1 Thiab nim no tau muaj tias tom qab Amas tau xaus lus rau cov neeg ntawm lub koom txoos, uas tau txhim tsa nyob hauv lub nroog Xalahelas, nws tsa cov pov thawj thiab cov txwj laug, los ntawm kev tso tes saum taub hau raws li Vajtswv tus txheej txheem, los tswj hwm thiab saib xyuas lub koom txoos.

2 Thiab tau muaj tias cov thawj coj ntawm lub koom txoos tau muab txhua tus uas tsis tau zwm rau lub koom txoos uas hloov siab lees txim rau lawv tej kev txhaum ua kev cai raus dej rau txoj kev hloov siab lees txim, thiab txais lawv los rau hauv lub koom txoos.

3 Thiab kuj tau muaj tias txhua tus uas zwm rau lub koom txoos tiam sis tsis hloov siab lees txim rau lawv tej kev phem thiab tsis txo lawv lub hwj chim rau Vajtswv—kuv hais txog cov uas khav theeb vim lawv lub siab muab hlob—cov thawj coj ntawm lub koom txoos xyeej cov no, thiab lawv lub npe raug rho tawm, xwv kom lub Koom Txoos cov thawj coj tsis txhob muab lawv lub npe suav nrog cov uas ncaj ncees.

4 Thiab xws li no lawv pib txhim tsa tus txheej txheem ntawm lub koom txoos nyob rau hauv lub nroog Xalahelas.

5 Nim no kuv xav kom nej to taub hais tias yeej muab Vajtswv txoj lus faib rau txhua tus, xwv kom tsis muaj leej twg uas txwv tsis pub lawv sib sau ua ke tuaj mloog Vajtswv txoj lus.

6 Txawm li ntawd los Vajtswv tau txib kom nws cov me nyuam ib sij sib sau ua ke, thiab koom ua ke yoo mov thiab sib zog thov Vajtswv pab cov uas tsis paub Vajtswv.

7 Thiab nim no tau muaj tias thaum Amas tsim tej kev cai no tas lawm nws ncaim lawv mus, muaj tseeb tiag, ncaim lub koom txoos uas nyob hauv lub nroog Xalahelas, thiab mus rau pem sab hnub tuaj ntawm tus dej Xidoos, rau hauv lub hav Nkide-oos, uas cov Neeg Nifais tau tsim ib lub nroog nyob rau ntawd, uas yog hu ua lub nroog Nkide-oos, nyob hauv lub hav uas hu ua Nkide-oos, uas yog hu raws tus txiv neej uas raug Nihos xuas ntaj tua.

8 Thiab Amas mus thiab pib tshaj Vajtswv txoj lus rau lub koom txoos uas tau txhim tsa nyob hauv lub hav Nkide-oos, raws li txoj kev tshwm sim uas hais tias tej lus uas nws cov yawg koob tau hais yeej muaj tseeb, thiab raws li lub txiaj ntsim qhia tau tej yuav muaj los yav tom ntej uas nyob hauv nws, raws li zaj lus tim khawv txog Yexus Khetos, Vajtswv Leej Tub, tus uas yuav los txhiv nws cov neeg dim ntawm lawv tej kev txhaum, thiab los ntawm tus txheej txheem dawb huv uas Vajtswv tau hu nws. Thiab yeej muaj li tau muab sau cia. Amees.