1 Nim no kuv tus me tub, nov yog tej yam ntxiv uas kuv yuav hais rau koj; vim kuv pom tias koj lub siab txhawj ntsig txog txoj kev sawv rov los ntawm cov tuag.

2 Saib seb, kuv hais rau koj tias, tsis muaj txoj kev sawv rov los—los sis, kuv yuav hais, los yog hais tias, lub cev uas txawj tuag no yuav tsis hloov los ua lub cev uas tsis txawj tuag, lub cev uas txawj lwj no yuav tsis hloov los ua lub cev uas tsis txawj lwj—kom txog thaum tom qab Khetos los tso.

3 Saib seb, nws ua kom cov tuag sawv rov los. Tiam sis saib seb, kuv tus me tub, txoj kev sawv rov los tseem tsis tau muaj. Nim no, kuv qhia ib qho uas neeg paub tsis txog rau koj; txawm li ntawd los, muaj ntau qhov txuj ci tseem ceeb uas neeg paub tsis txog uas tau muab khaws cia, xwv kom tsis txhob muaj neeg paub tsuas yog Vajtswv tus kheej xwb. Tiam sis kuv qhia rau koj ib qho uas kuv tau rau siab ntso thov Vajtswv xwv kom kuv paub—qhov ntawd yog ntsig txog txoj kev sawv rov los.

4 Saib seb, twb muaj ib lub sij hawm uas tau teem tseg uas txhua tus yuav sawv hauv qhov tuag rov los. Nim no thaum lub sij hawm no los tsis muaj leej twg paub; tiam sis Vajtswv paub lub sij hawm uas tau teem tseg.

5 Nim no, txawm tias yuav yog zaum ib, los sis zaum ob, los sis zaum peb, uas tib neeg yuav sawv hauv qhov tuag los, twb tsis tseem ceeb; vim Vajtswv paub tag nrho tej yam no; thiab kuv twb txaus siab paub tias muaj li no—hais tias twb muaj ib lub sij hawm uas tau teem tseg uas txhua tus yuav sawv hauv qhov tuag rov qab los.

6 Nim no yeej yuav muaj ib ntus ncua nyob nruab nrab ntawm lub caij tuag thiab lub caij ntawm txoj kev sawv rov los.

7 Thiab nim no kuv yuav nug tias tib neeg tus ntsuj plig mus nyob rau qhov twg txij thaum lub sij hawm tuag mus rau lub sij hawm uas tau teem tseg rau txoj kev sawv rov los?

8 Nim no txawm tias teem tau sij hawm rau neeg sawv los ntau tshaj ib zaug los twb tsis tseem ceeb; vim twb tsis yog tias txhua tus tib txhij tuag, thiab qhov no tsis tseem ceeb; txhua yam zoo li ib hnub rau Vajtswv, thiab tsuas yog tib neeg thiaj li suav sij hawm xwb.

9 Yog li ntawd, twb muaj ib lub sij hawm uas tau teem tseg rau tib neeg uas lawv yuav sawv hauv qhov tuag rov qab los; thiab muaj ib ntus ncua nyob nruab nrab ntawm lub caij tuag thiab txoj kev sawv rov los. Thiab nim no, hais txog lub caij no, tib neeg tus ntsuj plig yuav mus nyob rau qhov twg yog qhov uas kuv tau rau siab ntso thov tus Tswv kom paub; thiab qhov no yog qhov uas kuv paub.

10 Thiab thaum lub sij hawm los txog thaum uas txhua tus yuav sawv, thaum ntawd lawv yuav paub tias Vajtswv paub tag nrho tej sij hawm uas tau teem tseg rau tib neeg.

11 Nim no, hais txog qhov uas tus ntsuj plig mus nyob rau qhov twg thaum nruab nrab ntawm txoj kev tuag thiab txoj kev sawv rov los—Saib seb, ib tug tim tswv tau ua rau kuv paub tias, tag nrho tib neeg tej ntsuj plig, tom qab kiag thaum lawv ncaim ntawm lub cev uas txawj ploj txawj tuag no, muaj tseeb tiag, tag nrho tib neeg tej ntsuj plig, txawm tias lawv zoo los sis phem, yuav tau mus tsev mus cuag Vajtswv tus uas muab txoj sia rau lawv.

12 Thiab thaum ntawd yuav muaj tias, Vajtswv yuav txais tos cov uas ncaj ncees tej ntsuj plig mus nyob rau hauv ib qho chaw zoo siab, uas hu ua yeeb tsheej, ib qho chaw uas tau so, ib qho chaw uas muaj kev kaj siab lug, qhov chaw uas lawv yuav tau so ntawm tag nrho lawv tej teeb meem thiab tag nrho tej kev txhawj, thiab kev tu siab.

13 Thiab thaum ntawd yuav muaj tias, cov neeg phem tej ntsuj plig, muaj tseeb tiag, cov uas yog neeg phem—vim saib seb, lawv tsis muaj feem thiab tsis muaj xyuam ntawm tus Tswv tus Ntsuj Plig; vim saib seb, lawv xum xaiv ua tej yam phem tshaj xaiv ua tej yam zoo; yog li ntawd tus dab phem tus ntsuj plig tau nkag mus rau hauv lawv, thiab mus nyob hauv lawv tej tsev—thiab cov no yuav raug muab pov tawm mus rau qhov chaw tsaus ntuj nti; yuav muaj kev quaj, thiab kev nyiav, thiab muaj kev tom hniav qees, thiab qhov no vim yog lawv tus kheej tej kev ua phem, vim lawv raug ntxias txhom los ntawm tus dab phem lub siab nyiam.

14 Nim no qhov no yog qhov uas yuav raug cov neeg phem tej ntsuj plig, muaj tseeb tiag, nyob hauv txoj kev tsaus ntuj, thiab ib qho chaw uas phem heev, ntshai rawv nyob tsam Vajtswv txoj kev npau taws uas chim siab heev yuav los rau lawv; yog li ntawd lawv yuav nyob zoo li no, ib yam li cov ncaj ncees yuav nyob hauv yeeb tsheej, kom txog lub caij ntawm lawv txoj kev sawv rov los.

15 Nim no, muaj ib txhia to taub tias txoj kev zoo siab thiab txoj kev txom nyem ntawm tus ntsuj plig no, ua ntej txoj kev sawv rov los, twb yog thawj txoj kev sawv rov los. Muaj tseeb tiag, kuv xav tias kuj muab qhov no hu tau tias yog ib txoj kev sawv rov los, txoj kev sawv ntawm tus ntsuj los sis tus plig thiab qhov uas muab nws xa mus rau txoj kev zoo siab los sis txoj kev nyuaj siab, raws li tej lus uas tau hais lawm.

16 Thiab saib seb, twb tau hais lawm tias, muaj thawj txoj kev sawv rov los, ib txoj kev sawv rov los ntawm tag nrho cov uas tau muaj los, los sis cov uas nyob ziag no, los sis cov tseem yuav muaj, mus txog rau thaum Khetos sawv rov los.

17 Nim no, peb tsis txhob xav tias thawj txoj kev sawv rov los no, uas tau hais txog zoo li no, yuav yog txoj kev sawv rov los ntawm tej ntsuj plig thiab qhov uas muab lawv xa mus rau txoj kev zoo siab los sis txoj kev nyuaj siab. Koj tsis txhob xav tias qhov no yog txhais li no.

18 Saib seb, kuv hais rau koj tias, Tsis yog li ntawd; tiam sis qhov no txhais hais tias yog txoj kev rov sib sau ua ke ntawm lub cev thiab tus ntsuj plig, ntawm cov uas nyob txij thaum Adas lub caij nyoog los txog rau thaum Khetos sawv rov los.

19 Nim no, txawm tias tag nrho tej ntsuj plig thiab tej cev ntawm cov uas tau hais lawm yuav ua tib zaug rov sib sau los ua ke, tsis hais cov phem los sis cov ncaj ncees, kuv tsis hais; twb txaus lawm, uas kuv hais tias lawv tag nrho puav leej sawv los; los yog hais tias, lawv txoj kev sawv rov los xub muaj ua ntej txoj kev sawv rov los ntawm cov uas tuag tom qab Khetos txoj kev sawv rov los.

20 Nim no, kuv tus me tub, kuv tsis yog hais tias lawv txoj kev sawv rov los yog muaj rau thaum Khetos sawv rov los; tiam sis saib seb, kuv hais raws li kuv txoj kev xav tias, tus ntsuj plig thiab lub cev twb rov sib sau los ua ke, ntawm cov neeg ncaj ncees, thaum Khetos sawv rov los, thiab nws txoj kev nce mus rau saum ntuj ceeb tsheej.

21 Tiam sis txawm tias yog kiag thaum nws txoj kev sawv rov los los sis tom qab ntawd, kuv tsis hais; tiam sis kuv hais npaum li no tias, muaj ib ntus ncua nyob nruab nrab ntawm txoj kev tuag thiab txoj kev sawv rov los ntawm lub cev, thiab ib qho chaw zoo siab los sis nyuaj siab rau tus ntsuj plig nyob kom txog lub sij hawm uas Vajtswv tau teem tseg tias cov tuag yuav sawv los, thiab rov los sib sau ua ke, tus ntsuj plig thiab lub cev; thiab raug coj los sawv ntawm Vajtswv xub ntiag, thiab raug txiav txim raws li tej yam lawv ua.

22 Muaj tseeb tiag, qhov no yuav ua rau tej uas cov yaj saub tej qhov ncauj tau hais lawm txum tim rov qab los.

23 Tus ntsuj plig yuav txum tim rov qab los rau lub cev, thiab lub cev los rau tus ntsuj plig; muaj tseeb tiag, thiab txhais npab txhais ceg thiab lub pob qij txha yuav txum tim rov qab los rau nws lub cev; muaj tseeb tiag, ib txoj plaub hau saum taub hau xwb los yuav tsis ploj; tiam sis txhua yam yuav txum tim rov qab los rau lawv tej qub chaw thiab qub cev uas zoo tag nrho.

24 Thiab nim no, kuv tus me tub, qhov no yog txoj kev txum tim rov qab los uas cov yaj saub tej qhov ncauj tau hais—

25 Thiab thaum ntawd cov ncaj ncees yuav ci tuaj nyob hauv Vajtswv lub nceeg vaj.

26 Tiam sis saib seb, ib txoj kev tuag phem heev yuav los rau cov phem; vim lawv tuag ntawm tej uas yog ntsig txog kev ncaj ncees; vim lawv tsis huv, thiab tsis muaj leej twg uas tsis huv yuav muaj peev xwm tau Vajtswv lub nceeg vaj los ua nws tug; tiam sis lawv yuav raug ntiab tawm, thiab raug yuam kom noj tej txiv ntawm lawv tej kev khwv los sis lawv tej hauj lwm, uas tau ua phem; thiab lawv yuav haus tej txo ntawm lub khob dej iab.