1 Thiab tau muaj tias vaj ntxwv Lamaunais hais kom nws cov tub qhe txav los sawv thiab ua tim khawv ntsig txog tag nrho tej uas lawv tau pom.

2 Thiab thaum lawv txhua tus tau ua tim khawv rau tej uas lawv tau pom, thiab nws tau kawm txog Amoos txoj kev rau siab ntso thaum ceev nws cov yaj, thiab txog Amoos lub hwj chim loj thaum tawm tsam cov uas nrhiav kev muab nws tua, ua rau nws xav tsis thoob heev kawg nkaus li, thiab hais tias: Muaj tseeb tiag, tus no tsis yog ib tug neeg xwb. Saib seb, tus no puas yog tus Ntsuj Plig uas Muaj Hwj Chim uas xa tej kev rau txim loj los rau cov neeg no, vim yog lawv tej kev tua neeg?

3 Thiab lawv teb tus vaj ntxwv, thiab hais tias: Txawm nws yog tus Ntsuj Plig uas Muaj Hwj Chim los sis yog neeg, peb tsis paub; tiam sis peb paub npaum li no, hais tias vaj ntxwv cov yeeb ncuab tsis muaj peev xwm tua tau nws; thiab lawv kuj tsis muaj peev xwm ua rau vaj ntxwv cov yaj tawg khiav thaum nws nrog peb nyob, vim yog nws txoj kev txawj thiab kev muaj zog heev; yog li ntawd, peb paub tias nws yog vaj ntxwv ib tug phooj ywg. Thiab nim no, auj vaj ntxwv es, peb tsis ntseeg tias ib tug neeg yuav muaj hwj chim loj npaum li ntawd, vim peb paub tias tsis muaj leej twg muaj peev xwm tua tau nws.

4 Thiab nim no, thaum tus vaj ntxwv hnov tej lus no, nws hais rau lawv tias: Nim no kuv paub tias twb yog tus Ntsuj Plig uas Muaj Hwj Chim; thiab nws tau nqis los rau lub sij hawm no los tshwj tseg nej txoj sia, xwv kom kuv txhob muab nej tua ib yam li kuv tau ua rau nej cov kwv tij. Nim no tus no yeej yog tus Ntsuj Plig uas Muaj Hwj Chim uas peb cov yawg koob tau hais txog.

5 Nim no qhov no yog txoj kab lis kev cai ntawm Lamaunais, uas nws tau txais los ntawm nws txiv, hais tias muaj ib tug Ntsuj Plig uas Muaj Hwj Chim. Txawm hais tias lawv ntseeg tias muaj ib tug Ntsuj Plig uas Muaj Hwj Chim los, lawv tseem xav tias txhua yam uas lawv ua yeej yog lawm; txawm li ntawd los, Lamaunais pib ntshai heev kawg nkaus li, ntshai tias nws tau ua txhaum thaum nws tua nws cov tub qhe;

6 Vim nws tau tua lawv coob leej vim yog lawv cov kwv tij tau ua rau lawv cov yaj tawg khiav nyob rau nram qhov chaw uas muaj dej; thiab xws li no, vim lawv tau cia lawv cov yaj tawg khiav lawv thiaj raug tua.

7 Nim no twb yog qhov uas cov Neeg Lamas no ib txwm ua tuaj sawv ntawm cov dej Xinpus thiab ua rau cov neeg cov yaj tawg khiav, xwv kom lawv thiaj yuav tav tau ntau tus uas tau tawg khiav mus rau tom lawv thaj av, vim lawv nyiam tua txeeb tej khoom.

8 Thiab tau muaj tias vaj ntxwv Lamaunais nug nws cov tub qhe, hais tias: Tus txiv neej uas muaj hwj chim loj ua luaj li no nyob qhov twg?

9 Thiab lawv hais rau nws tias: Saib seb, nws tab tom pub koj cov nees. Nim no ua ntej thaum cov tub qhe coj cov yaj mus haus dej, tus vaj ntxwv tau txib kom lawv npaj nws cov nees thiab cov tsheb nees luag, thiab coj nws mus rau tom thaj av Nifais; vim yuav muaj ib rooj noj rooj haus loj nyob tom thaj av Nifais, los ntawm Lamaunais txiv, tus uas yog vaj ntxwv kav tag nrho thaj av.

10 Nim no thaum vaj ntxwv Lamaunais hnov tias Amoos tab tom npaj nws cov nees thiab nws cov tsheb nees luag nws haj yam xav tsis thoob ntxiv, vim yog Amoos txoj kev ntseeg, hais tias: Muaj tseeb tiag tsis tau muaj ib tug tub qhe nyob hauv tag nrho kuv cov tub qhe uas yuav rau siab li tus txiv neej no; vim nws nco ntsoov ua tag nrho kuv tej lus txib.

11 Nim no kuv paub tseeb tias tus no yog tus Ntsuj Plig uas Muaj Hwj Chim, thiab kuv xav kom nws los cuag kuv, tiam sis kuv tsis muaj cuab kav.

12 Thiab tau muaj tias thaum Amoos npaj tiav cov nees thiab cov tsheb nees luag rau tus vaj ntxwv thiab nws cov tub qhe, nws mus cuag vaj ntxwv, thiab nws pom tias vaj ntxwv lub ntsej muag tau hloov; yog li ntawd nws yuav luag thim rov qab ntawm tus vaj ntxwv xub ntiag mus.

13 Thiab tus vaj ntxwv ib tug tub qhe hais rau nws tias, Lanpanas, uas txhais hais tias, tus uas muaj hwj chim heev los sis vaj ntxwv muaj hwj chim, vim lawv xav tias lawv cov vaj ntxwv muaj hwj chim; thiab xws li no nws hais rau nws tias: Lanpanas, tus vaj ntxwv xav kom koj nyob.

14 Yog li ntawd Amoos thiaj tig nws tus kheej mus rau tus vaj ntxwv, thiab hais rau nws tias: Koj xav kom kuv ua dab tsi rau koj, auj vaj ntxwv es? Thiab tus vaj ntxwv tsis teb nws ntev li ib teev, raws li lawv lub sij hawm, vim nws tsis paub xyov nws yuav hais dab tsi rau Amoos.

15 Thiab tau muaj tias Amoos hais rau nws ntxiv tias: Koj xav tau dab tsi ntawm kuv? Tiam sis tus vaj ntxwv tsis teb nws.

16 Thiab tau muaj tias Amoos, vim nws muaj Vajtswv tus Ntsuj Plig puv npo, yog li ntawd nws paub txog tus vaj ntxwv tej kev xav. Thiab nws hais rau tus vaj ntxwv tias: Puas yog vim koj hnov tias kuv tiv thaiv koj cov tub qhe thiab cov yaj, thiab siv txoj hlua fiav thiab rab ntaj tua lawv cov kwv tij tuag xya leej, thiab txiav lawv txhais caj npab, xwv kom thiaj li tiv thaiv tau koj cov yaj thiab koj cov tub qhe; saib seb, puas yog qhov no ua rau koj xav tsis thoob?

17 Kuv hais rau koj tias, yog dab tsi, uas koj xav tsis thoob ua luaj li? Saib seb, kuv yog ib tug neeg xwb, thiab yog koj tus tub qhe; yog li ntawd, txhua yam uas koj xav tau uas yog qhov yog, kuv yuav ua qhov ntawd.

18 Nim no thaum tus vaj ntxwv hnov tej lus no, nws rov qab xav tsis thoob dua, vim nws pom tias Amoos paub tau nws tej kev xav; tiam sis txawm li no los, vaj ntxwv Lamaunais tau qhib nws lub qhov ncauj, thiab hais rau nws tias: Koj yog leej twg? Koj puas yog tus Ntsuj Plig uas Muaj Hwj Chim ntawd, tus uas paub txhua yam?

19 Amoos teb thiab hais rau nws tias: Kuv tsis yog.

20 Thiab tus vaj ntxwv hais tias: Ua li cas koj ho paub tej kev xav hauv kuv lub siab? Koj cia li yeej meem hais tsis ntshai, thiab qhia kuv txog tej yam no; thiab qhia kuv saib los ntawm lub hwj chim dab tsi uas koj thiaj tua tau thiab txiav tau tej caj npab ntawm kuv cov kwv tij uas tau ua rau kuv cov yaj tawg khiav—

21 Thiab nim no, yog koj yuav qhia kuv txog tej yam no, koj xav tau dab tsi los kuv yuav muab rau koj; thiab yog hais tias tsim nyog, kuv yuav tso kuv cov tub rog saib xyuas koj; tiam sis kuv paub tias koj yeej muaj zog tshaj lawv sawv daws; txawm li ntawd los, koj xav tau dab tsi ntawm kuv los kuv yuav pub rau koj.

22 Nim no vim Amoos txawj ntse, tiam sis tsis muaj siab ua phem, nws hais rau Lamaunais hais tias: Koj puas yuav mloog kuv tej lus, yog tias kuv qhia rau koj tias kuv ua tej yam no los ntawm lub hwj chim dab tsi? Thiab qhov no yog qhov uas kuv xav tau ntawm koj.

23 Thiab tus vaj ntxwv teb nws, thiab hais tias: Muaj tseeb tiag, kuv yuav ntseeg tag nrho koj tej lus. Thiab Amoos ua li no ua rau Lamaunais yuav mloog nws tej lus.

24 Thiab Amoos pib hais rau nws yam li tsis ntshai, thiab hais rau nws tias: Koj puas ntseeg hais tias muaj ib tug Vajtswv?

25 Thiab nws teb, thiab hais rau Amoos tias: Kuv tsis paub xyov qhov ko txhais li cas.

26 Ces Amoos hais tias: Koj puas ntseeg hais tias muaj ib tug Ntsuj Plig uas Muaj Hwj Chim?

27 Thiab nws hais tias, Ntseeg.

28 Thiab Amoos hais tias: Tus no yog Vajtswv. Thiab Amoos hais rau nws dua hais tias: Koj puas ntseeg tias tus Ntsuj Plig uas Muaj Hwj Chim no, uas yog Vajtswv, tsim txhua yam uas yog nyob saum ntuj ceeb tsheej thiab hauv lub ntiaj teb?

29 Thiab nws hais tias: Ntseeg, kuv ntseeg tias nws tsim txhua yam uas yog nyob hauv lub ntiaj teb; tiam sis kuv tsis paub txog lub ntuj ceeb tsheej.

30 Thiab Amoos hais rau nws tias: Lub ntuj ceeb tsheej yog qhov chaw uas Vajtswv thiab tag nrho nws cov tim tswv dawb huv nyob.

31 Thiab vaj ntxwv Lamaunais hais tias: Lub ntuj ceeb tsheej puas yog nyob lub ntiaj teb sab saud?

32 Thiab Amoos hais tias: Yog, thiab Vajtswv yeej nyob saud ntsia ntsoov tag nrho noob neej; thiab nws paub tag nrho yus tej kev xav thiab tej uas yus lub siab xav ua; vim nws txhais tes tau tsim tag nrho noob neej txij thaum chiv keeb los.

33 Thiab vaj ntxwv Lamaunais hais tias: Kuv ntseeg txhua yam no uas koj tau hais. Puas yog Vajtswv xa koj los?

34 Amoos hais rau nws tias: Kuv yog ib tug neeg xwb; thiab thaum chiv keeb Vajtswv tsim tib neeg muaj yam ntxwv zoo li nws, thiab nws tau hu kuv los ntawm nws tus Ntsuj Plig Dawb Huv tuaj qhia tej yam no rau cov neeg no, xwv kom yuav coj tau lawv los paub txog qhov uas ncaj thiab tseeb;

35 Thiab ib feem ntawm tus Ntsuj Plig ntawd nyob hauv kuv, uas muab kev txawj ntse, thiab hwj chim rau kuv raws li kuv txoj kev ntseeg thiab kev xav tau uas yog los ntawm Vajtswv.

36 Nim no thaum Amoos hais tej lus no tas lawm, nws pib hais txog thaum tsim lub ntiaj teb, thiab thaum tsim Adas, thiab qhia txhua yam rau nws ntsig txog tib neeg txoj kev poob, thiab piav qhia thiab muab nthuav rau ntawm nws xub ntiag tej ceev xwm txheej thiab tej vaj lug kub dawb huv ntawm cov neeg, uas cov yaj saub tau hais txog, twb los txog rau lub sij hawm thaum lawv tus yawg koob, Lihais, ncaim Yeluxalees.

37 Thiab nws kuj piav qhia rau lawv (rau tus vaj ntxwv thiab nws cov tub qhe) tag nrho tej kev tsiv ntawm lawv cov yawg koob nyob hauv hav zoov, thiab tag nrho lawv tej kev tshaib plab thiab nqhis dej, thiab lawv txoj kev txom nyem, thiab lwm yam.

38 Thiab nws kuj piav qhia rau lawv txog Lamas thiab Lemu-ees, thiab Ixama-ees cov tub tej kev ntxeev siab, muaj tseeb tiag, nws qhia tag nrho lawv tej kev ntxeev siab rau lawv; thiab nws piav meej rau lawv txog tag nrho tej ceev xwm txheej thiab tej vaj lug kub txij lub sij hawm thaum Lihais ncaim Yeluxalees los txog rau lub sij hawm no.

39 Tiam sis tsis tas li no xwb; vim nws piav meej rau lawv txog txoj hau kev txhiv dim, uas tau npaj txij thaum ntuj tsim teb raug los; thiab nws kuj ua rau lawv paub txog Khetos txoj kev los, thiab nws ua rau lawv paub txog tag nrho tej yam uas tus Tswv ua.

40 Thiab tau muaj tias tom qab nws tau hais txhua yam no, thiab tau piav txhua yam no rau tus vaj ntxwv, tus vaj ntxwv ntseeg tag nrho nws tej lus.

41 Thiab tus vaj ntxwv pib thov tus Tswv, hais tias: Auj tus Tswv es, thov muaj kev hlub tshua; raws li koj txoj kev hlub tshua nplua mias uas koj tau muaj rau cov neeg Nifais, thov muaj kev hlub tshua rau kuv, thiab kuv cov neeg.

42 Thiab nim no, thaum nws hais li no, nws vau rau hauv av, zoo ib yam li nws tuag lawm.

43 Thiab tau muaj tias nws cov tub qhe coj nws thiab ris nws mus cuag nws tus poj niam, thiab muab nws pw rau saum ib lub txaj; thiab nws pw zoo li nws tuag lawm tau ob hnub thiab ob hmos; thiab nws tus poj niam, thiab nws cov tub, thiab nws cov ntxhais quaj ntsuag txog nws, raws li cov Neeg Lamas txoj kev cai, quaj nyiav heev rau nws txoj kev tuag.