1 Thiab nim no tau muaj tias tom qab Amoos cov neeg mus nyob tus rau hauv thaj av Yesoos, thiab txhim tsa ib lub koom txoos nyob hauv thaj av Yesoos, thiab tau tso cov Neeg Nifais tej tub rog mus nyob ib puag ncig thaj av Yesoos, muaj tseeb tiag, nyob tag nrho rau tej ciam teb ib ncig thaj av Xalahelas; saib seb cov Neeg Lamas cov tub rog tau raws lawv cov kwv tij qab tuaj rau tom hav zoov.

2 Thiab yog li ntawd tau muaj ib npluav rog hnyav heev; muaj tseeb tiag, twb yog ib npluav rog uas tsis tau muaj dua nyob hauv tag nrho cov neeg hauv thaj av txij thaum Lihais ncaim Yeluxalees; muaj tseeb tiag, thiab kaum tawm txhiab ntawm cov Neeg Lamas raug tua thiab tawg khiav ri niab mus thoob plaws.

3 Muaj tseeb tiag, thiab cov Neeg Nifais kuj raug tua tuag coob leej; txawm li ntawd los, cov Neeg Lamas raug raws thiab tawg khiav ri niab, thiab cov Neeg Nifais rov qab los rau lawv thaj av.

4 Thiab nim no lub caij no yog ib lub caij uas muaj ib txoj kev nyiav thiab kev quaj ntsuag nrov uas hnov mus thoob plaws tag nrho thaj av, nyob hauv tag nrho cov Neeg Nifais—

5 Muaj tseeb tiag, tej poj ntsuam quaj ntsuag txog lawv tej txiv, thiab tej txiv quaj ntsuag txog lawv tej tub, thiab tus ntxhais quaj ntsuag txog tus nus, muaj tseeb tiag, tus tub quaj ntsuag txog leej txiv; thiab xws li no, tag nrho cov neeg yeej hnov txoj kev quaj ntsuag, quaj ntsuag txog lawv tej txheeb ze uas raug tua.

6 Thiab nim no lub caij no yog ib lub caij uas tu siab tiag tiag; muaj tseeb tiag, ib lub caij uas hnyav siab, thiab ib lub caij uas lawv yoo mov thiab thov Vajtswv heev.

7 Thiab xyoo thib kaum tsib ntawm cov neeg txiav txim txoj kev kav cov Neeg Nifais tau xaus li no;

8 Thiab zaj no yog hais txog Amoos thiab nws cov kwv tij, lawv tej kev mus rau hauv thaj av Nifais, lawv tej kev nyuaj siab nyob hauv thaj av, lawv tej kev tu siab, thiab lawv tej kev txom nyem, thiab lawv txoj kev xyiv fab uas tsis muaj peev xwm to taub, thiab txoj kev txais tos thiab txoj kev tiv thaiv Amoos cov neeg nyob hauv thaj av Yesoos. Thiab nim no thov tus Tswv, tib neeg sawv daws tus Txhiv Dim, foom koob hmoov rau lawv tus ntsuj plig mus ib txhis li.

9 Thiab zaj no hais txog tej kev ua rog thiab tej kev sib cav sib ceg nyob hauv cov Neeg Nifais, thiab tej kev ua rog ntawm cov Neeg Nifais thiab cov Neeg Lamas; thiab tau xaus xyoo thib kaum tsib ntawm cov neeg txiav txim txoj kev kav.

10 Thiab txij li xyoo thib ib mus txog xyoo thib kaum tsib tau muaj kev puas tsuaj rau ntau txhiab leej txoj sia; muaj tseeb tiag, lub caij ntawd tau muaj ib qho nqaij ntuag ntshav nrog uas phem heev.

11 Thiab tau muab ntau txhiab leej lub cev faus rau hauv av, thiab muaj ntau txhiab leej tej cev tab tom lwj tsus rau saum npoo av; muaj tseeb tiag, thiab ntau txhiab leej tab tom quaj ntsuag txog lawv tej txheeb ze uas tau tuag, vim yeej tsim nyog rau lawv ntshai, raws li Vajtswv tej lus cog tseg, hais tias lawv twb raug xa mus rau ib qho chaw txom nyem uas tsis muaj qhov kawg.

12 Thiab lwm tus ntau txhiab leej kuj quaj ntsuag txog lawv tej txheeb ze uas tau tuag, txawm li ntawd los lawv xyiv fab thiab zoo siab vim muaj kev cia siab, thiab yeej paub, raws li tus Tswv tej lus cog tseg; hais tias Vajtswv muab lawv tsa sawv los nyob ntawm Vajtswv sab tes xis, muaj kev zoo siab uas tsis muaj qhov kawg.

13 Thiab yog li ntawd peb pom tias qhov uas tib neeg tsis sib npaug loj npaum li cas vim muaj kev txhaum thiab kev ua txhaum, thiab tus dab phem lub hwj chim, uas yog los ntawm tej tom txwv uas nws tau ntaus tswv yim los cuab tib neeg lub siab.

14 Thiab yog li no peb pom qhov uas sib sib zog hu kom tib neeg rau siab ntso ua hauj lwm nyob hauv tus Tswv lub vaj txiv hmab; thiab yog li no peb pom lub ntsiab ntawm kev tu siab, thiab ntawm kev xyiv fab—tu siab vim yog txoj kev tuag thiab txoj kev puas tsuaj ntawm tib neeg, thiab xyiv fab vim yog Khetos txoj kev kaj mus rau txoj sia.