cov Neeg Lamas cov thawj coj tau xav tias, vim lawv muaj neeg coob heev, muaj tseeb tiag, lawv xav tias lawv yuav muaj cuab kav tawm tsam cov Neeg Nifais ib yam li lawv tau ua tas los lawm; muaj tseeb tiag, thiab lawv kuj npaj tau tej phiaj hlau los thaiv lawv tus kheej, thiab tej daim thaiv hauv siab; thiab lawv kuj npaj tau tej ris tsho tawv tsiaj rau lawv tus kheej hnav, muaj tseeb tiag, tej ris tsho tuab heev los npog lawv tej cev liab qab.

7 Thiab lawv xav hais tias vim npaj tau li no lawm ces lawv yuav kov yeej yooj yim heev thiab yuav khoo tau lawv cov kwv tij mus rau tus quab ntawm kev ua qhev, los sis muab lawv tua thiab tua ua tsheej pab raws li lawv siab nyiam.

8 Tiam sis saib seb, ua rau lawv xav tsis thoob heev kawg li, uas cov Neeg Nifais twb npaj txhij tos lawv, txoj kev npaj txhij uas tsis tau paub dua ib zaug li nyob rau hauv Lihais cov me nyuam. Nim no lawv npaj txhij tos cov Neeg Lamas, mus sib ntaus sib tua raws li Maulaunais tej lus qhia.

9 Thiab tau muaj tias cov Neeg Lamas, los sis cov neeg Amalikhaiyas, xav tsis thoob kawg li rau cov Neeg Nifais txoj kev npaj rau kev ua rog.

10 Nim no, yog hais tias vaj ntxwv Amalikhaiyas tau tawm ntawm thaj av Nifais tuaj, nyob pem hau ntej ntawm nws cov tub rog, tej zaum nws twb hais kom cov Neeg Lamas cia li tawm tsam cov Neeg Nifais ntawm lub nroog Amoonaihas lawm; vim saib seb, nws twb tsis khuv xim nws cov neeg tej ntshav.

11 Tiam sis saib seb, Amalikhaiyas tus kheej tsis tuaj ua rog. Thiab saib seb, nws cov thawj hau rog tsis kam tawm tsam cov Neeg Nifais ntawm lub nroog Amoonaihas, vim Maulaunais tau hloov cov Neeg Nifais tej kev coj ua hauj lwm, ua rau cov Neeg Lamas cia li poob siab vim cov Neeg Nifais tej chaw muaj zog thiab lawv tsis muaj peev xwm tuaj tawm tsam cov Neeg Nifais.

12 Yog li ntawd lawv thiaj li thim mus rau hauv hav zoov, thiab npaj lawv lub yeej thiab mus rau tom thaj av Nau-as, vim lawv xav tias qhov ntawd yog qhov chaw tom ntej uas zoo tshaj rau lawv tuaj tawm tsam cov Neeg Nifais.

13 Vim lawv twb tsis paub tias Maulaunais tau ua kom khov, los sis tau ua tej yeej uas ruaj khov, rau txhua lub nroog uas nyob thoob plaws hauv thaj av ib puag ncig; yog li ntawd, lawv mus rau tom thaj av Nau-as nrog ib txoj kev cia siab uas khov kho; muaj tseeb tiag, lawv cov thawj hau rog txav tawm los thiab lav lus tias lawv yuav ua kom cov neeg uas nyob hauv lub nroog ntawd puas tsuaj mus.

14 Tiam sis saib seb, ua rau lawv xav tsis thoob, lub nroog Nau-as, uas ua ntej ntawd yog ib qho chaw uas tsis muaj zog, los ntawm Maulaunais tej hauj lwm, nim no tau hloov los muaj zog, muaj tseeb tiag, tseem muaj zog tshaj lub nroog Amoonaihas.

15 Thiab nim no, saib seb, nov yog Maulaunais laj lim tswv yim; vim nws xav tias lawv yuav ntshai vim yog lub nroog Amoonaihas; thiab vim tias lub nroog Nau-as ua ntej ntawd yog lub uas tsis muaj zog tshaj nyob hauv thaj av, yog li ntawd lawv yuav mus lawm tod mus ua rog; thiab qhov no yog raws li nws lub siab xav.

16 Thiab saib seb, Maulaunais tsa Lihais ua tus thawj hau rog saib xyuas cov tub rog ntawm lub nroog ntawd; thiab nws yog tib tug Lihais uas tawm tsam cov Neeg Lamas nyob hauv lub hav uas nyob rau sab hnub tuaj ntawm tus dej Xidoos.

17 Thiab nim no saib seb tau muaj tias, thaum cov Neeg Lamas pom tias Lihais yog tus saib xyuas lub nroog lawv poob siab dua ib zaug ntxiv, vim lawv ntshai Lihais heev; txawm li ntawd los lawv cov thawj hau rog tau lav lus tias yuav mus tawm tsam lub nroog; yog li ntawd, lawv coj lawv tej tub rog los.

18 Nim no saib seb, cov Neeg Lamas tsis muaj ib txoj kev twg uas yuav nkag tau mus rau hauv lawv tej chaw tub rog uas ruaj khov tsuas yog ntawm lub qhov rooj nkag mus xwb, vim yog lub ntsa loog uas puab ntawd siab heev, thiab tus kwj uas tau khawb ib ncig ntawd tob heev, tsuas yog ntawm lub qhov rooj nkag mus xwb.

19 Thiab yog li ntawd cov Neeg Nifais npaj txhij yuav ua kom txhua tus uas nce tuaj nkag rau hauv qhov chaw tub rog puas tsuaj, los ntawm qhov uas txawb pob zeb thiab tua xub los rau lawv.

20 Yog li ntawd lawv npaj txhij, muaj tseeb tiag, ib pab ntawm lawv cov uas muaj zog tshaj plaws, nrog lawv cov ntaj thiab tej hlua fiav, npaj rawv yuav tua txhua tus uas sim nkag mus rau hauv lawv qhov chaw ruaj khov ntawm qhov chaw nkag mus; thiab lawv npaj txhij zoo li no los tiv thaiv lawv tus kheej ntawm cov Neeg Lamas.

21 Thiab tau muaj tias cov Neeg Lamas cov thawj tub rog coj lawv cov tub rog los rau ntawm qhov chaw nkag mus, thiab pib sib tawm tsam nrog cov Neeg Nifais, kom nkag tau mus rau hauv lawv qhov chaw ruaj khov; tiam sis saib seb, muaj ntau zaus lawv raug thawb rov qab, lawv thiaj li raug tua tuag coob kawg nkaus.

22 Nim no thaum lawv pom tias lawv tsis muaj peev xwm kov yeej cov Neeg Nifais ntawm qhov chaw nkag mus, lawv pib khawb lawv tej phab ntsa av kom lawv yuav muaj ib txoj kev mus rau lawv cov tub rog, kom lawv yuav muaj peev xwm sib npaug ntawm kev sib ntaus sib tua; tiam sis saib seb, thaum lawv sim ua li no lawv raug rhuav tshem los ntawm cov pob zeb thiab cov xub uas txawb mus rau lawv; thiab tsis yog tias hus tej av los npog lawv tej kwj kom puv, lawv cov tuag thiab cov raug mob los txhub ua rau tej kwj puv.

23 Yog li ntawd cov Neeg Nifais muaj hwj chim tag nrho kov yeej lawv cov yeeb ncuab; thiab xws li no cov Neeg Lamas sim ua kom cov Neeg Nifais puas tsuaj txog rau thaum lawv cov thawj hau rog raug tua tuag tas; muaj tseeb tiag, thiab cov Neeg Lamas uas tuag muaj coob tshaj ib txhiab leej; hos, nyob rau sab tod, cov Neeg Nifais tsis muaj ib tug tuag li.

24 Muaj kwv yees li tsib caug leej uas raug mob, cov uas raug cov Neeg Lamas tej xub uas hla dhau ntawm qhov chaw nkag tuaj, tiam sis lawv tej phiaj hlau, thiab lawv tej daim thaiv hauv siab, thiab lawv tej phiaj thaiv taub hau tau thaiv lawv, ua rau lawv raug mob ntawm lawv tej ceg, feem ntau kuj raug mob sab heev.

25 Thiab tau muaj tias, thaum cov Neeg Lamas pom tias lawv cov thawj hau rog raug tua tuag tas lawm lawv khiav mus rau hauv hav zoov. Thiab tau muaj tias lawv rov qab mus rau tom thaj av Nifais, mus qhia lawv tus vaj ntxwv Amalikhaiyas, tus uas yog ib tug Neeg Nifais yug, ntsig txog qhov uas lawv swb loj.

26 Thiab tau muaj tias nws npau taws heev rau nws cov neeg, vim nws tsis tau caij tsuj cov Neeg Nifais raws li nws siab xav; nws tsis tau khoo lawv rau tus quab ntawm kev ua qhev.

27 Muaj tseeb tiag, nws npau taws heev, thiab nws foom phem rau Vajtswv, thiab rau Maulaunais, lav lus tias nws yuav haus Maulaunais cov ntshav; thiab muaj li no los twb vim yog Maulaunais tau ua raws li Vajtswv tej lus txib ntawm txoj kev npaj kom nws cov neeg nyab xeeb.

28 Thiab tau muaj tias, nyob rau sab tod, Nifais cov neeg ua tus Tswv lawv tus Vajtswv tsaug, vim yog nws lub hwj chim uas loj tshaj txhua yam uas tau tso lawv dim ntawm lawv cov yeeb ncuab txhais tes.

29 Thiab xyoo thib kaum cuaj ntawm cov neeg txiav txim txoj kev kav Nifais cov neeg tau xaus li no.

30 Muaj tseeb tiag, thiab muaj kev thaj yeeb tsis tu ncua nyob rau hauv lawv, thiab muaj kev vam meej loj heev nyob rau hauv lub koom txoos vim yog lawv mloog thiab rau siab ntso rau Vajtswv txoj lus, uas Hilamas yog tus tshaj tawm rau lawv, thiab Sinploos, thiab Khali-atoos, thiab Amoos thiab nws cov kwv tij, muaj tseeb tiag, thiab txhua tus uas tau muab tsa los ntawm Vajtswv tus txheej txheem dawb huv, thiab ua kev cai raus dej rau kev hloov siab lees txim, thiab xa tawm mus qhuab qhia nyob hauv cov neeg.