1 Thiab ntxiv, kuv cov kwv tij, kuv yuav hais kom nej lub siab xav txog lub sij hawm thaum tus Tswv uas yog Vajtswv muab tej lus txib no rau nws cov me nyuam; thiab kuv xav kom nej nco ntsoov tias tus Tswv uas yog Vajtswv tau tsa cov pov thawj, raws li nws tus txheej txheem dawb huv, uas yog raws li tus txheej txheem ntawm nws Leej Tub, los qhia tej yam no rau cov neeg.

2 Thiab Vajtswv tsa cov pov thawj ntawd raws li tus txheej txheem ntawm nws Leej Tub, raws li no xwv kom cov neeg thiaj yuav paub tias lawv yuav ua li cas kom cia siab tos ntsoov nws Leej Tub kom txais tau kev txhiv dim.

3 Thiab Vajtswv tau tsa lawv raws li tus txheej txheem no—nws tau hu thiab npaj lawv txij thaum ntuj tsim teb raug los raws li Vajtswv txoj kev paub ua ntej, vim yog lawv txoj kev ntseeg heev thiab tej hauj lwm zoo; thaum chiv thawj Vajtswv cia rau lawv xaiv qhov zoo los sis qhov phem; yog li ntawd vim lawv xaiv qhov zoo, thiab vim lawv muaj kev ntseeg loj heev, Vajtswv tau siv ib txoj kev hu uas dawb huv hu lawv, muaj tseeb tiag, txoj kev hu uas dawb huv uas Vajtswv tau npaj nrog, thiab raws li, ib txoj kev txhiv dim uas tau npaj rau cov ntawd.

4 Thiab yog li ntawd Vajtswv tau hu lawv kom ua txoj kev hu uas dawb huv no vim yog lawv txoj kev ntseeg, tiam sis muaj lwm cov uas xyeej Vajtswv tus Ntsuj Plig vim yog lawv txoj kev ua siab tawv thiab kev tsis thoob tsib to nrog tiam sis, yog tias tsis yog rau qhov no ces ntshe lawv twb muaj ntiag tug zoo heev ib yam li lawv cov kwv tij lawm.

5 Los sis lub ntsiab yog li no, thaum chiv thawj lawv kuj muaj ntiag tug ib yam li lawv cov kwv tij thiab; yog li ntawd Vajtswv tau npaj txoj kev hu dawb huv no txij thaum ntuj tsim teb raug los rau cov uas tsis ua lawv lub siab tawv, txoj kev hu dawb huv uas yog los ntawm txoj kev theej txhoj ntawm Tib Leeg Tub, tus uas Vajtswv tau npaj—

6 Thiab Vajtswv tau siv txoj kev dawb huv no hu lawv li no, thiab tau tsa lawv los rau lub pov thawj hwj hlob ntawm Vajtswv tus txheej txheem dawb huv, los qhia nws tej lus txib rau noob neej, xwv kom lawv kuj nkag mus rau hauv nws qhov chaw so los tau thiab—

7 Lub pov thawj hwj hlob no yog muaj raws li tus txheej txheem ntawm nws Leej Tub, uas yog tus txheej txheem uas muaj txij thaum ntuj tsim teb raug los; los yog hais tias, tsis muaj hnub pib thiab tsis muaj xyoo kawg, uas Vajtswv tau npaj thaum ib txhiab ib txhis mus tag nrho rau ib txhiab ib txhis, raws li nws txoj kev paub ua ntej txog txhua yam—

8 Nim no Vajtswv tau tsa lawv raws li tus txheej txheem no—hu lawv los ntawm li ib txoj kev hu uas dawb huv, thiab tsa lawv los ntawm ib txoj kev tsa uas dawb huv, thiab muab lub pov thawj hwj hlob ntawm tus txheej txheem dawb huv rau lawv, txoj kev hu, thiab txoj kab ke, thiab lub pov thawj hwj hlob, uas tsis muaj qhov chiv keeb thiab tsis muaj qhov kawg—

9 Xws li no lawv los ua cov pov thawj hlob mus ib txhis, raws li Leej Tub tus txheej txheem, Leej Txiv Tib Leeg Tub, tus uas tsis muaj hnub pib thiab tsis muaj xyoo kawg, tus uas muaj kev tshav ntuj puv npo, muaj kev txim lij, thiab qhov tseeb. Thiab yeej muaj li ntawd tiag. Amees.

10 Nim no, ib yam li kuv tau hais txog tus txheej txheem dawb huv, los sis lub pov thawj hwj hlob no, muaj coob leej uas Vajtswv tau tsa thiab los ua Vajtswv cov pov thawj hlob; thiab twb vim yog lawv txoj kev ntseeg heev thiab txoj kev hloov siab lees txim, thiab lawv txoj kev ncaj ncees rau Vajtswv, vim lawv xaiv los hloov siab lees txim thiab ua ncaj ncees thiab tsis xaiv kom piam sij.

11 Yog li ntawd Vajtswv tau hu lawv raws li tus txheej txheem dawb huv no, thiab muab lawv hloov ua neeg dawb huv, thiab ntxuav lawv tej tsoos tsho kom dawb los ntawm tus Me Nyuam Yaj cov ntshav.

12 Nim no, tom qab tus Vaj Ntsuj Plig Dawb Huv ua rau lawv hloov ua neeg dawb huv, vim ua rau lawv tej tsoos tsho dawb, vim Vajtswv pom zoo tias lawv huv huv thiab tsis muaj qhov phem, lawv ntsia tsis taus kev txhaum tsuas yog ntsia nrog kev ntxub ntxaug; thiab tau muaj coob, coob heev kawg li, uas tau hloov los ua neeg huv huv thiab tau nkag mus rau hauv tus Tswv lawv tus Vajtswv qhov chaw so.

13 Thiab nim no, kuv cov kwv tij, kuv xav kom nej txo nej lub hwj chim rau Vajtswv, thiab txi tau txiv uas tsim nyog rau kev hloov siab lees txim, xwv kom nej yuav tau nkag mus rau hauv qhov chaw so ntawd thiab.

14 Muaj tseeb tiag, txo nej lub hwj chim ib yam li cov neeg uas nyob rau thaum Mekhixedes lub caij, tus uas kuj yog ib tug pov thawj hlob raws li tib tug txheej txheem uas kuv tau hais txog no, tus uas kuj tau txais lub pov thawj hwj hlob rau nws mus ib txhis li.

15 Thiab twb yog tib tug Mekhixedes no uas Anplaham tau them ib feem kaum rau; muaj tseeb tiag, peb tus yawg koob Anplaham them ib feem kaum ntawm txhua yam uas nws muaj.

16 Nim no tau muab tej kab ke no raws li tus txheej txheem no, xwv kom cov neeg thiaj yuav cia siab tos ntsoov Vajtswv Leej Tub, thiab qhov no twb yog ib lub cim ntawm nws tus txheej txheem, los sis qhov no twb yog nws tus txheej txheem, thiab qhov no xwv kom lawv yuav cia siab tos ntsoov nws kom txais kev zam txim rau lawv tej kev txhaum, xwv kom lawv yuav nkag tau mus rau hauv tus Tswv qhov chaw so.

17 Nim no tus Mekhixedes no yog ib tug vaj ntxwv kav thaj av Xalees; thiab nws cov neeg tau ua kev phem thiab kev qias heev zuj zus tuaj; muaj tseeb tiag, lawv tag nrho tau mus yuam kev; lawv tau muaj txhua yam kev phem;

18 Tiam sis vim Mekhixedes tau muab siab rau ntseeg heev, thiab vim nws tau txais lub luag hauj lwm ntawm lub pov thawj hwj hlob raws li Vajtswv tus txheej txheem dawb huv, nws tau tshaj tawm kev hloov siab lees txim rau nws cov neeg. Thiab saib seb, lawv tau hloov siab lees txim; thiab Mekhixedes tau txhim tsa kev thaj yeeb nyob hauv thaj av thaum nws tseem ua neej nyob; yog li ntawd cov neeg muab nws hu ua tus tub vaj ntxwv ntawm kev thaj yeeb, vim nws yog tus vaj ntxwv kav Xalees; thiab nws kav raws li nws txiv tej kev tswj hwm.

19 Nim no, twb muaj ntau tus ua ntej nws, thiab kuj muaj ntau tus tom qab, tiam sis tsis muaj ib tug uas yuav zoo dua; yog li ntawd, lawv thiaj sau txog nws ntau dua.

20 Nim no kuv tsis tas yuav hais txog qhov ntawd ntxiv; yam uas kuv tau hais nyaj yuav txaus lawm. Saib seb, cov vaj lug kub twb nyob ntawm nej xub ntiag; yog hais tias nej yuav ntxeev cov vaj lug kub ces yuav ua rau nej tus kheej puas tsuaj.

21 Thiab nim no tau muaj tias thaum Amas hais tej lus no rau lawv tas lawm, nws xyab hlo nws txhais tes rau lawv thiab tshaj nrog ib lub suab nrov nrov hais tias: Tam sim no yog lub sij hawm hloov siab lees txim, vim twb los txog hnub cawm seej lawm;

22 Muaj tseeb tiag, thiab tus Tswv lub suab, los ntawm cov tim tswv lub qhov ncauj, twb tshaj tawm rau txhua haiv neeg; muaj tseeb tiag, twb tshaj tawm, xws kom lawv yuav tau txais tej moo zoo siab ntawm kev xyiv fab heev; muaj tseeb tiag, thiab nws twb tshaj tawm tej moo zoo siab no rau tag nrho hauv nws cov neeg, muaj tseeb tiag, twb tshaj tawm rau cov uas tawg khiav ri niab mus rau lwm teb chaws nyob rau hauv lub ntiaj teb; yog li ntawd tej moo zoo siab no twb tau los rau peb.

23 Thiab tau ua tej moo zoo siab no rau peb paub meej, xwv kom peb yuav to taub, xwv kom peb tsis yuam kev; thiab li no los vim peb yog neeg loj leeb nyob hauv ib thaj av txawv; yog li ntawd, peb yeej tau koob hmoov ntau, vim tau muab tej moo zoo siab no tshaj tawm nyob hauv txhua txhia ces kaum ntawm peb lub vaj txiv hmab.

24 Vim saib seb, lub sij hawm no cov tim tswv tab tom tshaj tawm tej moo zoo siab no rau coob leej nyob hauv peb thaj av; thiab qhov no twb yog rau lub hom phiaj npaj kom noob neej lub siab muaj cuab kav txais tau nws txoj lus thaum nws los nrog nws lub yeeb koob.

25 Thiab nim no peb tsuas yog tos ntsoov mloog tej xov xwm xyiv fab ntsig txog nws txoj kev los uas cov tim tswv qhov ncauj tshaj tawm rau peb; vim lub sij hawm twb yuav los, peb tsis paub tias yuav sai npaum li cas. Cia siab rau Vajtswv tias yuav yog thaum kuv tseem ua neej nyob; tiam sis txawm tias yuav yog sai sai no los sis ntev ntev tom ntej, los kuv yeej zoo siab.

26 Thiab cov tim tswv lub qhov ncauj yuav ua rau cov neeg ncaj thiab dawb huv paub, thaum txog lub sij hawm uas nws los, xwv kom yuav muaj raws li peb cov yawg koob tej lus, raws li tej uas lawv tau hais txog nws, uas yog los ntawm lub txiaj ntsim qhia tau tej yuav muaj los yav tom ntej uas nyob hauv lawv.

27 Thiab nim no, kuv cov kwv tij, kuv vam puag hauv kuv nruab siab tuaj, muaj tseeb tiag, kuv txhawj heev twb ua rau kuv mob, hais tias nej yuav mloog kuv tej lus, thiab muab nej tej kev txhaum tso pov tseg, thiab tsis txhob laug sij hawm rau hnub uas nej hloov siab lees txim;

28 Tiam sis kuv vam hais tias nej yuav txo nej lub hwj chim rau tus Tswv, thiab hu txog nws lub npe dawb huv, thiab xyuas thiab thov Vajtswv tsis tu ncua, xwv kom nej tsis txhob raug ntxias ntau tshaj qhov uas nej tiv taus, thiab yog li ntawd xwv kom tus Ntsuj Plig Dawb Huv coj nej, thiab ua rau nej los ua neeg txo hwj chim, muaj siab mos siab muag, mloog lus, ua siab ntev, muaj kev hlub puv npo thiab muaj kev ua siab ntev nyiaj huv tib si;

29 Thiab muaj kev ntseeg tus Tswv; muaj kev cia siab tias nej yuav tau txais txoj sia nyob mus ib txhis; muaj Vajtswv txoj kev hlub nyob hauv nej lub siab tas mus li, xwv kom nws yuav tsa nej sawv nyob hauv hnub kawg thiab nkag mus rau hauv nws qhov chaw so.

30 Thiab thov tus Tswv pub txoj kev hloov siab lees txim rau nej, xwv kom nej tsis txhob coj nws txoj kev npau taws nqis los rau nej, xwv kom nej tsis txhob raug khi los ntawm ntuj txiag teb tsaus tej saw hlau, xwv kom nej tsis txhob raug txoj kev tuag zaum ob.

31 Thiab Amas tau hais lus ntau ntxiv rau cov neeg, uas tsis muab sau rau hauv phau ntawv no.