1 Thiab tau muaj tias nyob hauv xyoo thib tsib caug plaub tau muaj kev ntxeev siab ntau nyob hauv lub koom txoos, thiab kuj muaj ib txoj kev sib cav sib ceg nyob hauv cov neeg, ua rau lawv muaj nqaij ntuag ntshav nrog ntau heev.

2 Thiab feem neeg uas ntxeev siab tau raug tua thiab raug raws tawm ntawm thaj av, thiab lawv tau mus cuag cov Neeg Lamas tus vaj ntxwv.

3 Thiab tau muaj tias lawv rau siab mus txhaub cov Neeg Lamas kom tuaj ua rog tawm tsam cov Neeg Nifais; tiam sis saib seb, cov Neeg Lamas ntshai heev, lawv thiaj tsis kam mloog cov neeg ntxeev siab ntawd tej lus.

4 Tiam sis tau muaj tias nyob hauv xyoo thib tsib caug rau ntawm cov neeg txiav txim txoj kev kav, tau muaj cov neeg ntxeev siab uas tawm ntawm cov Neeg Nifais mus rau pem cov Neeg Lamas; thiab lawv nrog rau lwm cov neeg ntxeev siab txhaub tau kom cov Neeg Lamas npau taws rau cov Neeg Nifais; thiab tag nrho xyoo ntawd lawv tau npaj tuaj ua rog.

5 Thiab nyob hauv xyoo thib tsib caug xya lawv tau tuaj ua rog tawm tsam cov Neeg Nifais, thiab lawv pib txoj hauj lwm ntawm kev tuag; muaj tseeb tiag, nyob hauv xyoo thib tsib caug yim ntawm cov neeg txiav txim txoj kev kav lawv thiaj muaj peev xwm txeeb tau thaj av Xalahelas; muaj tseeb tiag, thiab tag nrho tej av, twb mus txog rau tej av uas nyob ze thaj av Huaj Vam.

6 Thiab cov Neeg Nifais thiab Maulaunaihas cov tub rog raug raws mus rau hauv thaj av Huaj Vam.

7 Thiab nyob hauv thaj av Huaj Vam lawv ua ruaj khov tawm tsam cov Neeg Lamas, txij ntawm tus dej hiav txwv sab hnub poob, mus rau tus dej hiav txwv sab hnub tuaj; txoj kab uas lawv tau ua kom ruaj khov thiab tso lawv cov tub rog nyob tiv thaiv lawv lub teb chaws sab qaum teb yog deb li ib hnub ke rau ib tug neeg Nifais taug kev mus.

8 Thiab xws li no cov Neeg Nifais uas ntxeev siab ntawd, nrog rau txoj kev pab ntawm cov Neeg Lamas cov tub rog uas coob heev, lawv thiaj txeeb tau tag nrho cov Neeg Nifais tej av uas yog nyob sab qab teb. Thiab txhua yam no tau ua nyob hauv xyoo thib tsib caug yim thiab tsib caug cuaj ntawm cov neeg txiav txim txoj kev kav.

9 Thiab tau muaj tias nyob hauv xyoo thib rau caum ntawm cov neeg txiav txim txoj kev kav, Maulaunaihas thiab nws cov tub rog txeeb tau ntau feem ntawm thaj av; muaj tseeb tiag, lawv rov txeeb tau ntau lub nroog uas tau poob rau hauv cov Neeg Lamas txhais tes.

10 Thiab tau muaj tias nyob hauv xyoo thib rau caum ib ntawm cov neeg txiav txim txoj kev kav lawv rov txeeb tau ib nrab ntawm tag nrho lawv tej av.

11 Nim no txoj kev poob loj ntawm cov Neeg Nifais no, thiab lawv cov neeg coob leej uas raug tua, ntshe twb tsis tshwm sim yog tias txhob muaj lawv tej kev phem thiab kev qias nyob hauv lawv; muaj tseeb tiag, tej kev phem thiab kev qias uas kuj yog muaj nyob hauv cov uas hais tias lawv zwm rau Vajtswv lub koom txoos.

12 Thiab twb vim yog lawv lub siab muab hlob, vim yog lawv tej kev nplua nuj heev, muaj tseeb tiag, twb vim yog lawv txoj kev quab yuam cov neeg pluag, tsis kam muab lawv tej zaub mov rau cov neeg tshaib plab, tsis kam muab lawv tej ris tsho rau cov neeg liab qab, thiab ntaus lawv cov kwv tij uas txo hwj chim plhu, ua saib tsis taus tej uas dawb ceev, xyeej lub txiaj ntsim qhia tau tej yuav muaj los yav tom ntej thiab lub txiaj ntsim txais tau kev tshwm sim, vim lawv tua neeg, tua txeeb tej khoom, dag, ua tub sab, deev luag poj luag txiv, sawv los sib cav sib ceg, thiab khiav mus nyob nrog cov Neeg Lamas hauv thaj av Nifais—

13 Thiab vim yog lawv txoj kev phem loj no, thiab lawv txoj kev khav theeb txog lawv tus kheej lub zog, Vajtswv thiaj tso lawv tseg rau lawv tus kheej lub zog; yog li ntawd lawv thiaj tsis vam meej, tiam sis raug txom nyem thiab raug ntaus, thiab raug raws khiav ua ntej cov Neeg Lamas, txog rau thaum lawv poob yuav luag tas lawv tej av.

14 Tiam sis saib seb, Maulaunaihas tau tshaj tawm ntau yam rau cov neeg vim yog lawv txoj kev ua phem, thiab Nifais thiab Lihais, uas yog Hilamas ob tug tub, tau qhuab qhia ntau yam rau cov neeg, muaj tseeb tiag, thiab tau qhia tej yuav muaj los yav tom ntej ntau yam rau lawv ntsig txog lawv tej kev ua phem, thiab tej uas yuav los rau lawv yog tias lawv tsis hloov siab lees txim rau lawv tej kev txhaum.

15 Thiab tau muaj tias lawv tau hloov siab lees txim, thiab npaum li uas lawv tau hloov siab lees txim lawv pib vam meej tuaj.

16 Thaum Maulaunaihas pom tias lawv tau hloov siab lees txim nws rov kam coj lawv ntawm ib qho chaw mus rau ib qho chaw, thiab ntawm ib lub nroog mus rau ib lub nroog, twb txog rau thaum lawv rov txeeb tau ib nrab ntawm lawv tej ntiag tug thiab ib nrab ntawm tag nrho lawv tej av.

17 Thiab xyoo thib rau caum ib ntawm cov neeg txiav txim txoj kev kav tau xaus li no.

18 Thiab tau muaj tias nyob hauv xyoo thib rau caum ob ntawm cov neeg txiav txim txoj kev kav, Maulaunaihas tsis muaj cuab kav txeeb tau tej av ntawm cov Neeg Lamas ntxiv.

19 Yog li ntawd lawv thiaj tso tseg lawv lub tswv yim yuav txeeb lawv tej av uas tseem tshuav, vim cov Neeg Lamas muaj coob heev uas tsis muaj hnub cov Neeg Nifais yuav muaj hwj chim tshaj lawv; yog li ntawd Maulaunaihas tau siv tag nrho nws cov tub rog tswj tuav tej feem uas nws txeeb tau lawm.

20 Thiab tau muaj tias, cov Neeg Nifais ntshai heev vim yog cov Neeg Lamas muaj coob heev, ntshai tsam lawv swb, thiab raug tsuj, thiab raug tua, thiab raug puas tsuaj.

21 Muaj tseeb tiag, lawv pib nco txog Amas tej kev qhia tej yuav muaj los yav tom ntej, thiab Mauxiyas tej lus; thiab lawv pom tias lawv yog ib co neeg tawv ncauj, thiab pom tias lawv tau muab Vajtswv tej lus txib suav tsis muaj nqis kiag li.

22 Thiab pom tias lawv tau muab Mauxiyas tej kev cai hloov thiab tsuj rau hauv qab xib taws, los sis tej uas tus Tswv tau txib nws kom muab rau cov neeg; thiab lawv pom tias lawv tej kev cai raug muab hloov ua tsis ncaj, thiab pom tias lawv tau rais mus ua ib co neeg phem, ua rau lawv phem ib yam li cov Neeg Lamas.

23 Thiab vim yog lawv txoj kev ua phem lub koom txoos tau pib tsawg zuj zus; thiab lawv pib tsis ntseeg lub txiaj ntsim qhia tau tej yuav muaj los yav tom ntej thiab lub txiaj ntsim txais tau kev tshwm sim; thiab Vajtswv tej kev txiav txim ntsia lawv lub ntsej muag nruj nrees.

24 Thiab lawv pom tias lawv tau hloov los ua neeg qaug zog, ib yam li lawv cov kwv tij, cov Neeg Lamas, thiab pom tias tus Tswv tus Ntsuj Plig twb tsis tsom kwm lawv ntxiv lawm; muaj tseeb tiag, nws tau ncaim ntawm lawv mus vim tus Tswv tus Ntsuj Plig tsis nyob hauv tej tuam tsev uas tsis dawb huv—

25 Yog li ntawd tus Tswv tau tsum tsis tsom kwm lawv los ntawm nws lub hwj chim tseem ceeb thiab loj tshaj txhua yam, vim lawv tau poob mus rau hauv ib qho uas tsis ntseeg thiab phem heev kawg nkaus; thiab lawv pom tias cov Neeg Lamas muaj coob tshaj lawv, thiab tsuas yog lawv muab siab npuab tus Tswv lawv tus Vajtswv, tsis li ntawd lawv yeej yuav piam sij khiav tsis dim.

26 Vim saib seb, lawv pom tias cov Neeg Lamas lub zog yeej loj ib yam li lawv lub zog, tsis hais ib tug tub rog rau ib tug tub rog. Thiab yog li ntawd lawv tau poob rau hauv txoj kev ua txhaum loj no; muaj tseeb tiag, yog li ntawd lawv tau hloov los ua neeg qaug zog, vim yog lawv txoj kev txhaum, nyob hauv lub sij hawm uas twb tsis muaj ntau xyoo.