1 Auj kheev lam kuv yog ib tug tim tswv, thiab muaj peev xwm ua tau li kuv lub siab xav, kheev lam kuv tawm tau mus thiab hais tau lus nrov cuag Vajtswv lub suab raj hlau, muaj ib lub suab ua rau lub ntiaj teb tshee hnyo, thiab tshaj tawm kev hloov siab lees txim rau txhua tus neeg!

2 Muaj tseeb tiag, kuv yuav tshaj tawm rau txhua tus neeg, ib yam li lub suab xob quaj, txog kev hloov siab lees txim thiab txoj hau kev txhiv dim, xwv kom lawv yuav hloov siab lees txim thiab los cuag peb tus Vajtswv, xwv kom tsis txhob muaj kev tu siab nyob rau hauv lub ntiaj teb ntxiv lawm.

3 Tiam sis saib seb, kuv yog ib tug neeg, thiab ua txhaum los ntawm kuv lub siab xav; vim kuv tsim nyog zoo siab rau tej uas tus Tswv tau pub rau kuv.

4 Tsis tsim nyog rau kuv rhuav tus Vajtswv uas ncaj ncees txoj lus tshaj tawm uas nyob ruaj nrees rau kuv lub siab xav, vim kuv paub tias nws yeej muab pub rau tib neeg raws li lawv lub siab xav, txawm hais tias mus rau kev tuag los sis mus rau txoj sia; muaj tseeb tiag, kuv paub tias nws pub rau tib neeg, muaj tseeb tiag, muab tej kev cai ruaj khov uas pauv tsis tau rau lawv, raws li lawv siab nyiam, txawm hais tias mus rau kev cawm seej los sis mus rau kev puas tsuaj.

5 Muaj tseeb tiag, thiab kuv paub tias qhov zoo thiab qhov phem twb los rau tib neeg txhua tus; tus uas tsis paub qhov zoo thiab qhov phem yuav tsis muaj txim; tiam sis tus uas paub qhov zoo thiab qhov phem, Vajtswv yuav muab rau tus ntawd raws li nws lub siab xav, txawm hais tias nws xav tau qhov zoo los sis qhov phem, xav tau txoj sia los sis kev tuag, xav tau kev xyiv fab los sis kev tu siab los ntawm kev paub qhov zoo thiab qhov phem.

6 Nim no, vim kuv twb paub tej yam no, vim li cas kuv ho xav tau ntau tshaj qhov uas kuv ua txoj hauj lwm uas Vajtswv tau hu kuv los ua?

7 Vim li cas kuv ho xav tias kheev lam kuv yog ib tug tim tswv, xwv kom kuv muaj peev xwm hais lus rau tag nrho tej neeg thoob ntiaj teb?

8 Vim saib seb, tus Tswv yeej pub rau txhua haiv neeg, ib txhia neeg yog los ntawm lawv haiv neeg thiab lawv yam lus, kom qhia nws txoj lus, muaj tseeb tiag, nrog laj lim tswv yim, tag nrho tej uas nws pom tias tsim nyog rau lawv tau; yog li ntawd peb pom tias tus Tswv qhuab qhia nrog laj lim tswv yim, raws li qhov uas ncaj thiab tseeb.

9 Kuv paub tej uas tus Tswv tau txib kom kuv ua, thiab kuv zoo siab ua tej ntawd. Kuv tsis yog zoo siab ntawm kuv tus kheej, tiam sis kuv zoo siab ua tej uas tus Tswv tau txib kom kuv ua; muaj tseeb tiag, thiab qhov no yog kuv txoj kev zoo siab, hais tias tej zaum kuv yuav ua tau zoo li ib rab cuab yeej nyob hauv Vajtswv txhais tes mus coj ib txhia neeg los rau txoj kev hloov siab lees txim; thiab qhov no yog kuv txoj kev xyiv fab.

10 Thiab saib seb, thaum kuv pom kuv cov kwv tij coob leej hloov siab lees txim tiag tiag, thiab los cuag tus Tswv lawv tus Vajtswv, thaum ntawd kuv tus ntsuj plig muaj kev xyiv fab puv npo; thaum ntawd kuv nco qab txog tej uas tus Tswv tau ua rau kuv, muaj tseeb tiag, nco txog qhov uas nws twb hnov kuv tej lus thov; muaj tseeb tiag, thaum ntawd kuv nco qab txog nws txhais npab hlub tshua uas nws tau cev tuaj rau kuv.

11 Muaj tseeb tiag, thiab kuv kuj nco qab txog kuv cov yawg koob txoj kev poob cev qhev; vim kuv paub tseeb tias tus Tswv tau tso lawv dim ntawm kev ua qhev, thiab los ntawm qhov no tau txhim tsa nws lub koom txoos; muaj tseeb tiag, tus Tswv uas yog Vajtswv, Anplaham tus Vajtswv, Ixaj tus Vajtswv, thiab Yakhauj tus Vajtswv, tau tso lawv dim ntawm kev ua qhev.

12 Muaj tseeb tiag, kuv yeej ib txwm nco qab txog kuv cov yawg koob txoj kev poob cev qhev; thiab tib tug Vajtswv uas tau tso lawv dim ntawm cov neeg Iyiv txhais tes tau tso lawv dim ntawm kev ua qhev.

13 Muaj tseeb tiag, thiab tib tug Vajtswv ntawd tau txhim tsa nws lub koom txoos nyob hauv lawv; muaj tseeb tiag, thiab tib tug Vajtswv ntawd tau siv ib txoj kev hu uas dawb huv hu kuv, los tshaj tawm txoj lus rau cov neeg no, tau muab kev vam meej ntau rau kuv, qhov ntawd ua rau kuv txoj kev xyiv fab puv npo.

14 Tiam sis kuv tsis yog xyiv fab rau kuv tus kheej txoj kev vam meej xwb, tiam sis kuv txoj kev xyiv fab puv ntau ntxiv vim yog txoj kev vam meej ntawm kuv cov kwv tij, cov uas tau mus rau pem thaj av Nifais.

15 Saib seb, lawv tau khwv heev, thiab ua tau rau tawg paj txi txiv ntau; thiab lawv tej nqi zog yuav tseem ceeb kawg nkaus!

16 Nim no, thaum kuv xav txog txoj kev vam meej ntawm kuv cov kwv tij no kuv tus ntsuj plig raug coj mus deb, zoo li nws twb ncaim ntawm lub cev mus, ua piv txwv, kuv txoj kev xyiv fab loj heev.

17 Thiab nim no thov Vajtswv pub rau kuv cov kwv tij no, kom lawv yuav tau zaum nyob hauv Vajtswv lub nceeg vaj; muaj tseeb tiag, thiab kuj pub rau tag nrho cov uas yog tej txiv ntoo uas txi los ntawm lawv tej kev khwv xwv kom lawv tsis txhob tawm mus ntxiv lawm, tiam sis kom lawv qhuas nws mus ib txhis. Thiab thov Vajtswv pub kom ua tau raws li kuv tej lus, twb zoo li kuv tau hais. Amees.