1 Thiab nim no tau muaj tias, tom qab kiag thaum Amalikhaiyas tau los ua vaj ntxwv lawm nws pib tshoov cov Neeg Lamas lub siab kom tawm tsam Nifais cov neeg; muaj tseeb tiag, nws tsa neeg los hais lus rau cov Neeg Lamas nyob saum lawv tej pej thuam, tawm tsam cov Neeg Nifais.

2 Thiab xws li no nws tshoov lawv lub siab kom tawm tsam cov Neeg Nifais, thaum yuav kawg ntawm xyoo thib kaum cuaj ntawm cov neeg txiav txim txoj kev kav, vim nws ua tau raws li nws lub tom txwv los txog txij no, muaj tseeb tiag, vim nws tau los ua vaj ntxwv kav cov Neeg Lamas, nws kuj nrhiav kev los kav tag nrho thaj av, muaj tseeb tiag, thiab kav tag nrho cov neeg uas nyob hauv thaj av, cov Neeg Nifais thiab cov Neeg Lamas.

3 Yog li ntawd nws ua tau raws li nws lub tom txwv, vim nws tau ua rau cov Neeg Lamas siab tawv thiab ua rau lawv tsis thoob tsib to nrog, thiab txhaub lawv kom npau taws, nws thiaj sau tau ib pab neeg coob heev mus ua rog tawm tsam cov Neeg Nifais.

4 Vim nws yeej txiav txim siab hais tias yuav kov yeej cov Neeg Nifais thiab coj lawv los ua qhev, vim nws muaj neeg coob heev kawg nkaus li.

5 Thiab yog li ntawd nws tsa cov Neeg Xaulas los ua cov thawj hau rog, vim lawv yog cov uas paub txog cov Neeg Nifais lub zog zoo, thiab lawv tej chaw tiv thaiv thiab tej chaw uas tsis muaj zog tshaj ntawm lawv tej nroog; yog li ntawd nws tsa cov Neeg Xaulas los ua cov thawj hau rog saib xyuas nws cov tub rog.

6 Thiab tau muaj tias lawv nqa lawv lub yeej, thiab txav tawm mus rau tom thaj av Xalahelas nyob hauv hav zoov.

7 Nim no tau muaj tias thaum Amalikhaiyas tab tom siv kev dag thiab kev ntxias ua kom tau hwj chim xws li no, Maulaunais, nyob rau sab tod, tau npaj cov neeg lub siab kom rau siab ntseeg tus Tswv lawv tus Vajtswv.

8 Muaj tseeb tiag, nws tau txhawb cov Neeg Nifais cov tub rog kom muaj zog, thiab tsa tej me nyuam yeej, los sis tej qhov chaw tiv thaiv; khawb kwj av ncig thaiv nws cov tub rog, thiab kuj puab phab ntsa pob zeb vij lawv, ib puag ncig ntawm lawv tej nroog thiab lawv tej ciam av; muaj tseeb tiag, ncig tag nrho thaj av.

9 Thiab nws tso neeg coob tshaj rau hauv lawv tej chaw tiv thaiv uas tsis muaj zog tshaj; thiab xws li no nws ua kom thaj av uas cov Neeg Nifais nyob ruaj khov thiab muaj zog tuaj.

10 Thiab xws li no nws tau npaj txhawb nqa lawv txoj kev ywj pheej, lawv tej av, lawv cov poj niam, thiab lawv cov me nyuam, thiab lawv txoj kev thaj yeeb, thiab xwv kom lawv yuav tau ua neej rau tus Tswv lawv tus Vajtswv, thiab xwv kom lawv yuav tswj tuav tau qhov uas lawv cov yeeb ncuab muab hu ua lub ntsiab cai ntawm cov ntseeg Khetos.

11 Thiab Maulaunais yog ib tug neeg muaj zog thiab muaj hwj chim; nws yog ib tug neeg uas to taub tag nrho; muaj tseeb tiag, ib tug neeg uas tsis nyiam nqaij ntuag ntshav nrog; ib tug neeg uas xyiv fab rau kev ywj siab thiab kev ywj pheej ntawm nws lub teb chaws, thiab nws cov kwv tij txoj kev dim ntawm kev raug txim thiab kev ua qhev;

12 Muaj tseeb tiag, ib tug neeg uas muaj lub siab puv npo ua nws tus Vajtswv tsaug, rau ntau yam kev muaj cai thiab koob hmoov uas nws muab rau nws cov neeg; ib tug neeg uas ua hauj lwm hnyav heev rau nws cov neeg txoj kev noj qab nyob zoo thiab kev nyab xeeb.

13 Muaj tseeb tiag, thiab nws yog ib tug neeg uas nyob ruaj nrees ntawm txoj kev ntseeg Khetos, thiab nws tau lav lus los tiv thaiv nws cov neeg, nws tej kev muaj cai, thiab nws lub teb chaws, thiab nws txoj kev teev ntuj, twb kom txog thaum nws ntshav nrog.

14 Nim no cov Neeg Nifais cov thawj coj qhia kom lawv tiv thaiv lawv tus kheej ntawm lawv cov yeeb ncuab, txawm tias nqaij ntuag ntshav nrog yog hais tias tsim nyog; muaj tseeb tiag, thiab lawv cov thawj coj kuj qhia kom lawv tsis txhob ua siab lwm tus, muaj tseeb tiag, thiab tsis txhob tsa rab ntaj tsuas yog tsa tawm tsam ib tug yeeb ncuab, tsuas yog ua li ntawd los tsom kwm lawv txoj sia.

15 Thiab qhov no yog lawv txoj kev ntseeg, hais tias los ntawm qhov ua li no Vajtswv yuav ua kom lawv vam meej nyob hauv thaj av, los yog hais tias, yog lawv rau siab ntso ua raws li Vajtswv tej lus txib ces nws yuav ua kom lawv vam meej nyob hauv thaj av; muaj tseeb tiag, ceeb toom kom lawv khiav, los sis kom npaj rau kev ua rog, raws li lawv tej kev plhom sij;

16 Thiab, Vajtswv kuj yuav ua rau lawv paub qhov chaw uas tsim nyog rau lawv mus tiv thaiv lawv tus kheej tawm tsam lawv cov yeeb ncuab, thiab yog tias yuav ua li no, tus Tswv yuav coj lawv dim; thiab qhov no yog Maulaunais txoj kev ntseeg, thiab nws lub siab zoo siab heev rau qhov ntawd; tsis yog rau txoj kev ua kom nqaij ntuag ntshav nrog tiam sis rau txoj kev ua zoo, rau txoj kev tsom kwm nws cov neeg, muaj tseeb tiag, rau txoj kev coj Vajtswv tej lus txib, muaj tseeb tiag, thiab tawm tsam txoj kev ua phem.

17 Muaj tseeb tiag, kuv hais tseeb tseeb rau nej tias, tag nrho tej neeg uas nyob yav tas los, thiab nyob nim no, thiab tseem yuav nyob lawm yav tom ntej, yog lawv zoo li Maulaunais, saib seb, ntshe ntuj txiag teb tsaus lub hwj chim twb yuav raug tshee hnyo mus ib txhis; muaj tseeb tiag, ntshe tus dab phem twb tsis muaj hwj chim kav noob neej lub siab ib zaug li.

18 Saib seb, nws yog ib tug neeg zoo li Amoos, Mauxiyas tus tub, muaj tseeb tiag, thiab zoo li Mauxiyas lwm cov tub, muaj tseeb tiag, thiab kuj zoo li Amas thiab nws cov tub, vim lawv txhua tus yog neeg ntawm Vajtswv.

19 Nim no saib seb, Hilamas thiab nws cov kwv tij yeej ua hauj lwm pab rau cov neeg npaum li Maulaunais; vim lawv tau tshaj tawm Vajtswv txoj lus, thiab lawv tau ua kev cai raus dej rau txoj kev hloov siab lees txim rau tag nrho txhua tus neeg uas mloog lawv tej lus.

20 Thiab xws li no lawv tau tawm mus, thiab cov neeg tau txo lawv lub hwj chim vim yog lawv tej lus, tus Tswv thiaj tau txhawb nqa lawv ntau heev, thiab yog li ntawd lawv tsis muaj kev ua rog thiab kev sib cav sib ceg nyob hauv lawv, muaj tseeb tiag, twb tsis muaj tau plaub xyoos.

21 Tiam sis, ib yam li kuv twb hais lawm, nyob rau thaum kawg ntawm xyoo thib kaum cuaj, muaj tseeb tiag, txawm tias lawv muaj kev thaj yeeb nyob hauv lawv tus kheej, lawv yeej tsis xav ua tiam sis lawv yuav tsum tawm tsam lawv cov kwv tij, cov Neeg Lamas.

22 Muaj tseeb tiag, thiab lub ntsiab yog li no, lawv tej kev ua rog nrog cov Neeg Lamas twb tsis tsum tau ntau xyoo, txawm hais tias lawv twb tsis xav ua.

23 Nim no, lawv tu siab tias yuav tau nqa cuab yeej ua rog tawm tsam cov Neeg Lamas, vim lawv tsis nyiam ua kom muaj nqaij ntuag ntshav nrog; muaj tseeb tiag, thiab tsis tas li no xwb—lawv tu siab tias lawv yog cov uas ua rau lawv cov kwv tij coob leej tas lub neej no mus rau hauv lub neej uas nyob mus ib txhis, uas twb npaj tsis tau txhij mus ntsib lawv tus Vajtswv.

24 Txawm li ntawd los, lawv yuav cia li tso lawv txoj sia tseg tsis tau, kom lawv cov poj niam thiab cov me nyuam raug tua los ntawm txoj kev lim hiam qus ntawm cov uas thaum ub yog lawv cov kwv tij, muaj tseeb tiag, thiab tau ntxeev siab tawm ntawm lawv lub koom txoos mus, thiab tau ncaim lawv mus thiab tau mus koom nrog cov Neeg Lamas ua kom lawv puas tsuaj.

25 Muaj tseeb tiag, lawv tiv tsis taus tias lawv cov kwv tij yuav zoo siab rau cov Neeg Nifais cov ntshav, thaum tseem muaj ib tug twg uas coj Vajtswv tej lus txib, vim tus Tswv lo lus cog tseg hais tias, yog lawv yuav ua raws li nws tej lus txib lawv yuav vam meej nyob hauv thaj av.