1 Thiab nim no tau muaj tias nyob rau thaum pib ntawm xyoo thib nees nkaum tsib ntawm cov neeg txiav txim txoj kev kav Nifais cov neeg, lawv tau txhim tsa kev thaj yeeb rau cov neeg ntawm Lihais thiab cov neeg ntawm Mauli-atoos ntsig txog lawv tej av, tom qab lawv muaj kev thaj yeeb thaum pib xyoo thib nees nkaum tsib.

2 Txawm li ntawd los, lawv twb ua tsis tau kom muaj kev thaj yeeb nyob hauv thaj av ntev, vim pib muaj kev sib cav sib ceg nyob hauv cov neeg ntsig txog tus thawj txiav txim Pehaulas; vim saib seb, muaj ib feem ntawm cov neeg xav kom muab tej yam ntawm txoj kev cai hloov.

3 Tiam sis saib seb, Pehaulas tsis kam hloov los sis tsis kam cia hloov txoj kev cai; yog li ntawd, nws tsis mloog cov uas tau xa lawv lub suab nrog rau lawv cov ntawv thov ntsig txog qhov uas lawv xav hloov txoj kev cai.

4 Yog li ntawd, cov uas xav kom hloov txoj kev cai npau taws rau nws, thiab tsis xav kom nws ua tus thawj txiav txim kav thaj av ntxiv lawm; yog li ntawd pib muaj kev sib cav kub siab txog qhov ntawd, tiam sis tsis tau ua rau ntshav nrog.

5 Thiab tau muaj tias cov uas xav kom rho Pehaulas tawm ntawm lub rooj txiav txim hu ua cov neeg vaj ntxwv, vim lawv xav kom hloov txoj kev cai kom ntxeev tau tsoom fwv uas muab kev ywj pheej rau cov pej xeem thiab tsim ib tug vaj ntxwv los kav thaj av.

6 Thiab cov uas xav kom Pehaulas ua tus thawj txiav txim kav thaj av twj ywm tau lub npe hu ua cov neeg ywj pheej; thiab lawv sib cais zoo li no, vim cov neeg ywj pheej tau cog lus los sis khi lus hais tias yuav ua rau lawv tej cai thiab tej kev muaj cai nyob ruaj nrees ntawm lawv txoj kev teev ntuj los ntawm ib tsoom fwv uas muab kev ywj pheej rau cov pej xeem.

7 Thiab tau muaj tias qhov teeb meem ntawm lawv txoj kev sib cav sib ceg no yog cov neeg lub suab muab daws tiav. Thiab tau muaj tias cov neeg lub suab pom zoo raws li cov neeg ywj pheej, thiab Pehaulas rov qab tau lub rooj txiav txim, uas ua rau muaj kev zoo siab heev nyob hauv Pehaulas cov kwv tij thiab kuj nyob hauv coob leej ntawm cov neeg ywj pheej, cov uas kuj ua rau cov neeg vaj ntxwv ntsiag to, uas lawv tsis muaj cuab kav tawm tsam tiam sis yuav tsum pab txhawb nqa lub ntsiab ntawm kev ywj pheej.

8 Nim no cov uas nyiam kom muaj vaj ntxwv yog cov uas yug los ntawm tsev neeg muaj koob nto npe, thiab lawv xav ua vaj ntxwv; thiab cov uas xav tau hwj chim los kav cov neeg yog cov uas txhawb lawv.

9 Tiam sis saib seb, tam sim no yog ib lub sij hawm tsis zoo kom muaj kev sib cav zoo li ntawd nyob hauv Nifais cov neeg; vim saib seb, Amalikhaiyas rov qab txhaub cov Neeg Lamas lub siab kom tawm tsam cov Neeg Nifais, thiab nws sib sau cov tub rog nyob thoob plaws hauv nws thaj av tuaj ua ke, thiab muab cuab yeej ua rog rau lawv, thiab rau siab ntso npaj rau kev ua rog; vim nws tau lav lus lawm tias yuav haus Maulaunais cov ntshav.

10 Tiam sis saib seb, peb yuav pom tias nws lo lus cog tseg uas nws hais yeej tsis xyuam xim; txawm li ntawd los, nws tau npaj nws tus kheej thiab nws cov tub rog tuaj ua rog tawm tsam cov Neeg Nifais.

11 Nim no nws cov tub rog twb tsis muaj coob npaum li yav tas los, vim yog ntau txhiab leej cov uas raug tua los ntawm cov Neeg Nifais txhais tes; tiam sis txawm hais tias lawv tau swb loj los, Amalikhaiyas tseem sib sau tau ib pab tub rog coob heev, ua rau nws tsis ntshai tuaj rau nram thaj av Xalahelas.

12 Muaj tseeb tiag, Amalikhaiyas tus kheej los kuj tau tuaj thiab, nyob pem cov Neeg Lamas hau ntej. Thiab yog nyob hauv xyoo thib nees nkaum tsib ntawm cov neeg txiav txim txoj kev kav; thiab twb yog tib lub sij hawm uas cov Neeg Nifais pib daws tiav tej teeb meem ntawm lawv tej kev sib cav ntsig txog tus thawj txiav txim, Pehaulas.

13 Thiab tau muaj tias thaum cov neeg uas hu ua cov neeg vaj ntxwv tau hnov tias cov Neeg Lamas tab tom tuaj nram ua rog tawm tsam lawv, lawv zoo siab nyob hauv lawv lub siab; thiab lawv tsis kam nqa cuab yeej ua rog, vim lawv npau taws heev rau tus thawj txiav txim, thiab rau cov neeg ywj pheej, lawv thiaj tsis kam nqa cuab yeej ua rog tiv thaiv lawv lub teb chaws.

14 Thiab tau muaj tias thaum Maulaunais pom li no, thiab kuj pom tias cov Neeg Lamas tab tom tuaj rau hauv tej ciam teb ntawm thaj av, nws npau taws heev vim yog txoj kev tawv ncauj ntawm cov neeg uas nws tau rau siab heev ua hauj lwm los tsom kwm; muaj tseeb tiag, nws npau taws heev; nws tus ntsuj plig muaj kev npau taws puv npo rau lawv.

15 Thiab tau muaj tias nws xa ib tsab ntawv thov, sau nrog cov neeg lub suab mus rau tus tswv xeev ntawm thaj av, thov kom nws nyeem tsab ntawv ntawd, thiab muab hwj chim rau nws (Maulaunais) yuam cov neeg ntxeev siab kom cia li tiv thaiv lawv lub teb chaws tsis li ces raug muab tua pov tseg.

16 Vim qhov uas nws xav tau tshaj plaws ces twb yog ua kom tej kev sib cav thiab tej kev tsis sib haum xeeb uas nyob hauv cov neeg ntawd ploj kom tas mus; vim saib seb, yav tas los qhov no twb yog ib lub ntsiab ntawm tag nrho lawv tej kev puas tsuaj. Thiab tau muaj tias tus tswv xeev tau muab rau nws raws li cov neeg lub suab xav tau.

17 Thiab tau muaj tias Maulaunais txib kom nws cov tub rog mus tawm tsam cov neeg vaj ntxwv ntawd, mus txo lawv txoj kev muab hlob thiab lawv txoj kev muaj meej mom, thiab txiav lawv rau hauv av, los sis lawv yuav tsum nqa tej cuab yeej ua rog thiab txhawb lub ntsiab ntawm kev ywj pheej.

18 Thiab tau muaj tias cov tub rog tawm mus tawm tsam lawv; thiab cov tub rog txo lawv txoj kev muab hlob thiab lawv txoj kev muaj meej mom, yog li ntawd thaum lawv tsa lawv tej cuab yeej ua rog tua tawm tsam Maulaunais cov tub rog lawv raug ntov thiab raug txiav vau rau hauv av.

19 Thiab tau muaj tias muaj plaub txhiab leej ntawm cov neeg ntxeev siab ntawd raug ntov vau los ntawm rab ntaj; thiab lawv cov thawj coj uas tsis raug tua hauv tshav rog raug txhom thiab muab tso rau hauv lub tsev kaw, vim lub caij no tsis muaj sij hawm hais lawv tej plaub.

20 Thiab cov uas seem ntawm cov neeg ntxeev siab ntawd, uas tsis xum raug ntov vau rau hauv av los ntawm rab ntaj, kam ywj rau tus chij ntawm kev ywj pheej, thiab raug yuam kom tsa tus chij ntawm kev ywj pheej rau saum lawv tej pej thuam, thiab nyob hauv lawv tej nroog, thiab kom nqa tej cuab yeej ua rog tiv thaiv lawv lub teb chaws.

21 Thiab Maulaunais ua rau cov neeg vaj ntxwv ntawd xaus li no, kom tsis muaj ib tug twg siv lub npe cov neeg vaj ntxwv ntxiv lawm; thiab nws ua rau cov neeg uas khav hais tias lawv yog noob muaj meej mom txoj kev tawv ncauj thiab kev muab hlob xaus li no; tiam sis lawv raug qhau vau kom txo lawv lub hwj chim zoo ib yam li lawv cov kwv tij, thiab rau siab ntso sib ntaus sib tua rau lawv txoj kev ywj pheej kom tsis txhob ua qhev.

22 Saib seb, tau muaj tias thaum Maulaunais tab tom ua kom tej kev ua rog thiab tej kev sib cav nyob hauv nws cov neeg tawg zoo li no, thiab khoo kom lawv muaj kev thaj yeeb thiab kev vam meej, thiab ua tej kev cai npaj ua rog tawm tsam cov Neeg Lamas, saib seb, cov Neeg Lamas tau tuaj rau hauv thaj av Maulaunais, uas yog nyob hauv tej ciam teb ze ntawm ntug hiav txwv.

23 Thiab tau muaj tias cov Neeg Nifais tsis muaj zog txaus nyob hauv lub nroog Maulaunais; yog li ntawd Amalikhaiyas muab lawv raws, tua tuag coob leej. Thiab tau muaj tias Amalikhaiyas txeeb tau lub nroog, muaj tseeb tiag, txeeb tau tag nrho lawv tej chaw uas ruaj khov.

24 Thiab cov uas khiav tawm ntawm lub nroog Maulaunais tau los rau lub nroog Nifaihas; thiab cov neeg ntawm lub nroog Lihais kuj tau sib sau tuaj ua ke, thiab npaj txhij txais tos cov Neeg Lamas ua rog.

25 Tiam sis tau muaj tias Amalikhaiyas tsis cia cov Neeg Lamas mus ua rog tawm tsam lub nroog Nifaihas, tiam sis ceev lawv nyob rau nram ntug hiav txwv, thiab tso tub rog nyob hauv txhua lub nroog txhawb nqa thiab tiv thaiv tej nroog ntawd.

26 Thiab nws ua ntxiv mus zoo li no, txeeb tau ntau lub nroog, lub nroog Nifaihas, thiab lub nroog Lihais, thiab lub nroog Mauli-atoos, thiab lub nroog Oonaws, thiab lub nroog Nkis, thiab lub nroog Mules, tag nrho cov uas nyob rau tej ciam teb sab hnub tuaj ze ntug hiav txwv.

27 Thiab xws li no cov Neeg Lamas txeeb tau ntau lub nroog, los ntawm Amalikhaiyas txoj kev txawj dag ntxias, los ntawm lawv cov tub rog uas suav tsis txheeb, tag nrho tej nroog uas tau ua kom ruaj khov raws li tus yeeb yam ntawm Maulaunais tej kev ua kom ruaj khov; tag nrho tej nroog uas yog tej chaw ruaj khov rau cov Neeg Lamas.

28 Thiab tau muaj tias lawv tau mus rau tom tej ciam teb ntawm thaj av Huaj Vam, muab cov Neeg Nifais raws khiav tawm thiab muab coob leej tua tuag.

29 Tiam sis tau muaj tias lawv mus ntsib Thi-akhas, tus uas tau tua Mauli-atoos thiab txiav nws cov neeg kev thaum nws khiav.

30 Thiab tau muaj tias Thi-akhas kuj txiav tau Amalikhaiyas kev, thaum Amalikhaiyas thiab nws cov tub rog coob coob tab tom yuav mus txeeb kom tau thaj av Huaj Vam, thiab thaj av nyob rau sab qaum teb.

31 Tiam sis saib seb nws ntsib kev poob siab vim Thi-akhas thiab nws cov tub rog, vim lawv yog ib co neeg txawj sib tua heev, ua rau nws thim rov qab; vim Thi-akhas txhua tus tub rog yeej muaj zog tshaj thiab txawj ua rog tshaj cov Neeg Lamas, lawv thiaj kov yeej cov Neeg Lamas.

32 Thiab tau muaj tias lawv tawm tsam cov Neeg Lamas, lawv thiaj tua cov Neeg Lamas mus txog ntua thaum tsaus ntuj. Thiab tau muaj tias Thi-akhas thiab nws cov tub rog rub lawv tej tsev pheeb suab ntaub nyob hauv tej ciam teb ntawm thaj av Huaj Vam; thiab Amalikhaiyas rub nws tej tsev pheeb suab ntaub nyob hauv tej ciam teb nyob ze ntug hiav txwv, thiab lawv raug raws khiav zoo li no.

33 Thiab tau muaj tias thaum tsaus ntuj los lawm, Thi-akhas thiab nws tus tub qhe nyiag sawv thiab tawm mus thaum hmo ntuj, thiab mus rau hauv Amalikhaiyas lub yeej; thiab saib seb, kev tsaug zog tau kov yeej cov Neeg Lamas vim yog lawv txoj kev sab lim heev, uas yog los ntawm kev siv zog thiab tshav kub ntawm hnub ntawd.

34 Thiab tau muaj tias Thi-akhas nyiag nkag mus rau hauv tus vaj ntxwv lub tsev pheeb suab ntaub thiab xuas ib rab hmuv nkaug nws lub plawv; thiab nws ua rau tus vaj ntxwv tuag kiag tam sim ntawd uas nws tsa tsis tau nws cov tub qhe.

35 Thiab Thi-akhas rov qab twj ywm los rau hauv nws lub yeej, thiab saib seb, nws cov neeg tsaug zog tas, thiab nws tsa lawv thiab qhia txhua yam uas nws tau ua rau lawv.

36 Thiab nws hais kom nws cov tub rog sawv npaj kom txhij, nyob tsam cov Neeg Lamas yuav tsim thiab tuaj tawm tsam lawv.

37 Thiab xyoo thib nees nkaum tsib ntawm cov neeg txiav txim txoj kev kav Nifais cov neeg tau xaus li no; thiab Amalikhaiyas lub neej tau xaus li no.