1 Thiab nim no, cov no yog Amoos tej lus rau nws cov kwv tij, uas hais li no: Kuv cov kwv tij thiab kuv cov kwv npawg, saib seb kuv hais rau nej tias, yeej tsim nyog rau peb zoo siab heev; vim thaum peb pib nram thaj av Xalahelas tuaj peb puas xav txog hais tias Vajtswv yuav pub tej koob hmoov zoo npaum li no rau peb?

2 Thiab nim no, kuv nug hais tias, nws tau muab yam koob hmoov tseem ceeb dab tsi rau peb? Nej puas muaj cuab kav qhia tau?

3 Saib seb, kuv teb rau nej tias; peb cov kwv tij, cov Neeg Lamas, twb nyob hauv txoj kev tsaus ntuj, muaj tseeb tiag, twb nyob hauv lub qhov tob uas tsaus ntuj tshaj plaws, tiam sis saib seb, twb coj tau lawv pes tsawg leej los pom Vajtswv txoj kev kaj uas zoo kawg nkaus! Thiab qhov no yog qhov koob hmoov uas Vajtswv tau muab rau peb, hais tias peb yog cov cuab yeej nyob hauv Vajtswv txhais tes los ua txoj hauj lwm tseem ceeb no.

4 Saib seb, lawv txhiab txhiab leej zoo siab heev, thiab twb coj tau lawv txhiab txhiab leej los rau hauv Vajtswv pab yaj.

5 Saib seb, daim teb tau siav lawm, thiab nej tau koob hmoov, vim nej cev liag mus hlais, thiab siv nej lub zog mus sau, muaj tseeb tiag, nej ua hauj lwm tag nrho ib hnub ntev loo; thiab saib seb tej teg nplej uas nej sau los muaj ntau kawg! Thiab tus Tswv yuav muab lawv sau mus rau hauv txhab, xwv kom lawv thiaj tsis xiam mus.

6 Muaj tseeb tiag, lawv yuav tsis raug nthwv cua daj cua dub nplawm kom vau thaum txog hnub kawg; muaj tseeb tiag, thiab lawv yuav tsis raug tej khaub zig cua ntsawj kom tawg ri niab; tiam sis thaum nthwv cua daj cua dub los yuav muab lawv sau los ua ke rau hauv lawv qhov chaw, xwv kom nthwv cua daj cua dub tsis muaj peev xwm ntsawj mus txog lawv; muaj tseeb tiag, thiab lawv yuav tsis raug tej cua nyaum tshuab mus rau qhov twg los xij uas tus yeeb ncuab xav cab lawv mus.

7 Tiam sis saib seb, lawv nyob hauv tus Tswv ntawm kev sau qoob loo txhais tes, thiab lawv yog nws li; thiab nws yuav tsa lawv sawv thaum txog hnub kawg.

8 Cia li qhuas peb tus Vajtswv lub npe; cia peb hu nkauj qhuas nws, muaj tseeb tiag, cia peb ua tsaug rau nws lub npe dawb huv, vim nws ua ncaj ncees mus ib txhis.

9 Yog hais tias peb tsis tau tawm ntawm thaj av Xalahelas tuaj, cov kwv tij uas peb hlub no, cov uas hlub peb heev, yeej tseem yuav raug tsim txom nrog kev ntxub ntxaug tawm tsam peb, muaj tseeb tiag, thiab lawv kuj tseem yuav yog cov neeg qhua rau Vajtswv.

10 Thiab tau muaj tias thaum Amoos hais tej lus no tas lawm, nws tus tij laug Aloos cem nws, hais tias: Amoos, kuv ntshai tsam koj txoj kev xyiv fab ua rau koj khav theeb.

11 Tiam sis Amoos hais rau nws tias: Kuv twb tsis khav theeb txog kuv tus kheej lub zog, los sis txog kuv tus kheej lub tswv yim; tiam sis saib seb, kuv txoj kev xyiv fab twb puv npo, muaj tseeb tiag, kuv lub siab twb muaj kev xyiv fab puv nkaus, thiab kuv yuav zoo siab rau kuv tus Vajtswv.

12 Muaj tseeb tiag, kuv paub tias kuv tsis tseem ceeb dab tsi; hais txog kuv lub zog los kuv yeej tsis muaj zog; yog li ntawd kuv yuav tsis khav txog kuv tus kheej, tiam sis kuv yuav khav txog kuv tus Vajtswv, vim nrog nws lub zog kuv yeej muaj peev xwm ua tau txhua yam; muaj tseeb tiag, saib seb, peb tau ua ntau yam txuj ci tseem ceeb loj nyob hauv thaj av no, yog li ntawd peb yuav qhuas nws lub npe mus ib txhis.

13 Saib seb, nws twb tso peb cov kwv tij pes tsawg txhiab leej dim ntawm ntuj txiag teb tsaus tej kev mob nkeeg; thiab coj tau lawv los hu nkauj txog txoj kev hlub uas txhiv dim, thiab muaj li no los twb vim yog lub hwj chim ntawm nws txoj lus uas yog nyob hauv peb, yog li ntawd puas tsim nyog rau peb zoo siab heev?

14 Muaj tseeb tiag, tsim nyog rau peb qhuas nws mus ib txhis, vim nws yog tus Vajtswv uas Siab Tshaj Plaws, thiab tau tso peb cov kwv tij dim ntawm ntuj txiag teb tsaus tej saw hlau.

15 Muaj tseeb tiag, txoj kev tsaus ntuj thiab kev puas tsuaj uas kav ib txhis twb khaub zig lawv; tiam sis saib seb, nws twb coj lawv los rau hauv nws txoj kev kaj uas kav ib txhis, muaj tseeb tiag, los rau txoj kev cawm seej uas kav ib txhis; thiab nws txoj kev hlub uas loj tshaj txhua yam twb khaub zig lawv; muaj tseeb tiag, thiab peb twb yog cov cuab yeej nyob hauv nws txhais tes los ua txoj hauj lwm tseem ceeb thiab zoo kawg nkaus no.

16 Yog li ntawd, cia peb qhuas nws, muaj tseeb tiag, peb yuav qhuas tus Tswv; muaj tseeb tiag, peb yuav zoo siab kawg, vim peb txoj kev xyiv fab twb puv npo; muaj tseeb tiag, peb yuav qhuas peb tus Vajtswv mus ib txhis. Saib seb, leej twg yuav muaj peev xwm zoo siab ntau dhau lawm rau tus Tswv? Muaj tseeb tiag, leej twg yuav muaj cuab kav hais ntau dhau lawm txog nws lub hwj chim loj, thiab txog nws txoj kev hlub tshua, thiab txog nws txoj kev ua siab ntev nyiaj rau noob neej? Saib seb, kuv hais rau nej tias, kuv twb tsis muaj peev xwm hais tau feem uas me tshaj plaws hauv kuv lub siab.

17 Leej twg yuav xav txog hais tias peb tus Vajtswv yuav muaj kev hlub tshua ua luaj es nws thiaj pab tshem peb dim ntawm peb txoj kev ua phem, ua txhaum, thiab ua vuab tsuab?

18 Saib seb, peb tau tawm mus nrog txoj kev npau taws, nrog tej kev hawv uas phem hais tias yuav ua kom nws lub koom txoos puas tsuaj.

19 Auj yog li ntawd, vim li cas nws ho tsis muab peb tso rau txoj kev puas tsuaj uas phem kawg nkaus, muaj tseeb tiag, vim li cas nws ho tsis cia rab ntaj ntawm nws txoj kev txim lij hlais peb, thiab phua txim rau peb rau txoj kev nyuaj siab mus ib txhis?

20 Auj, thaum xav txog qhov ntawd xwb, kuv tus ntsuj plig twb yuav ya khiav mus. Saib seb, nws twb tsis siv nws txoj kev txim lij rau peb, tiam sis nrog nws txoj kev hlub tshua heev nws tau coj peb los hla dhau tus kwj tob tob ntawm kev tuag thiab kev nyuaj siab uas kav ib txhis ntawd, xwv kom peb cov ntsuj plig thiaj tau kev cawm seej.

21 Thiab nim no saib seb, kuv cov kwv tij, puas muaj ib tug neeg ntawm sab cev nqaij daim tawv paub tej yam no? Kuv hais rau nej tias, yeej tsis muaj leej twg paub tej yam no, tsuas yog cov uas hloov siab lees txim xwb.

22 Muaj tseeb tiag, tus uas hloov siab lees txim thiab muab siab rau ntseeg, thiab ua tej yam zoo, thiab thov Vajtswv tsis tu ncua mus li—rau cov uas zoo li no thiaj cia kom paub txog tej txuj ci uas neeg tsis paub txog Vajtswv; muaj tseeb tiag, rau cov uas zoo li no thiaj yuav cia kom lawv ua tshwm sim tej uas tsis tau ua tshwm sim dua; muaj tseeb tiag, thiab rau cov uas zoo li no yuav cia kom coj tau txhiab txhiab leej los rau txoj kev hloov siab lees txim, ib yam li twb tau cia rau peb coj tau peb cov kwv tij no los rau txoj kev hloov siab lees txim.

23 Nim no nej puas nco qab, kuv cov kwv tij, hais tias peb hais rau peb cov kwv tij nyob hauv thaj av Xalahelas tias, peb mus rau pem thaj av Nifais, mus qhuab qhia rau peb cov kwv tij, uas yog cov Neeg Lamas, thiab lawv luag thuam peb?

24 Vim lawv hais rau peb tias: Nej xav hais tias nej muaj peev xwm coj tau cov Neeg Lamas los paub qhov tseeb no los? Nej xav hais tias nej muaj peev xwm ua rau cov Neeg Lamas ntseeg txog qhov uas lawv cov yawg koob tej kab lis kev cai yuam kev, thaum lawv yog ib co neeg tawv ncauj npaum li ntawd; cov neeg uas muaj lub siab nyiam ua kom nqaij ntuag ntshav nrog; cov neeg uas ua lawv lub neej ua phem tshaj plaws; cov neeg uas lawv tej kev yog zoo li ib tug neeg ua txhaum tej kev txij thaum chiv keeb los? Nim no kuv cov kwv tij, nej nco qab tias lawv hais tej lus no.

25 Thiab lawv hais ntxiv tias: Cia peb nqa cuab yeej tawm tsam lawv, xwv kom peb ua rau lawv thiab lawv tej kev ua phem puas tsuaj tawm ntawm thaj av mus, tsam lawv ho kov yeej peb thiab ua rau peb puas tsuaj.

26 Tiam sis saib seb, kuv cov kwv tij uas kuv hlub, peb tuaj rau hauv hav zoov tsis yog nrog lub hom phiaj ua kom peb cov kwv tij puas tsuaj, tiam sis nrog lub hom phiaj tias tej zaum peb yuav cawm tau lawv ib txhia dim.

27 Nim no thaum peb nyuaj siab, thiab peb yuav luag tig rov qab, saib seb, tus Tswv twb nplij peb lub siab, thiab hais tias: Cia li mus rau hauv nej cov kwv tij, cov Neeg Lamas, thiab ua siab ntev nyiaj nej tej kev txom nyem, thiab kuv yuav pub kom nej ua tau li nej siab xav.

28 Thiab nim no, peb tau tuaj, thiab tau nyob hauv lawv; thiab peb tau ua siab ntev nyiaj peb tej kev nyuaj siab, thiab peb tau nyiaj txhua yam kev txom nyem; muaj tseeb tiag, peb tau mus ntawm ib lub tsev rau ib lub tsev, tso siab rau neeg ntiaj teb tej kev hlub tshua—tsis yog tso siab rau neeg ntiaj teb tej kev hlub tshua xwb tiam sis rau Vajtswv tej kev hlub tshua.

29 Thiab peb tau nkag mus rau hauv lawv tej tsev thiab tau qhia lawv, thiab peb tau qhia lawv nyob hauv lawv tej kev; muaj tseeb tiag, thiab peb tau qhia lawv nyob saum lawv tej pov roob; thiab peb kuj tau nkag mus rau hauv lawv tej tuam tsev thiab lawv tej tsev sab laj thiab qhia lawv; thiab lawv tau ntiab peb tawm, thiab thuam peb, thiab nto qaub ncaug rau peb, thiab xuas ncuav pias rau peb tej plhu; thiab lawv tau xuas pob zeb ntaus peb, thiab txhom peb thiab xuas tej hlua khov khov khi peb, thiab muab peb tso rau hauv lub tsev kaw; thiab yog los ntawm Vajtswv lub hwj chim thiab lub tswv yim peb thiaj li dim dua.

30 Thiab peb tau raug txhua yam kev txom nyem, thiab txhua yam no, xwv kom tej zaum los ntawm tej yam peb ua peb yuav cawm tau ib tug neeg dim; thiab peb xav hais tias tej zaum peb txoj kev xyiv fab yuav puv npo yog hais tias los ntawm tej yam peb ua peb yuav cawm tau ib txhia.

31 Nim no saib seb, peb twb muaj peev xwm ntsia thiab pom tej kev tawg paj txi txiv ntawm peb tej kev khwv; thiab tej kev tawg paj txi txiv ntawd puas yog tsawg? Kuv hais rau nej tias, Tsis tsawg, lawv yeej coob heev; muaj tseeb tiag, thiab peb yeej pom tau lawv txoj kev ntseeg tiag tiag, vim yog lawv txoj kev hlub uas muaj rau lawv cov kwv tij thiab rau peb.

32 Vim saib seb, lawv xum tso lawv txoj sia tshaj qhov uas txo lawv tus yeeb ncuab txoj sia; thiab lawv twb muab lawv tej cuab yeej ua rog faus cia tob rau hauv av, vim yog lawv txoj kev hlub uas lawv muaj rau lawv cov kwv tij.

33 Thiab nim no saib seb kuv hais rau nej tias, puas tau muaj kev hlub tiag tiag zoo li ntawd nyob hauv tag nrho thaj av? Saib seb, kuv hais rau nej tias, Tsis tau muaj, nyob hauv cov Neeg Nifais los twb tsis tau muaj thiab.

34 Vim saib seb, lawv yuav nqa cuab yeej ua rog tawm tsam lawv cov kwv tij; lawv yuav tsis cia lawv tus kheej raug tua. Tiam sis saib seb lawv cov no coob heev tau tso lawv txoj sia; thiab peb paub tias lawv twb tau mus cuag lawv tus Vajtswv, vim yog lawv txoj kev hlub thiab vim yog lawv txoj kev ntxub kev txhaum.

35 Nim no puas tsim nyog rau peb zoo siab? Muaj tseeb tiag, kuv hais rau nej tias, twb tsis tau muaj neeg uas tsim nyog zoo siab heev npaum li peb, txij thaum lub ntiaj teb chiv keeb los; muaj tseeb tiag, thiab ua rau kuv txoj kev xyiv fab puv npo, twb ua rau kuv khav txog kuv tus Vajtswv; vim nws muaj hwj chim tag nrho, muaj tswv yim tag nrho, thiab muaj kev to taub tag nrho; nws to taub txhua yam, thiab nws yog ib Tug uas muaj kev hlub tshua, nws thiaj muab txoj kev cawm seej, rau cov uas yuav hloov siab lees txim thiab ntseeg nws lub npe.

36 Nim no yog tias hais li no es ho yog khav theeb, txawm li ntawd los kuv yuav khav; vim qhov no yog kuv txoj sia thiab kuv txoj kev kaj, kuv txoj kev xyiv fab thiab kuv txoj kev cawm seej, thiab kuv txoj kev txhiv dim ntawm txoj kev txom nyem uas kav ib txhis. Muaj tseeb tiag, kuv tus Vajtswv lub npe muaj yeeb koob, tus uas nco ntsoov txog cov neeg no, cov uas yog ib ceg ntawm tsob ntoo Ixayees, thiab tau ploj ncaim ntawm nws lub cev mus rau pej kum teb; muaj tseeb tiag, kuv hais tias, cia li qhuas kuv tus Vajtswv lub npe, tus uas nco ntsoov txog peb, uas yog cov neeg loj leeb nyob hauv pej kum teb.

37 Nim no kuv cov kwv tij, peb pom tias Vajtswv yeej nco ntsoov txog txhua yam neeg, txawm hais tias lawv yuav nyob hauv thaj av twg los xij; muaj tseeb tiag, nws yeej suav ntsoov nws cov neeg, thiab txoj kev hlub tshua ntawm nws lub siab yeej nyob thoob tag nrho lub ntiaj teb. Nim no qhov no yog kuv txoj kev xyiv fab, thiab kuv txoj kev ua tsaug loj; muaj tseeb tiag, thiab kuv yuav ua kuv tus Vajtswv tsaug mus ib txhis li. Amees.