1 Thiab tau muaj tias thaum lawv txhim tsa ib lub koom txoos nyob hauv thaj av ntawd lawm, vaj ntxwv Lamaunais thov kom Amoos nrog nws mus rau pem thaj av Nifais, xwv kom nws yuav ua rau nws txiv ntsib Amoos.

2 Thiab tus Tswv lub suab los rau Amoos hais tias: Koj tsis txhob mus rau pem thaj av Nifais, vim saib seb, tus vaj ntxwv yuav nrhiav kev txo koj txoj sia; tiam sis koj yuav tsum mus rau tom thaj av Midaunais; vim saib seb, koj tus kwv Aloos, thiab Mulaukhais thiab Eemas raug kaw.

3 Nim no tau muaj tias thaum Amoos hnov li no, nws hais rau Lamaunais tias: Saib seb, kuv tus kwv thiab cov kwv tij nyob hauv lub tsev kaw tom Midaunais, thiab kuv yuav mus xwv kom kuv yuav tso tau lawv dim.

4 Nim no Lamaunais hais rau Amoos tias: Kuv paub, nrog tus Tswv lub zog koj yeej ua tau txhua yam. Tiam sis saib seb, kuv yuav nrog koj mus rau tom thaj av Midaunais; vim tus vaj ntxwv ntawm thaj av Midaunais, uas npe hu ua Eethi-anaus, yog kuv ib tug phooj ywg; yog li ntawd kuv yuav mus rau tom thaj av Midaunais, xwv kom kuv yuav tau hais lus raug siab rau tus vaj ntxwv ntawm thaj av, thiab nws yuav tso koj cov kwv tij tawm hauv tsev kaw. Nim no Lamaunais hais rau nws tias: Leej twg qhia koj hais tias koj cov kwv tij nyob hauv lub tsev kaw?

5 Thiab Amoos hais rau nws tias: Tsis muaj leej twg qhia kuv, tsuas yog Vajtswv xwb; thiab nws hais rau kuv tias—Cia li mus thiab mus tso koj cov kwv tij dim, vim lawv nyob hauv lub tsev kaw nyob hauv thaj av Midaunais.

6 Nim no thaum Lamaunais hnov qhov no lawm nws txib kom nws cov tub qhe npaj nws cov nees thiab nws cov tsheb nees luag kom txhij.

7 Thiab nws hais rau Amoos tias: Los, kuv yuav nrog koj mus rau nram thaj av Midaunais, thiab nyob nrad kuv yuav thov tus vaj ntxwv kom nws tso koj cov kwv tij tawm hauv lub tsev kaw.

8 Thiab tau muaj tias thaum Amoos thiab Lamaunais tseem tab tom taug kev mus rau nrad, nkawd ntsib Lamaunais txiv, tus uas yog vaj ntxwv kav tag nrho thaj av.

9 Thiab saib seb, Lamaunais txiv hais rau nws tias: Vim li cas koj ho tsis tuaj koom rooj noj rooj haus nyob rau hnub loj ntawd thaum uas kuv npaj ib rooj noj rooj haus rau kuv cov tub, thiab rau kuv cov neeg?

10 Thiab nws kuj hais tias: Koj tab tom yuav mus qhov twg nrog tus Neeg Nifais no, tus uas yog ib tug neeg dag tus me nyuam?

11 Thiab tau muaj tias Lamaunais qhia rau nws tias nws tab tom yuav mus qhov twg, vim nws ntshai tsam ua rau nws npau taws.

12 Thiab nws kuj qhia rau nws txhua yam uas ua rau nws tau nyob hauv nws lub nceeg vaj, uas nws tsis tau mus koom rooj noj rooj haus uas nws txiv tau npaj.

13 Thiab nim no thaum Lamaunais tau qhia txhua yam no rau nws lawm, saib seb, ua rau nws xav tsis thoob, vim nws txiv npau taws rau nws, thiab hais tias: Lamaunais, koj tseem yuav mus tso cov Neeg Nifais no dim, cov uas yog ib tug neeg dag cov tub. Saib seb, nws nyiag peb cov yawg koob tug; thiab nim no nws cov me nyuam kuj tau tuaj rau hauv peb xwv kom los ntawm lawv txoj kev ntxias thiab lawv tej kev dag, lawv yuav dag ntxias tau peb, xwv kom lawv yuav rov nyiag tau tej uas yog peb tug.

14 Nim no Lamaunais txiv txib kom nws muab nws rab ntaj tua Amoos. Thiab nws kuj txib kom Lamaunais tsis txhob mus rau tom thaj av Midaunais, tiam sis kom nws rov qab nrog nws mus lawm tom thaj av Ixama-ees.

15 Tiam sis Lamaunais hais rau nws tias: Kuv yuav tsis tua Amoos, kuv yuav tsis rov qab mus lawm tom thaj av Ixama-ees, tiam sis kuv yuav mus lawm tom thaj av Midaunais xwv kom kuv yuav tso tau Amoos cov kwv tij, vim kuv paub tias lawv yog neeg ncaj ncees thiab yog cov yaj saub dawb huv ntawm tus Vajtswv tseeb.

16 Nim no thaum nws txiv hnov tej lus no, nws npau taws rau nws, thiab nws rho hlo nws rab ntaj xwv kom nws yuav tua kom Lamaunais vau rau hauv av.

17 Tiam sis Amoos txav zog los thiab hais rau nws tias: Saib seb, koj tsis txhob tua koj tus tub; txawm li ntawd los yog nws tuag ntshai yuav zoo dua li koj, vim saib seb, nws twb hloov siab lees txim ntawm nws tej kev txhaum; tiam sis yog hais tias koj tuag nyob rau lub sij hawm no, nrog koj txoj kev npau taws, yuav cawm tsis tau koj tus ntsuj plig dim.

18 Thiab ntxiv, tsim nyog uas koj yuav tsum tswj koj tus kheej; yog tias koj tua koj tus tub, vim nws yog ib tug neeg tsis muaj txim, nws cov ntshav yuav thov tawm hauv av tuaj rau tus Tswv nws tus Vajtswv, kom txoj kev pauj los rau koj; thiab tej zaum koj yuav xiam koj tus ntsuj plig mus.

19 Nim no thaum Amoos hais tej lus no rau nws, nws teb Amoos tias: Kuv paub tias yog kuv tua kuv tus tub, ces yog kuv ua rau tus neeg tsis muaj txim nqaij ntuag ntshav nrog; vim twb yog koj uas yog tus nrhiav kev ua kom nws puas tsuaj.

20 Thiab nws xyab hlo nws txhais tes los tua Amoos. Tiam sis Amoos tiv tau nws txoj kev tua, thiab kuj thav nws txhais caj npab xwv kom nws tsis muaj peev xwm siv nws txhais caj npab.

21 Nim no thaum tus vaj ntxwv pom tias Amoos muaj cuab kav tua tau nws, nws pib thov Amoos kom nws tseg nws txoj sia.

22 Tiam sis Amoos tsa hlo nws rab ntaj, thiab hais rau nws tias: Saib seb, kuv yuav muab koj tua tsuas yog koj yuav pub rau kuv kom tso kuv cov kwv tij tawm hauv lub tsev kaw los xwb.

23 Nim no tus vaj ntxwv, vim ntshai tsam nws yuav xiam nws txoj sia, hais tias: Yog koj tseg kuv txoj sia txhua yam uas koj nug kuv yuav muab rau koj, txawm hais tias ib nrab kiag ntawm lub teb chaws.

24 Nim no thaum Amoos pom tias nws ua tau rau tus vaj ntxwv laus raws li nws lub siab xav, nws hais rau nws tias: Yog koj yuav pub rau kuv kom tso kuv cov kwv tij tawm hauv lub tsev kaw los, thiab yuav cia Lamaunais ceev nws lub nceeg vaj li qub, thiab koj yuav tsis npau taws rau nws, tiam sis pub nws ua raws li nws tus kheej lub siab xav ua txhua yam uas nws xav tau, ces kuv yuav tseg koj txoj sia; yog tsis li ntawd ces kuv yuav ntaus koj kom vau rau hauv av.

25 Nim no thaum Amoos tau hais tej lus no tas lawm, tus vaj ntxwv pib zoo siab vim yog nws txoj sia.

26 Thiab thaum nws pom tias Amoos tsis muaj siab xav ua kom nws puas tsuaj, thiab thaum nws pom tias Amoos hlub nws tus tub Lamaunais tiag tiag, nws xav tsis thoob kiag li, thiab hais tias: Vim tias tej no yog tag nrho tej uas koj xav tau, kom kuv tso koj cov kwv tij, thiab cia kuv tus tub Lamaunais ceev nws lub nceeg vaj li qub, saib seb, kuv yuav pub rau koj cia kuv tus tub ceev nws lub nceeg vaj li qub txij lub sij hawm no mus thiab mus ib txhis li; thiab kuv yuav tsis kav nws ntxiv lawm—

27 Thiab kuv kuj yuav pub rau koj kom tso koj cov kwv tij tawm hauv lub tsev kaw los, thiab koj thiab koj cov kwv tij yuav los cuag kuv, nyob hauv kuv lub nceeg vaj; vim kuv xav pom koj heev. Vim tus vaj ntxwv xav tsis thoob heev kawg li rau tej lus uas nws tau hais, thiab rau tej lus uas nws tus tub Lamaunais tau hais, yog li ntawd nws xav kawm tej lus ntawd.

28 Thiab tau muaj tias Amoos thiab Lamaunais taug kev ntxiv mus rau tom thaj av Midaunais. Thiab tus vaj ntxwv ntawm thaj av Midaunais txaus siab rau Lamaunais; yog li ntawd nws thiaj tso Amoos cov kwv tij tawm hauv lub tsev kaw los.

29 Thiab thaum Amoos ntsib lawv nws tu siab heev kawg li, vim saib seb lawv liab qab, thiab lawv tej tawv nqaij tau ntuag tag vim yog tej hlua khov khov uas khi lawv. Thiab lawv kuj raug tshaib plab, nqhis dej, thiab txhua yam kev txom nyem; txawm li ntawd los lawv tseem ua siab ntev raug tag nrho lawv tej kev nyuaj siab.

30 Thiab, ib yam li uas tau tshwm sim, twb yog lawv txoj hmoov poob mus rau hauv cov neeg uas tawv ncauj dua thiab nyaum dua; yog li ntawd lawv thiaj tsis kam mloog lawv tej lus, thiab lawv ntiab lawv tawm, thiab ntaus lawv, thiab raws lawv ntawm ib lub tsev mus rau ib lub tsev, thiab ntawm ib qho chaw mus rau ib qho chaw, twb mus txog rau thaum lawv los txog rau hauv thaj av Midaunais; thiab nyob ntawm qhov chaw ntawd lawv thiaj raug txhom thiab muab tso rau hauv lub tsev kaw, thiab raug xuas hlua khov khov khi, thiab nyob hauv lub tsev kaw tau ntau hnub, thiab Lamaunais thiab Amoos nkawd thiaj tso lawv dim.