1 Nim no thaum Amoos thiab nws cov kwv tij lawv sib ncaim nyob hauv tej ciam teb ntawm cov Neeg Lamas thaj av, saib seb Aloos taug kev mus rau tom thaj av uas cov Neeg Lamas muab hu tias, Yeluxalees, hu raws li thaj av uas lawv cov yawg koob yug nyob rau haud; thiab thaj av Yeluxalees nyob deb npuab tej ciam teb ntawm thaj av Maumoos.

2 Nim no cov Neeg Lamas thiab cov neeg Amalej thiab Amuloos cov neeg tau tsa ib lub nroog loj, uas hu ua Yeluxalees.

3 Nim no cov Neeg Lamas ntawm lawv tus kheej xwb yeej tawv txaus, tiam sis cov neeg Amalej thiab cov neeg Amuloos tseem tawv tshaj; yog li ntawd lawv ua rau cov Neeg Lamas kom lawv ua lawv lub siab tawv, kom lawv tej kev phem thiab lawv tej kev qias loj zuj zus.

4 Thiab tau muaj tias Aloos tuaj rau hauv lub nroog Yeluxalees, thiab xub pib qhuab qhia rau cov neeg Amalej. Thiab nws pib qhuab qhia rau lawv nyob hauv lawv tej tsev sab laj, vim lawv tau tsim tej tsev sab laj raws li tus txheej txheem ntawm Nihos; vim coob leej ntawm cov neeg Amalej thiab cov neeg Amuloos ua raws li tus txheej txheem ntawm Nihos.

5 Yog li ntawd, thaum Aloos nkag mus rau hauv lawv ib lub tsev sab laj mus qhuab qhia rau cov neeg, thiab thaum nws tseem tab tom hais lus rau lawv, saib seb muaj ib tug neeg Amalej sawv thiab pib cav nrog nws, hais tias: Qhov uas koj ua tim khawv yog dab tsi? Koj puas tau pom ib tug tim tswv? Yog vim li cas cov tim tswv ho tsis tshwm sim los rau peb pom? Saib seb tsis yog cov neeg no twb coj zoo ib yam li koj cov neeg thiab los?

6 Koj kuj hais tias, tsuas yog peb hloov siab lees txim xwb tsis li ntawd ces peb yuav piam sij. Ua li cas koj ho paub tau peb tej kev xav thiab tej uas peb lub siab xav ua? Ua li cas koj ho paub tias peb muaj tej yam uas peb yuav tsum hloov siab lees txim? Ua li cas koj ho paub tau tias peb tsis yog ib co neeg ncaj ncees? Saib seb, peb tau tsim tej chaw dawb huv, thiab peb twb sau peb tus kheej ua ke tuaj teev tiam Vajtswv. Peb yeej ntseeg tias Vajtswv yuav cawm neeg txhua tus.

7 Nim no Aloos hais rau nws tias: Koj puas ntseeg tias Vajtswv Leej Tub yuav los txhiv tib neeg dim ntawm lawv tej kev txhaum?

8 Thiab tus txiv neej hais rau nws tias: Peb tsis ntseeg hais tias koj paub tej yam zoo li ntawd. Peb tsis ntseeg tej kab li kev cai ruam no. Peb tsis ntseeg tias koj paub txog tej uas yuav muaj los, thiab peb tsis ntseeg tias koj cov yawg koob thiab peb cov yawg koob paub ntsig txog tej uas lawv tau hais, txog tej uas yuav muaj los.

9 Nim no Aloos pib nthuav cov vaj lug kub rau lawv ntsig txog Khetos txoj kev los, thiab ntsig txog cov neeg tuag txoj kev sawv rov los, thiab hais tias yuav tsis muaj kev txhiv dim rau tib neeg tsuas yog los ntawm Khetos txoj kev tuag thiab kev txom nyem, thiab txoj kev theej txhoj los ntawm nws cov ntshav.

10 Thiab tau muaj tias thaum nws pib piav tej yam no rau lawv lawv npau taws rau nws, thiab pib thuam nws; thiab lawv tsis kam mloog tej lus uas nws hais.

11 Yog li ntawd, thaum nws pom tias lawv tsis kam mloog nws tej lus, nws tawm ntawm lawv lub tsev teev ntuj, thiab los rau ib lub zos uas hu ua Anais-Athais, thiab nyob ntawm qhov chaw ntawd nws pom Mulaukhais tab tom qhuab qhia txoj lus rau lawv; thiab Eemas thiab nws cov kwv tij thiab. Thiab lawv sib cam nrog coob leej txog txoj lus.

12 Thiab tau muaj tias lawv pom tias cov neeg ua lawv lub siab tawv qhawv, yog li ntawd lawv thiaj tau tawm thiab los rau hauv thaj av Midaunais. Thiab lawv tshaj tawm txoj lus rau coob leej, thiab tsawg tus thiaj ntseeg tej lus uas lawv qhia.

13 Tiam sis, Aloos thiab ib txhia ntawm nws cov kwv tij raug txhom thiab tso rau hauv lub tsev kaw, thiab lawv cov uas seem tau khiav tawm ntawm thaj av Midaunais mus rau tej thaj tsam ib puag ncig.

14 Thiab cov uas raug tso rau hauv lub tsev kaw raug kev txom nyem ntau yam, thiab Lamaunais thiab Amoos nkawd txhais tes tau tso lawv dim, thiab pub zaub mov rau lawv noj thiab muab tsoos tsho rau lawv hnav.

15 Thiab lawv rov tawm mus tshaj tawm txoj lus dua, thiab tau muab lawv tso dim ntawm lub tsev kaw thawj zaug xws li no; thiab lawv raug txom nyem xws li no.

16 Thiab lawv tawm mus rau txhua qhov chaw uas tus Tswv tus Ntsuj Plig coj lawv, mus tshaj tawm Vajtswv txoj lus nyob hauv cov neeg Amalej txhua lub tsev teev ntuj, los sis nyob hauv cov Neeg Lamas txhua qhov chaw sib sau ua ke uas cia rau lawv nkag mus haud.

17 Thiab tau muaj tias tus Tswv pib foom koob hmoov rau lawv, lawv thiaj coj tau coob leej los paub txog qhov tseeb; muaj tseeb tiag, lawv qhia tau coob leej kom paub txog lawv tej kev txhaum, thiab txog tej kab lis kev cai ntawm lawv cov yawg koob, uas tsis yog.

18 Thiab tau muaj tias Amoos thiab Lamaunais rov qab ntawm thaj av Midaunais mus rau thaj av Ixama-ees, uas yog thaj av ntawm lawv qub txeeg qub teg.

19 Thiab vaj ntxwv Lamaunais tsis kam cia Amoos ua hauj lwm rau nws, los sis ua nws tus tub qhe.

20 Tiam sis nws hais kom cov neeg tsim tej tsev sab laj nyob hauv thaj av Ixama-ees; thiab nws hais tso cai rau nws cov neeg, los sis cov neeg uas nws kav, kom lawv sib sau tuaj ua ke.

21 Thiab nws zoo siab rau lawv, thiab nws qhia ntau yam rau lawv. Thiab nws kuj tshaj tawm rau lawv tias lawv yog ib co neeg uas nws kav, thiab lawv yog ib co neeg nyob ywj siab, hais tias lawv twb dim ntawm tej kev nruj tsiv ntawm tus vaj ntxwv, uas yog nws txiv; vim tias nws txiv tau pub rau nws kav cov neeg uas nyob hauv thaj av Ixama-ees, thiab nyob hauv tag nrho thaj av ib puag ncig.

22 Thiab nws kuj tshaj tawm rau lawv tias lawv yuav muaj kev ywj pheej teev tiam tus Tswv lawv tus Vajtswv raws li lawv lub siab nyiam, nyob txhua qhov chaw uas lawv nyob, yog tias nyob hauv thaj av uas vaj ntxwv Lamaunais kav.

23 Thiab Amoos tau qhuab qhia rau vaj ntxwv Lamaunais cov neeg; thiab tau muaj tias nws qhia lawv txhua yam ntsig txog kev ncaj ncees. Thiab nws ntuas lawv txhua hnub, rau siab ntso tag nrho; thiab lawv mloog nws txoj lus, thiab lawv kub siab lug coj Vajtswv tej lus txib.