1 Thiab tau muaj tias tus Tswv txib kom Amas thiab Amulej nkawd tawm ntawm lub nroog ntawd mus; thiab nkawd tawm los, thiab mus rau hauv thaj av Xidos; thiab saib seb, nyob rau qhov chaw ntawd nkawd pom tag nrho cov neeg uas tau tawm ntawm thaj av Amoonaihas, cov uas cov neeg tom lub nroog Amoonaihas muab ntiab tawm thiab xuas pob zeb ntaus, vim yog lawv ntseeg Amas tej lus.

2 Thiab nkawd piav rau lawv txhua yam uas tau tshwm sim rau lawv cov poj niam thiab me nyuam, thiab kuj piav ntsig txog nkawd tus kheej, thiab txog nkawd lub hwj chim ntawm kev cawm dim.

3 Thiab Xi-elas los kuj mob pw nyob tom Xidos, vim nws ua npaws kub, uas yog mob los ntawm tej kev txom nyem hauv nws lub siab vim yog nws txoj kev phem, vim nws xav tias ntshe tsis muaj Amas thiab Amulej lawm; thiab nws xav tias ntshe cov neeg tom lub nroog Amoonaihas twb muab nkawd tua vim yog nws txoj kev ua phem. Thiab txoj kev txhaum loj no, thiab nws tej kev txhaum ntau lwm yam, tau ua rau nws ntxhov siab txog rau thaum nws mob heev kawg li, thiab nws tsis muaj kev cawm dim; yog li ntawd nws thiaj pib kub heev nrog hluav taws kub.

4 Nim no, thaum nws hnov tias Amas thiab Amulej tau los rau hauv thaj av Xidos, nws lub siab pib rov muaj zog tuaj; thiab nws xa ib tsab xov tam sim ntawd mus rau nkawd, xav kom nkawd mus cuag nws.

5 Thiab tau muaj tias nkawd mus kiag tam sim ntawd, ua raws li tsab xov uas nws tau xa mus rau nkawd; thiab nkawd mus rau hauv tsev mus cuag Xi-elas; thiab nkawd pom nws pw saum nws lub txaj, vim nws mob, thiab ua npaws kub tsis muaj zog kiag li; thiab nws lub siab los kuj mob heev kawg nkaus vim yog nws tej kev ua phem; thiab thaum nws pom nkawd nws xyab nws txhais tes los, thiab thov nkawd kom nkawd kho nws.

6 Thiab tau muaj tias Amas tuav nws txhais tes, hais rau nws tias: Koj puas ntseeg Khetos lub hwj chim uas cawm tau tib neeg?

7 Thiab nws teb hais tias: Muaj tseeb tiag, kuv ntseeg tag nrho tej lus uas koj tau qhia.

8 Thiab Amas hais tias: Yog koj ntseeg Khetos txoj kev txhiv dim ces koj yeej zoo taus.

9 Thiab nws hais tias: Muaj tseeb tiag, kuv ntseeg raws nraim li koj tej lus.

10 Thiab tom qab ntawd Amas thov tus Tswv nrov nrov hais tias: Auj tus Tswv peb tus Vajtswv es, thov hlub tshua tus txiv neej no, thiab kho nws raws li nws txoj kev ntseeg uas yog kev ntseeg Khetos.

11 Thiab thaum Amas hais tej lus no tas, Xi-elas sawv tsees, thiab pib mus kev; thiab qhov no ua rau tag nrho cov neeg xav tsis thoob; thiab cov neeg paub txog qhov no mus thoob plaws hauv thaj av Xidos.

12 Thiab Amas muab Xi-elas ua kev cai raus dej rau tus Tswv; thiab txij li lub sij hawm ntawd mus nws pib qhuab qhia cov neeg.

13 Thiab Amas tsa ib lub koom txoos nyob hauv thaj av Xidos, thiab tsa cov pov thawj thiab cov xib hwb nyob hauv thaj av, los muab txhua tus uas xav ua kev cai raus dej ua kev cai raus dej rau tus Tswv.

14 Thiab tau muaj tias lawv coob heev; vim lawv tau tuaj ntawm tag nrho ib thaj tsam ib puag ncig Xidos tuaj, thiab ua kev cai raus dej.

15 Tiam sis cov neeg uas nyob hauv thaj av Amoonaihas, lawv tseem ua ib co neeg siab tawv thiab tawv ncauj; thiab lawv tsis hloov siab lees txim rau lawv tej kev txhaum, thiab hais tias tag nrho Amas thiab Amulej nkawd tej hwj chim yog tus dab phem li; vim lawv yog tib txoj kev ntseeg li Nihos, thiab tsis ntseeg tias muaj txoj kev hloov siab lees txim rau lawv tej kev txhaum.

16 Thiab tau muaj tias Amas thiab Amulej, vim Amulej tau tso tseg tag nrho nws tej kub, thiab tej nyiaj dawb, thiab nws tej khoom muaj nuj nqis, uas muaj nyob hauv thaj av Amoonaihas, los txais Vajtswv txoj lus, thiab vim nws txiv thiab nws cov kwv tij neej tsa thiab cov uas yog nws cov phooj ywg ua ntej ntawd tau xyeej nws;

17 Yog li ntawd, tom qab Amas tau tsa lub koom txoos nyob hauv Xidos, nws pom tias muaj ib txoj kev ris siab loj, muaj tseeb tiag, nws pom tias cov neeg ris siab txog lawv lub siab muab hlob, thiab pib txo lawv lub hwj chim rau Vajtswv, thiab pib sau lawv tus kheej tuaj ua ke rau ntawm lawv tej chaw dawb huv tuaj teev tiam Vajtswv ntawm lub thaj, xyuas ntsoov thiab thov Vajtswv tsis tu ncua, xwv kom lawv yuav dim ntawm Dab Ntxwg Nyoog, thiab ntawm txoj kev tuag, thiab ntawm txoj kev puas tsuaj—

18 Nim no ib yam li kuv tau hais, vim Amas tau pom tag nrho tej yam no, yog li ntawd nws thiaj coj Amulej thiab los rau hauv thaj av Xalahelas, thiab coj nws mus rau tom nws lub tsev, thiab pab nws ntawm nws tej kev txom nyem, thiab pab txhawb nws txoj kev ntseeg tus Tswv.

19 Thiab xyoo thib kaum ntawm cov neeg txiav txim txoj kev kav Nifais cov neeg tau xaus li no.