1 Thiab nim no tau muaj tias nyob rau thaum pib ntawm xyoo thib nees nkaum cuaj ntawm cov neeg txiav txim, Amauloos xa xov mus rau Maulaunais thov kom nws sib pauv cov neeg raug txim.

2 Thiab tau muaj tias Maulaunais muaj kev zoo siab heev rau txoj kev thov no, vim nws xav cia tej khoom noj khoom siv, uas tau muab faib rau cov Neeg Lamas uas raug txim, muab txhawb pab nws cov neeg; thiab nws kuj xav tau nws cov neeg los pab dag zog rau nws cov tub rog.

3 Nim no cov Neeg Lamas txhom tau coob leej poj niam thiab me nyuam, thiab twb tsis muaj ib tug poj niam los sis ib tug me nyuam nyob hauv tag nrho Maulaunais cov neeg raug txim, los sis cov neeg raug txim uas Maulaunais txhom tau; yog li ntawd Maulaunais thiaj txiav txim siab siv tswv yim kom coj tau cov Neeg Nifais uas raug txim dim ntawm cov Neeg Lamas coob npaum li uas coj tau.

4 Yog li ntawd nws sau ib tsab ntawv, thiab muab rau Amauloos tus tub qhe nqa mus, tib tug uas tau nqa ib tsab ntawv tuaj rau Maulaunais. Nim no cov no yog cov lus uas nws sau rau Amauloos, hais tias:

5 Saib seb, Amauloos, kuv tau sau qee yam rau koj ntsig txog npluav rog no uas koj tau ua rau kuv cov neeg, los sis npluav rog uas koj tus tij laug tau ua tawm tsam lawv, thiab npluav rog uas koj tseem txiav txim siab yuav ua ntxiv tom qab uas nws tuag lawm.

6 Saib seb, kuv yuav qhia koj tej yam ntsig txog Vajtswv txoj kev txim lij, thiab rab ntaj ntawm nws txoj kev npau taws heev, uas dai kav nraim rau saum nej tsuas yog nej yuav hloov siab lees txim thiab thim nej cov tub rog mus rau nej tej av xwb, los sis mus rau thaj av uas nej nyob, uas yog thaj av Nifais.

7 Muaj tseeb tiag, kuv yuav qhia koj tej yam no yog koj muaj peev xwm mloog lawv; muaj tseeb tiag, kuv yuav qhia koj txog lub ntuj txiag teb tsaus uas phem heev ntawd uas tos ntsoov txais cov neeg tua neeg zoo li koj thiab koj cov kwv tij tau ua yav tas los, tsuas yog koj yuav hloov siab lees txim thiab thim koj tej tswv yim tua neeg, thiab rov qab nrog koj cov tub rog mus rau nej tej av.

8 Tiam sis ib yam li nej twb xyeej tej no ib zaug lawm, thiab tau sib ntaus sib tua tawm tsam tus Tswv cov neeg, tib yam li ntawd kuv xav tias nej yuav rov qab ua dua.

9 Thiab nim no saib seb, peb twb npaj txhij tos txais nej; muaj tseeb tiag, thiab tsuas yog koj thim koj tej hom phiaj, saib seb, nej yuav rub kom tus Vajtswv uas nej tau xyeej txoj kev npau taws poob los rau nej, twb yuav ua kom nej puas tsuaj huv tib si.

10 Tiam sis, ib yam li tus Tswv muaj txoj sia nyob, peb cov tub rog yuav tuaj tua nej tsuas yog nej thim xwb, thiab tsis ntev kev tuag yuav los xyuas nej, vim peb yuav rov muab peb tej nroog thiab peb tej av; muaj tseeb tiag, thiab peb yuav txhawb nqa peb txoj kev teev ntuj thiab lub ntsiab ntawm peb tus Vajtswv.

11 Tiam sis saib seb, kuv xav tias kuv hais rau koj txog tej yam no twb tsis muaj qab hau dab tsi; los sis kuv xav tias koj yog ib tug me nyuam ntawm ntuj txiag teb tsaus; yog li ntawd kuv yuav xaus kuv tsab ntawv los ntawm qhov qhia koj tias kuv yuav tsis kam sib pauv cov neeg raug txim, tsuas yog tias koj yuav tso ib tug txiv neej thiab nws tus poj niam thiab nws cov me nyuam, pauv ib tug neeg raug txim xwb; yog koj kam ua li no, kuv thiaj yuav kam pauv.

12 Thiab saib seb, yog koj tsis kam ua li no, kuv yuav tuaj tawm tsam nej nrog kuv cov tub rog; muaj tseeb tiag, kuv yeej yuav muab cuab yeej ua rog rau kuv cov poj niam thiab kuv cov me nyuam thiab kuv yuav tuaj tawm tsam nej, thiab kuv yuav raws nej kom mus txog ntua nej thaj av, uas yog thaj av ntawm peb thawj qhov qub txeeg qub teg; muaj tseeb tiag, thiab yuav yog ntshav pauj ntshav, muaj tseeb tiag, siav pauj siav; thiab kuv yuav ua rog rau nej kom txog thaum nej puas tsuaj tawm ntawm lub ntiaj teb no mus.

13 Saib seb, kuv npau taws, thiab kuv cov neeg los tib yam; nej tau nrhiav tua peb, thiab peb tsuas yog nrhiav kev tiv thaiv peb tus kheej xwb. Tiam sis saib seb, yog nej nrhiav ua kom peb puas tsuaj ntxiv peb yuav nrhiav ua kom nej puas tsuaj; muaj tseeb tiag, thiab peb yuav nrhiav peb thaj av, thaj av uas yog peb qub txeeg qub teg thaum xub thawj.

14 Nim no kuv xaus kuv tsab ntawv. Kuv yog Maulaunais; kuv yog ib tug thawj coj ntawm Nifais cov neeg.

15 Nim no tau muaj tias, thaum nws tau txais tsab ntawv no, Amauloos npau taws; thiab nws sau dua ib tsab ntawv tuaj rau Maulaunais, thiab nov yog cov lus uas nws sau, hais tias:

16 Kuv yog Amauloos, cov Neeg Lamas tus vaj ntxwv; kuv yog Amalikhaiyas, tus uas nej muab tua lawm, tus kwv. Saib seb, kuv yuav pauj nws cov ntshav rau nej, muaj tseeb tiag, thiab kuv yuav tuaj tawm tsam nej nrog kuv cov tub rog vim kuv tsis ntshai koj tej lus hem.

17 Vim saib seb, nej cov yawg koob tau ua txhaum lawv cov kwv tij, npaum li uas lawv txhav txoj cai los kav cov neeg tiam sis txoj cai ntawd twb yog lawv cov kwv tij li.

18 Thiab nim no saib seb, yog nej yuav tso nej tej cuab yeej ua rog, thiab ywj nej tus kheej rau cov uas muaj cai los kav, ces kuv yuav hais kom kuv cov neeg tso tseg lawv tej cuab yeej ua rog thiab tsum tsis ua rog ntxiv lawm.

19 Saib seb, koj tau hais tawm ntau lo lus hem tawm tsam kuv thiab kuv cov neeg; tiam sis saib seb, peb tsis ntshai koj tej lus hem.

20 Txawm li ntawd los, kuv yuav kam sib pauv cov neeg raug txim raws li koj hais, zoo siab hlo, xwv kom kuv yuav tshwj tau kuv tej zaub mov rau kuv cov neeg ua rog; thiab peb yuav ua ib npluav rog uas tsis muaj hnub kawg, kom khoo tau cov Neeg Nifais los rau peb txoj cai los sis kom lawv tu noob mus ib txhis.

21 Thiab hais txog tus Vajtswv ntawd uas koj hais tias peb tau xyeej, saib seb, peb tsis paub ib tug zoo li ntawd; nej los kuj tsis paub thiab; tiam sis yog hais tias muaj ib tug zoo li ntawd, peb xav tias nws tau tsim peb ib yam li tsim nej.

22 Thiab yog hais tias muaj ib tug dab phem thiab ib lub ntuj txiag teb tsaus, saib seb nws yuav tsis xa koj mus nyob qhov chaw ntawd nrog kuv tus tij laug uas nej tau muab tua, tus uas koj hais tias tau mus rau qhov chaw zoo li ntawd lawm los? Tiam sis saib seb tej no tsis ua li cas.

23 Kuv yog Amauloos, thiab yog ib tug xeeb ntxwv ntawm Xaulas, tus uas nej cov yawg koob tau yuam thiab coj tawm hauv Yeluxalees tuaj.

24 Thiab saib seb nim no, kuv yog ib tug Neeg Lamas uas tsis ntshai dab tsi; saib seb, npluav rog no yog ntaus los pauj tej uas tau ua txhaum rau lawv, thiab los txhawb nqa thiab los muab txoj cai kav cov neeg rau lawv; thiab kuv xaus kuv tsab ntawv rau Maulaunais.