1 Thiab tau muaj tias nyob hauv xyoo thib kaum ib ntawm cov neeg txiav txim txoj kev kav cov Neeg Nifais, nyob rau hnub xiab tsib ntawm lub ob hlis, tom qab tau muaj kev thaj yeeb ntau nyob hauv thaj av Xalahelas, tom qab tsis muaj kev ua rog los sis kev sib cav sib ceg tau ob peb xyoos, txog rau thaum hnub xiab tsib ntawm lub ob hlis ntuj nyob hauv xyoo thib kaum ib, muaj kev tshaj tawm txog ib npluav rog ncha mus thoob plaws hauv thaj av.

2 Vim saib seb, cov Neeg Lamas tej tub rog tau tuaj tom sab hav zoov tuaj rau hauv tej ciam teb ntawm thaj av, twb tuaj rau hauv lub nroog Amoonaihas, thiab pib tua cov neeg thiab ua rau lub nroog puas tsuaj.

3 Thiab nim no tau muaj tias, ua ntej cov Neeg Nifais npaj tau ib pab tub rog uas coob txaus caum lawv tawm ntawm thaj av, lawv tau ua rau cov neeg uas nyob hauv lub nroog Amoonaihas puas tsuaj tas, thiab ib co uas nyob ib ncig ntawm tej ciam teb Nau-as, thiab tau txhom ib txhia coj mus rau hauv hav zoov.

4 Nim no tau muaj tias cov Neeg Nifais xav mus tso cov uas raug txhom coj mus rau hauv hav zoov.

5 Yog li ntawd, tus uas cov neeg tau tsa los ua tus thawj hau rog saib xyuas cov Neeg Nifais cov tub rog, (thiab nws lub npe hu ua Xaulas, thiab nws muaj ob tug tub, Lihais thiab Aha)—Nim no Xaulas thiab nws ob tug tub, vim lawv paub tias Amas yog tus pov thawj hlob rau lub koom txoos, thiab tau hnov tias nws muaj lub txiaj ntsim qhia tau tej yuav muaj los yav tom ntej, yog li ntawd lawv thiaj mus cuag nws thiab thov kom nws qhia saib tus Tswv puas xav kom lawv mus nrhiav lawv cov kwv tij rau hauv hav zoov, cov uas raug cov Neeg Lamas txhom mus.

6 Thiab tau muaj tias Amas thov tus Tswv txog qhov ntawd. Thiab Amas rov qab los thiab hais rau lawv tias: Saib seb, cov Neeg Lamas yuav hla tus dej Xidoos nyob ntawm hav zoov sab nram hav, dhau nram tej ciam teb ntawm thaj av Meethais. Thiab saib seb nej yuav ntsib lawv nrad, uas nyob sab hnub tuaj ntawm tus dej Xidoos, thiab nyob qhov ntawd tus Tswv yuav coj nej cov kwv tij uas raug cov Neeg Lamas txhom lawm los rau nej.

7 Thiab tau muaj tias Xaulas thiab nws ob tug tub hla tus dej Xidoos, nrog lawv cov tub rog, thiab mus dhau nram tej ciam teb ntawm Meethais mus rau tom hav zoov sab nram hav, uas nyob rau sab hnub tuaj ntawm tus dej Xidoos.

8 Thiab lawv sib tawm tsam nrog cov Neeg Lamas cov tub rog, thiab cov Neeg Lamas tau tawg khiav ri niab thiab raug raws mus rau hauv hav zoov; thiab lawv coj tau lawv cov kwv tij uas raug cov Neeg Lamas txhom, thiab cov uas raug txhom tsis muaj ib tug ploj li. Thiab lawv cov kwv tij coj lawv los mus nyob hauv lawv tej thaj av.

9 Thiab xyoo thib kaum ib ntawm cov neeg txiav txim xaus li no, thiab cov Neeg Nifais tau raws cov Neeg Lamas tawm ntawm thaj av, thiab cov neeg hauv Amoonaihas raug puas tsuaj; muaj tseeb tiag, txhua tus neeg muaj sia uas yog Neeg Amoonaihas tau raug puas tsuaj, thiab lawv lub nroog loj, uas lawv hais tias Vajtswv tsis muaj cuab kav ua kom puas tsuaj, vim lub nroog ntawd loj heev.

10 Tiam sis saib seb, tib hnub xwb cov Neeg Lamas ua rau lub nroog ntawd puas tsuaj tsis muaj neeg nyob; thiab tej dev thiab tej tsiaj qus hauv hav zoov muab cov tuag dua ua lwj ua liam.

11 Txawm li ntawd los, tom qab ntau hnub cov Neeg Nifais mus muab cov tuag tum tsheej pawg rau saum av, thiab muab av npog nyias ntsais rau. Thiab nim no tej pa ntawd tsw lwj heev ua rau cov neeg tsis kam mus nyob hauv thaj av Amoonaihas tau ntau xyoo. Thiab Amoonaihas hu ua Nihos Qhov Chaw Tsis Muaj Neeg Nyob; vim cov uas raug tua yog tib txoj kev ntseeg li Nihos; thiab lawv tej av tsis muaj neeg mus nyob.

12 Thiab cov Neeg Lamas tsis rov qab tuaj ua rog tawm tsam cov Neeg Nifais ntxiv txog rau xyoo thib kaum plaub ntawm cov neeg txiav txim txoj kev kav cov Neeg Nifais. Thiab xws li no Nifais cov neeg muaj kev thaj yeeb tsis tu ncua tau peb xyoos nyob thoob plaws hauv thaj av.

13 Thiab Amas thiab Amulej tau tawm mus tshaj tawm kev hloov siab lees txim rau cov neeg nyob hauv lawv tej tuam tsev, thiab nyob hauv tej chaw dawb huv, thiab kuj nyob hauv lawv tej tsev sab laj, uas tau ua kom muaj tus yam ntxwv zoo li cov Neeg Yudais tej.

14 Thiab tag nrho cov uas xav hnov nkawd tej lus, nkawd tau faib Vajtswv txoj lus rau lawv tsis tu ncua, tsis xaiv leej twg ntsej muag li.

15 Thiab Amas thiab Amulej tau tawm mus li no, thiab kuj muaj coob leej ntxiv uas tus Tswv tau xaiv rau txoj hauj lwm, mus tshaj tawm txoj lus thoob plaws hauv thaj av. Thiab txoj kev txhim tsa lub koom txoos nthuav dav mus thoob plaws hauv thaj av, nyob hauv txhua thaj tsam ib puag ncig, nyob hauv tag nrho cov Neeg Nifais.

16 Thiab tsis muaj kev tsis sib txig nyob hauv lawv; tus Tswv tau pub nws tus Ntsuj Plig nplua mias rau thoob plaws hauv thaj av, kom npaj noob neej tej kev xav, los sis kom npaj lawv lub siab los txais txoj lus uas tus Tswv yuav qhia nyob hauv lawv thaum lub caij nws los—

17 Xwv kom lawv txhob ua siab tawv tawm tsam txoj lus, xwv kom lawv txhob ua siab tsis ntseeg, thiab mus rau kev puas tsuaj, tiam sis xwv kom lawv yuav txais txoj lus nrog kev xyiv fab, thiab zoo li ib tug ceg uas raug muab txuas rau tsob txiv hmab tseeb, xwv kom lawv yuav nkag mus rau hauv tus Tswv lawv tus Vajtswv qhov chaw so.

18 Nim no cov pov thawj uas tau tawm mus rau hauv cov neeg tau qhuab qhia tawm tsam txhua yam kev dag, thiab kev ntxias, thiab kev ntshaw, thiab kev sib cav sib ceg, thiab kev xav ua kom lwm tus puas tsuaj, thiab kev hais lus cem, thiab kev tub sab, kev tua txeeb tej khoom, kev lim hiam, kev tua neeg, kev deev luag poj luag txiv, thiab txhua yam ntawm kev sib daj sib deev, qhia nrov nrov tias yuav tsum tsis txhob muaj tej yam no—

19 Qhia ntshis tej uas yeej yuav muaj los tsis ntev no; muaj tseeb tiag, qhia ntshis Vajtswv Leej Tub txoj kev los, nws tej kev nyuaj siab thiab txoj kev tuag, thiab txoj kev sawv rov los ntawm cov tuag.

20 Thiab coob leej ntawm cov neeg tau nug ntsig txog qhov chaw uas Vajtswv Leej Tub yuav los; thiab cov pov thawj qhia rau lawv hais tias nws yuav tshwm sim los rau lawv tom qab nws sawv rov los; thiab cov neeg tau hnov qhov no nrog kev xyiv fab thiab zoo siab heev.

21 Thiab nim no tom qab tau txhim tsa lub koom txoos nyob thoob plaws hauv thaj av—tom qab lub koom txoos tau kov yeej tus dab phem, thiab tau tshaj tawm Vajtswv txoj lus tseeb tseeb nyob thoob plaws hauv thaj av, thiab tus Tswv tau foom nws cov koob hmoov nplua mias rau cov neeg—xyoo thib kaum plaub ntawm cov neeg txiav txim txoj kev kav cov Neeg Nifais tau xaus li no.