1 Nim no nyob hauv Mauxiyas txoj kev cai, txhua tus uas yog ib tug neeg txiav txim ntawm txoj kev cai, los sis cov uas cov neeg tau tsa los ua cov neeg txiav txim, yuav tsum tau txais nqi zog raws li lub sij hawm uas lawv tau ua hauj lwm txiav txim rau cov uas raug coj los rau lawv txiav txim.

2 Nim no yog hais tias ib tug neeg tshuav lwm tus nqi, thiab nws tsis kam them tej uas nws tshuav nqi ntawd, nws yuav raug foob rau cov neeg txiav txim; thiab tus neeg txiav txim yuav siv txoj cai, thiab xa tub ceev xwm mus coj tus neeg ntawd tuaj rau nws; thiab nws yuav txiav txim rau tus neeg ntawd raws li txoj kev cai thiab tej pov thawj uas tau muab los tawm tsam nws, thiab li no tus neeg ntawd yuav raug txhib kom them tej uas nws tshuav nqi, los sis lwg nws tej khoom, los sis raug ntiab tawm ntawm cov neeg zoo li ib tug tub sab thiab ib tug tub nyiag.

3 Thiab tus neeg txiav txim txais nws tej nqi zog raws li nws lub sij hawm—ib hnub ib xinais kub, los sis ib xinas nyiaj dawb, uas npaum li ib xinais kub; thiab qhov no yog raws li txoj kev cai uas vaj ntxwv Mauxiyas tau muab tseg.

4 Nim no nov yog lub npe ntawm lawv cov kub, thiab ntawm lawv cov nyiaj dawb, raws li cov kub thiab cov nyiaj dawb ntawd tus nqi. Thiab cov Neeg Nifais yog cov uas tis npe rau cov nyiaj no, vim lawv tsis suav lawv cov nyiaj raws li cov Neeg Yudais uas nyob tim Yeluxalees tus txheej txheem; thiab lawv kuj tsis luj raws li cov Neeg Yudais tus txheej txheem; tiam sis lawv suav txawv thiab luj txawv, ua raws li cov neeg lub siab xav thiab tej xwm txheej, nyob hauv txhua txhua tiam neeg, los txog rau thaum cov neeg txiav txim txoj kev kav, thiab txoj kev suav thiab kev luj lawv cov nyiaj no twb yog vaj ntxwv Mauxiyas txhim tsa.

5 Nim no txoj kev suav lawv cov nyiaj muaj xws li no—ib xinais kub, ib xi-oo kub, ib sas kub, thiab ib linas kub.

6 Ib xinas nyiaj dawb, ib anaws nyiaj dawb, ib exilas nyiaj dawb, thiab ib oothais nyiaj dawb.

7 Ib xinas nyiaj dawb npaum li ib xinais kub, thiab muaj nqis npaum li ib qho luj ntawm noob txhuv liab, thiab muaj nqis npaum li ib qho luj ntawm txhua yam noob.

8 Nim no ib xi-oo kub muaj nqis txog ob npaug ntawm ib xinais.

9 Thiab ib sas kub muaj nqis txog ob npaug ntawm ib xi-oo.

10 Thiab ib linas kub muaj nqis npaum li tag nrho cov no.

11 Thiab ib anaws nyiaj dawb muaj nqis npaum li ob xinas.

12 Thiab ib exilas nyiaj dawb muaj nqis npaum li plaub xinas.

13 Thiab ib oothais muaj nqis npaum li tag nrho cov no.

14 Nim no cov no yog lawv cov nyiaj uas suav muaj nqis tsawg dua—

15 Ib sinploos yog ib nrab ntawm ib xinas; yog li ntawd, ib sinploos muaj nqis npaum li ib nrab ntawm ib qho luj ntawm noob txhuv liab.

16 Thiab ib sinplas yog ib nrab ntawm ib sinploos.

17 Thiab ib le-as yog ib nrab ntawm ib sinplas.

18 Nim no cov no yog lawv cov zauv, raws li lawv txoj kev suav nyiaj.

19 Nim no ib eethi-oos kub muaj nqis npaum li peb sinploos.

20 Nim no, lub hom phiaj twb yog ua kom nplua nuj, vim yog lawv tau txais lawv tej nqi zog los ntawm lawv txoj hauj lwm, yog li ntawd, lawv thiaj txhaub cov neeg kom sawv tawm tsam, thiab ua txhua yam kev kub ntxhov thiab kev phem, xwv kom lawv yuav muaj hauj lwm ntau ntxiv, xwv kom lawv yuav tau nyiaj los ntawm tej kev hais plaub uas cov neeg coj tuaj rau lawv; yog li ntawd lawv thiaj txhaub kom cov neeg tawm tsam Amas thiab Amulej.

21 Thiab tus Xi-elas no pib nug Amulej, hais tias: Koj puas kam teb kuv ob peb lo lus uas kuv yuav nug koj? Nim no Xi-elas yog ib tug neeg txawj siv tus dab phem tej kev ntxias, xwv kom nws yuav ua rau tej uas zoo puas tsuaj; yog li ntawd, nws nug Amulej hais tias: Koj puas kam teb cov lus nug uas kuv yuav nug koj?

22 Thiab Amulej teb nws tias: Teb tau, yog hais tias qhov ntawd yog raws li tus Tswv tus Ntsuj Plig, uas nyob hauv kuv; vim kuv yuav tsis hais dab tsi uas tsis raws li tus Tswv tus Ntsuj Plig. Thiab Xi-elas hais rau nws tias: Saib seb, ntawm no yog rau oothais nyiaj dawb, thiab kuv yuav muab cov no tag nrho rau koj yog koj lees hais tias tsis muaj ib tug Tswv Ntuj Tswv Teb.

23 Nim no Amulej hais tias: Auj koj tus uas yog me nyuam ntuj txiag teb tsaus es, vim li cas koj thiaj ntxias kuv? Koj puas paub tias cov neeg ncaj ncees yeej tsis ywj rau tej kev ntxias zoo li ntawd?

24 Koj ntseeg hais tias tsis muaj Vajtswv no los? Kuv hais rau koj tias, Tsis yog li ntawd, koj yeej paub hais tias muaj ib tug Vajtswv, tiam sis koj hlub kev nplua nuj tshaj nws.

25 Thiab nim no koj tau dag kuv nyob ntawm Vajtswv xub ntiag. Koj hais rau kuv tias—Saib rau lub oothais no, uas muaj nqis heev, kuv yuav muab rau koj—thaum koj twb xav hauv koj lub siab tias yuav tsis muab cov ntawd rau kuv; thiab qhov koj xav tau twb yog kom kuv xyeej tus Vajtswv uas tseeb thiab muaj txoj sia nyob, xwv kom koj yuav ua tau rau kuv puas tsuaj. Thiab nim no saib seb, vim txoj kev phem loj no koj yuav tau txais koj nqi zog.

26 Thiab Xi-elas hais rau nws tias: Koj hais tias muaj ib tug Vajtswv uas tseeb thiab muaj txoj sia nyob no los?

27 Thiab Amulej hais tias: Muaj tseeb tiag, yeej muaj ib tug Vajtswv uas tseeb thiab muaj txoj sia nyob.

28 Nim no Xi-elas hais tias: Puas muaj coob tshaj ib tug Vajtswv?

29 Thiab nws teb hais tias, Tsis muaj.

30 Nim no Xi-elas hais rau nws ntxiv tias: Ua li cas koj ho paub tej no?

31 Thiab nws hais tias: Ib tug tim tswv qhia rau kuv paub.

32 Thiab Xi-elas hais dua ntxiv tias: Leej twg yog tus uas yuav los? Puas yog Vajtswv Leej Tub?

33 Thiab Amulej hais rau nws tias, Yog.

34 Thiab Xi-elas hais ntxiv tias: Nws puas yuav cawm nws cov neeg thaum lawv tseem muaj kev txhaum? Thiab Amulej teb thiab hais rau nws tias: Kuv hais rau koj tias nws yuav tsis cawm, vim twb muaj tsis taus tias nws yuav xyeej nws tej lus.

35 Nim no Xi-elas hais rau cov neeg tias: Xav kom nej nco ntsoov tej yam no; vim nws hais tias tsuas muaj ib tug Vajtswv xwb; tiam sis nws ho hais tias Vajtswv Leej Tub yuav los, tiam sis nws yuav tsis cawm nws cov neeg—cuag li nws muaj cai txib Vajtswv.

36 Nim no Amulej rov hais dua rau nws tias: Saib seb koj tau dag, vim koj hais tias kuv hais lus cuag li kuv muaj cai txib Vajtswv vim kuv hais tias nws yuav tsis cawm nws cov neeg thaum lawv tseem muaj kev txhaum.

37 Thiab kuv hais rau koj ntxiv dua hais tias nws cawm tsis tau thaum lawv tseem muaj kev txhaum; vim kuv tsis muaj cuab kav xyeej nws txoj lus, thiab nws tau hais tias tsis muaj leej twg uas tsis huv yuav tau lub nceeg vaj ceeb tsheej los ua nws tug; yog li ntawd, yuav cawm nej dim tau li cas, tsuas yog hais tias nej tau lub nceeg vaj ceeb tsheej los ua nej tug xwb? Yog li ntawd, nej dim tsis tau thaum nej tseem ua txhaum.

38 Nim no Xi-elas hais dua rau nws tias: Vajtswv Leej Tub puas yog kiag tus Leej Txiv uas Nyob Mus Ib Txhis?

39 Thiab Amulej hais rau nws tias: Muaj tseeb tiag, nws twb yog kiag Leej Txiv uas Nyob Mus Ib Txhis ntawm ntuj ceeb tsheej thiab ntawm ntiaj teb, thiab ntawm txhua yam uas nyob haud; nws yog qhov chiv keeb thiab qhov kawg, tus thawj thiab tus kawg;

40 Thiab nws yuav los rau hauv lub ntiaj teb los txhiv nws cov neeg dim; thiab nws yuav los ris cov uas ntseeg nws lub npe tej kev txhaum; thiab cov no yog cov uas yuav muaj txoj sia nyob mus ib txhis, thiab kev cawm seej yuav tsis los rau lwm tus twg li.

41 Yog li ntawd cov neeg phem tseem nyob zoo li tsis tau muaj kev txhiv dim, tsuas yog hais tias daws tau kev tuag tej hlua xwb; vim saib seb, hnub ntawd twb yuav los uas txhua tus yuav sawv hauv qhov tuag rov qab los thiab sawv ntawm Vajtswv xub ntiag, thiab nws yuav txiav txim rau lawv raws li tej yam lawv tau ua.

42 Nim no, muaj ib txoj kev tuag uas hu ua kev tuag ntawm sab cev nqaij daim tawv; thiab Khetos txoj kev tuag yuav muab txoj kev tuag ntawm sab cev nqaij daim tawv no tej hlua daws, xwv kom txhua tus yuav sawv rov qab los ntawm txoj kev tuag ntawm sab cev nqaij daim tawv no.

43 Vajtswv yuav ua kom tus ntsuj plig thiab lub cev rov qab los koom ua ke muaj yam ntxwv uas zoo tag nrho; Vajtswv yuav muab txhais npab txhais ceg thiab pob qij txha txum tim rov qab los ua lub cev li ib txwm muaj, zoo ib yam li peb nyob lub sij hawm tam sim no; thiab Vajtswv yuav coj peb mus sawv ntawm nws xub ntiag, thiab peb yuav paub txhua yam zoo li peb paub ziag no, thiab nco qab zoo txog tag nrho peb txoj kev muaj txim.

44 Nim no, txoj kev txum tim rov qab los no yuav los rau txhua tus, tag nrho cov laus thiab cov hluas, tag nrho cov ua qhev thiab cov ywj pheej, tag nrho poj niam thiab txiv neej, tag nrho cov neeg phem thiab cov neeg ncaj ncees; thiab ib txoj plaub hau saum lawv lub taub hau los twb yuav tsis ploj; tiam sis Vajtswv yuav txum tim txhua yam rov qab los ua lub cev uas zoo tag nrho, zoo ib yam li ziag no, los sis zoo ib yam li ntawm sab cev nqaij daim tawv, thiab yuav coj thiab hu txhua tus los hais rau ntawm lub rooj txiav txim ntawm Khetos tus uas yog Leej Tub, thiab Vajtswv uas yog Leej Txiv, thiab tus Ntsuj Plig Dawb Huv, uas yog ib tug Vajtswv uas Nyob Mus Ib Txhis, los txiav txim raws li tej yam lawv ua, saib lawv ua zoo los sis lawv ua phem.

45 Nim no, saib seb, kuv tau hais rau koj ntsig txog txoj kev tuag ntawm cev nqaij daim tawv uas txawj ploj txawj tuag, thiab ntsig txog txoj kev sawv rov los ntawm cev nqaij daim tawv uas txawj ploj txawj tuag. Kuv hais rau koj tias Vajtswv yuav tsa lub cev uas txawj ploj tuag no sawv los mus ua lub cev uas tsis txawj tuag, uas yog sawv ntawm txoj kev tuag los, twb yog ntawm thawj txoj kev tuag mus rau txoj sia, xwv kom lawv tsis txawj tuag ib zaug ntxiv li lawm; lawv tus ntsuj plig los koom ua ke nrog lawv lub cev, tsis sib faib ib zaug ntxiv lawm; yog li ntawd tag nrho lub cev yuav muaj ntsuj plig thiab tsis txawj ploj tuag, xwv kom lawv yuav tsis pom kev lwj ib zaug ntxiv li lawm.

46 Nim no, thaum Amulej hais tej lus no tas cov neeg pib xav tsis thoob, thiab Xi-elas kuj pib tshee. Thiab Amulej tej lus xaus li no, los sis kuv tsuas yog sau tau li no xwb.