1 Thiab nim no tau muaj tias Maulaunais tsis tsum kev npaj rau kev ua rog, los sis tiv thaiv nws cov neeg ntawm cov Neeg Lamas; vim nyob rau thaum pib ntawm xyoo thib nees nkaum ntawm cov neeg txiav txim txoj kev kav, nws hais kom nws cov tub rog pib khawb av los ua pawg ncig tag nrho txhua lub nroog, thoob plaws txhua thaj av uas cov Neeg Nifais nyob.

2 Thiab nyob rau saum tej phab ntsa av no nws hais kom muab cav ntoo, muaj tseeb tiag, muab cav ntoo los xov kom siab txij li neeg, ncig tej nroog.

3 Thiab nws hais kom txua ib co pas hmuv txheem rau saum cov ntoo ib puag ncig; thiab cov pas hmuv no khov thiab siab heev.

4 Thiab nws hais kom tsa tej pej thuam uas saib pom cov ntsa ntoo uas ntse ntse ntawd, thiab nws hais kom rhawv chaw tiv thaiv rau saum tej pej thuam ntawd, xwv kom cov Neeg Lamas cov pob zeb thiab cov xub tuaj tsis raug lawv.

5 Thiab tau ua tej pej thuam no xwv kom lawv yuav txawb tau pob zeb tawm saum lub ncov saud mus, raws li lawv siab xav thiab lawv lub zog, thiab tua tau cov uas sim tuaj ze tej ntsa loog ntawm lub nroog.

6 Xws li no Maulaunais tau npaj tej chaw ruaj khov rau thaum lawv cov yeeb ncuab yuav tuaj, ncig txhua lub nroog nyob thoob plaws hauv thaj av.

7 Thiab tau muaj tias Maulaunais hais kom nws cov tub rog tawm mus rau hauv koog hav zoov sab hnub tuaj; muaj tseeb tiag, thiab lawv tawm mus thiab raws tag nrho cov Neeg Lamas uas nyob hauv koog hav zoov sab hnub tuaj tawm mus rau hauv lawv tej av, uas yog nyob sab qab teb ntawm thaj av Xalahelas.

8 Thiab thaj av Nifais yog nyob ntawm tus dej hiav txwv sab hnub tuaj ncaj nraim mus rau tus dej hiav txwv sab hnub poob.

9 Thiab tau muaj tias thaum Maulaunais raws tau tag nrho cov Neeg Lamas tawm ntawm koog hav zoov sab hnub tuaj, uas yog nyob sab qaum teb ntawm thaj av uas yog lawv ntiag tug, nws hais kom cov neeg nyob hauv thaj av Xalahelas thiab nyob hauv thaj av ib puag ncig tawm mus rau hauv koog hav zoov sab hnub tuaj, twb mus txog ntua rau ntawm ntug dej hiav txwv, thiab mus nyob hauv thaj av.

10 Thiab nws kuj tso ib co tub rog nyob rau sab qab teb, ntawm tej ciam teb ntawm thaj av uas lawv nyob, thiab hais kom lawv tsa tej chaw tiv thaiv xwv kom lawv yuav tiv thaiv tau lawv cov tub rog thiab lawv cov neeg ntawm lawv cov yeeb ncuab txhais tes.

11 Thiab xws li no nws txiav tau tag nrho cov Neeg Lamas tej chaw ruaj khov nyob hauv koog hav zoov sab hnub tuaj, muaj tseeb tiag, thiab kuj txiav tau tej uas nyob rau sab hnub poob, thiab nws ua rau txoj ciam nyob nruab nrab ntawm cov Neeg Nifais thiab cov Neeg Lamas, ntawm thaj av Xalahelas thiab thaj av Nifais ruaj khov tuaj, txij li ntawm tus dej hiav txwv sab hnub poob, mus ze rau ntawm hau dej ntawm tus dej Xidoos—cov Neeg Nifais nyob rau tag nrho thaj av sab qaum teb, muaj tseeb tiag, twb yog tag nrho thaj av uas nyob sab qaum teb ntawm thaj av Huaj Vam, raws li lawv siab nyiam.

12 Xws li no Maulaunais, nrog nws cov tub rog, uas muaj coob ntxiv tuaj txhua txhua hnub vim yog txoj kev paub tseeb tias tej yam nws ua yeej coj tau kev tiv thaiv los rau lawv, nrhiav kev txiav tau cov Neeg Lamas lub zog thiab lub hwj chim tawm ntawm tej av uas yog lawv tej chaw nyob, xwv kom lawv tsis txhob muaj hwj chim rau tej av uas yog lawv tej chaw nyob.

13 Thiab tau muaj tias cov Neeg Nifais pib ua ib lub nroog, thiab lawv muab lub nroog lub npe hu ua Maulaunais; thiab lub nroog no nyob ze ntawm tus dej hiav txwv sab hnub tuaj; thiab lub nroog no nyob sab qab teb ze tus ciam ntawm thaj av uas yog cov Neeg Lamas li.

14 Thiab lawv kuj pib ua ib lub nroog nyob nruab nrab ntawm lub nroog Maulaunais thiab lub nroog Aloos, koom tus ciam teb ntawm Aloos thiab Maulaunais; thiab lawv muab lub npe ntawm lub nroog, los sis thaj av, hu ua Nifaihas.

15 Thiab nyob rau tib xyoos ntawd lawv kuj pib ua ntau lub nroog nyob rau sab qaum teb, ib lub uas lawv ua txawv lawv muab hu ua Lihais, uas yog nyob sab qaum teb ze ntawm ntug dej hiav txwv.

16 Thiab xyoo thib nees nkaum tau xaus li no.

17 Thiab Nifais cov neeg muaj tej kev vam meej zoo li no nyob rau thaum pib ntawm xyoo thib nees nkaum ib ntawm cov neeg txiav txim txoj kev kav Nifais cov neeg.

18 Thiab lawv vam meej heev, thiab lawv los ua neeg nplua nuj heev; muaj tseeb tiag, thiab lawv huaj vam thiab muaj zog zuj zus nyob hauv thaj av.

19 Thiab yog li ntawd peb pom tias tus Tswv tej kev ua dej num muaj kev hlub tshua thiab ncaj npaum li cas, uas nws ua kom muaj raws li tag nrho nws tej lus rau noob neej; muaj tseeb tiag, peb twb pom tias nws tej lus yeej muaj tseeb tiag, tsis hais nyob rau lub sij hawm no, uas nws tau hais rau Lihais, hais tias:

20 Koj thiab koj cov me nyuam yuav tau koob hmoov; thiab lawv yuav tau koob hmoov, npaum li uas lawv yuav ua raws li kuv tej lus txib lawv yuav vam meej nyob rau hauv thaj av. Tiam sis nco ntsoov, npaum li uas lawv yuav tsis ua raws li kuv tej lus txib lawv yuav raug txiav tawm ntawm tus Tswv xub ntiag mus.

21 Thiab peb pom tias tej lus cog tseg no tau muaj tseeb rau Nifais cov neeg; vim twb yog lawv tej kev sib cav thiab lawv tej kev tsis sib haum xeeb, muaj tseeb tiag, lawv tej kev tua neeg, thiab lawv tej kev tua txeeb tej khoom, lawv tej kev pe dab pe mlom, lawv tej kev sib daj sib deev, thiab lawv tej kev qias, uas muaj nyob hauv lawv, uas coj tau tej kev ua rog thiab tej kev puas tsuaj los rau lawv.

22 Thiab cov uas rau siab ua raws li tus Tswv tej lus txib nws yeej pab lawv dim txhua txhia zaus, tiam sis lawv cov kwv tij uas phem txhiab txhiab tug raug muab tso rau hauv kev ua qhev, los sis kom piam sij los ntawm rab ntaj, los sis kom tso txoj kev ntseeg tseg zuj zus, thiab sib xyaws nrog cov Neeg Lamas.

23 Tiam sis saib seb txij thaum Nifais lub caij, twb tsis tau muaj ib lub caij nyob hauv Nifais cov neeg uas yuav zoo siab npaum li Maulaunais lub caij, muaj tseeb tiag, twb nyob rau lub caij no, nyob hauv xyoo thib nees nkaum ib ntawm cov neeg txiav txim txoj kev kav.

24 Thiab tau muaj tias xyoo thib nees nkaum ob ntawm cov neeg txiav txim txoj kev kav kuj tau xaus nyob hauv kev thaj yeeb; muaj tseeb tiag, thiab xyoo thib nees nkaum peb los kuj tib yam.

25 Thiab tau muaj tias nyob rau thaum pib ntawm xyoo thib nees nkaum plaub ntawm cov neeg txiav txim txoj kev kav, tej zaum kuj yuav muaj kev thaj yeeb nyob hauv Nifais cov neeg yog tias txhob muaj kev sib cav sib ceg uas muaj nyob hauv lawv ntsig txog thaj av Lihais, thiab thaj av Mauli-atoos, uas koom rau tej ciam teb ntawm Lihais; ob thaj tib si uas nyob rau tej ciam teb ze ntug hiav txwv.

26 Vim saib seb, cov neeg uas nyob hauv thaj av Mauli-atoos tau txeeb ib feem ntawm thaj av Lihais; yog li ntawd pib muaj kev kub siab sib cav sib ceg ntawm lawv, ua rau cov neeg ntawm Mauli-atoos cia li nqa cuab yeej ua rog tawm tsam lawv cov kwv tij, thiab lawv txiav txim siab tias yuav xuas ntaj tua lawv.

27 Tiam sis saib seb, cov neeg uas nyob hauv thaj av Lihais khiav mus rau tom Maulaunais lub yeej, thiab thov kom nws pab; vim saib seb lawv tsis yog cov ua txhaum.

28 Thiab tau muaj tias thaum cov neeg ntawm Mauli-atoos, uas muaj ib tug txiv neej lub npe hu ua Mauli-atoos coj lawv, pom tias cov neeg ntawm Lihais tau khiav mus rau tom Maulaunais lub yeej, lawv ntshai heev nyob tsam Maulaunais cov tub rog ho tuaj tawm tsam lawv thiab ua rau lawv puas tsuaj.

29 Yog li ntawd, Mauli-atoos muab tso rau hauv lawv lub siab hais tias lawv yuav tsum khiav mus rau thaj av uas nyob rau sab qaum teb, uas muaj dej ntau, thiab mus nyob rau thaj av uas nyob rau sab qaum teb.

30 Thiab saib seb, tej zaum lawv twb ua tau raws li qhov uas tau npaj no, (uas tej zaum yuav yog ib qho ua rau cov Neeg Nifais nyiav heev) tiam sis saib seb, Mauli-atoos yog ib tug neeg npau taws sai, yog li ntawd nws tau npau taws rau nws ib tug ntxhais qhev, thiab tawm tsam nws thiab ntaus nws heev.

31 Thiab tau muaj tias tus ntxhais qhev ntawd tau khiav, thiab tuaj rau tom Maulaunais lub yeej, thiab qhia rau Maulaunais txhua yam ntsig txog qhov xwm no, thiab kuj qhia ntsig txog qhov uas lawv yuav khiav mus rau hauv thaj av sab qaum teb.

32 Nim no saib seb, cov neeg uas nyob hauv thaj av Huaj Vam, los sis Maulaunais, ntshai tias tsam lawv yuav mloog Mauli-atoos tej lus thiab sib sau ua ke nrog nws cov neeg, thiab yog li ntawd ntshe Mauli-atoos yuav txeeb tau chaw nyob rau hauv thaj av ntawd, uas yuav cog tau ib lub hauv paus rau tej xwm txheej phem nyob hauv Nifais cov neeg, muaj tseeb tiag, tej xwm txheej uas yuav ntxeev tau lawv txoj kev ywj pheej.

33 Yog li ntawd Maulaunais thiaj xa ib co tub rog, nrog lawv lub yeej, mus txiav cov neeg ntawm Mauli-atoos kev, tsis pub lawv khiav mus rau hauv thaj av sab qaum teb.

34 Thiab tau muaj tias lawv txiav tsis tau cov neeg ntawm Mauli-atoos kev txog rau thaum lawv twb los txog rau ntawm tej ciam teb ntawm thaj av Quav Poj; thiab lawv txiav tau lawv kev nyob rau ntawm qhov chaw ntawd, nyob ze ntawm txoj kev nqaim uas yog mus ze tus dej hiav txwv mus rau hauv thaj av sab qaum teb, muaj tseeb tiag, ze tus dej hiav txwv, nyob sab hnub poob thiab nyob sab hnub tuaj.

35 Thiab tau muaj tias cov tub rog uas Maulaunais xa mus, uas muaj ib tug txiv neej coj lawv lub npe hu ua Thi-akhas, tau ntsib cov neeg ntawm Mauli-atoos; thiab cov neeg ntawm Mauli-atoos tawv ncauj heev, (vim Mauli-astoos txoj kev phem thiab tej lus dag ntxias tau txhawb lawv zog) uas lawv pib sib ntaus sib tua, uas Thi-akhas muab Mauli-atoos tua tuag thiab kov yeej nws cov tub rog, thiab txhom tau lawv ua neeg raug txim, thiab rov qab los rau tom Maulaunais lub yeej. Thiab xyoo thib nees nkaum plaub ntawm cov neeg txiav txim txoj kev kav Nifais cov neeg tau xaus li no.

36 Thiab coj tau cov neeg ntawm Mauli-atoos rov qab los xws li no. Thiab thaum lawv khi lus tias yuav coj txoj kev thaj yeeb Maulaunais muab lawv txum tim rov qab rau thaj av Mauli-atoos, thiab lawv thiab cov neeg ntawm Lihais rov sib sau ua ke dua; thiab Maulaunais kuj muab cov neeg ntawm Lihais txum tim rov qab rau lawv tej av.

37 Thiab tau muaj tias nyob rau tib xyoos uas Nifais cov neeg txum tim rov qab tau kev thaj yeeb rau lawv, Nifaihas, uas yog tus thawj txiav txim thib ob, tau tuag, nws tau zaum saum lub rooj txiav txim nrog kev ncaj ncees tag nrho rau Vajtswv.

38 Txawm li ntawd los, nws tsis kam khaws cov ceev xwm txheej thiab tej yam uas Amas thiab nws cov yawg koob muab saib hais tias dawb ceev dua ntais; yog li ntawd Amas thiaj tau muab tej ntawd rau nws tus tub, Hilamas.

39 Saib seb, tau muaj tias Nifaihas tus tub raug muab tsa los zaum saum lub rooj txiav txim, los pauv nws txiv qhov chaw; muaj tseeb tiag, nws raug muab tsa los ua tus thawj txiav txim thiab tus tswv xeev rau cov neeg, nrog kev lav lus thiab kab ke uas dawb ceev hais tias yuav txiav txim kom ncaj ncees, thiab ceev txoj kev thaj yeeb thiab txoj kev ywj pheej ntawm cov neeg, thiab pub tej kev muaj cai uas dawb ceev rau lawv teev tiam tus Tswv lawv tus Vajtswv, muaj tseeb tiag, pab txhawb thiab tuav lub hom phiaj ntawm Vajtswv kom tas nws lub neej, thiab coj cov neeg phem los rau kev txim lij raws li lawv tej kev txhaum.

40 Nim no saib seb, nws lub npe hu ua Pehaulas. Thiab Pehaulas los zaum saum nws txiv lub rooj, thiab pib nws txoj kev kav Nifais cov neeg nyob rau thaum kawg ntawm xyoo thib nees nkaum plaub.