1 Thiab tau muaj tias nws rov qab sau ntawv dua mus rau tus tswv xeev ntawm thaj av, tus uas yog Pehaulas, thiab cov no yog cov lus uas nws sau, hais tias: Saib seb, kuv sau kuv tsab ntawv rau Pehaulas, nyob hauv lub nroog Xalahelas, tus uas yog tus thawj txiav txim thiab tus tswv xeev kav thaj av, thiab kuj sau rau tag nrho cov uas cov neeg no tau xaiv los kav thiab tswj hwm tej hauj lwm ntawm txoj kev tsov rog no.

2 Vim saib seb, kuv muaj qee yam hais rau lawv kom cem lawv; vim saib seb, nej tus kheej yeej paub lawm hais tias nej raug tsa los sau ua ke cov tub rog, thiab muab ntaj, thiab muab liag, thiab muab txhua yam cuab yeej ua rog rau lawv, thiab xa lawv tawm mus tawm tsam cov Neeg Lamas, rau txhua qhov chaw uas cov Neeg Lamas yuav tuaj rau hauv peb thaj av.

3 Thiab nim no saib seb, kuv hais rau nej tias kuv tus kheej, thiab kuv cov tub rog, thiab Hilamas thiab nws cov tub rog, tau raug kev nyuaj siab loj heev; muaj tseeb tiag, kev tshaib, kev nqhis, thiab kev sab lim, thiab tag nrho txhua tsav txhua yam kev txom nyem.

4 Tiam sis saib seb, yog peb tsuas yog raug tej kev kub ntxhov no xwb ces peb yuav tsis yws thiab tsis hais.

5 Tiam sis saib seb, peb cov neeg raug tua tuag coob heev; muaj tseeb tiag, txhiab txhiab leej raug tua tuag los ntawm rab ntaj, thiab tej zaum twb tsis zoo li no yog tias nej xa zog thiab kev pab txaus tuaj rau peb cov tub rog. Muaj tseeb tiag, nej twb tsis quav ntsej txog peb ib nyuag qho li.

6 Thiab nim no saib seb, peb xav paub vim li cas uas nej tsis quav ntsej ib nyuag qho no; muaj tseeb tiag, peb xav paub vim li cas nej tsis txawj xav.

7 Nej puas xav tias nej yuav zaum tib pob saum nej tej rooj theej kiab tsis txawj xav zoo li ruam ntsuav, thaum nej cov yeeb ncuab tab tom ri txoj hauj lwm ntawm kev tuag nyob ib puag ncig nej? Muaj tseeb tiag, thaum lawv tab tom tua nej cov kwv tij txog txhiab txhiab leej—

8 Muaj tseeb tiag, lawv cov uas twb ntsia ntsoov nej kom tiv thaiv lawv, muaj tseeb tiag, lawv tau muab nej tso rau qhov chaw xwv kom nej yuav pab tau lawv, muaj tseeb tiag, nej yeej xa tau tub rog mus rau lawv, mus txhawb zog rau lawv, thiab cawm tau lawv txhiab txhiab leej kom txhob vau los ntawm rab ntaj.

9 Tiam sis saib seb, tsis tas li no xwb—nej tau ceev tseg nej tej khoom noj khoom siv tsis xa mus rau lawv, ua rau coob leej sib ntaus sib tua thiab tag lawv txoj sia vim yog lawv ntshaw kom cov neeg no muaj kev noj qab nyob zoo; muaj tseeb tiag, thiab lawv tau ua li no thaum lawv tab tom yuav luag piam sij nrog kev tshaib, vim yog nej tsis quav ntsej ib nyuag qho txog lawv li.

10 Thiab nim no, kuv cov kwv tij uas kuv hlub es—vim yeej tsim nyog hlub nej; muaj tseeb tiag, thiab tsim nyog rau nej yuav tsum rau siab ntso txhaub nej tus kheej rau cov neeg no txoj kev noj qab nyob zoo thiab txoj kev ywj pheej; tiam sis saib seb, nej twb tsis quav ntsej txog lawv, txhiab txhiab leej cov ntshav thiaj yuav los pauj rau nej lub taub hau; muaj tseeb tiag, vim Vajtswv twb paub tag nrho lawv lub suab quaj, thiab tag nrho lawv tej kev nyuaj siab—

11 Vim saib seb, nej puas xav tias nej yuav zaum tau saum nej tej rooj theej kiab, thiab vim yog Vajtswv txoj kev zoo kawg nkaus es nej tsis tas ua dab tsi thiab nws yuav cawm kom nej dim? Saib seb, yog nej xav li no ces nej xav yuam kev lawm.

12 Nej puas xav tias, nej cov kwv tij coob leej tau raug tua vim yog lawv tej kev phem? Kuv hais rau nej, yog nej xav li no ces nej xav yuam kev lawm; vim kuv hais rau nej tias, muaj coob leej tau vau los ntawm rab ntaj; thiab saib seb twb yog rau nej txoj kev raug txim;

13 Vim tus Tswv cia cov neeg ncaj ncees raug tua xwv kom nws txoj kev txim lij thiab txoj kev txiav txim yuav los raug cov neeg phem; yog li ntawd nej tsis txhob xav hais tias cov neeg ncaj ncees yuam kev vim yog lawv raug tua; tiam sis saib seb, lawv nkag mus rau hauv tus Tswv lawv tus Vajtswv qhov chaw so.

14 Thiab nim no saib seb, kuv hais rau nej tias, kuv ntshai kawg nkaus tsam Vajtswv tej kev txiav txim yuav los raug cov neeg no, vim yog lawv txoj kev tub nkeeg heev, muaj tseeb tiag, ib yam li txoj kev tub nkeeg ntawm peb cov nom tswv, thiab lawv txoj kev tsis quav ntsej loj kawg nkaus rau lawv cov kwv tij, muaj tseeb tiag, rau cov uas tau raug tua.

15 Yog tias txhob muaj txoj kev phem uas xub pib nyob ntawm peb cov thawj coj ces ntshe peb twb nres tau peb cov yeeb ncuab kom lawv txhob muaj hwj chim kov yeej peb.

16 Muaj tseeb tiag, yog tias txhob muaj npluav rog uas xub pib nyob hauv peb tus kheej; muaj tseeb tiag, yog tias txhob muaj cov neeg vaj ntxwv no, cov uas ua rau muaj nqaij ntuag ntshav nrog ntau nyob hauv peb; muaj tseeb tiag, nyob rau lub sij hawm thaum peb tseem tab tom sib cav nyob hauv peb tus kheej, yog tias peb sib sau peb lub zog tuaj ua ke ib yam li peb tau ua dhau los no; muaj tseeb tiag, yog tias txhob muaj kev ntshaw hwj chim thiab ntshaw txoj cai uas cov neeg vaj ntxwv ntawd ntshaw los kav peb; yog tias lawv muaj siab tseeb rau lub ntsiab ntawm peb txoj kev ywj pheej, thiab sib koom nrog peb, thiab tawm mus tawm tsam peb cov yeeb ncuab, es tsis txhob nqa lawv tej ntaj tawm tsam peb, uas yog lub ntsiab ntawm qhov uas ua rau muaj nqaij ntuag ntshav nrog ntau nyob hauv peb tus kheej; muaj tseeb tiag, yog tias peb tawm mus tawm tsam lawv nrog tus Tswv lub zog, ces ntshe peb twb ua rau peb cov yeeb ncuab tawg ri niab lawm, ntshe twb ua tiav, kom muaj raws li Vajtswv tej lus.

17 Tiam sis saib seb, nim no cov Neeg Lamas tab tom tuaj tawm tsam peb, tab tom txeeb peb tej av, thiab lawv tab tom xuas ntaj tua peb cov neeg, muaj tseeb tiag, peb cov poj niam thiab peb cov me nyuam, thiab kuj tab tom cab lawv mus ua qhev, tab tom ua rau lawv kom lawv raug txhua yam kev txom nyem, thiab muaj li no los twb vim yog txoj kev phem heev ntawm cov uas nrhiav hwj chim thiab nrhiav txoj cai, muaj tseeb tiag, twb yog cov neeg vaj ntxwv ntawd.

18 Tiam sis vim li cas kuv thiaj li hais ntau ntsig txog yam xwm no? Vim peb twb tsis paub ntshe nej tus kheej tab tom nrhiav kev tau txoj cai. Peb twb tsis paub ntshe nej los kuj yog cov neeg ntxeev siab rau nej lub teb chaws.

19 Los sis puas yog hais tias nej tsis quav ntsej txog peb vim yog nej nyob hauv plawv ntawm peb lub teb chaws thiab muaj kev tiv thaiv nyob ib puag ncig nej, es nej thiaj tsis hais kom xa zaub mov mus rau peb, thiab xa neeg mus txhawb zog rau peb cov tub rog?

20 Puas yog nej hnov qab tus Tswv nej tus Vajtswv tej lus txib? Muaj tseeb tiag, puas yog nej hnov qab nej cov yawg koob txoj kev poob cev qhev? Puas yog nej hnov qab hais tias tus Tswv tau cawm peb dim ntawm peb cov yeeb ncuab txhais tes ntau zaus?

21 Los sis nej puas xav hais tias tus Tswv tseem yuav cawm peb, thaum peb zaum saum peb lub rooj theej kiab thiab tsis siv tej kev uas tus Tswv tau pub rau peb?

22 Muaj tseeb tiag, puas yog nej tseem yuav zaum tub nkeeg ntsuav thaum txhiab txhiab leej, muaj tseeb tiag, thiab kaum tawm txhiab leej, cov uas kuj zaum tub nkeeg ntsuav nyob ib puag ncig nej, thaum uas muaj txhiab txhiab leej uas nyob ib puag ncig ntawm tej ciam teb ntawm thaj av tab tom raug xuas ntaj tua, muaj tseeb tiag, raug mob thiab los ntshav?

23 Nej puas xav tias Vajtswv yuav ntsia tias nej tsis muaj txim thaum uas nej zaum twj ywm thiab ntsia pom tej yam no? Saib seb kuv hais rau nej, Tsis yog li ntawd. Nim no kuv xav kom nej nco ntsoov tias Vajtswv tau hais tias yuav tsum xub ntxuav lub tais sab hauv ua ntej, thiab tom qab ntawd mam ntxuav lub tais sab nraud thiab.

24 Thiab nim no, tsuas yog nej yuav hloov siab lees txim rau tej uas nej tau ua lawm xwb, thiab pib sawv thiab ua hauj lwm, thiab xa zaub mov thiab xa neeg los rau peb, thiab mus rau Hilamas, xwv kom nws yuav txhawb tau feem ntawm peb lub teb chaws uas nws rov txeeb tau, thiab xwv kom peb yuav rov txeeb tau peb tej av uas tshuav nyob rau feem av no, saib seb yuav tsim nyog tias peb yuav tsis sib tawm tsam nrog cov Neeg Lamas ntxiv kom txog thaum peb xub ntxuav peb lub tais sab hauv tso, muaj tseeb tiag, twb yog tej thawj coj ntawm peb cov nom tswv.

25 Thiab tsuas yog nej yuav muab raws li kuv tsab ntawv, thiab tawm tuaj thiab ua rau kuv pom ib qho nplooj siab tseeb ntawm kev ywj pheej, thiab sib zog tuaj txhawb zog thiab ua kom peb cov tub rog ruaj khov, thiab pub zaub mov ua kev txhawb zog rau lawv, saib seb kuv yuav cia ib feem ntawm kuv cov neeg ywj pheej tswj tuav feem av no ntawm peb thaj av, thiab kuv yuav muab Vajtswv lub dag zog thiab tej koob hmoov rau lawv, kom tsis txhob muaj lwm yam hwj chim muaj peev xwm tawm tsam tau lawv—

26 Thiab li no los twb vim yog lawv txoj kev ntseeg muaj zog heev, thiab lawv tej kev ua siab ntev nyiaj lawv tej kev txom nyem—

27 Thiab kuv yuav los rau ntawm nej, thiab yog tias muaj leej twg nyob hauv nej uas tseem xav tau kev ywj pheej, muaj tseeb tiag, txawm hais tias tshuav ib nyuag qhov hmoov ywj pheej, saib seb kuv yuav txhaub kom muaj kev ntxeev siab nyob hauv nej, kom txog thaum cov uas xav txeeb hwj chim thiab txeeb cai tu noob mus.

28 Muaj tseeb tiag, saib seb kuv tsis ntshai nej lub hwj chim los sis nej txoj cai, tiam sis kuv ntshai tus uas yog kuv tus Vajtswv; thiab twb yog raws li nws tej lus txib es kuv thiaj nqa kuv rab ntaj los tiv thaiv lub hom phiaj ntawm kuv lub teb chaws, thiab twb vim yog nej tej kev ua phem es peb thiaj raug kev ploj ntau.

29 Saib seb txog sij hawm lawm, muaj tseeb tiag, nim no twb yuav txog lub sij hawm lawm, tsuas yog nej yuav txhaub nej tus kheej los tiv thaiv nej lub teb chaws thiab nej cov me nyuam xwb, vim rab ntaj ntawm kev txim lij twb dai rawv ntawm nej sab saud; muaj tseeb tiag, thiab rab ntaj ntawd yuav los hlais nej thiab los xyuas nej kom txog thaum nej puas tsuaj huv tib si mus.

30 Saib seb, kuv tos kev pab ntawm nej; thiab, tsuas yog tias nej yuav tuaj pab kom peb dim pa xwb, saib seb, kuv yuav los rau ntawm nej, twb nyob hauv thaj av Xalahelas, thiab xuas ntaj tsuav nej, kom nej thiaj tsis txhob muaj hwj chim los cuam tshuam cov neeg no txoj kev vam meej los ntawm lub ntsiab ntawm peb txoj kev ywj pheej.

31 Vim saib seb, tus Tswv yuav tsis cia kom nej muaj sia nyob thiab muaj zog zuj zus ua nej tej kev phem kom ua rau nws cov neeg ncaj ncees puas tsuaj mus.

32 Saib seb, nej puas xav tias tus Tswv yuav tseg nej thiab tawm tuaj nrog kev txiav txim rau cov Neeg Lamas, thaum pom tias twb yog lawv tej yawg koob txoj kab lis kev cai uas tau ua rau lawv muaj kev ntxub, muaj tseeb tiag, thiab cov uas tau khiav ntawm peb mus twb ua rau txoj kev ntxub ntawd haj yam loj ntxiv tuaj, thaum nej txoj kev ua phem twb yog rau lub ntsiab ntawm nej txoj kev ntshaw yeeb koob thiab tej yam uas tsis muaj nuj nqis ntawm lub ntiaj teb?

33 Nej yeej paub tias nej ua txhaum Vajtswv tej kev cai, thiab nej yeej paub tias nej muab tej kev cai ntawd tsuj rau hauv nej qab xib taws. Saib seb, tus Tswv hais rau kuv tias: Yog cov uas nej tau tsa los ua nej cov tswv xeev tsis kam hloov siab lees txim ntawm lawv tej kev txhaum thiab tej kev ua phem, ces nej yuav tsum mus ua rog tawm tsam lawv.

34 Thiab nim no saib seb, kuv, Maulaunais, raug txhib, kom ua raws li txoj kev khi lus uas kuv tau khi tias yuav coj kuv tus Vajtswv tej lus txib; yog li ntawd kuv xav kom nej mloog Vajtswv txoj lus, thiab cia li nrawm nroos xa nej tej khoom noj khoom siv thiab nej cov tub rog tuaj rau kuv, thiab rau Hilamas.

35 Thiab saib seb, yog nej tsis ua li no kuv yuav los xyuas nej sai heev; vim saib seb, Vajtswv yuav tsis cia kom peb piam sij vim txoj kev tshaib; yog li ntawd nws yuav muab nej tej zaub mov rau peb, txawm hais tias yuav tsum muab los ntawm rab ntaj. Nim no xyuas kom nej ua raws li Vajtswv txoj lus.

36 Saib seb, kuv yog Maulaunais, nej tus thawj hau rog. Kuv tsis yog nrhiav hwj chim, tiam sis rub kom hwj chim poob. Kuv tsis yog nrhiav sam xeeb ntawm neeg ntiaj teb, tiam sis nrhiav kuv tus Vajtswv lub yeeb koob, thiab kev ywj pheej thiab kev nyab xeeb ntawm kuv lub teb chaws. Thiab kuv xaus kuv tsab ntawv li no.