1 Thiab nim no, kuv cov kwv tij uas kuv hlub es, saib seb, kuv tshaj tawm rau nej tias yog nej tsis hloov siab lees txim xwb, ces nej tej vaj tse yuav raug tso tseg tsis muaj neeg nyob.

2 Muaj tseeb tiag, yog nej tsis hloov siab lees txim, ces nej cov poj niam yuav muaj kev txom nyem quaj ntsuag nyob rau lub sij hawm thaum lawv pub mis rau me nyuam mos noj; vim nej yuav sim khiav thiab yuav tsis muaj chaw rau nej nkaum; muaj tseeb tiag, thiab kev txom nyem yuav raug cov uas muaj me nyuam, vim lawv yuav xeeb me nyuam thiab khiav tsis taus; yog li ntawd, lawv yuav raug tsuj thiab raug tso tseg kom piam sij.

3 Muaj tseeb tiag, kev txom nyem yuav raug cov neeg no uas yog hu ua Nifais cov neeg tsuas yog lawv yuav hloov siab lees txim xwb, thaum lawv yuav pom tag nrho tej cim no thiab tej txuj ci uas xav tsis thoob uas yuav ua rau lawv pom; vim saib seb, lawv yog ib co neeg uas tus Tswv tau xaiv; muaj tseeb tiag, nws hlub Nifais cov neeg, thiab kuj qhuab ntuas lawv; muaj tseeb tiag, nyob hauv lub caij ntawm lawv tej kev ua phem nws qhuab ntuas lawv vim yog nws hlub lawv.

4 Tiam sis saib seb kuv cov kwv tij, nws ntxub cov Neeg Lamas vim tej uas lawv ua tsuas yog phem tsis tu ncua, thiab li no los twb vim yog txoj kev ua phem ntawm lawv cov yawg koob txoj kab lis kev cai. Tiam sis saib seb, kev cawm seej tau los rau lawv los ntawm cov Neeg Nifais txoj kev qhuab qhia; thiab vim li no tus Tswv thiaj tau ncua lawv txoj sia kom ntev.

5 Thiab kuv xav kom nej pom tias feem coob ntawm lawv yeej nyob rawv ntawm lawv txoj kev ua lawv tej dej num, thiab Vajtswv pom tias lawv yeej taug kev ceev faj, thiab lawv yeej mob siab ua raws li nws tej lus txib thiab nws tej kev cai thiab nws tej kev txiav txim raws li Mauxes txoj kev cai.

6 Muaj tseeb tiag, kuv hais rau nej tias, feem coob ntawm lawv tab tom ua li no, thiab lawv tab tom rau siab ntso yam tsis nkees kiag xwv kom lawv yuav coj tau lawv cov kwv tij uas tseem tshuav los paub txog qhov tseeb; yog li ntawd yeej muaj coob leej los ntxiv rau lawv txhua txhua hnub.

7 Thiab saib seb, nej yeej paub ntawm nej tus kheej, vim nej twb pom lawm tias, tag nrho cov uas lawv cov kwv tij ua rau lawv paub txog qhov tseeb, thiab paub txog qhov uas lawv cov yawg koob tej kab lis kev cai phem thiab txaus ntxub, thiab coj lawv los ntseeg tej vaj lug kub dawb huv, muaj tseeb tiag, cov yaj saub dawb huv tej lus qhia tej yuav muaj los yav tom ntej, uas tau muab sau tseg, uas coj lawv los rau txoj kev ntseeg tus Tswv thiab rau kev hloov siab lees txim, txoj kev ntseeg thiab kev hloov siab lees txim uas ua rau lawv hloov siab—

8 Yog li ntawd, tag nrho cov uas tau los rau qhov no, nej yeej paub ntawm nej tus kheej tias lawv yeej nyob ruaj nrees thiab khov kho coj raws li txoj kev ntseeg, thiab kev cawm seej uas tau ua rau lawv dim.

9 Thiab nej kuj paub tias lawv tau muab lawv cov cuab yeej ua rog faus, thiab lawv ntshai muab cov cuab yeej ua rog ntawd los siv tsam lawv ho ua txhaum; muaj tseeb tiag, nej yeej pom tau tias lawv ntshai ua txhaum—vim saib seb lawv yuav cia lawv tus kheej raug tsuj thiab raug tua los ntawm lawv cov yeeb ncuab, thiab yuav tsis kam tsa lawv tej ntaj tawm tsam lawv, thiab li no los vim yog lawv txoj kev ntseeg Khetos.

10 Thiab nim no, vim lawv nyob khov kho thaum lawv ntseeg qhov uas lawv ntseeg ntawd, rau qhov vim yog lawv txoj kev ruaj nrees thaum lawv pom kev lawm, saib seb, tus Tswv yuav foom koob hmoov rau lawv thiab ncua lawv lub neej kom ntev, txawm tias lawv muaj kev ua phem—

11 Muaj tseeb tiag, txawm tias lawv yuav tso txoj kev ntseeg tseg zuj zus los tus Tswv tseem yuav ncua lawv lub neej kom ntev, kom txog thaum lub caij nyoog uas peb cov yawg koob, thiab tus yaj saub Xenos, thiab ntau tus yaj saub ntxiv, tau hais lawm los txog tso, ntsig txog txoj kev txum tim peb cov kwv tij, uas yog cov Neeg Lamas, rov los paub qhov tseeb dua—

12 Muaj tseeb tiag, kuv hais rau nej tias, nyob hauv lub caij nyoog kawg yuav muab tus Tswv tej kev cog lus cev rau peb cov kwv tij, uas yog cov Neeg Lamas; thiab txawm tias lawv muaj kev txom nyem ntau, thiab txawm tias lawv yuav raug raws kom khiav mus rau ub rau no nyob rau hauv lub ntiaj teb, thiab raug plob tua, thiab yuav raug nplawm thiab ua kom tawg khiav ri niab mus rau qhov txhia chaw, thiab tsis muaj chaw nkaum, los tus Tswv tseem yuav hlub tshua txog lawv.

13 Thiab tej no yog raws li txoj kev qhia tej yuav muaj los yav tom ntej, hais tias yuav rov qab coj lawv los rau txoj kev paub tseeb, uas yog txoj kev paub txog lawv tus Txhiv Dim, thiab lawv tus tswv yug yaj tseeb thiab zoo, thiab nws yuav suav lawv nrog nws cov yaj.

14 Yog li ntawd kuv hais rau nej tias, yuav zoo rau lawv dua li rau nej tsuas yog nej yuav hloov siab lees txim xwb.

15 Vim saib seb, yog tau ua tej yam tseem ceeb rau lawv pom li uas tau ua rau nej pom, muaj tseeb tiag, rau lawv cov uas tau tso txoj kev ntseeg tseg zuj zus vim yog lawv cov yawg koob tej kab lis kev cai, nej yeej pom tau ntawm nej tus kheej tias ntshe lawv twb tsis muaj hnub yuav tso txoj kev ntseeg tseg zuj zus.

16 Yog li ntawd, tus Tswv hais tias: Kuv yuav tsis ua kom lawv puas tsuaj huv tib si mus, tiam sis nyob rau hnub uas kuv pom zoo kuv yuav ua kom lawv tig rov qab los cuag kuv dua, tus Tswv hais li.

17 Thiab nim no saib seb, tus Tswv hais txog cov Neeg Nifais li no: Yog lawv tsis kam hloov siab lees txim, thiab ua li kuv siab xav, kuv yuav ua kom lawv puas tsuaj huv tib si mus, tus Tswv hais tias, vim yog lawv txoj kev tsis ntseeg txawm tias muaj ntau yam tseem ceeb uas kuv tau ua nyob hauv lawv; thiab tseeb npaum li tus Tswv muaj txoj sia nyob tej no yeej yuav muaj tiag, tus Tswv hais li.