1 Nim no tau muaj tias thaum cov Neeg Lamas uas tau mus ua rog tawm tsam cov Neeg Nifais pom hais tias, tom qab muaj ntau yam nyuaj rau lawv thaum lawv mus ua kom cov Neeg Nifais puas tsuaj, twb ua tsis tau rau cov Neeg Nifais puas tsuaj, lawv rov qab mus rau thaj av Nifais.

2 Thiab tau muaj tias cov neeg Amalej npau taws heev, vim yog lawv coob leej raug tua tuag. Thiab thaum lawv pom tias lawv tsis muaj peev xwm ua pauj rau cov Neeg Nifais, lawv pib txhaub kom cov neeg npau taws tawm tsam lawv cov kwv tij, uas yog cov neeg Eethais-Nifais-Lihais; yog li ntawd lawv rov pib ua kom lawv puas tsuaj dua.

3 Nim no ib zaug ntxiv cov neeg no tsis kam nqa lawv tej cuab yeej ua rog, thiab lawv cia lawv tus kheej raug tua raws li lawv cov yeeb ncuab siab nyiam.

4 Nim no thaum Amoos thiab nws cov kwv tij pom txoj kev puas tsuaj no nyob hauv cov uas lawv hlub heev, thiab nyob hauv cov uas hlub lawv heev—vim cov neeg Eethais-Nifais-Lihais hwm lawv yam li lawv yog cov tim tswv uas Vajtswv tau xa los cawm lawv dim ntawm txoj kev puas tsuaj uas kav ib txhis—yog li ntawd, thaum Amoos thiab nws cov kwv tij pom txoj kev puas tsuaj loj no, lawv mob siab heev nrog txoj kev khuv leej, thiab lawv hais rau tus vaj ntxwv hais tias:

5 Cia peb sau tus Tswv cov neeg no los ua ke, thiab cia peb mus rau nram thaj av Xalahelas mus cuag peb cov kwv tij cov Neeg Nifais, thiab khiav tawm ntawm peb cov yeeb ncuab tes, xwv kom peb thiaj tsis puas tsuaj.

6 Tiam sis tus vaj ntxwv hais rau lawv tias: Saib seb, cov Neeg Nifais yuav ua kom peb puas tsuaj, vim yog tej kev tua neeg coob thiab tej kev txhaum uas peb tau ua rau lawv.

7 Thiab Amoos hais tias: Kuv yuav mus thiab nug tus Tswv, thiab yog nws hais rau peb tias, cia li mus rau nram peb cov kwv tij, nej puas yuav mus?

8 Thiab tus vaj ntxwv hais rau nws tias: Muaj tseeb tiag, yog tus Tswv hais rau peb tias mus, peb yuav mus rau nram peb cov kwv tij, thiab peb yuav ua lawv qhev kom txog thaum peb kho tau tej kev tua neeg coob thiab tej kev txhaum uas peb tau ua rau lawv.

9 Tiam sis Amoos hais rau nws tias: Qhov ko txhaum peb cov kwv tij txoj kev cai, uas kuv txiv yog tus txhim tsa, hais tias yuav tsum tsis txhob muaj ib tug twg ua qhev nyob hauv lawv; yog li ntawd cia peb mus thiab tso siab rau peb cov kwv tij tej kev hlub tshua.

10 Tiam sis tus vaj ntxwv hais rau nws tias: Nug tus Tswv, thiab yog nws hais rau peb tias mus, peb yuav mus; tsis li ntawd ces peb yuav piam sij nyob hauv thaj av.

11 Thiab tau muaj tias Amoos tau mus thiab nug tus Tswv, thiab tus Tswv hais rau nws tias:

12 Coj cov neeg no tawm ntawm thaj av no mus, xwv kom lawv yuav tsis piam sij; vim Dab Ntxwg Nyoog tuav tau cov neeg Amalej lub siab ruaj heev li, cov uas txhaub kom cov Neeg Lamas npau taws tawm tsam lawv cov kwv tij kom muab lawv tua; yog li ntawd nej cia li tawm ntawm thaj av no mus; thiab cov neeg no tau koob hmoov nyob hauv tiam no, vim kuv yuav tsom kwm lawv.

13 Thiab nim no tau muaj tias Amoos mus thiab hais rau tus vaj ntxwv tag nrho tej lus uas tus Tswv tau hais rau nws.

14 Thiab lawv sau tag nrho lawv cov neeg tuaj ua ke, muaj tseeb tiag, tag nrho tus Tswv cov neeg, thiab sau tag nrho lawv tej pab yaj thiab tej tsiaj txhu los ua ke, thiab ncaim tawm ntawm thaj av, thiab los rau hauv koog hav zoov uas kem thaj av Nifais thiab thaj av Xalahelas, thiab los txog ze rau tej ciam teb ntawm thaj av.

15 Thiab tau muaj tias Amoos hais rau lawv tias: Saib seb, kuv thiab kuv cov kwv tij yuav tawm mus rau hauv thaj av Xalahelas, thiab nej nyob qhov no kom txog thaum peb rov qab los; thiab peb yuav sim peb cov kwv tij lub siab, saib lawv puas kam nej los rau hauv lawv thaj av.

16 Thiab tau muaj tias thaum Amoos tab tom tawm mus rau hauv thaj av, nws thiab nws cov kwv tij ntsib Amas, nyob rau hauv qhov chaw uas tau hais txog; thiab saib seb, nov yeej yog ib txoj kev sib ntsib uas xyiv fab heev.

17 Nim no Amoos txoj kev xyiv fab loj kawg nkaus twb ua rau nws puv npo; muaj tseeb tiag, nws lub siab puv nrog nws tus Vajtswv txoj kev xyiv fab, ua rau nws qaug zog; thiab nws rov vau rau hauv av dua.

18 Nim no qhov no puas yog txoj kev xyiv fab uas loj heev? Saib seb, qhov no yog txoj kev xyiv fab uas tsis muaj leej twg tau txais tsuas yog tus uas hloov siab lees txim tiag tiag thiab tus uas txo hwj chim los nrhiav txoj kev zoo siab xwb.

19 Nim no Amas txoj kev xyiv fab thaum ntsib nws cov kwv tij yeej loj tiag tiag, thiab txoj kev xyiv fab ntawm Aloos, ntawm Oonaws, thiab Heenais kuj loj heev; tiam sis saib seb lawv txoj kev xyiv fab tsis ua rau lawv qaug zog.

20 Thiab nim no tau muaj tias Amas coj nws cov kwv tij rov qab mus rau tom thaj av Xalahelas; twb mus rau hauv nws lub tsev. Thiab lawv mus thiab qhia rau tus thawj txiav txim txhua yam uas tau tshwm sim rau lawv nyob hauv thaj av Nifais, nyob hauv lawv cov kwv tij, ua yog cov Neeg Lamas.

21 Thiab tau muaj tias tus thawj txiav txim xa ib zaj lus tshaj tawm mus thoob plaws rau txhua thaj av, thov paub cov neeg lub suab saib lawv puas kam txais lawv cov kwv tij, uas yog cov neeg Eethais-Nifais-Lihais.

22 Thiab tau muaj tias cov neeg lub suab tawm, hais tias: Saib seb, peb yuav muab thaj av Yesoos, uas yog nyob sab hnub tuaj ze tus dej hiav txwv, uas yog npuab thaj av Huaj Vam, uas yog nyob sab qab teb ntawm thaj av Huaj Vam; thiab thaj av Yesoos no yog thaj av uas peb yuav muab rau peb cov kwv tij ua ib qho qub txeeg qub teg.

23 Thiab saib seb, peb yuav tso peb tej tub rog nyob nruab nrab ntawm thaj av Yesoos thiab thaj av Nifais, xwv kom peb yuav tiv thaiv tau peb cov kwv tij nyob hauv thaj av Yesoos; thiab peb ua li no rau peb cov kwv tij, vim yog lawv ntshai nqa cuab yeej ua rog tawm tsam lawv cov kwv tij tsam lawv ua txhaum; thiab qhov uas lawv ntshai heev no twb yog vim lawv txoj kev hloov siab lees txim mob heev uas lawv muaj, vim yog lawv tej kev tua neeg ntau thiab lawv tej kev phem heev.

24 Thiab nim no saib seb, peb yuav ua li no rau peb cov kwv tij, xwv kom lawv yuav tau thaj av Yesoos ua lawv tug; thiab peb yuav cia peb tej tub rog tiv thaiv lawv ntawm lawv cov yeeb ncuab, yog hais tias lawv kam muab ib feem ntawm lawv tej khoom los pab txhawb peb cov tub rog.

25 Nim no, tau muaj tias thaum Amoos tau hnov qhov no, nws rov qab mus rau cov neeg Eethais-Nifais-Lihais, thiab Amas kuj nrog nws thiab, mus rau tom hav zoov, qhov chaw uas lawv rub lawv tej tsev pheeb suab ntaub, thiab qhia rau lawv paub txhua yam no. Thiab Amas kuj qhia rau lawv txog nws txoj kev hloov siab los ntseeg Vajtswv, nrog Amoos thiab Aloos, thiab nws cov kwv tij.

26 Thiab tau muaj tias qhov no ua rau lawv muaj kev xyiv fab loj heev. Thiab lawv mus rau nram thaj av Yesoos, thiab mus nyob rau hauv thaj av Yesoos; thiab cov neeg Nifais hu lawv ua Amoos cov neeg; yog li ntawd lawv tau lub npe ntawd txij thaum ntawd los.

27 Thiab lawv nyob nrog cov Neeg Nifais, thiab tau suav lawv nrog cov neeg uas yog cov ntseeg ntawm Vajtswv lub koom txoos. Thiab lawv txawv lwm cov neeg vim yog lawv txoj kev mob siab hlub tshua rau Vajtswv, thiab rau tib neeg; vim lawv ua neeg siab ncaj thiab siab zoo huv si ua txhua yam; thiab lawv nyob ruaj nrees ntawm txoj kev ntseeg Khetos, kom mus txog thaum kawg.

28 Thiab lawv xav tias txoj kev ua kom lawv cov kwv tij nqaij ntuag ntshav nrog yog yam ntxim ntxub tshaj plaws; thiab yeej tsis muaj leej twg hais tau kom lawv nqa cuab yeej ua rog tawm tsam lawv cov kwv tij; thiab lawv yeej tsis ntshai kev tuag ib nyuag qhov li, vim yog lawv txoj kev cia siab thiab tej kev to taub txog Khetos thiab txog txoj kev sawv rov los; yog li ntawd, qhov uas Khetos kov yeej kev tuag twb ua rau kev tuag tsis muaj kuab rau lawv.

29 Yog li ntawd, lawv xum raug txoj kev tuag uas mob tshaj thiab nyuaj tshaj uas lawv cov kwv tij muaj peev xwm ua, ua ntej lawv yuav nqa ntaj los sis nqa liag muab lawv cov kwv tij tua.

30 Thiab xws li no lawv yog ib co neeg rau siab thiab ntxim hlub, ib co neeg uas tau koob hmoov nplua mias los ntawm tus Tswv.