1 Thiab nim no tau muaj tias kuv tau txais ib tsab ntawv ntawm Amauloos, tus uas yog vaj ntxwv, hais tias yog kuv tso cov neeg raug txhom hauv hav rog uas peb txhom tau ces nws yuav muab lub nroog Eethiphalas rau peb.

2 Tiam sis kuv xa ib tsab ntawv mus rau tus vaj ntxwv hais tias, peb paub tseeb tias peb cov tub rog yeej coob txaus uas yuav txeeb tau lub nroog Eethiphalas los ntawm peb lub zog; thiab qhov uas kom peb tso cov neeg raug txim los pauv lub nroog ntawd peb xav hais tias tsis yog tswv yim zoo, thiab hais tias yog muab neeg raug txim sib pauv peb thiaj yuav tso peb cov neeg raug txim xwb.

3 Thiab Amauloos tsis kam ua li kuv tsab ntawv, vim nws tsis kam sib pauv cov neeg raug txim; yog li ntawd peb thiaj pib npaj mus tawm tsam lub nroog Eethiphalas.

4 Tiam sis cov neeg hauv Eethiphalas tau tawm hauv lub nroog mus, thiab khiav mus rau lawv lwm lub nroog, uas lawv txeeb tau, mus ua kom cov nroog ntawd ruaj khov; thiab xws li no lub nroog Eethiphalas tau poob rau hauv peb txhais tes.

5 Thiab xyoo thib nees nkaum yim ntawm cov neeg txiav txim txoj kev kav tau xaus li no.

6 Thiab tau muaj tias nyob rau thaum pib ntawm xyoo thib nees nkaum cuaj, peb tau txais ib co khoom noj khoom siv, thiab kuj tau txais neeg ntxiv rau peb cov tub rog, los ntawm thaj av Xalahelas, thiab los ntawm tej thaj av uas nyob ib ncig, txog li rau txhiab leej neeg, twb tsis suav rau caum leej ntawm cov neeg Amoos cov tub uas tau tuaj koom lawv cov kwv tij, uas yog kuv pab hluas ob txhiab leej. Thiab nim no saib seb, peb muaj zog, muaj tseeb tiag, thiab kuj muaj khoom noj khoom siv ntau xa tuaj rau peb.

7 Thiab tau muaj tias peb xav ua ib npluav rog nrog pab tub rog uas Amauloos tau muab tso pov hwm lub nroog Khumenais.

8 Thiab nim no saib seb, kuv yuav qhia rau koj tias tsis ntev no peb twb yuav ua tau raws li peb siab xav; muaj tseeb tiag, nrog peb pab tub rog muaj zog, los sis nrog ib feem ntawm peb pab tub rog muaj zog, peb tau vij lub nroog Khumenais, thaum hmo ntuj, ib nyuag ua ntej thaum lawv yuav tau txais ib co khoom noj khoom siv.

9 Thiab tau muaj tias peb rub yeej pw ncig lub nroog tau ntau hmo; tiam sis peb pw puag rawv peb cov ntaj, thiab tso neeg zov, kom cov Neeg Lamas tsis muaj peev xwm tuaj tawm tsam peb thaum hmo ntuj thiab tua peb, qhov uas lawv twb sim ua ntau zaus; tiam sis ntau zaus npaum li uas lawv sim ua li no lawv tej ntshav tau nrog.

10 Ntev loo lawv tej khoom noj khoom siv tau tuaj txog, thiab lawv tab tom yuav luag nkag mus rau hauv lub nroog thaum hmo ntuj. Thiab peb, ntxim li yog cov Neeg Lamas, tiam sis ho yog cov Neeg Nifais; yog li ntawd, peb muab lawv txhom thiab txeeb tau lawv tej khoom noj khoom siv.

11 Thiab txawm tias cov Neeg Lamas raug txiav ntawm lawv tej kev pab zoo li no los, lawv tseem txiav txim siab yuav tswj tuav lub nroog; yog li ntawd thiaj tsim nyog tias peb yuav tsum muab cov khoom noj khoom siv ntawd xa mus rau tom Yudais, thiab xa peb cov neeg raug txim mus rau tom thaj av Xalahelas.

12 Thiab tau muaj tias twb tsis muaj pes tsawg hnub tom qab ntawd cov Neeg Lamas pib poob tag nrho kev cia siab tias yuav txais kev pab; yog li ntawd lawv thiaj tso lub nroog rau peb tes; thiab yog li ntawd peb ua tau raws li peb lub tswv yim kom txeeb tau lub nroog Khumenais.

13 Tiam sis tau muaj tias peb cov neeg raug txim coob heev, txawm hais tias peb cov neeg twb muaj coob kawg los, peb tseem tau siv tag nrho peb pab tub rog los ceev lawv, los sis muab lawv tua kom tuag.

14 Vim saib seb, lawv muaj coob leej uas pheej tsoo khiav tawm, thiab siv pob zeb los sib ntaus sib tua, thiab siv qws, los sis yam dab tsi uas lawv nrhiav tau los rau hauv lawv txhais tes, peb thiaj muab lawv tua tuag tshaj ob txhiab leej tom qab lawv tau nyoo swb los ua neeg raug txhom hauv hav rog.

15 Yog li ntawd thiaj li tsim nyog rau peb, kom peb txo lawv txoj sia, los sis zov khoo lawv, tuav rawv ntaj hauv txhais tes, mus kom txog nram thaj av Xalahelas; thiab peb tej khoom noj khoom siv los twb tsis ntau tshaj li uas txaus rau peb cov neeg, txawm hais tias suav tag nrho cov uas peb txeeb tau ntawm cov Neeg Lamas los.

16 Thiab nim no, nyob hauv lub caij uas plhom sij ntawd, yog ib qho uas nyuaj heev los txiav txim ntsig txog cov neeg raug txhom hauv hav rog no; txawm li ntawd los, peb tau txiav txim siab xa lawv mus rau nram thaj av Xalahelas; yog li ntawd peb xaiv ib co ntawm peb cov tub rog, thiab muab hauj lwm rau lawv kom coj peb cov neeg raug txim mus rau nram thaj av Xalahelas.

17 Tiam sis tau muaj tias hnub tom qab lawv tau rov qab los. Thiab nim no saib seb, peb twb tsis nug lawv ntsig txog cov neeg raug txim; vim saib seb, cov Neeg Lamas tau tuaj tua peb, thiab lawv tau rov qab los txog thaum lub sij hawm yog kom cawm peb dim ntawm kev poob rau hauv cov Neeg Lamas txhais tes. Vim saib seb, Amauloos tau xa ib co khoom noj khoom siv tshiab thiab ib pab tub rog coob heev tuaj pab lawv.

18 Thiab tau muaj tias cov neeg uas peb xa mus nrog cov neeg raug txim tau los txog thaum lub sij hawm yog kom los xyuas cov Neeg Lamas, thaum lawv yuav luag kov yeej peb.

19 Tiam sis saib seb, kuv pawg me nyuam hluas ob txhiab thiab rau caum leej sib ntaus sib tua yam sib zog kawg nkaus; muaj tseeb tiag, lawv ua khov kho rau ntawm cov Neeg Lamas, thiab muab kev tuag rau txhua tus uas tawm tsam lawv.

20 Thiab thaum peb cov tub rog uas seem tab tom yuav luag thim ntawm cov Neeg Lamas mus, saib seb, ob txhiab thiab rau caum leej ntawd ua khov kho thiab tsis ntshai li.

21 Muaj tseeb tiag, thiab lawv mloog lus thiab kam ua raws nraim li txhua lo lus txib; muaj tseeb tiag, thiab raws nraim li lawv txoj kev ntseeg Vajtswv twb tau ua li ntawd rau lawv; thiab kuv nco ntsoov cov lus uas lawv hais rau kuv uas lawv niam tau qhia lawv.

22 Thiab nim no saib seb, twb yog kuv cov tub no, thiab cov tub rog uas tau xaiv los saib cov neeg raug txim, lawv yog cov uas peb tshuav nqi rau ntawm txoj kev yeej loj no; vim lawv yog cov uas tua yeej cov Neeg Lamas; yog li ntawd cov Neeg Lamas thiaj raug raws rov qab mus rau lub nroog Meethais.

23 Thiab peb rov qab tau peb lub nroog Khumenais, thiab tsis raug puas tsuaj tag nrho los ntawm rab ntaj; txawm li ntawd los, peb muaj kev ploj tuag ntau heev.

24 Thiab tau muaj tias tom qab uas cov Neeg Lamas tau khiav lawm, tam sim ntawd kuv txib kom cia li nqa kuv cov tub rog uas tau raug mob tawm ntawm cov tuag mus, thiab hais kom muab lawv tej qhov txhab qhwv.

25 Thiab tau muaj tias muaj ob puas tus, ntawm kuv ob txhiab thiab rau caum leej, uas tau tsaus muag vim yog xiam ntshav; txawm li ntawd los, raws li Vajtswv txoj kev zoo, thiab qhov uas ua rau peb xav tsis thoob, thiab qhov uas ua rau tag nrho peb pab tub rog xyiv fab, lawv twb tsis muaj ib tug uas tuag li; muaj tseeb tiag, thiab lawv twb tsis muaj ib tug neeg uas tsis raug mob ntau.

26 Thiab nim no, qhov uas Vajtswv tsom kwm lawv ua rau tag nrho peb pab tub rog xav tsis thoob, muaj tseeb tiag, hais tias lawv tsis tuag tiam sis muaj ib txhiab leej ntawm peb cov kwv tij raug tua tuag. Thiab peb yeej hais yog lawm hais tias qhov no yog Vajtswv lub hwj chim ua txuj ci tseem ceeb, vim yog lawv txoj kev ntseeg loj heev rau tej uas lawv niam tau qhia kom lawv ntseeg—hais tias muaj ib tug Vajtswv uas ncaj, thiab tus uas ntseeg, ces nws lub hwj chim ua txuj ci tseem ceeb yuav tsom kwm tus ntawd.

27 Nim no cov uas kuv tau hais txog lawm los lawv txoj kev ntseeg zoo li no; lawv tseem hluas, thiab lawv lub siab yeej khov kho, thiab lawv yeej tso siab rau Vajtswv tsis tu ncua.

28 Thiab nim no tau muaj tias tom qab peb tau tu peb cov neeg raug mob tas zoo li no, thiab tau faus peb cov neeg tuag thiab cov Neeg Lamas cov neeg tuag, uas muaj coob heev, saib seb, peb tau nug Nkis ntsig txog cov neeg raug txim uas lawv tau pib nrog mus rau nram thaj av Xalahelas.

29 Nim no Nkis yog tus thawj hau rog saib xyuas pab tub rog uas raug tsa los coj lawv mus rau nram thaj av.

30 Thiab nim no, tej lus no yog tej uas Nkis hais rau kuv: Saib seb, peb pib mus rau nram thaj av Xalahelas nrog peb cov neeg raug txim. Thiab tau muaj tias peb mus ntsib peb cov tub rog cov neeg soj xyuas, uas cov thawj tub rog tau xa tawm mus saib cov Neeg Lamas lub yeej.

31 Thiab lawv qw rau peb, hais tias—Saib seb, cov Neeg Lamas cov tub rog tab tom taug kev mus rau tom lub nroog Khumenais; thiab saib seb, cov Neeg Lamas yuav mus tawm tsam lawv, muaj tseeb tiag, thiab yuav ua kom peb cov neeg puas tsuaj.

32 Thiab tau muaj tias peb cov neeg raug txim tau hnov lawv qw, uas ua rau lawv muaj siab loj; thiab lawv tau sawv ntxeev siab tawm tsam peb.

33 Thiab tau muaj tias vim yog lawv txoj kev ntxeev siab peb thiaj xuas peb cov ntaj tua lawv. Thiab tau muaj tias lawv khiav ua ib pab los rau ntawm peb cov ntaj, uas thaum ntawd, lawv feem coob thiaj raug tua; thiab lawv cov uas tseem tshuav tau txeem dhau thiab khiav ntawm peb mus lawm.

34 Thiab saib seb, thaum lawv khiav lawm thiab peb tsis muaj peev xwm caum tau lawv, peb thiaj taug kev nrawm nroos los rau tom lub nroog Khumenais; thiab saib seb, peb los txog ncaj sij hawm kom peb thiaj pab tau peb cov kwv tij tsom kwm lub nroog.

35 Thiab saib seb, Vajtswv rov qab cawm peb dim ntawm peb cov yeeb ncuab txhais tes. Thiab peb tus Vajtswv lub npe muaj yeeb koob; vim saib seb, nws twb yog tus uas cawm peb dim; muaj tseeb tiag, tus uas ua tej yam tseem ceeb heev no rau peb.

36 Nim no tau muaj tias thaum kuv, Hilamas, tau hnov Nkis tej lus no, kuv muaj kev xyiv fab ntau kawg nkaus vim yog Vajtswv txoj kev zoo uas tau tsom kwm peb, xwv kom peb txhua tus tsis txhob piam sij; muaj tseeb tiag, thiab kuv ntseeg tias cov uas raug tua tuag lawm tej ntsuj plig twb tau nkag mus rau hauv lawv tus Vajtswv qhov chaw so.