1 Kuv tus me tub, cuab pob ntseg rau kuv tej lus, vim kuv hais rau koj tias, zoo ib yam li kuv tau hais rau Hilamas lawm tias, npaum li uas koj yuav ua raws li Vajtswv tej lus txib koj yuav vam meej nyob hauv thaj av; thiab npaum li uas koj yuav tsis ua raws li Vajtswv tej lus txib koj yuav raug txiav tawm ntawm nws xub ntiag mus.

2 Thiab nim no, kuv tus me tub, kuv cia siab tias kuv yuav muaj kev xyiv fab rau koj, vim yog koj txoj kev ruaj nrees thiab koj txoj kev ntseeg rau Vajtswv; ib yam li koj tau pib ntsia ntsoov tus Tswv koj tus Vajtswv thaum koj tseem hluas, tib yam li ntawd kuv cia siab ntsoov tias koj yuav ua raws li nws tej lus txib mus tsis tu ncua; vim tus uas nyiaj mus kom txog thaum kawg tau koob hmoov.

3 Kuv hais rau koj, kuv tus me tub es, hais tias kuv twb muaj kev xyiv fab heev los ntawm koj lawm, vim yog koj txoj kev ntseeg thiab koj txoj kev rau siab ntso, thiab koj txoj kev ua siab ntev thiab koj txoj kev ua siab ntev nyiaj nyob hauv cov Neeg Xaulas.

4 Vim kuv paub tias koj raug khi; muaj tseeb tiag, thiab kuv kuj paub tias lawv xuas pob zeb ntaus koj vim yog txoj lus; thiab koj ua siab ntev nyiaj tau txhua yam no los vim yog tus Tswv nrog koj; thiab nim no koj paub tias tus Tswv tau tso koj dim.

5 Thiab nim no kuv tus me tub, Sinploos, kuv xav kom koj nco ntsoov tias, npaum li uas koj yuav tso siab rau Vajtswv koj yuav dim ntawm koj tej kev sim siab, thiab koj tej teeb meem, thiab koj tej kev txom nyem ntau npaum li ntawd, thiab Vajtswv yuav tsa koj sawv thaum txog hnub kawg.

6 Nim no, kuv tus me tub, kuv tsis xav kom koj xav tias kuv paub tej yam no ntawm kuv tus kheej, tiam sis yog Vajtswv tus Ntsuj Plig uas nyob hauv kuv uas ua tej yam no rau kuv paub; vim yog tias kuv tsis tau yug los ntawm Vajtswv ces ntshe kuv twb tsis paub tej yam no.

7 Tiam sis saib seb, tus Tswv nrog nws txoj kev hlub tshua heev tau xa nws tus tim tswv los tshaj tawm rau kuv tias kuv yuav tsum tseg txoj hauj lwm ntawm kev puas tsuaj nyob hauv nws cov neeg; muaj tseeb tiag, thiab kuv tau pom ib tug tim tswv tim ntsej tim muag, thiab nws hais lus nrog kuv, thiab nws lub suab nrov li xob quaj, thiab ua rau tag nrho thaj av tshee qeeg nkaws.

8 Thiab tau muaj tias kuv raug txoj kev mob thiab kev ntxhov siab uas iab tshaj plaws ntawm sab ntsuj plig tau peb hnub thiab peb hmos; thiab kuv ib txwm tsis tau txais kev zam txim rau kuv tej kev txhaum, txog rau thaum kuv thov tus Tswv Yexus Khetos kom hlub tshua kuv. Tiam sis saib seb, kuv tau thov nws thiab kuv txais tau txoj kev kaj siab lug rau kuv tus ntsuj plig.

9 Thiab nim no, kuv tus me tub, kuv tau qhia koj tej yam no xwv kom koj yuav kawm tau laj lim tswv yim, xwv kom koj yuav kawm ntawm kuv tias tsis muaj dua lwm txoj kev los sis lwm yam uas tib neeg yuav muaj peev xwm dim tau, tsuas yog los ntawm Khetos xwb. Saib seb, nws yog txoj sia thiab txoj kev kaj ntawm neeg ntiaj teb. Saib seb, nws yog txoj lus ntawm qhov tseeb thiab qhov ncaj ncees.

10 Thiab nim no, ib yam li koj tau pib qhia txoj lus ib yam li ntawd kuv xav kom koj kav tsij qhia mus ntxiv; thiab kuv xav kom koj rau siab thiab tswj koj tus kheej ua txhua yam.

11 Ceev faj kom koj tsis txhob muab hlob; muaj tseeb tiag, ceev faj koj tsis txhob khav txog koj tus kheej lub tswv yim, thiab txhob khav txog koj lub zog.

12 Ua siab loj, tiam sis tsis txhob muab hlob heev; thiab kuj ceev faj tias koj yuav tswj tag nrho koj tej kev ntswv siab, xwv kom koj yuav muaj kev hlub puv npo; ceev faj kom koj tsis txhob ua tub nkeeg.

13 Tsis txhob thov Vajtswv li cov Neeg Xaulas thov, vim koj twb pom tias lawv thov kom neeg hnov, thiab kom neeg qhuas lawv lub tswv yim.

14 Tsis txhob hais tias: Auj Vajtswv, kuv ua koj tsaug tias peb zoo dua peb cov kwv tij; tiam sis yuav tsum hais tias: Auj tus Tswv, thov zam txim rau kuv txoj kev tsis tsim nyog, thiab nco ntsoov hlub tshua kuv cov kwv tij—muaj tseeb tiag, lees paub koj txoj kev tsis tsim nyog rau Vajtswv txhua lub caij nyoog.

15 Thiab thov kom tus Tswv foom koob hmoov rau koj tus ntsuj plig, thiab txais koj mus rau hauv nws lub nceeg vaj thaum txog hnub kawg, mus zaum nrog kev kaj siab lug. Nim no cia li mus, kuv tus me tub, thiab qhia txoj lus rau cov neeg no. Ua tiag tiag. Kuv tus me tub, mus zoo koj.