1 Thiab nim no tau muaj tias Amas cov tub tawm mus rau hauv cov neeg, mus tshaj tawm txoj lus rau lawv. Thiab Amas, nws tus kheej, kuj so tsis taus thiab, thiab nws kuj mus thiab.

2 Nim no peb yuav tsis hais txog lawv tej kev tshaj tawm ntxiv lawm, tsuas yog tias lawv tshaj tawm txoj lus, thiab qhov tseeb, raws li qhov txiaj ntsim qhia tau tej yuav muaj los yav tom ntej thiab txais tau kev tshwm sim; thiab lawv qhuab qhia raws li Vajtswv tus txheej txheem dawb huv uas tau hu lawv los qhia.

3 Thiab nim no kuv rov qab hais ib zaj uas hais txog tej kev ua rog ntawm cov Neeg Nifais thiab cov Neeg Lamas; nyob hauv xyoo thib kaum yim ntawm cov neeg txiav txim txoj kev kav.

4 Vim saib seb, tau muaj tias cov Neeg Xaulas hloov los ua cov Neeg Lamas; yog li ntawd, nyob rau thaum pib ntawm xyoo thib kaum yim cov Neeg Nifais pom tias cov Neeg Lamas tab tom tuaj tawm tsam lawv; yog li ntawd lawv thiaj li npaj ua rog; muaj tseeb tiag, lawv muab lawv cov tub rog sau tuaj ua ke nyob hauv thaj av Yesoos.

5 Thiab tau muaj tias cov Neeg Lamas tuaj muaj txhiab txhiab leej; thiab lawv tuaj rau hauv thaj av Eethi-onas, uas yog cov Neeg Xaulas thaj av; thiab ib tug txiv neej uas muaj npe hu ua Xelaheenas yog lawv tus thawj.

6 Thiab nim no, vim cov neeg Amalej, ntawm lawv tus kheej, yog ib co neeg uas phem tshaj thiab tua neeg tshaj cov Neeg Lamas, yog li ntawd, Xelaheenas thiaj tsa cov thawj hau rog los kav cov Neeg Lamas, thiab tag nrho cov no puav leej yog cov neeg Amalej thiab cov Neeg Xaulas.

7 Nim no nws ua li no xwv kom nws yuav ua rau lawv tseem ntxub cov Neeg Nifais, kom nws yuav khoo tau lawv ua raws li nws lub tom txwv.

8 Vim saib seb, nws lub tom txwv yog txhaub kom cov Neeg Lamas npau taws tawm tsam cov Neeg Nifais; nws ua li no xwv kom nws yuav tau siv hwj chim loj kav lawv, thiab xwv kom nws yuav muaj hwj chim kav cov Neeg Nifais los ntawm qhov uas yuav coj lawv los rau hauv txoj kev poob cev qhev.

9 Thiab nim no cov Neeg Nifais lub hom phiaj ces yog los txhawb pab lawv tej av, thiab lawv tej tsev, thiab lawv cov poj niam, thiab lawv cov me nyuam, xwv kom lawv yuav tshwj tau lawv kom dim ntawm lawv cov yeeb ncuab txhais tes; thiab xwv kom lawv yuav tshwj tau lawv tej kev muaj cai thiab lawv tej cib fim, muaj tseeb tiag, thiab lawv txoj kev ywj pheej, xwv kom lawv tau teev tiam Vajtswv raws li lawv lub siab xav.

10 Vim lawv paub hais tias yog lawv poob mus rau hauv cov Neeg Lamas txhais tes, ces tus uas teev tiam Vajtswv raws li sab ntsuj plig thiab raws li qhov tseeb, tus Vajtswv uas tseeb thiab muaj sia nyob, cov Neeg Lamas yuav ua kom tus ntawd puas tsuaj.

11 Muaj tseeb tiag, thiab lawv kuj paub txog cov Neeg Lamas txoj kev ntxub heev rau lawv cov kwv tij, uas yog cov neeg Eethais-Nifais-Lihais, uas yog hu ua Amoos cov neeg—thiab lawv tsis kam nqa tej cuab yeej ua rog, muaj tseeb tiag, lawv tau khi lus tseg thiab lawv tsis kam rhuav kev khi lus ntawd—yog li ntawd, yog tias lawv poob mus rau hauv cov Neeg Lamas txhais tes lawv yuav raug puas tsuaj.

12 Thiab cov Neeg Nifais yeej tsis cia kom lawv raug puas tsuaj; yog li ntawd, lawv thiaj muab av rau lawv ua lawv qub txeeg qub teg.

13 Thiab cov neeg Amoos tau muab ib feem uas ntau ntawm lawv tej khoom rau cov Neeg Nifais txhawb pab lawv cov tub rog; thiab yog li ntawd cov Neeg Nifais, lawv tus kheej, yuav tsum tawm tsam cov Neeg Lamas, uas yog Lamas thiab Lemu-ees nkawd cov xeeb leej xeeb ntxwv, thiab Ixama-ees cov tub, thiab tag nrho cov uas tau tawm ntawm cov Neeg Nifais mus, uas yog cov neeg Amalej thiab cov Neeg Xaulas, thiab Nau-as cov pov thawj tej xeeb leej xeeb ntxwv.

14 Nim no cov xeeb leej xeeb ntxwv no coob heev, yuav luag, npaum li cov Neeg Nifais; thiab yog li ntawd cov Neeg Nifais yuav tsum sib tawm tsam nrog lawv cov kwv tij, twb kom txog thaum nqaij ntuag ntshav nrog.

15 Thiab tau muaj tias thaum cov Neeg Lamas cov tub rog tau sib sau ua ke nyob hauv thaj av Eethi-onas, saib seb, cov Neeg Nifais cov tub rog twb npaj txhij mus ntsib lawv nyob hauv thaj av Yesoos.

16 Nim no, tus thawj coj ntawm cov Neeg Nifais, los sis tus txiv neej uas cov nom tswv muab tsa los ua tus thawj hau rog coj cov Neeg Nifais—nim no tus thawj hau rog yog tus saib xyuas tag nrho cov Neeg Nifais tej tub rog—thiab nws lub npe hu ua Maulaunais;

17 Thiab Maulaunais yog tus saib xyuas, thiab tswj hwm tag nrho lawv tej kev ua rog. Thiab nws muaj nees nkaum tsib xyoos xwb thaum nws raug tsa los ua tus thawj hau rog saib xyuas cov Neeg Nifais cov tub rog.

18 Thiab tau muaj tias nws ntsib cov Neeg Lamas nyob hauv tej ciam teb ntawm Yesoos, thiab nws cov neeg nqa ntaj, thiab liag, thiab txhua yam cuab yeej ua rog.

19 Thiab thaum cov Neeg Lamas cov tub rog pom tias Nifais cov neeg, los sis pom tias Maulaunais, tau npaj nws cov neeg nrog tej daim thaiv hauv siab thiab nrog tej phiaj hlau thaiv caj npab, muaj tseeb tiag, thiab tej phiaj hlau tiv thaiv lawv taub hau thiab, thiab lawv kuj hnav tej ris tsho tuab tuab—

20 Nim no Xelaheenas cov tub rog twb npaj tsis tau ib yam dab tsi zoo li ntawd li; lawv tsuas yog muaj lawv tej ntaj thiab lawv tej liag, lawv tej hneev thiab lawv tej xub, lawv tej pob zeb thiab lawv tej hlua roj hmab; thiab lawv liab qab, tsuas yog muaj ib daig tawv vas lawv puab tais xwb; muaj tseeb tiag, txhua tus puav leej liab qab, tsuas tshuav cov Neeg Xaulas thiab cov neeg Amalej xwb.

21 Tiam sis lawv tsis hnav tej daim thaiv hauv siab, los sis tej phiaj hlau—yog li ntawd, lawv ntshai cov Neeg Nifais cov tub rog heev vim yog lawv tej cuab yeej ua rog, txawm tias lawv cov tub rog muaj coob tshaj ob peb npaug cov Neeg Nifais.

22 Saib seb, nim no tau muaj tias lawv tsis muaj cuab kav tuaj tawm tsam cov Neeg Nifais nyob hauv tej ciam teb Yesoos; yog li ntawd lawv thiaj li tawm ntawm thaj av Eethi-onas mus rau hauv hav zoov, thiab lawv ncig mus ncig los nyob hauv hav zoov, deb nyob ntawm hau dej ntawm tus dej Xidoos, xwv kom lawv yuav los tau rau hauv thaj av Meethais thiab txeeb kom tau thaj av; vim lawv tsis tau xav tias Maulaunais cov tub rog yuav paub tias lawv mus qhov twg lawm.

23 Tiam sis tau muaj tias, tam sim kiag thaum lawv tawm mus rau hauv hav zoov lawm Maulaunais xa neeg mus rau hauv hav zoov mus soj lawv lub yeej; thiab Maulaunais, vim nws paub txog Amas tej kev qhia tej yuav muaj los yav tom ntej, kuj xa ib co neeg mus cuag Amas, thov kom nws nug tus Tswv saib cov Neeg Nifais tej tub rog tsim nyog mus rau qhov twg es thiaj tiv thaiv tau lawv tus kheej ntawm cov Neeg Lamas.

24 Thiab tau muaj tias tus Tswv txoj lus tau los rau Amas, thiab Amas hais rau Maulaunais cov tub xa xov, hais tias cov Neeg Lamas cov tub rog tab tom mus ncig ib cheeb tsam nyob hauv hav zoov, xwv kom lawv yuav los tau rau hauv thaj av Meethais, kom lawv yuav pib tawm tsam tua feem uas tsis tshua muaj zog ntawm cov neeg. Thiab cov tub xa xov ntawd mus thiab coj tsab xov mus rau Maulaunais.

25 Nim no Maulaunais, tom qab nws tso nws ib txhia tub rog nyob hauv thaj av Yesoos, nyob tsam cov Neeg Lamas ib txhia ho los rau hauv thaj av thiab txeeb tau lub nroog, coj nws cov tub rog uas seem tshuav thiab mus rau hauv thaj av Meethais.

26 Thiab nws hais kom tag nrho cov neeg uas nyob ib cheeb tsam ntawm thaj av yuav tsum sau lawv tus kheej ua ke tuaj ua rog tawm tsam cov Neeg Lamas, tiv thaiv lawv tej av thiab lawv lub teb chaws, lawv tej kev muaj cai thiab lawv tej kev ywj siab; yog li ntawd lawv twb npaj txhij tos rau lub sij hawm thaum cov Neeg Lamas tuaj.

27 Thiab tau muaj tias Maulaunais hais kom nws cov tub rog nkaum nyob hauv lub hav uas yog nyob ze ntawm tus ntug dej Xidoos, uas yog nyob sab hnub poob ntawm tus dej Xidoos nyob hauv hav zoov.

28 Thiab Maulaunais tso neeg soj xyuas ib ncig, xwv kom nws paub thaum cov Neeg Lamas cov tub rog tuaj.

29 Thiab nim no, vim Maulaunais paub qhov uas cov Neeg Lamas xav ua, paub tias lawv xav ua kom lawv cov kwv tij puas tsuaj, los sis kom tau khoo lawv thiab coj lawv mus rau hauv kev ua qhev xwv kom lawv yuav txhim tsa tau ib lub teb chaws rau lawv tus kheej nyob thoob plaws hauv thaj av;

30 Thiab vim nws kuj paub tias cov Neeg Nifais tsuas yog xav tsom kwm lawv tej av, thiab lawv txoj kev ywj pheej, thiab lawv lub koom txoos, yog li ntawd nws xav tias nyaj tsis txhaum yog nws siv lub tom txwv tiv thaiv lawv; yog li ntawd, nws paub los ntawm nws cov neeg soj xyuas hais tias cov Neeg Lamas yuav tuaj txoj kev twg tuaj.

31 Yog li ntawd, nws faib nws cov tub rog thiab coj ib feem los rau hauv lub hav, thiab muab lawv zais rau sab hnub tuaj, thiab rau sab nram hav ntawm lub pov roob Lilas;

32 Thiab nws muab cov uas seem tshuav zais nyob hauv lub hav sab hnub poob, uas nyob rau sab hnub poob ntawm tus dej Xidoos, thiab ua li ntawd mus rau nram tej ciam teb ntawm thaj av Meethais.

33 Thiab xws li no tom qab tau muab nws cov tub rog tso raws li nws siab xav, nws tau npaj txhij yuav ntsib lawv.

34 Thiab tau muaj tias cov Neeg Lamas tau tuaj rau sab qaum teb ntawm lub pov roob, qhov uas Maulaunais tau muab ib feem ntawm nws cov tub rog zais.

35 Thiab thaum cov Neeg Lamas tau hla lub pov roob Lilas, thiab tuaj rau hauv lub hav, thiab pib hla tus dej Xidoos, cov tub rog uas tau muab zais rau sab nram hav ntawm lub pov roob, uas tus coj yog ib tug txiv neej lub npe hu ua Lihais, thiab nws coj nws cov tub rog tawm los thiab vij cov Neeg Lamas nyob rau sab hnub tuaj tom lawv qub qab.

36 Thiab tau muaj tias cov Neeg Lamas, thaum lawv pom cov Neeg Nifais tuaj tom lawv qub qab tuaj rau lawv, lawv tig rov qab thiab pib tawm tsam nrog Lihais cov tub rog.

37 Thiab tej tes hauj lwm ntawm kev tuag pib muaj rau ob tog, tiam sis yog liam sim tshaj rau cov Neeg Lamas, vim lawv txoj kev liab qab yeej qhib lug rau cov Neeg Nifais siv lawv tej ntaj thiab tej liag sib zog tua, uas ua rau lawv tuag yuav luag txhua zaus.

38 Hos nyob rau sab tod, nyob nyob ib chim kuj muaj ib tug Neeg Nifais tuag, los ntawm lawv cov ntaj thiab kev xiam ntshav, vim lawv hnav phiaj hlau thaiv tej feem tseem ceeb ntawm lub cev, los sis muaj cov phiaj hlau thaiv feem uas tseem ceeb ntawm lub cev thaum cov Neeg Lamas ntaus, los ntawm lawv tej daim thaiv hauv siab, thiab lawv tej phiaj hlau thaiv caj npab, thiab lawv tej phiaj thaiv taub hau; thiab xws li no cov Neeg Nifais ua tes hauj lwm ntawm kev tuag nyob hauv cov Neeg Lamas.

39 Thiab tau muaj tias cov Neeg Lamas pib ntshai, vim yog txoj kev puas tsuaj loj nyob hauv lawv, ua rau lawv pib khiav mus rau tom tus dej Xidoos.

40 Thiab Lihais thiab nws cov tub rog caum lawv mus; thiab Lihais muab lawv raws mus rau hauv cov dej Xidoos, thiab lawv hla cov dej Xidoos. Thiab Lihais kom nws cov tub rog nyob tim tus ntug dej Xidoos kom lawv tsis txhob hla.

41 Thiab tau muaj tias Maulaunais thiab nws cov tub rog ntsib cov Neeg Lamas nyob hauv lub hav, nyob sab ntug dej Xidoos tim ub, thiab pib tawm tsam lawv thiab tua lawv.

42 Thiab cov Neeg Lamas khiav ntawm lawv mus, mus rau thaj av Meethais; thiab lawv rov mus ntsib Maulaunais cov tub rog dua.

43 Nim no nyob rau zaum no cov Neeg Lamas sib zog tua heev kawg nkaus li; muaj tseeb tiag, ib txwm tsis tau paub tias cov Neeg Lamas yuav tua muaj zog thiab muaj peev xwm npaum li no, tsis tau muaj li, twb tsis tau muaj txij thaum chiv keeb los.

44 Thiab cov Neeg Xaulas thiab cov neeg Amalej, uas yog lawv cov thawj hau rog thiab cov thawj coj, thiab Xelaheenas, tus uas yog lawv tus thawj hau rog, los sis lawv tus thawj coj thiab thawj coj txib, tau txhawb zog rau lawv; muaj tseeb tiag, lawv sib ntaus sib tua zoo li tej zaj, thiab cov Neeg Nifais coob leej raug tua los ntawm lawv txhais tes, muaj tseeb tiag, vim lawv phua tau cov Neeg Nifais tej phiaj thaiv taub hau tawg ua ob sab, thiab lawv nkaug tshab cov Neeg Nifais ntau daim thaiv hauv siab, thiab lawv txiav tau cov Neeg Nifais coob leej txhais caj npab; thiab cov Neeg Lamas npau taws heev sib tua zoo li no.

45 Txawm li ntawd los, cov Neeg Nifais twb muaj ib qho uas zoo dua txhawb lawv zog, vim lawv tsis yog sib ntaus sib tua kom tau huab tais los sis kom muaj hwj chim tiam sis lawv sib ntaus sib tua rau lawv tej vaj tse thiab lawv tej kev ywj siab, lawv cov poj niam thiab lawv cov me nyuam, thiab tag nrho tej uas lawv muaj, muaj tseeb tiag, rau lawv tej kab ke teev tiam thiab lawv lub koom txoos.

46 Thiab lawv ua qhov uas lawv ntseeg hais tias yog txoj hauj lwm uas lawv yuav tsum ua rau lawv tus Vajtswv; vim tus Tswv tau hais rau lawv, thiab kuj hais rau lawv tej yawg koob, tias: Npaum li uas nej tsis yog tus xub ua txhaum, thiab tsis yog tus ua txhaum thib ob, nej yuav tsum tsis txhob cia nej tus kheej raug tua los ntawm nej tej yeeb ncuab txhais tes.

47 Thiab tus Tswv tau hais ntxiv tias: Nej yuav tsum tiv thaiv nej lub cuab lub yig txawm tias yuav ua rau nqaij ntuag ntshav nrog. Yog li ntawd vim qhov no cov Neeg Nifais thiaj sib ntaus sib tua nrog cov Neeg Lamas, tiv thaiv lawv tus kheej, thiab lawv tej cuab tej yig, thiab lawv tej av, lawv lub teb chaws, thiab lawv tej kev muaj cai, thiab lawv txoj kev teev ntuj.

48 Thiab tau muaj tias thaum Maulaunais cov neeg pom cov Neeg Lamas txoj kev chim thiab kev npau taws, lawv twb yuav luag thim thiab khiav ntawm lawv mus. Thiab Maulaunais, vim nws paub txog qhov uas lawv lub siab xav ua, thiaj xa tej lus no tawm mus thiab tshoov lawv lub siab nrog tej kev xav no—muaj tseeb tiag, tej kev xav txog lawv tej av, lawv txoj kev ywj siab, muaj tseeb tiag, lawv txoj kev ywj pheej kom tsis txhob ua qhev.

49 Thiab tau muaj tias lawv tig mus rau cov Neeg Lamas, thiab lawv koom ib lub suab thov tus Tswv lawv tus Vajtswv, rau lawv txoj kev ywj siab thiab lawv txoj kev ywj pheej kom tsis txhob ua qhev.

50 Thiab lawv pib sib zog tawm tsam cov Neeg Lamas; thiab nyob rau tib teev sij hawm ntawd uas lawv thov tus Tswv rau lawv txoj kev ywj pheej, cov Neeg Lamas pib khiav ntawm lawv mus; thiab lawv khiav mus rau tom cov dej Xidoos.

51 Nim no, cov Neeg Lamas muaj coob tshaj, muaj tseeb tiag, muaj coob tshaj ob npaug ntawm cov Neeg Nifais; txawm li ntawd los, lawv raug raws khiav ua rau lawv cia li sib sau los ua ib pab nyob hauv lub hav, nyob ntawm ntug dej ntawm tus dej Xidoos.

52 Yog li ntawd Maulaunais cov tub rog muab lawv vij tag, muaj tseeb tiag, twb nyob rau ob sab ntug dej tib si, vim saib seb, nyob rau sab hnub tuaj yog Lihais cov tub rog.

53 Yog li ntawd thaum Xelaheenas pom Lihais cov tub rog nyob sab hnub tuaj ntawm tus dej Xidoos, thiab Maulaunais cov tub rog nyob sab hnub poob ntawm tus dej Xidoos, pom tias cov Neeg Nifais muab lawv vij tag, lawv ntshai heev.

54 Nim no Maulaunais, thaum nws pom tias lawv ntshai, nws hais rau nws cov tub rog kom tsum tsis txhob ua rau lawv ntshav nrog.