1 Thiab nim no, tau muaj tias muaj coob leej uas tau hnov tej lus ntawm Xamuyees, uas yog tus Neeg Lamas, uas nws hais nyob saum tej ntsa loog ntawm lub nroog. Thiab tag nrho cov uas ntseeg nws tej lus tawm mus nrhiav Nifais; thiab thaum lawv tawm mus thiab nrhiav tau nws lawv lees lawv tej kev txhaum rau nws thiab tsis xyeej, thiab xav ua kev cai raus dej rau tus Tswv.

2 Tiam sis tag nrho cov uas tsis ntseeg Xamuyees tej lus npau taws rau nws; thiab lawv txawb pob zeb rau nws saum ntsa loog, thiab kuj muaj coob leej tua xub rau nws thaum nws sawv nyob saum ntsa loog; tiam sis tus Tswv tus Ntsuj Plig nyob nrog nws, ua rau lawv tej pob zeb thiab lawv tej xub tsis raug nws.

3 Nim no thaum lawv pom tias lawv tsis muaj peev xwm tua raug nws, muaj coob leej ntxiv ntseeg nws tej lus, lawv thiaj mus cuag Nifais kom muab lawv ua kev cai raus dej.

4 Vim saib seb, Nifais muab lawv ua kev cai raus dej, thiab qhia tej yuav muaj los yav tom ntej rau lawv, thiab qhuab qhia lawv, hais txog kev hloov siab lees txim rau cov neeg, ua lub cim thiab tej txuj ci uas xav tsis thoob rau lawv pom, ua tej txuj ci tseem ceeb nyob hauv cov neeg, xwv kom lawv thiaj paub tias tus Khetos twb yeej yuav los tsis ntev no—

5 Qhia rau lawv txog tej uas yeej yuav los tsis ntev no, xwv kom lawv yuav paub thiab nco qab nyob rau thaum uas tej ntawd los tias twb ua tej ntawd rau lawv paub ua ntej lawm, rau lub hom phiaj kom lawv yuav ntseeg; yog li ntawd tag nrho cov uas ntseeg Xamuyees tej lus tau tawm mus rau nws kom muab lawv ua kev cai raus dej, vim lawv tuaj nrog kev hloov siab lees txim thiab kam lees lawv tej kev txhaum.

6 Tiam sis feem coob ntawm lawv tsis ntseeg Xamuyees tej lus; yog li ntawd thaum lawv pom tias lawv tej pob zeb thiab lawv tej xub tsis raug nws, lawv qw nrov rau lawv tej thawj tub rog, hais tias: Txhom tus neeg no thiab muab nws khi, vim saib seb nws muaj ib tug dab phem; thiab vim yog tus dab phem lub hwj chim uas nyob hauv nws peb tej pob zeb thiab tej xub thiaj tsis raug nws; yog li ntawd cia li muab nws txhom thiab muab nws khi, thiab coj nws khiav mus.

7 Thiab thaum uas lawv mus xuas lawv tes ntsiab nthos nws, saib seb, nws dhia saum ntsa loog los, thiab khiav tawm ntawm lawv thaj av mus, muaj tseeb tiag, twb yog mus rau tom nws lub teb chaws, thiab pib qhuab qhia thiab qhia tej yuav muaj los yav tom ntej nyob hauv nws cov neeg.

8 Thiab saib seb, cov Neeg Nifais tsis hnov txog nws ib zaug ntxiv li lawm; thiab tau muaj li no nyob hauv cov neeg.

9 Thiab xyoo yim caum rau ntawm cov neeg txiav txim txoj kev kav Nifais cov neeg tau xaus li no.

10 Thiab xyoo yim caum xya ntawm cov neeg txiav txim txoj kev kav kuj tau xaus li no thiab, feem coob ntawm cov neeg yeej tseem muaj lawv txoj kev muab hlob thiab kev phem, thiab feem tsawg los Vajtswv pom tias lawv taug kev ceev faj zog.

11 Thiab tej yam no los kuj muaj nyob hauv xyoo yim caum yim ntawm cov neeg txiav txim txoj kev kav.

12 Thiab twb tsis muaj kev txawv txav ntau nyob hauv cov neeg, tsuas yog tias cov neeg pib ua siab tawv ua phem, thiab ua tej uas tsis raws li Vajtswv tej lus txib ntau ntxiv thiab ntxiv, nyob hauv xyoo yim caum cuaj ntawm cov neeg txiav txim txoj kev kav.

13 Tiam sis tau muaj tias nyob hauv xyoo cuaj caum ntawm cov neeg txiav txim txoj kev kav, Vajtswv tau muab tej cim loj thiab tej txuj ci uas xav tsis thoob rau cov neeg; thiab pib muaj raws li cov yaj saub tej lus.

14 Thiab cov tim tswv tau tshwm sim los rau tib neeg, cov tib neeg uas muaj tswv yim, thiab tshaj tawm tej moo zoo siab ntawm txoj kev xyiv fab heev rau lawv; yog li ntawd nyob rau hauv xyoo no pib muaj raws li cov vaj lug kub qhia.

15 Txawm li ntawd los, cov neeg pib ua lawv lub siab tawv, tsuas yog tshuav cov uas ntseeg heev tshaj ntawm lawv xwb, tsis hais cov neeg Nifais los sis cov Neeg Lamas puav leej, thiab pib vam khom rau lawv tus kheej lub zog thiab rau lawv tus kheej lub tswv yim, hais tias:

16 Tej zaum lawv kwv yees hais tau tej yam uas yog lawm, los ntawm ntau yam no; tiam sis saib seb, peb paub tias tag nrho tej hauj lwm tseem ceeb thiab zoo kawg nkaus no, uas twb tau hais lawm, yuav muaj tsis tau los.

17 Thiab lawv pib soj ntsuam thiab sib cav nyob hauv lawv, hais tias:

18 Twb tsis tsim nyog tias yuav muaj ib tug zoo li ib tug Khetos yuav los; yog muaj li ntawd, thiab nws yog Vajtswv Leej Tub, yog Leej Txiv ntawm lub ntuj ceeb tsheej thiab lub ntiaj teb, zoo li tau hais lawm, vim li cas nws ho tsis ua nws tus kheej rau peb pom ib yam li ua rau lawv cov uas nyob tim Yeluxalees pom?

19 Muaj tseeb tiag, vim li cas nws ho tsis ua nws tus kheej tshwm los rau hauv thaj av no ib yam li nyob rau tim thaj av Yeluxalees?

20 Tiam sis saib seb, peb paub tias qhov no yog ib txoj kab lis kev cai phem, uas yog peb cov yawg koob tau muab cev los rau peb, ua kom peb ntseeg tej yam uas tseem ceeb thiab zoo kawg nkaus uas yuav muaj los, tiam sis twb tsis yog nyob hauv peb, tiam sis yog nyob hauv ib thaj av uas nyob deb, ib thaj av uas peb tsis paub; yog li ntawd lawv thiaj ceev tau kom peb tsis paub, vim peb tsis muaj peev xwm pom nrog peb lub qhov muag tias tej ntawd muaj tseeb.

21 Thiab los ntawm kev dag ntxias thiab tej txuj ci tes taw ntawm tus niag phem, lawv yuav ua tej yam txuj ci uas peb tsis muaj peev xwm to taub, uas yuav ceev kom peb nyob qis ua qhev rau lawv tej lus, thiab ua qhev rau lawv, vim peb vam khom lawv kom qhia txoj lus rau peb; thiab li no lawv yuav ceev kom peb tsis paub tas peb lub neej yog tias peb ywj peb tus kheej rau lawv.

22 Thiab muaj ntau yam ntxiv uas cov neeg xav nyob hauv lawv lub siab, uas yog tej yam ruam thiab tsis muaj qab hau; thiab ua rau lawv chim heev, vim Dab Ntxwg Nyoog tau txhaub kom lawv ua phem tsis tu ncua; muaj tseeb tiag, nws ncig mus tshaj tawm tej lus paj lus cua thiab tej kev sib cav sib ceg rau hauv tag nrho thaj av, xwv kom nws yuav ua tau rau cov neeg lub siab tawv tawm tsam tej uas zoo thiab tawm tsam tej uas yuav los.

23 Thiab txawm tias muaj tej cim thiab tej txuj ci uas xav tsis thoob uas tus Tswv tau ua muaj nyob hauv nws cov neeg, thiab tej txuj ci tseem ceeb ntau uas lawv tau ua, los Dab Ntxwg Nyoog tseem tuav tau cov neeg lub siab ruaj nyob thoob plaws rau hauv thaj av.

24 Thiab xyoo cuaj caum ntawm cov neeg txiav txim txoj kev kav Nifais cov neeg tau xaus li no.

25 Thiab phau ntawv Hilamas tau xaus li no, raws li Hilamas thiab nws cov tub phau ceev xwm txheej.