1 Thiab nim no tau muaj tias Xamuyees, uas yog tus Neeg Lamas, tau qhia tej yuav muaj los yav tom ntej ntau yam tseem ceeb ntxiv uas muab sau tsis tau cia.

2 Thiab saib seb, nws hais rau lawv tias: Saib seb, kuv muab ib lub cim rau nej; vim tshuav tsib xyoos ntxiv, thiab saib seb, ces Vajtswv Leej Tub yuav los txhiv tag nrho cov uas yuav ntseeg nws lub npe dim.

3 Thiab saib seb, kuv yuav muab qhov no ua lub cim rau nej rau thaum lub caij uas nws los; vim saib seb, yuav muaj tej teeb ci heev saum ntuj, npaum li uas hmo ua ntej nws los yuav tsis tsaus ntuj li, ua rau tib neeg pom zoo li yog nruab hnub.

4 Yog li ntawd, yuav muaj ib hnub thiab ib hmos thiab ib hnub, uas yuav zoo li tib hnub xwb thiab yuav tsis muaj hmo ntuj; thiab qhov no yuav yog ib lub cim rau nej; vim nej yuav paub thaum lub hnub tuaj thiab thaum lub hnub poob; yog li ntawd lawv yuav paub tseeb tias twb yog ob hnub thiab ib hmos; txawm li ntawd los thaum hmo ntuj yuav tsis tsaus ntuj; thiab hmo ntawd yuav yog hmo ua ntej nws yug.

5 Thiab saib seb, yuav muaj ib lub hnub qub tshiab ci tuaj, ib lub uas nej tsis tau pom dua li; thiab qhov no los kuj yuav yog ib lub cim rau nej thiab.

6 Thiab saib seb tsis tas li no xwb, yuav muaj ntau lub cim thiab ntau yam txuj ci uas xav tsis thoob nyob saum ntuj.

7 Thiab yuav muaj tias nej sawv daws yuav yoob, thiab xav tsis thoob, npaum li uas nej yuav vau rau hauv av.

8 Thiab yuav muaj tias tus uas yuav ntseeg Vajtswv Leej Tub, tus ntawd yuav muaj txoj sia uas kav ib txhis.

9 Thiab saib seb, tus Tswv tau txib kuv li no, los ntawm nws tus tim tswv, kom kuv yuav tsum tuaj thiab qhia qhov no rau nej; muaj tseeb tiag, nws txib kom kuv qhia tej yuav muaj los yav tom ntej txog tej yam no rau nej; muaj tseeb tiag, nws hais rau kuv tias: Tshaj tawm rau cov neeg no, cia li hloov siab lees txim thiab npaj tus Tswv txoj kev.

10 Thiab nim no, vim kuv yog ib tug Neeg Lamas, thiab tau hais rau nej tej lus uas tus Tswv tau txib kuv, thiab vim tej lus ntawd hnyav tawm tsam nej, nej thiaj npau taws rau kuv thiab nrhiav kev ua kom kuv puas tsuaj, thiab tau ntiab kuv tawm ntawm nej mus.

11 Thiab nej yuav hnov kuv cov lus, rau qhov, vim yog lub ntsiab no kuv thiaj tau nce rau saum ntsa loog ntawm lub nroog no, xwv kom nej yuav hnov thiab paub txog Vajtswv tej kev txiav txim uas tos ntsoov nej vim yog nej tej kev ua phem, thiab xwv kom nej yuav paub txog tej ntsiab lus ntawm kev hloov siab lees txim thiab;

12 Thiab kom nej yuav paub txog Yexus Khetos txoj kev los, uas yog Vajtswv Leej Tub, uas yog Leej Txiv rau saum ntuj ceeb tsheej thiab hauv ntiaj teb, uas yog tus Tsim tag nrho txhua yam txij thaum chiv keeb los; thiab kom nej yuav paub txog tej cim ntawm nws txoj kev los, rau lub hom phiaj tias tej zaum nej yuav ntseeg nws lub npe.

13 Thiab yog tias nej ntseeg nws lub npe nej yuav hloov siab lees txim rau tag nrho nej tej kev txhaum, xwv kom nej thiaj yuav tau txais kev zam txim rau nej tej kev txhaum los ntawm nws tej hauj lwm zoo.

14 Thiab saib seb, ntxiv, kuv muab dua ib lub cim rau nej, muaj tseeb tiag, ib lub cim ntawm nws txoj kev tuag.

15 Vim saib seb, nws yeej yuav tuag xwv kom kev cawm seej yuav los tau; muaj tseeb tiag, nws yeej yuav tsum tuag thiab tsim nyog uas nws tuag, thiaj li muaj tau txoj kev sawv rov los ntawm cov tuag, xwv kom thiaj li yuav coj tau neeg mus nyob rau ntawm tus Tswv lub xub ntiag.

16 Muaj tseeb tiag, saib seb, txoj kev tuag no yuav coj kom muaj tau txoj kev sawv rov los, thiab txhiv tau tib neeg txhua tus dim ntawm txoj kev tuag zaum ib—txoj kev tuag ntawm sab ntsuj plig ntawd; vim tag nrho noob neej, los ntawm Adas txoj kev poob, vim lawv raug txiav tawm ntawm tus Tswv xub ntiag mus, raug suav tias lawv tuag lawm, rau sab cev nqaij daim tawv thiab sab ntsuj plig thiab.

17 Tiam sis saib seb, Khetos txoj kev sawv rov los yuav txhiv tib neeg dim, muaj tseeb tiag, twb yog tag nrho noob neej, thiab coj lawv rov qab mus nyob rau ntawm tus Tswv lub xub ntiag.

18 Muaj tseeb tiag, thiab ua kom muaj txoj ntsiab lus ntawm kev hloov siab lees txim, hais tias tus uas hloov siab lees txim tus ntawd yuav tsis raug muab ntov thiab muab pov rau hauv hluav taws; tiam sis txhua tus uas tsis kam hloov siab lees txim yuav raug muab ntov thiab muab pov rau hauv hluav taws; thiab yuav rov muaj dua ib txoj kev tuag ntawm sab ntsuj plig los raug lawv, muaj tseeb tiag, txoj kev tuag zaum ob, vim lawv raug txiav tawm dua xws li ntawm tej uas ntsig txog kev ncaj ncees.

19 Yog li ntawd nej cia li hloov siab lees txim, nej cia li hloov siab lees txim, ntshai tsam nej yuav cia nej tus kheej los raug txim, thiab nej yuav raug coj los mus rau txoj kev tuag zaum ob no, vim nej twb paub tiam sis tsis kam ua raws li tej no.

20 Tiam sis saib seb, ib yam li kuv tau hais rau nej txog ib lub cim ntxiv, lub cim ntawm nws txoj kev tuag, saib seb, nyob rau hnub ntawd uas nws yuav raug txoj kev tuag lub hnub yuav tsaus nti thiab tsis kam muab nws txoj kev kaj tuaj rau nej; lub hli thiab cov hnub qub los kuj tib yam; thiab yuav tsis muaj qhov kaj nyob rau hauv thaj av no, twb yog txij li thaum lub caij uas nws yuav raug txoj kev tuag, ncua li peb hnub, mus txog rau thaum lub caij uas nws yuav sawv hauv qhov tuag rov qab los.

21 Muaj tseeb tiag, nyob rau lub sij hawm thaum nws yuav tso tseg txoj sia yuav muaj xob quaj thiab xob laim ncua ntau ntau teev, thiab lub ntiaj teb yuav co qeg txoog thiab tshee hnyo; thiab tej pob zeb uas nyob saum lub ntiaj teb no, uas nyob saum lub ntiaj teb thiab hauv qab, uas nyob rau lub sij hawm no nej paub tias yeej tawv tawv, los sis feem ntau yeej yog ib thooj tawv tawv, yuav tawg ntsoog ntxaws.

22 Muaj tseeb tiag, tej pob zeb ntawd yuav tawg ua ob sab, thiab tom qab ntawd mus yuav pom tias tej pob zeb ntawd tawg pleb thiab nrwb pleb, thiab muaj pob zeb tawg ntsoog ntxaws nyob rau saum lub ntiaj teb, muaj tseeb tiag, nyob rau saum lub ntiaj teb thiab nyob hauv qab tib si.

23 Thiab saib seb, yuav muaj cua daj cua dub loj, thiab yuav ua rau ntau lub roob tiaj, zoo li ib lub hav, thiab yuav muaj ntau qhov chaw uas ziag no yog vos hav yuav hloov los ua roob siab heev.

24 Thiab ntau txoj kev loj yuav tawg, thiab ntau lub nroog yuav hloov thiaj tsis muaj neeg nyob.

25 Thiab ntau lub ntxa yuav qhib, thiab tej qhov ntxa yuav cia coob leej ntawm lawv cov tuag tawm los; thiab ntau tus cov uas ntseeg yuav tshwm los rau coob leej pom.

26 Thiab saib seb, tus tim tswv hais rau kuv li no; vim nws tau hais rau kuv tias yuav muaj xob quaj thiab xob laim ncua ntau ntau teev.

27 Thiab nws hais rau kuv tias thaum tseem muaj xob quaj thiab xob laim thiab cua daj cua dub, yeej yuav muaj tej no, thiab yuav muaj kev tsaus ntuj los vov tag nrho lub ntiaj teb ncua li peb hnub.

28 Thiab tus tim tswv tau hais rau kuv tias muaj coob leej yuav pom tej yam uas loj tshaj no, rau lub hom phiaj tias tej zaum lawv yuav ntseeg tias tej cim no thiab tej txuj ci uas xav tsis thoob no yuav muaj los nyob rau hauv tag nrho thaj av no, rau lub hom phiaj tias kom txhob muaj qhov uas ua rau noob neej tsis ntseeg—

29 Thiab qhov no twb yog rau lub hom phiaj kom txhua tus uas ntseeg yuav txais kev cawm dim, thiab txhua tus uas tsis ntseeg, ces ib txoj kev txiav txim uas ncaj ncees yuav los rau lawv; thiab yog tias lawv raug txim ces twb yog lawv coj txoj kev raug txim los rau lawv tus kheej.

30 Thiab nim no cia li nco ntsoov, cia li nco ntsoov, kuv cov kwv tij es, hais tias tus uas piam sij, tsuas yog piam sij rau nws tus kheej xwb; thiab tus uas ua kev phem, tsuas yog ua rau nws tus kheej xwb; vim saib seb, nej twb ywj pheej; twb cia rau nej ua nej tus kheej; vim saib seb, Vajtswv tau ua rau nej paub thiab nws tau cia rau nej ywj pheej.

31 Nws tau cia rau nej kom nej paub qhov zoo thiab qhov phem, thiab nws tau muab rau nej kom nej yuav xaiv txoj sia los sis kev tuag; thiab nej muaj peev xwm ua zoo thiab raug muab txum tim rau qhov uas zoo, los sis muab qhov uas zoo los txum tim rau nej; los sis nej muaj peev xwm ua phem, thiab muab qhov phem los txum tim rau nej.