1 Saib seb, nim no tau muaj tias nyob hauv xyoo rau caum cuaj ntawm cov neeg txiav txim txoj kev kav cov Neeg Nifais, Nifais, uas yog Hilamas tus tub, tau rov qab pem thaj av sab qaum teb los rau hauv thaj av Xalahelas.

2 Vim nws tau mus nyob nrog cov neeg uas nyob hauv thaj av sab qaum teb, thiab tau tshaj tawm Vajtswv txoj lus rau lawv, thiab tau qhia tej yuav muaj los yav tom ntej ntau yam rau lawv;

3 Thiab lawv tau xyeej tag nrho nws tej lus, nws thiaj nyob tsis taus nrog lawv, es thiaj tau rov qab los rau hauv thaj av uas yug nws.

4 Thiab nws pom cov neeg ua phem ua qias heev, thiab pom cov tub sab Nkadi-atoos ntawd los zaum saum tej lub rooj txiav txim—txeeb tau lub hwj chim thiab txoj cai ntawm thaj av; muab Vajtswv tej lus txib tso tseg, thiab tsis ua ncaj ib nyuag qhov rau nws li; tsis muaj kev txim lij rau noob neej;

5 Rau txim rau cov neeg ncaj ncees vim yog lawv txoj kev ncaj ncees; cia rau cov neeg muaj txim thiab cov neeg phem mus dawb vim yog lawv cov nyiaj; thiab ib qho ntxiv yog cia lawv los ua cov thawj nyob hauv lub tsoom fwv, los kav thiab ua raws li lawv siab nyiam, xwv kom lawv yuav muaj nyiaj nplua nuj thiab ua kom neeg ntiaj teb qhuas, thiab, ib qho ntxiv, xwv kom yuav yooj yim rau lawv deev luag poj luag txiv, thiab ua tub sab, thiab tua neeg, thiab ua tau raws li lawv siab xav—

6 Nim no txoj kev ua phem loj no tau los raug cov Neeg Nifais, nyob hauv ib ntus uas twb tsis muaj ntau xyoo; thiab thaum Nifais pom qhov no, ua rau nws tu siab puv npo nyob hauv nws hauv siab; thiab nws tau quaj qw nrov vim nws tus ntsuj plig mob kawg nkaus hais tias:

7 Auj, kheev lam kuv yug los nyob rau lub caij thaum kuv tus yawg koob Nifais nyuam qhuav tawm tim thaj av Yeluxalees tuaj, xwv kom kuv yuav tau nrog nws xyiv fab nyob hauv thaj av uas cog lus cia; nyob rau lub sij hawm ntawd yooj yim qhia nws cov neeg, lawv ua raws nraim li Vajtswv tej lus txib ruaj nrees, thiab ua qeeb thaum raug coj mus ua phem; thiab lawv maj nrawm nroos los mloog tus Tswv tej lus—

8 Muaj tseeb tiag, yog tias kuv yug los nyob rau lub sij hawm ntawd, ces ntshe kuv tus ntsuj plig twb muaj kev xyiv fab los ntawm kuv cov kwv tij txoj kev ncaj ncees.

9 Tiam sis saib seb, Vajtswv tso kuv los nyob rau lub caij no, thiab los kom kuv lub siab yuav muaj kev tu siab puv npo vim yog txoj kev phem no ntawm kuv cov kwv tij.

10 Thiab saib seb, nim no tau muaj tias twb yog nyob rau saum ib tug pej thuam, uas yog nyob hauv Nifais lub vaj, uas yog nyob ib sab ntawm txoj kev loj uas mus rau tom lub khw loj, uas yog nyob hauv lub nroog Xalahelas; yog li ntawd, Nifais tau txhos caug saum tus pej thuam uas yog nyob hauv nws lub vaj, tus pej thuam uas kuj yog nyob ze lub rooj vag uas txoj kev loj hla mus los.

11 Thiab tau muaj tias muaj ib co neeg hla los mus thiab pom thaum Nifais tab tom thov Vajtswv kawg siab kawg ntsws nyob saum tus pej thuam; thiab lawv khiav mus qhia rau cov neeg txog qhov uas lawv tau pom, thiab cov neeg tuaj ua ke coob coob xwv kom lawv yuav paub lub ntsiab ntawm qhov uas muaj kev quaj ntsuag heev rau txoj kev phem ntawm cov neeg.

12 Thiab nim no, thaum Nifais sawv los nws pom cov neeg coob coob uas tau sib sau tuaj ua ke.

13 Thiab tau muaj tias nws qhib nws lub qhov ncauj thiab hais rau lawv tias: Saib seb, yog vim li cas nej thiaj sib sau tuaj ua ke? Puas yog kom kuv qhia nej tej kev ua phem rau nej?

14 Muaj tseeb tiag, vim yog kuv tau tuaj nyob rau saum kuv tus pej thuam xwv kom kuv yuav thov kuv tus Vajtswv kawg siab kawg ntsws, vim yog txoj kev tu siab heev ntawm kuv lub siab, uas twb vim yog nej tej kev ua phem!

15 Thiab vim yog kuv txoj kev nyiav thiab txoj kev quaj ntsuag nej thiaj sib sau tuaj ua ke, thiab xav tsis thoob; muaj tseeb tiag, thiab nej yeej tsim nyog xav tsis thoob; muaj tseeb tiag, nej tsim nyog xav tsis thoob vim yog nej qhib kev rau tus dab phem kom tuav tau nej lub siab ruaj heev.

16 Muaj tseeb tiag, ua li cas nej thiaj qhib kev rau txoj kev ntxias ntawm tus uas tab tom nrhiav kev muab nej tus ntsuj plig pov rau hauv txoj kev nyuaj siab uas kav ib txhis thiab kev txom nyem uas tsis muaj qhov kawg?

17 Auj nej cia li hloov siab lees txim, nej cia li hloov siab lees txim! Vim li cas nej thiaj yuav tuag? Nej cia li tig hlo, nej cia li tig hlo mus rau tus Tswv nej tus Vajtswv. Vim li cas nws thiaj tau tso nej tseg?

18 Twb yog vim nej tau ua nej lub siab tawv; muaj tseeb tiag, nej tsis kam mloog tus tswv yug yaj zoo lub suab; muaj tseeb tiag, nej tau thab nws ua rau nws npau taws rau nej.

19 Thiab saib seb, tsuas yog nej yuav hloov siab lees txim xwb, tsis li ces nws yuav tsis sau nej los ua ke, tiam sis, yuav ua kom nej tawg khiav ri niab tawm mus xwv kom nej yuav hloov los ua nqaij rau cov dev thiab cov tsiaj qus noj.

20 Auj, ua li cas nej thiaj ho hnov qab nej tus Vajtswv nyob hauv tib hnub kiag uas nws tau tso nej dim?

21 Tiam sis saib seb, twb yog ua kom muaj nyiaj nplua nuj, kom tib neeg qhuas, muaj tseeb tiag, thiab xwv kom nej yuav tau kub thiab nyiaj dawb. Thiab nej tau muab nej lub siab tso rau tej kev nplua nuj thiab tej yam tsis muaj nuj nqis ntawm lub ntiaj teb no, vim yog tej ntawd nej thiaj tua neeg, thiab tua txeeb tej khoom, thiab ua tub sab, thiab ua tim khawv tsis tseeb tawm tsam nej tus neeg zej zog, thiab ua txhua yam kev phem.

22 Thiab vim qhov no kev txom nyem yuav los rau nej tsuas yog nej yuav hloov siab lees txim xwb. Yog tias nej tsis kam hloov siab lees txim, saib seb, lub nroog loj no, thiab cov nroog loj uas nyob ib puag ncig, uas yog nyob hauv thaj av uas yog peb li, yuav raug tshem mus xwv kom nej yuav tsis muaj tug nyob hauv thaj av; vim saib seb, tus Tswv yuav tsis pub zog rau nej, ib yam li uas nws tau ua tas los lawm, kom tawm tsam nej cov yeeb ncuab.

23 Vim saib seb, tus Tswv tau hais li no: Kuv yuav tsis ua kuv lub zog rau cov neeg phem pom, rau ib tug ntau dua li lwm tus, tsuas yog rau cov uas hloov siab lees txim rau lawv tej kev txhaum, thiab mloog kuv tej lus. Nim no yog li ntawd, kuv cov kwv tij, kuv xav kom nej pom tias yuav zoo rau cov Neeg Lamas dua li rau nej tsuas yog nej yuav hloov siab lees txim xwb.

24 Vim saib seb, lawv tseem ncaj ncees dua nej, vim lawv tsis tau ua txhaum rau txoj kev txawj ntse loj uas nej tau txais ntawd; yog li ntawd tus Tswv yuav muaj kev hlub tshua rau lawv; muaj tseeb tiag, nws yuav ua kom lawv hnub nyoog ntev tuaj thiab ua kom lawv cov tub ki huaj vam, uas twb yog thaum nej yuav raug puas tsuaj huv tib si, tsuas yog nej yuav hloov siab lees txim xwb.

25 Muaj tseeb tiag, kev txom nyem yuav los rau nej vim yog txoj kev qias loj ntawd uas tau los rau hauv nej; thiab nej tau muab nej tus kheej sau ua ke nrog tej ntawd, muaj tseeb tiag, rau pab neeg ua hauj lwm ntsiag to uas Nkadi-atoos tau txhim tsa!

26 Muaj tseeb tiag, kev txom nyem yuav los rau nej vim yog txoj kev muab hlob ntawd uas nej tau cia los nkag rau hauv nej lub siab, uas tau tsa nej mus siab tshaj li qhov uas zoo vim yog nej tej kev nplua nuj heev!

27 Muaj tseeb tiag, kev txom nyem yuav los rau nej vim yog nej txoj kev phem thiab tej kev qias!

28 Thiab tsuas yog nej hloov siab lees txim xwb tsis li ntawd nej yuav piam sij; muaj tseeb tiag, nej thaj av los twb yuav raug muab tshem ntawm nej mus, thiab nej yuav raug puas tsuaj tawm ntawm lub ntiaj teb mus.

29 Saib seb nim no, kuv tsis yog hais los ntawm kuv tus kheej tias yuav muaj tej no, vim twb tsis yog los ntawm kuv tus kheej uas kuv paub tej yam no; tiam sis saib seb, kuv paub tias tej no yeej tseeb vim tus Tswv uas yog Vajtswv tau qhia rau kuv paub, yog li ntawd kuv ua tim khawv tias yuav muaj li ntawd.