1 Thiab tau muaj tias lawv tau tsum thiab thim ntawm cov Neeg Lamas mus deb me ntsis. Thiab Maulaunais hais rau Xelaheenas tias: Saib seb, Xelaheenas, xwv kom koj pom tias peb tsis yog cov neeg nyiam tua neeg. Koj yeej paub tias nej twb nyob hauv peb txhais tes, tiam sis peb tsis xav tua nej.

2 Saib seb, peb tsis tau tuaj ua rog tawm tsam nej xwv kom peb yuav ua tau rau nej ntshav nrog kom peb tau hwj chim; thiab peb kuj tsis xav coj ib tug twg mus rau tus quab ntawm kev ua qhev. Tiam sis qhov no twb yog lub hom phiaj uas nej tau tuaj tawm tsam peb; muaj tseeb tiag, thiab nej npau taws rau peb vim yog peb txoj kev teev ntuj.

3 Tiam sis nim no, nej twb pom tias tus Tswv nrog peb; thiab nej twb pom tias nws tau coj nej los rau hauv peb txhais tes. Thiab nim no kuv xav kom nej to taub hais tias tau muaj li no rau peb los twb vim yog peb txoj kev teev ntuj thiab peb txoj kev ntseeg Khetos. Thiab nim no nej twb pom tias nej tsis muaj peev xwm ua kom peb txoj kev ntseeg no puas tsuaj.

4 Nim no nej pom tias qhov no yog txoj kev ntseeg Vajtswv tiag tiag; muaj tseeb tiag, nej pom tias Vajtswv yuav pab cuam, thiab ceev, thiab tsom kwm peb, ntev npaum li uas peb rau siab ntseeg nws, thiab cia siab rau peb txoj kev ntseeg, thiab peb txoj kev teev ntuj; thiab tus Tswv yeej tsis cia kom peb raug puas tsuaj tsuas yog ntshai peb yuav poob mus rau kev ua txhaum thiab xyeej peb txoj kev ntseeg xwb.

5 Thiab nim no, Xelaheenas, kuv txib nej, los ntawm tus Vajtswv uas muaj hwj chim tag nrho ntawd lub npe, tus uas tau txhawb peb lub zog kom peb muaj zog dua nej, los ntawm peb txoj kev ntseeg, los ntawm peb txoj kev teev ntuj, thiab los ntawm peb tej kab ke teev tiam, thiab los ntawm peb lub koom txoos, thiab los ntawm txoj hauj lwm dawb huv uas peb yuav tsum ua rau peb cov poj niam thiab peb cov me nyuam, los ntawm txoj kev ywj pheej ntawd uas khi peb rau peb tej thaj av thiab peb lub teb chaws; muaj tseeb tiag, thiab los ntawm txoj kev tsom kwm Vajtswv txoj lus uas dawb ceev, uas yog lub hauv paus ntawm tag nrho peb txoj kev zoo siab; thiab los ntawm txhua yam uas peb hlub tshua tshaj plaws—

6 Muaj tseeb tiag, thiab tsis tas li no xwb; kuv txib nej los ntawm tag nrho nej tej kev ntshaw rau txoj sia, kom nej cia li muab nej tej cuab yeej ua rog rau peb, thiab peb yuav tsis ua kom nej ntshav nrog, tiam sis peb yuav tseg nej txoj sia, yog tias nej cia li khiav mus thiab txhob rov qab tuaj ua rog tawm tsam peb ntxiv lawm.

7 Thiab nim no, yog nej tsis ua li no, saib seb, nej nyob hauv peb txhais tes, thiab kuv yuav txib kuv cov tub rog kom lawv tawm tsam nej, thiab ua kom muaj tej qhov txhab ntawm kev tuag nyob hauv nej lub cev, kom nej yuav tu noob; thiab thaum ntawd peb yuav ntsia saib leej twg yuav muaj hwj chim kav cov neeg no; muaj tseeb tiag, peb yuav ntsia saib leej twg yuav raug coj mus rau hauv txoj kev ua qhev.

8 Thiab nim no tau muaj tias thaum Xelaheenas hnov tej lus hais no nws tau tawm los thiab muab nws rab ntaj thiab nws rab liag, thiab nws rab hneev rau hauv Maulaunais txhais tes, thiab hais rau nws tias: Saib seb, nov yog peb tej cuab yeej ua rog; peb yuav muab tej no rau nej, tiam sis peb yuav tsis kam cia peb tus kheej lav lus rau nej, uas peb paub hais tias peb yuav muab rhuav, thiab peb cov me nyuam los tib yam; tiam sis nqa peb tej cuab yeej ua rog mus, thiab cia peb ncaim mus rau hauv hav zoov; tsis li ntawd ces peb yuav tuav rawv peb cov ntaj, thiab yuav ua kom peb piam sij los sis ua kom peb yeej.

9 Saib seb, peb tsis ntseeg li nej ntseeg; peb tsis ntseeg hais tias Vajtswv yog tus uas tau muab peb tso rau hauv nej txhais tes; tiam sis peb ntseeg hais tias yog nej txoj kev txawj ntxias uas tau pov hwm nej kom tsis txhob raug peb cov ntaj. Saib seb, twb yog nej tej daim thaiv hauv siab thiab nej tej phiaj hlau uas tau pov hwm nej.

10 Thiab nim no thaum Xelaheenas hais cov lus no tas lawm, Maulaunais muab rab ntaj thiab tej cuab yeej ua rog, uas nws tau txais, rov rau Xelaheenas, thiab hais tias: Saib seb, peb yuav xaus txoj kev ua rog no.

11 Nim no kuv yuav tsis thim tej lus uas kuv tau hais lawm, yog li ntawd ib yam li tus Tswv muaj txoj sia nyob, nej yuav ncaim mus tsis tau tsuas yog nej yuav ncaim mus nrog kev lav lus hais tias nej yuav tsis rov qab tuaj ua rog tawm tsam peb ntxiv lawm. Nim no vim nej nyob hauv peb txhais tes peb yuav ua kom nej ntshav tshau lug rau hauv av, los sis nej yuav kam ua li tej uas kuv tau hais lawm.

12 Thiab nim no thaum Maulaunais hais tej lus no tas, Xelaheenas txais nws rab ntaj rov qab, thiab nws npau taws rau Maulaunais, thiab nws tib sas los xwv kom nws yuav tua tau Maulaunais; tiam sis thaum nws tsa hlo nws rab ntaj, saib seb, Maulaunais ib tug tub rog tib ntag ua rau rab ntaj poob rau hauv av, thiab rab ntaj lov ntawm tus ko; thiab nws kuj tib ntag rau Xelaheenas uas nws txiav tau Xelaheenas daim tawv taub hau poob rau hauv av. Thiab Xelaheenas tau thim ntawm lawv mus rau hauv nruab nrab ntawm nws cov tub rog.

13 Thiab tau muaj tias tus tub rog uas sawv ze ntawd, tus uas txiav tau Xelaheenas daim tawv taub hau, tsawv cov plaub hau khaws daim tawv taub hau hauv av los, thiab muab daim tawv taub hau tso rau saum nws rab ntsis ntaj, thiab muab tsa rau lawv, thiab hais nrog ib lub suab nrov nrov rau lawv tias:

14 Tib yam li daim tawv taub hau no tau poob rau hauv av, uas yog nej tus thawj daim tawv taub hau, tib yam li ntawd nej yuav vau rau hauv av tsuas yog nej yuav muab nej tej cuab yeej ua rog los thiab ncaim mus nrog ib txoj kev khi lus ntawm kev thaj yeeb.

15 Nim no muaj coob leej, thaum lawv hnov tej lus no thiab pom daim tawv taub hau uas nyob saum rab ntaj, lawv ntshai heev; thiab coob leej tau tawm los thiab muab lawv tej cuab yeej ua rog pov rau ntawm Maulaunais ko taw, thiab ua kev khi lus ntawm kev thaj yeeb. Thiab tag nrho cov uas ua kev kev khi lus Maulaunais thiab nws cov tub rog cia lawv ncaim mus rau hauv hav zoov.

16 Nim no tau muaj tias Xelaheenas npau taws heev, thiab nws txhaub nws cov tub rog uas tseem tshuav kom npau taws, kom tawm tsam cov Neeg Nifais sib zog tshaj ntxiv.

17 Thiab nim no Maulaunais npau taws, vim yog cov Neeg Lamas txoj kev tawv ncauj; yog li ntawd nws thiaj txib kom nws cov neeg tawm tsam lawv thiab tua lawv. Thiab tau muaj tias lawv pib tua lawv; muaj tseeb tiag, thiab cov Neeg Lamas sib tawm tsam nrog lawv cov ntaj thiab lawv lub dag zog.

18 Tiam sis saib seb, lawv daim tawv liab qab thiab lawv lub taub hau do qhib lug rau cov Neeg Nifais cov ntaj ntse; muaj tseeb tiag, saib seb lawv raug hno thiab raug tua, muaj tseeb tiag, thiab vau sai heev los ntawm cov Neeg Nifais tej ntaj; thiab lawv raug rhuav tshem, ib yam li Maulaunais tus tub rog tau hais tseg.

19 Nim no Xelaheenas, thaum nws pom tias lawv txhua tus twb yuav raug puas tsuaj, thov Maulaunais nrov nrov, cog lus tias nws thiab nws cov neeg yuav khi lus rau lawv, yog lawv yuav tseg lawv cov uas tseem tshuav txoj sia, cog lus tias lawv yuav tsis tuaj ua rog tawm tsam lawv ib zaug ntxiv lawm.

20 Thiab tau muaj tias Maulaunais hais kom tsum tes hauj lwm ntawm kev tuag nyob hauv cov neeg. Thiab nws tshem tej cuab yeej ua rog ntawm cov Neeg Lamas; thiab tom qab lawv ua kev khi lus ntawm kev thaj yeeb rau nws lawm Maulaunais thiab nws cov tub rog tso lawv ncaim mus rau hauv hav zoov.

21 Nim no twb tsis suav lawv cov tuag vim yog muaj coob heev; muaj tseeb tiag, lawv cov tuag muaj coob heev, ntawm cov Neeg Nifais thiab ntawm cov Neeg Lamas ob tog tib si.

22 Thiab tau muaj tias lawv muab lawv cov tuag pov rau hauv cov dej Xidoos, thiab lawv cov tuag tau ntws mus thiab nyob hauv qab thu dej hiav txwv.

23 Thiab cov Neeg Nifais cov tub rog, los sis Maulaunais cov, rov qab los rau lawv tej vaj tse thiab lawv thaj av.

24 Thiab xyoo thib kaum yim ntawm cov neeg txiav txim txoj kev kav cov Neeg Nifais tau xaus li no. Thiab xws li no tau xaus Amas phau ceev xwm txheej, uas yog muab sau rau saum Nifais cov phiaj.