1 Kuv tus tub, cuab pob ntseg rau kuv tej lus; vim kuv cog lus rau koj tias, npaum li uas koj yuav ua raws li Vajtswv tej lus txib koj yuav vam meej nyob rau hauv thaj av.

2 Kuv xav kom koj ua li kuv tau ua lawm, nco ntsoov txog peb cov yawg koob txoj kev ua qhev; vim lawv tau poob cev qhev, thiab tsis muaj leej twg muaj peev xwm tso lawv dim tsuas yog Anplaham tus Vajtswv, thiab Ixaj tus Vajtswv, thiab Yakhauj tus Vajtswv; thiab nws yeej tau tso lawv dim ntawm lawv tej kev txom nyem lawm tiag.

3 Thiab nim no, auj kuv tus me tub Hilamas es, saib seb, koj tseem hluas, thiab yog li ntawd, kuv thov kom koj yuav mloog kuv tej lus thiab kawm ntawm kuv; vim kuv paub tias txhua tus uas yuav tso siab rau Vajtswv yuav tau txais kev pab thaum lawv muaj kev sim siab, thiab thaum lawv muaj teeb meem, thiab thaum lawv raug txom nyem, thiab Vajtswv yuav muab lawv tsa sawv thaum txog hnub kawg.

4 Thiab kuv tsis xav kom koj xav tias kuv paub los ntawm kuv tus kheej—tsis yog los ntawm sab cev nqaij daim tawv tiam sis yog los ntawm sab ntsuj plig, tsis yog los ntawm lub siab uas nyiam sab cev nqaij daim tawv tiam sis yog los ntawm Vajtswv.

5 Nim no, saib seb, kuv hais rau koj tias, yog kuv tsis tau yug los ntawm Vajtswv ntshe kuv twb tsis tau paub txog tej yam no; tiam sis los ntawm nws tus tim tswv dawb huv lub qhov ncauj, Vajtswv ua tej yam no rau kuv paub, tsis yog vim kuv yog ib tug neeg tsim nyog;

6 Vim kuv tau mus ncig nrog Mauxiyas cov tub, nrhiav kev ua kom Vajtswv lub koom txoos puas tsuaj; tiam sis saib seb, Vajtswv tau xa nws tus tim tswv dawb huv los cheem peb ntawm txoj kev.

7 Thiab saib seb, nws hais lus rau peb zoo li ib lub suab xob quaj, thiab tej av qeeg nkaws hauv peb qab xib taws; thiab peb txhua tus tau vau rau hauv av, vim txoj kev ntshai tus Tswv los rau peb.

8 Tiam sis saib seb, lub suab hais rau kuv tias: Cia li sawv. Thiab kuv tau sawv thiab tau sawv ntsug, thiab tau pom tus tim tswv.

9 Thiab nws hais rau kuv tias: Txawm hais tias koj xav kom koj tus kheej raug puas tsuaj los, tsis txhob nrhiav kev ua kom Vajtswv lub koom txoos puas tsuaj ntxiv.

10 Thiab tau muaj tias kuv vau rau hauv av; thiab tau peb hnub thiab peb hmos kuv rua tsis taus kuv lub qhov ncauj, thiab kuv kuj siv tsis taus kuv txhais npab thiab txhais ceg.

11 Thiab tus tim tswv hais ntau yam ntxiv rau kuv, uas kuv cov kwv tij hnov, tiam sis kuv tsis hnov tej ntawd; vim thaum kuv hnov tej lus uas hais tias—Txawm hais tias koj xav kom koj tus kheej raug puas tsuaj los, tsis txhob nrhiav kev ua kom Vajtswv lub koom txoos puas tsuaj ntxiv—kuv txhawj thiab ntshai heev kawg nkaus li ntshai tsam kuv raug puas tsuaj, uas kuv cia li vau rau hauv av thiab tsis hnov dab tsi ntxiv lawm.

12 Tiam sis kuv raug tsim txom nrog txoj kev tsim txom uas nyob mus ib txhis, vim kuv tus ntsuj plig raug txom nyem kawg nkaus thiab raug tsim txom nrog tag nrho kuv tej kev txhaum.

13 Muaj tseeb tiag, kuv nco qab txog tag nrho kuv tej kev txhaum thiab tej kev ua phem, tej uas ua rau kuv raug tsim txom nrog tej kev mob ntawm ntuj txiag teb tsaus; muaj tseeb tiag, kuv pom tias kuv tau ntxeev siab tawm tsam kuv tus Vajtswv, thiab kuv tsis tau coj nws tej lus txib dawb huv.

14 Muaj tseeb tiag, thiab kuv tau tua nws cov me nyuam coob leej, los sis tau coj lawv mus rau txoj kev puas tsuaj; muaj tseeb tiag, thiab lub ntsiab yog li no hais tias kuv tej kev ua phem yeej ntau kawg, twb ua rau kuv tus ntsuj plig raug tsim txom nrog txoj kev ntshai uas tsis pom qab piav thaum kuv tsuas xav txog qhov uas kuv yuav los rau hauv Vajtswv lub xub ntiag xwb.

15 Auj, kuv xav tias, kheev lam Vajtswv cia li ntiab kuv tawm thiab ua rau kuv tus ntsuj plig thiab lub cev ploj mus, xwv kom tsis txhob coj kuv mus sawv nyob hauv kuv tus Vajtswv xub ntiag, kom raug txiav txim rau tej uas kuv tau ua.

16 Thiab nim no, kuv raug tsim txom tau peb hnub thiab peb hmos, twb raug tej kev mob ntawm ib tug ntsuj plig uas raug txim.

17 Thiab tau muaj tias thaum kuv raug txim nrog txoj kev tsim txom zoo li ntawd, thaum kuv raug tsim txom los ntawm qhov uas kuv nco qab txog kuv tej kev txhaum ntau, saib seb, kuv kuj nco qab txog kuv txiv txoj kev qhia tej yuav muaj los yav tom ntej rau cov neeg ntsig txog qhov uas ib tug hu ua Yexus Khetos, Vajtswv ib tug Tub, yuav los theej neeg ntiaj teb tej kev txhaum.

18 Nim no, thaum kuv lub siab tsom ntsoov rau txoj kev xav no, kuv thov nyob hauv kuv lub siab tias: Auj Yexus, koj tus uas yog Vajtswv Leej Tub, thov hlub tshua kuv, tus uas poob siab tag nrho, thiab raug txoj kev tuag uas kav ib txhis tej saw hlau muab khaub zig.

19 Thiab nim no, saib seb, thaum kuv xav li no, kuv cia li tsis nco qab txog kuv tej kev mob ntxiv lawm; muaj tseeb tiag, kuv cia li tsis raug tsim txom los ntawm txoj kev nco qab txog kuv tej kev txhaum ntxiv lawm.

20 Thiab auj, txoj kev xyiv fab loj kawg nkaus, thiab kuv tau pom txoj kev kaj zoo kawg nkaus; muaj tseeb tiag, kuv tus ntsuj plig muaj kev xyiv fab puv npo ntau npaum li kuv tej kev mob!

21 Muaj tseeb tiag, kuv hais rau koj, kuv tus me tub, yeej tsis muaj ib yam dab tsi uas yuav mob thiab iab npaum li kuv tej kev mob. Muaj tseeb tiag, thiab kuv hais rau koj ntxiv, kuv tus me tub, tiam sis nyob rau sab tes tod, ho tsis muaj dab tsi zoo nkauj thiab qab zib npaum li kuv txoj kev xyiv fab.

22 Muaj tseeb tiag, kuv nco tias kuv twb pom, ib yam li peb tus yawg koob Lihais tau pom, Vajtswv zaum saum nws lub rooj theej kiab, muaj tim tswv coob leej suav tsis txheeb nyob nrog ncig nws, tab tom hu nkauj thiab qhuas lawv tus Vajtswv; muaj tseeb tiag, thiab kuv tus ntsuj plig xav nyob qhov chaw ntawd.

23 Tiam sis saib seb, kuv txhais npab txhais ceg rov qab muaj zog dua, thiab kuv tau sawv tsees sawv ntsug, thiab qhia tseeb rau cov neeg tias kuv tau yug los ntawm Vajtswv.

24 Muaj tseeb tiag, thiab txij li lub caij ntawd los txog nim no, kuv tau ua hauj lwm tsis tseg li, xwv kom kuv yuav coj tau tib neeg los rau txoj kev hloov siab lees txim; xwv kom kuv yuav coj tau lawv los saj txoj kev xyiv fab heev uas kuv tau saj lawm; xwv kom lawv kuj yuav tau yug los ntawm Vajtswv, thiab muaj tus Vaj Ntsuj Plig Dawb Huv puv npo.

25 Muaj tseeb tiag, thiab nim no saib seb, auj kuv tus me tub es, tus Tswv tau muab kev xyiv fab ntau heev rau kuv los ntawm tej txiv ntoo uas txi ntawm kuv tej hauj lwm;

26 Rau qhov vim yog txoj lus uas nws tau qhia rau kuv, saib seb, coob leej tau yug los ntawm Vajtswv, thiab tau saj ib yam li kuv tau saj, thiab tau pom kiag ntawm qhov muag ib yam li kuv tau pom; yog li ntawd lawv yeej paub txog tej uas kuv tau hais no, ib yam li kuv paub; thiab txoj kev paub uas kuv muaj yog los ntawm Vajtswv los.

27 Thiab Vajtswv tau pab kuv thaum muaj txhua yam kev sim siab thiab txhua yam teeb meem, muaj tseeb tiag, thiab thaum raug txhua yam kev txom nyem; muaj tseeb tiag, Vajtswv tau tso kuv dim lub tsev kaw, thiab dim kev raug txim, thiab dim kev tuag; muaj tseeb tiag, thiab kuv yeej tso siab rau nws, thiab nws yeej tseem yuav tso kuv dim.

28 Thiab kuv paub tias nws yuav tsa kuv sawv thaum txog hnub kawg, mus nyob nrog nws muaj yeeb koob; muaj tseeb tiag, thiab kuv yuav qhuas nws mus ib txhis li, vim nws tau coj peb cov yawg koob tawm ntawm Iyiv los, thiab nws tau ua rau dej nqos cov Neeg Iyiv mus rau hauv dej Hiav Txwv Liab; thiab nws tau coj lawv los ntawm nws lub hwj chim mus rau thaj av uas cog lus cia; muaj tseeb tiag, thiab tej lub sij hawm nws tau tso lawv dim ntawm txoj kev poob cev qhev thiab txoj kev ua qhev.

29 Muaj tseeb tiag, thiab nws kuj tau coj peb cov yawg koob tawm ntawm thaj av Yeluxalees tuaj thiab; thiab los ntawm nws lub hwj chim uas kav ib txhis, nws kuj tau tso lawv dim ntawm tej kev ua qhev thiab kev poob cev qhev, tej lub sij hawm los txog rau niaj hnub nim no; thiab kuv yeej ib txwm nco ntsoov txog lawv tej kev poob cev qhev; muaj tseeb tiag, thiab tsim nyog rau koj nco ntsoov txog lawv tej kev ua qhev thiab, ib yam li kuv nco ntsoov txog lawv tej kev poob cev qhev.

30 Tiam sis saib seb, kuv tus me tub es, tsis tas li no xwb; vim tsim nyog rau koj paub ib yam li kuv paub tias, npaum li uas koj yuav ua raws li Vajtswv tej lus txib koj yuav vam meej nyob hauv thaj av; thiab kuj tsim nyog rau koj paub tias, npaum li uas koj yuav tsis ua raws li Vajtswv tej lus txib koj yuav raug txiav tawm ntawm nws xub ntiag mus. Nim no qhov no yog raws li nws txoj lus.