1 Nim no cov no yog cov lus uas Amulej tau qhuab qhia rau cov neeg nyob hauv thaj av Amoonaihas, hais tias:

2 Kuv yog Amulej; kuv yog Nkidaunas tus tub, uas yog Ixama-ees tus tub, uas yog Aminadais ib tug xeeb ntxwv; thiab twb yog tib tug Aminadais uas txhais cov ntawv nyob saum phab ntsa loog ntawm lub tuam tsev, uas yog Vajtswv tus ntiv tes sau.

3 Thiab Aminadais yog Nifais ib tug xeeb ntxwv, uas yog Lihais tus tub, uas tau tawm tim thaj av Yeluxalees tuaj, tus uas yog Manaxes ib tug xeeb ntxwv, tus uas yog Yauxej tus tub, tus uas nws cov kwv tij muab muag mus rau hauv Iyiv.

4 Thiab saib seb, kuv kuj yog ib tug neeg uas muaj suab npe nyob tag nrho hauv cov neeg uas paub kuv; muaj tseeb tiag, thiab saib seb, kuv muaj kwv tij neej tsa thiab phooj ywg coob, thiab kuv kuj muaj kev nplua nuj heev los ntawm kuv txoj kev sib zog khwv.

5 Txawm li ntawd los, txawm tias muaj txhua yam no los, kuv twb tsis paub ntau txog tus Tswv tej kev, thiab nws tej txuj ci uas neeg paub tsis txog thiab lub hwj chim uas zoo kawg nkaus. Kuv hais tias kuv twb tsis paub ntau txog tej yam no; tiam sis saib seb, kuv hais yuam kev, vim kuv twb tau pom ntau yam ntawm nws tej txuj ci uas neeg paub tsis txog thiab nws lub hwj chim uas zoo kawg nkaus; muaj tseeb tiag, twb pom tus Tswv lub hwj chim tsom kwm cov neeg no txoj sia.

6 Txawm li ntawd los, kuv tseem ua kuv lub siab tawv qhawv, vim Vajtswv twb hu kuv ntau zaus thiab kuv tsis kam mloog; yog li ntawd kuv twb paub txog tej yam no, tiam sis kuv tsis xav lees; yog li ntawd kuv ntxeev siab tawm tsam Vajtswv, raws li txoj kev phem ntawm kuv lub siab, twb mus txog rau hnub thib plaub ntawm lub xya hli no, uas nyob hauv xyoo thib kaum ntawm cov neeg txiav txim txoj kev kav.

7 Thaum kuv tseem tab tom mus saib ib tug kwv tij txheeb ze, saib seb tus Tswv ib tug tim tswv tau tshwm sim los rau kuv thiab hais tias: Amulej es, cia li rov qab lawm tom koj lub tsev, vim koj yuav pub mov rau tus Tswv ib tug yaj saub noj; muaj tseeb tiag, yog ib tug neeg dawb huv, ib tug neeg uas yog Vajtswv xaiv; nws tau yoo mov tau ntau hnub vim yog cov neeg no tej kev txhaum, thiab nws tshaib plab heev, thiab koj yuav tsum txais tos nws mus rau hauv koj lub tsev thiab pub mov rau nws noj, thiab nws yuav foom koob hmoov rau koj thiab koj tsev neeg; thiab tus Tswv tej koob hmoov yuav los nyob rau koj thiab koj tsev neeg.

8 Thiab tau muaj tias kuv ua raws li tus tim tswv lub suab, thiab rov qab mus rau tom kuv tsev. Thiab thaum kuv tab tom mus tsev kuv pom tus neeg uas tus tim tswv tau hais rau kuv tias: Koj yuav tsum txais tos mus rau hauv koj lub tsev—thiab saib seb tus ntawd twb yog tib tug txiv neej no uas tau hais rau nej txog tej yam ntawm Vajtswv.

9 Thiab tus tim tswv tau hais rau kuv tias nws yog ib tug neeg dawb huv; yog li ntawd kuv paub tias nws yog ib tug neeg dawb huv vim Vajtswv ib tug tim tswv tau hais li ntawd.

10 Thiab ntxiv, kuv paub tias tej uas nws tau ua tim khawv yeej muaj tseeb; vim saib seb kuv hais rau nej tias, ib yam li tus Tswv muaj txoj sia nyob, ib yam li ntawd nws xa nws tus tim tswv los ua tej yam no tshwm sim rau kuv; thiab nws tau ua li no thaum uas tus Amas no tseem nyob tom kuv tsev.

11 Vim saib seb, nws tau foom koob hmoov rau kuv tsev neeg, nws tau foom koob hmoov rau kuv, thiab cov poj niam uas nyob hauv kuv tsev, thiab kuv cov me nyuam, thiab kuv txiv thiab kuv cov kwv tij neej tsa; muaj tseeb tiag, nws twb foom koob hmoov rau tag nrho kuv cov kwv tij neej tsa, thiab tus Tswv txoj koob hmoov tau los rau peb raws li tej lus uas nws tau hais.

12 Thiab nim no, thaum Amulej hais tej lus no tas cov neeg pib xav tsis thoob, vim lawv pom tias yeej muaj coob tshaj ib tug tim khawv uas ua pov thawj txog tej yam uas lawv raug liam, thiab txog tej uas yuav muaj los, raws li lub txiaj ntsim qhia tau tej yuav muaj los yav tom ntej uas nkawd muaj.

13 Txawm li ntawd los, lawv muaj ib txhia uas xav nug nkawd, xwv kom los ntawm lawv tej kev ntxias lawv yuav cuab tau nkawd tej lus, xwv kom lawv yuav nrhiav tau tim khawv nkaug nkawd, xwv kom lawv yuav tau coj nkawd mus rau lawv cov neeg txiav txim kom nkawd raug txiav txim raws li txoj kev cai, thiab kom nkawd raug muab tua los sis tso rau hauv lub tsev kaw, raws li txoj kev txhaum uas lawv ua kom muaj los sis ua tim khawv nkaug nkawd.

14 Nim no cov neeg uas nrhiav kev ua kom nkawd puas tsuaj twb yog cov neeg kws lij choj, uas cov neeg ntiav thiab tsa los tswj txoj kev cai thaum lub sij hawm hais plaub, los sis thaum muab cov neeg tej kev txhaum kev cai coj los hais plaub rau ntawm cov neeg txiav txim.

15 Nim no cov kws lij choj no tau kawm tag nrho cov neeg tej kev haub thiab kev ntxias; thiab lawv ua li no ua kom lawv muaj txuj ci ua lawv tej hauj lwm.

16 Thiab tau muaj tias lawv pib nug Amulej, xwv kom lawv thiaj yuav ua rau nws tej lus sib chab sib chaws, los sis ua rau tej lus uas nws hais sib cov nyom.

17 Nim no lawv tsis paub tias Amulej muaj cuab kav paub txog lawv lub tom txwv. Tiam sis tau muaj tias thaum lawv pib nug nws, nws paub txog lawv tej kev xav, thiab nws hais rau lawv tias: Auj tiam niag neeg phem thiab tsis yuav lus es, nej uas yog cov kws lij choj thiab cov neeg siab dag es, nej tab tom teeb tus dab phem lub hauv paus; nej tab tom cuab ntxiab thiab cuam koob kom mag Vajtswv cov neeg dawb huv.

18 Nej tab tom npaj ua kom cov neeg ncaj ncees tej kev yuam kev, thiab ua kom Vajtswv txoj kev npau taws nqis los rau saum nej lub taub hau, twb ua kom cov neeg no puas tsuaj tas huv tib si.

19 Muaj tseeb tiag, Mauxiyas tau hais meej, tus uas yog peb tus vaj ntxwv kawg, thaum nws tab tom yuav muab lub teb chaws rau lwm tus kav, vim nws tsis muaj leej twg uas yuav muab lub teb chaws tso rau, nws thiaj tau hais kom siv cov neeg no lub suab los kav lawv tus kheej—muaj tseeb tiag, nws twb tau hais meej hais tias yog lub sij hawm los txog uas cov neeg no lub suab xaiv kev ua phem, hais tias, yog lub sij hawm los txog uas cov neeg no poob mus rau kev ua txhaum, thaum ntawd lawv yuav siav rau txoj kev puas tsuaj.

20 Thiab nim no kuv hais rau nej tias tsim nyog uas tus Tswv txiav txim rau nej tej kev ua phem; yeej tsim nyog uas nws tshaj tawm rau cov neeg no, los ntawm nws cov tim tswv lub suab hais tias: Nej cia li hloov siab lees txim, hloov siab lees txim, vim twb txog lub sij hawm rau lub nceeg vaj ceeb tsheej lawm.

21 Muaj tseeb tiag, yeej tsim nyog rau nws tshaj tawm, los ntawm nws cov tim tswv lub suab hais tias: Kuv yuav nqis los rau hauv kuv cov neeg, nrog kev txim lij thiab kev ncaj ncees nyob hauv kuv txhais tes.

22 Muaj tseeb tiag, thiab kuv hais rau nej tias yog tsis muaj cov neeg ncaj ncees tej kev thov Vajtswv, cov uas nim no nyob hauv thaj av, ces nim no nej twb raug kev puas tsuaj huv tib si xyuas lawm; tiam sis tsis yog los ntawm dej nyab, ib yam li cov neeg thaum Nau-as tseem ua neej nyob, tiam sis yog los ntawm kev tshaib nqhis, thiab los ntawm tej kab mob phem, thiab rab ntaj.

23 Tiam sis twb yog los ntawm cov neeg ncaj ncees tej kev thov Vajtswv es tus Tswv thiaj li tseg nej; nim no yog li ntawd, yog hais tias nej yuav ntiab cov neeg ncaj ncees tawm hauv nej mus ces tus Tswv txhais tes yuav tsis nyob twj ywm; tiam sis nrog nws txoj kev npau taws heev nws yuav tawm los tawm tsam nej; ces nej yuav raug tsim txom los ntawm kev tshaib nqhis, thiab los ntawm tej kab mob phem, thiab los ntawm rab ntaj; thiab twb yuav txog lub sij hawm lawm tsuas yog nej hloov siab lees txim xwb.

24 Thiab nim no tau muaj tias cov neeg npau taws tshaj rau Amulej, thiab lawv qw nrov nrov, hais tias: Tus neeg no hais lus cem tawm tsam peb tej kev cai uas ncaj ncees, thiab peb cov kws lij choj txawj ntse uas peb tau xaiv.

25 Tiam sis Amulej xyab hlo nws txhais tes, thiab hais nrov dua rau lawv, hais tias: Auj tiam niag neeg uas phem thiab tsis yuav lus es, vim li cas Dab Ntxwg Nyoog thiaj tuav tau nej lub siab ruaj ua luaj? Vim li cas nej ho ywj nej tus kheej rau nws xwv kom nws muaj hwj chim kav nej, los npog nej qhov muag, xwv kom nej tsis to taub tej lus uas tau hais, raws li qhov tseeb ntawm tej lus ntawd?

26 Vim saib seb, kuv puas tau ua tim khawv tawm tsam nej txoj kev cai? Nej tsis to taub; nej hais tias kuv hais lus tawm tsam nej txoj kev cai; tiam sis kuv twb tsis tau ua li ntawd, tiam sis kuv tsuas yog hais raws li nej txoj kev cai, ua rau nej raug txim.

27 Thiab nim no saib seb, kuv hais rau nej tias, lub hauv paus ntawm cov neeg no txoj kev puas tsuaj twb yog pib teeb los ntawm nej cov kws lij choj thiab nej cov neeg txiav txim tej kev tsis ncaj ncees.

28 Thiab nim no tau muaj tias thaum Amulej tau hais cov lus no cov neeg hais nrov nrov tawm tsam nws, hais tias: Nim no peb paub tias tus neeg no yog tus dab phem ib tug me nyuam, vim nws tau dag peb; vim nws tau hais tawm tsam peb txoj kev cai. Thiab ziag no nws ho hais tias nws tsis tau hais tawm tsam no.

29 Thiab ntxiv, nws tau hais lus phem tawm tsam peb cov kws lij choj, thiab peb cov neeg txiav txim.

30 Thiab tau muaj tias cov kws lij choj muab tej yam no tso rau hauv cov neeg lub siab xwv kom lawv yuav nco ntsoov tej yam no tawm tsam Amulej.

31 Thiab tau muaj ib tug nyob hauv lawv uas npe hu ua Xi-elas. Nim no nws yog tus uas liam Amulej thiab Amas heev tshaj, thiab nws yog ib tug uas txawj tshaj nyob hauv lawv, vim nws muaj hauj lwm ntau ua heev nyob hauv cov neeg.

32 Nim no cov kws lij choj no lub hom phiaj yog ua kom nplua nuj; thiab lawv nplua nuj los ntawm lawv tej hauj lwm.