1 Thiab nim no, tau muaj tias nyob hauv xyoo thib nees nkaum rau ntawm cov neeg txiav txim txoj kev kav Nifais cov neeg, saib seb, thaum cov Neeg Lamas tsim los nyob rau thawj tag kis ntawm thawj lub hlis, saib seb, lawv pom tias Amalikhaiyas tau tuag nyob hauv nws lub tsev pheeb suab ntaub; thiab lawv kuj pom tias Thi-akhas twb npaj tau yuav ua rog rau lawv hnub ntawd.

2 Thiab nim no, thaum cov Neeg Lamas pom qhov no lawv ntshai heev; thiab lawv cia li tso tseg lawv lub tswv yim tias yuav mus rau hauv thaj av sab qaum teb, thiab thim tag nrho lawv cov tub rog mus rau hauv lub nroog Mules, thiab mus nrhiav kev tiv thaiv nyob hauv lawv tej chaw ruaj khov.

3 Thiab tau muaj tias Amalikhaiyas tus kwv raug tsa los ua vaj ntxwv kav cov neeg; thiab nws lub npe hu ua Amauloos; yog li ntawd vaj ntxwv Amauloos, uas yog vaj ntxwv Amalikhaiyas tus kwv, raug tsa pauv nws qhov chaw los kav.

4 Thiab tau muaj tias nws txib kom nws cov neeg yuav tsum txhawb nqa tej nroog ntawd, tej uas lawv txeeb tau los ntawm txoj kev nqaij ntuag ntshav nrog; vim tsis muaj ib lub nroog twg uas lawv txeeb tau es tsis xiam ntshav ntau.

5 Thiab nim no, Thi-akhas pom tias cov Neeg Lamas tau txiav txim siab txhawb nqa cov nroog uas lawv txeeb tau, thiab tej feem ntawm thaj av uas lawv tau kav lawm; thiab kuj pom tias lawv coob heev, Thi-akhas thiaj xav tias tsis tsim nyog rau nws mus tawm tsam lawv nyob hauv lawv tej chaw ruaj khov.

6 Tiam sis nws ceev nws cov tub rog nyob ib puag ncig, zoo li npaj yuav ua rog; muaj tseeb tiag, thiab tseeb tiag nws yeej npaj tau yuav tiv thaiv nws tus kheej tawm tsam lawv, los ntawm txoj kev ua phab ntsa ncig thiab npaj tej chaw tiv thaiv.

7 Thiab tau muaj tias nws rau siab npaj ua rog zoo li no mus txog rau thaum Maulaunais xa ib pab neeg coob tuaj txhawb zog rau nws cov tub rog.

8 Thiab Maulaunais kuj tau xa lus txib mus rau nws kom nws yuav tsum ceev tag nrho cov neeg raug txim uas tau poob rau hauv nws txhais tes; vim cov Neeg Lamas txhom tau lawv coob leej mus ua neeg raug txim, thiaj kom nws ceev tag nrho cov Neeg Lamas uas yog neeg raug txim es thiaj tau coj lawv mus txhiv cov uas cov Neeg Lamas txhom tau lawm.

9 Thiab Maulaunais kuj tau xa lus txib mus rau nws kom nws yuav tsum ua kom thaj av Huaj Vam ruaj khov, thiab tiv thaiv txoj kev nqaim uas mus rau pem thaj av sab qaum teb, nyob tsam cov Neeg Lamas ho txeeb tau qhov ntawd thiab muaj zog tawm tsam lawv nyob rau txhua sab.

10 Thiab Maulaunais kuj xa xov mus rau nws, thov kom nws mob siab txhawb nqa ces kaum av ntawd, thiab kom nws nrhiav txhua lub cib fim los nplawm cov Neeg Lamas nyob rau ces kaum av ntawd, kom ntau npaum li nws lub zog, xwv kom tej zaum nws yuav rov qab txeeb tau tej nroog uas tau poob ntawm lawv txhais tes mus lawm, los ntawm kev siv tswv yim los sis los ntawm lwm txoj kev; thiab kom nws ua rau tej nroog nyob ib ncig uas tsis tau poob rau hauv cov Neeg Lamas txhais tes kom ruaj khov thiab muaj zog tuaj.

11 Thiab Maulaunais kuj hais rau nws tias, kuv yuav tuaj cuag koj, tiam sis saib seb, cov Neeg Lamas tau tawm tsam peb nyob rau ntawm tej ciam teb ntawm thaj av ze tus dej hiav txwv sab hnub poob; thiab saib seb, kuv tau mus tawm tsam lawv, yog li ntawd kuv thiaj tuaj cuag tsis tau koj.

12 Nim no, tus vaj ntxwv (Amauloos) tau tawm ntawm thaj av Xalahelas mus, thiab tau qhia rau tus niam vaj ntxwv paub txog nws tus tij laug txoj kev tuag, thiab tau sau ib co tub rog coob coob tuaj ua ke, thiab tau tawm mus tawm tsam cov Neeg Nifais nyob rau ntawm tej ciam teb ze tus dej hiav txwv sab hnub poob.

13 Thiab nws sib zog mus tawm tsam cov Neeg Nifais tsis tseg zoo li no, thiab rub kom tau ib feem ntawm lawv cov tub rog mus rau sab av ntawd, thiab nws tau txib cov uas nws tau tseg cia kom nyob hauv tej nroog uas nws txeeb tau, kom lawv yeej meem tawm tsam cov Neeg Nifais nyob rau ntawm tej ciam teb ze tus dej hiav txwv sab hnub tuaj, thiab kom txeeb lawv tej av ntau npaum li lawv muaj hwj chim ua tau, raws li lawv cov tub rog lub hwj chim.

14 Thiab yog li ntawd nyob rau thaum kawg ntawm xyoo thib nees nkaum rau ntawm cov neeg txiav txim txoj kev kav, cov Neeg Nifais nyob rau hauv tej xwm txheej plhom sij.

15 Tiam sis saib seb, tau muaj tias nyob hauv xyoo thib nees nkaum xya ntawm cov neeg txiav txim txoj kev kav, Thi-akhas, raws li Maulaunais tej lus txib—tus uas tau txhim tsa tej pawg tub rog los tsom kwm tej ciam teb sab qab teb thiab sab hnub poob ntawm thaj av, thiab nws tau tawm ncaj qha mus rau tom thaj av Huaj Vam, xwv kom nws yuav pab tau Thi-akhas thiab nws cov tub rog txeeb kom tau tej nroog uas lawv poob lawm rov qab los.

16 Thiab tau muaj tias Thi-akhas tau txais lus txib kom tawm tsam lub nroog Mules thiab txeeb lub nroog Mules rov qab los yog hais tias ua tau.

17 Thiab tau muaj tias Thi-akhas npaj ua ib npluav rog tawm tsam lub nroog Mules, thiab nrog nws cov tub rog tawm mus tawm tsam cov Neeg Lamas; tiam sis nws pom tias nws yuav kov tsis yeej lawv thaum lawv tseem nyob hauv lawv tej chaw tiv thaiv; yog li ntawd nws tso tseg nws tej kev npaj thiab rov qab los rau tom lub nroog Huaj Vam, los tos Maulaunais, xwv kom nws yuav tau txais zog pab nws cov tub rog.

18 Thiab tau muaj tias Maulaunais thiab nws cov tub rog tuaj txog rau thaj av Huaj Vam, nyob rau thaum yuav kawg ntawm xyoo thib nees nkaum xya ntawm cov neeg txiav txim txoj kev kav Nifais cov neeg.

19 Thiab nyob rau thaum pib ntawm xyoo thib nees nkaum yim, Maulaunais thiab Thi-akhas thiab ntau tus thawj hau rog rub ib lub rooj sab laj txog kev ua rog—saib lawv yuav ua li cas cov Neeg Lamas thiaj tawm tuaj ua rog tawm tsam lawv; los sis kom lawv yuav ua tau tej yam dab tsi ntxias tau cov Neeg Lamas tawm ntawm lawv tej chaw nkaum, xwv kom lawv yuav muaj peev xwm kov yeej cov Neeg Lamas thiab txeeb tau lub nroog Mules rov qab.

20 Thiab tau muaj tias lawv xa neeg xa xov mus rau cov Neeg Lamas cov tub rog, uas saib xyuas lub nroog Mules, mus rau lawv tus thawj coj, uas npe hu ua Yakhauj, thov kom nws tawm nrog nws cov tub rog tuaj ntsib lawv rau tom tiaj uas nyob nruab nrab ntawm ob lub nroog. Tiam sis saib seb, Yakhauj, uas yog ib tug neeg Xaulas, tsis kam tawm nrog nws cov tub rog tuaj ntsib lawv rau tom tiaj.

21 Thiab tau muaj tias Maulaunais, vim tsis muaj kev cia siab tias yuav tau ntsib cov Neeg Lamas kom xwm yeem, yog li ntawd, nws npaj ib lub tswv yim saib nws ntxias puas tau cov Neeg Lamas tawm ntawm lawv tej chaw ruaj khov.

22 Yog li ntawd nws hais kom Thi-akhas coj ib pab tub rog tsawg thiab mus ze nram ntug hiav txwv; thiab Maulaunais thiab nws cov tub rog, tau mus rau hauv hav zoov thaum tsaus ntuj, uas nyob sab hnub poob ntawm lub nroog Mules; thiab yog li ntawd, nyob rau hnub tom qab, thaum cov Neeg Lamas cov tub rog ntsia pom Thi-akhas, lawv khiav mus qhia Yakhauj, lawv tus thawj coj.

23 Thiab tau muaj tias cov Neeg Lamas cov tub rog tau tawm mus tawm tsam Thi-akhas, thiab lawv xav tias vim lawv cov tub rog coob coob lawv yuav kov yeej Thi-akhas vim nws cov tub rog tsawg heev. Thiab thaum Thi-akhas pom tias cov Neeg Lamas cov tub rog tab tom tawm tuaj tawm tsam nws, nws pib thim ze rau nram ntug hiav txwv, mus rau sab qaum teb.

24 Thiab tau muaj tias thaum cov Neeg Lamas pom tias nws pib khiav, lawv muaj siab hlo thiab tas zog nrho raws lawv. Thiab thaum Thi-akhas tab tom coj cov Neeg Lamas raws nws mus tsis muaj qab hau zoo li no, saib seb, Maulaunais txib kom ib feem ntawm nws cov tub rog uas nrog nws mus rau hauv lub nroog, thiab txeeb lub nroog.

25 Thiab lawv tau ua li no, thiab tua tuag tag nrho cov uas nyob tiv thaiv lub nroog, muaj tseeb tiag, tag nrho cov uas tsis kam tso tseg lawv tej cuab yeej ua rog.

26 Thiab yog li ntawd Maulaunais txeeb tau lub nroog Mules nrog ib feem ntawm nws cov tub rog, hos nws nrog rau cov uas tseem tshuav tau mus ntsib cov Neeg Lamas thaum lawv rov qab los tom qab lawv mus raws Thi-akhas.

27 Thiab tau muaj tias cov Neeg Lamas raws Thi-akhas mus txog rau thaum lawv los ze rau ntawm lub nroog Huaj Vam, thiab tom qab ntawd lawv ntsib Lihais thiab ib pab tub rog tsawg, uas tau tso tseg kom tiv thaiv lub nroog Huaj Vam.

28 Thiab nim no saib seb, thaum cov thawj hau rog ntawm cov Neeg Lamas pom tias Lihais nrog rau nws cov tub rog tab tom tuaj tawm tsam lawv, lawv khiav ua tom ntej tom qab, ntshai tsam lawv mus tsis txog lub nroog Mules ua ntej Lihais ho caum tau lawv; vim lawv qaug zog rau qhov lawv tau taug kev deb, thiab Lihais cov tub rog tseem khov kho.

29 Nim no cov Neeg Lamas tsis paub tias Maulaunais twb nyob tom lawv qab nrog nws cov tub rog; thiab lawv tsuas yog ntshai Lihais thiab nws cov tub rog xwb.

30 Nim no Lihais tsis xav caum kom tau lawv kom txog rau thaum lawv mus ntsib Maulaunais thiab nws cov tub rog tso.

31 Thiab tau muaj tias ua ntej cov Neeg Lamas thim mus deb lawv twb raug cov Neeg Nifais muab vij, nyob rau ib sab yog Maulaunais cov tub rog, thiab nyob rau lwm sab yog Lihais cov tub rog, tag nrho lawv sawv daws tseem khov thiab muaj zog heev; tiam sis cov Neeg Lamas qaug zog vim yog lawv tau taug kev deb.

32 Thiab Maulaunais txib nws cov tub rog kom lawv tawm tsam cov Neeg Lamas kom txog thaum lawv tso lawv tej cuab yeej ua rog tseg.

33 Thiab tau muaj tias Yakhauj, vim nws yog lawv tus thawj coj, vim nws kuj yog ib tug neeg Xaulas, thiab vim nws muaj lub siab tsis kam swb leej twg li, nws coj cov Neeg Lamas tawm tsam Maulaunais yam npau taws heev.

34 Vim Maulaunais nyob thaiv lawv kev, yog li ntawd Yakhauj thiaj txiav txim siab tua kom tau lawv thiab tho kom tau kev mus rau tom lub nroog Mules. Tiam sis saib seb, Maulaunais thiab nws cov tub rog muaj zog dua; yog li ntawd lawv tsis txav kev rau cov Neeg Lamas li.

35 Thiab tau muaj tias lawv ob tog puav leej sib tua yam npau taws heev; thiab muaj coob leej raug tua tuag nyob rau ob tog; muaj tseeb tiag, thiab Maulaunais tau raug mob thiab Yakhauj raug tua tuag.

36 Thiab Lihais sib zog nias qees tom cov Neeg Lamas qab nrog nws cov tub rog uas muaj zog, ua rau cov Neeg Lamas uas nyob tom qab tso tseg lawv tej cuab yeej ua rog; thiab cov uas tseem tshuav ntawm lawv, ua tom ntej tom qab, tsis paub xyov yuav khiav los sis yuav sib tua.

37 Nim no thaum Maulaunais pom tias lawv ua tom ntej tom qab, nws thiaj hais rau lawv tias: Yog nej nqa nej tej cuab yeej ua rog los thiab muab tso tseg, saib seb peb yuav tsis ua rau nej ntshav nrog.

38 Thiab tau muaj tias thaum cov Neeg Lamas hnov tej lus no, lawv tej thawj hau rog, tag nrho cov uas tsis tau raug tua, txav los thiab muab lawv tej cuab yeej ua rog pov rau ntawm Maulaunais ko taw, thiab txib kom lawv cov tub rog ua tib yam li ntawd.

39 Tiam sis saib seb, muaj coob leej uas tsis kam; thiab cov uas tsis kam tso lawv cov ntaj tseg raug txhom thiab raug khi, thiab lawv tej cuab yeej ua rog raug txeeb ntawm lawv mus, thiab lawv raug yuam taug kev nrog lawv cov kwv tij mus rau hauv thaj av Huaj Vam.

40 Thiab nim no cov neeg uas raug txhom coob tshaj cov uas raug tua tuag, muaj tseeb tiag, coob tshaj cov uas raug tua tuag ntawm ob tog.