1 Thiab tau muaj tias thaum xyoo rau caum ob ntawm cov neeg txiav txim txoj kev kav tau xaus, txhua yam no tau tshwm sim thiab feem coob ntawm cov Neeg Lamas tau hloov los ua ib co neeg ncaj ncees, ua rau lawv txoj kev ncaj ncees ntau tshaj cov Neeg Nifais, vim yog lawv txoj kev ruaj nrees thiab lawv txoj kev nyob khov kho ntawm lawv txoj kev ntseeg.

2 Vim saib seb, muaj cov Neeg Nifais coob leej tau hloov los ua siab tawv thiab tsis kam hloov siab lees txim thiab phem heev kawg li, lawv thiaj xyeej Vajtswv txoj lus thiab tag nrho tej kev qhuab qhia thiab txoj kev qhia tej yuav muaj los yav tom ntej uas tau los rau hauv lawv.

3 Txawm li ntawd los, cov neeg ntawm lub koom txoos muaj kev xyiv fab heev vim yog cov Neeg Lamas txoj kev hloov siab los ntseeg, muaj tseeb tiag, vim yog Vajtswv lub koom txoos, uas tau txhim tsa nyob hauv lawv. Thiab lawv ib leeg ua phooj ywg rau ib leeg, thiab ib leeg zoo siab rau ib leeg, thiab muaj kev xyiv fab heev.

4 Thiab tau muaj tias cov Neeg Lamas coob leej tau los rau nram thaj av Xalahelas, thiab tshaj tawm rau cov Neeg Nifais txog lawv txoj kev hloov siab los ntseeg, thiab ntuas lawv kom lawv ntseeg thiab hloov siab lees txim.

5 Muaj tseeb tiag, thiab muaj coob leej tau qhuab qhia nrog hwj chim thiab txoj cai loj heev, ua rau lawv coob leej txo hwj chim kom kawg siab kawg ntsws, los ua cov neeg txo hwj chim uas coj raws li Vajtswv thiab tus Me Nyuam Yaj.

6 Thiab tau muaj tias cov Neeg Lamas coob leej tau mus rau pem thaj av sab qaum teb; thiab Nifais thiab Lihais los kuj mus rau pem thaj av sab qaum teb, mus qhuab qhia rau cov neeg. Thiab xyoo rau caum peb tau xaus li no.

7 Thiab saib seb, tau muaj kev thaj yeeb nyob tag nrho hauv thaj av, cov Neeg Nifais thiaj mus tau rau hauv feem av twg uas lawv xav mus, tsis hais nyob hauv cov Neeg Nifais los sis cov Neeg Lamas.

8 Thiab tau muaj tias cov Neeg Lamas los kuj mus tau rau qhov twg uas lawv xav mus, tsis hais nyob hauv cov Neeg Lamas los sis nyob hauv cov Neeg Nifais; thiab yog li ntawd lawv muaj kev mus los ywj siab ntawm ib leeg mus rau ib leeg, mus yuav khoom los sis muag khoom, thiab ua kom muaj nyiaj nplua nuj, raws li lawv siab xav.

9 Thiab tau muaj tias lawv los ua neeg nplua nuj heev, cov Neeg Lamas thiab cov Neeg Nifais; thiab lawv muaj kub, thiab nyiaj dawb nplua mias, thiab tag nrho txhua yam hlau muaj nuj nqis, nyob hauv thaj av sab qab teb thiab thaj av sab qaum teb.

10 Nim no thaj av sab qab teb yog muab hu ua Lihais, thiab thaj av sab qaum teb yog muab hu ua Mules, uas yog muab hu raws li Xedekiyas tus tub; vim tus Tswv tau coj Mules tuaj rau hauv thaj av sab qaum teb, thiab Lihais tuaj rau hauv thaj av sab qab teb.

11 Thiab saib seb, muaj tag nrho txhua yam kub nyob hauv ob thaj av no, thiab muaj nyiaj dawb, thiab muaj tej quav hlau muaj nqis txhua yam; thiab kuj muaj tej neeg uas txawj ua hlau, ua txhua yam quav hlau thiab ua tau cov hlau zoo; thiab yog li ntawd lawv tau los ua neeg nplua nuj.

12 Lawv cog noob qoob noob loos nplua mias, nyob rau sab qaum teb thiab nyob rau sab qab teb; thiab lawv vam meej heev kawg nkaus, nyob rau sab qaum teb thiab nyob rau sab qab teb. Thiab lawv huaj vam thiab muaj zog heev zuj zus tuaj nyob rau hauv thaj av. Thiab lawv yug ntau pab yaj thiab ntau pab tsiaj, muaj tseeb tiag, ntau tus tsiaj uas rog.

13 Saib seb lawv cov poj niam khwv thiab kiv xov, thiab ua tau txhua yam ntaub npuag thiab ntaub txhua yam, los hnav npog lawv tej kev liab qab. Thiab yog li ntawd xyoo rau caum plaub tau dhau mus nrog kev thaj yeeb.

14 Thiab nyob hauv xyoo rau caum tsib lawv kuj muaj kev xyiv fab thiab kev thaj yeeb, muaj tseeb tiag, muaj kev qhuab qhia ntau thiab ntau yam kev qhia tej yuav muaj los yav tom ntej txog tej uas yuav muaj los. Thiab xyoo rau caum tsib tau dhau mus li no.

15 Thiab tau muaj tias nyob hauv xyoo rau caum rau ntawm cov neeg txiav txim txoj kev kav, saib seb, Xixaulas raug tua los ntawm ib txhais tes uas tsis muaj neeg paub thaum nws zaum saum lub rooj txiav txim. Thiab tau muaj tias nyob hauv tib xyoos ntawd, nws tus tub, uas yog cov neeg tsa los pauv nws qhov chaw, kuj raug tua thiab. Thiab xyoo rau caum rau tau xaus li no.

16 Thiab nyob rau thaum pib ntawm xyoo rau caum xya cov neeg pib rov ua phem heev kawg nkaus.

17 Vim saib seb, tus Tswv tau foom koob hmoov rau lawv ntev heev nrog tej kev nplua nuj ntawm lub ntiaj teb es lawv twb tsis tau raug txhaub kom npau taws, kom mus ua rog, los sis kom muaj nqaij ntuag ntshav nrog; yog li ntawd lawv pib muab lawv lub siab tso rau lawv tej kev nplua nuj; muaj tseeb tiag, lawv pib nrhiav kev ua kom muaj nyiaj nplua nuj kom lawv yuav tau khav tias lawv ib leeg zoo tshaj ib leeg; yog li ntawd lawv pib tua neeg ntsiag to, thiab ua tub sab thiab tua txeeb tej khoom, xwv kom lawv yuav muaj nyiaj nplua nuj.

18 Thiab nim no saib seb, cov uas tua neeg thiab tua txeeb tej khoom ntawd twb yog ib pab uas Kisawkhumas thiab Nkadi-atoos tau tsim. Thiab nim no tau muaj tias muaj coob leej, twb nyob hauv cov Neeg Nifais, uas yog Nkadi-atoos pab. Tiam sis saib seb, lawv muaj coob dua nyob hauv feem uas phem zog ntawm cov Neeg Lamas. Thiab lawv hu ua Nkadi-atoos cov neeg tub sab thiab cov neeg tua neeg.

19 Thiab lawv twb yog cov tua tus thawj txiav txim Xixaulas, thiab nws tus tub, thaum tseem zaum saum lub rooj txiav txim; thiab saib seb, twb nrhiav tsis tau lawv.

20 Thiab nim no tau muaj tias thaum cov Neeg Lamas pom tias muaj cov tub sab nyob hauv lawv, lawv tu siab heev; thiab lawv siv txhua lub tswv yim ntawm lawv lub hwj chim los ua kom cov tub sab puas tsuaj tawm ntawm lub ntiaj teb mus.

21 Tiam sis saib seb, Dab Ntxwg Nyoog tau txhaub feem coob ntawm cov Neeg Nifais lub siab, ua rau lawv mus koom nrog tej pab tub sab ntawd, thiab ua lawv tej kev khi lus thiab lawv tej kev lav lus, hais tias lawv ib leeg yuav tsom kwm thiab saib xyuas ib leeg nyob hauv txhua xwm txheej nyuaj uas lawv yuav raug tso rau, xwv kom lawv yuav tsis raug txim rau lawv tej kev tua neeg, thiab lawv tej kev tua txeeb tej khoom, thiab lawv tej kev ua tub nyiag.

22 Thiab tau muaj tias lawv yeej muaj lawv tej cim, muaj tseeb tiag, lawv tej cim ntsiag to, thiab lawv tej lus ntsiag to; thiab ua li no kom lawv thiaj paub qhov txawv ntawm ib tug kwv tij uas tau ua kev khi lus, xwv kom txhua yam kev phem uas nws tus kwv tij yuav ua kom nws tsis txhob foob nws tus kwv tij, thiab cov uas tau zwm rau nws pab, cov uas tau ua kev khi lus no.

23 Thiab li no kom lawv yuav tua neeg, thiab tua txeeb tej khoom, thiab ua tub sab, thiab sib daj sib deev thiab tag nrho txhua yam kev phem, tsis raws li tej kev cai ntawm lawv lub teb chaws thiab tej kev cai ntawm lawv tus Vajtswv.

24 Thiab txhua tus ntawm cov uas tau zwm rau lawv pab qhia rau neeg ntiaj teb txog lawv tej kev phem thiab lawv tej kev qias, yuav raug coj los hais plaub, tsis yog raws li tej kev cai ntawm lawv lub teb chaws, tiam sis raws li tej kev cai ntawm lawv txoj kev phem, uas yog Nkadi-atoos thiab Kisawkhumas tau txhim tsa.

25 Nim no saib seb, twb yog tej kev lav lus thiab kev khi lus ntsiag to no uas Amas tau hais rau nws tus tub tias kom tsis txhob cia tawm mus rau neeg ntiaj teb, tsam tej ntawd yog tej uas coj tau cov neeg poob mus rau kev puas tsuaj.

26 Nim no saib seb, tej kev lav lus thiab kev khi lus ntsiag to ntawd twb tsis yog los rau Nkadi-atoos los ntawm tej ceev xwm txheej uas tau muab rau Hilamas; tiam sis saib seb, tau muab tej ntawd rau hauv Nkadi-atoos lub siab los ntawm tib tug uas tau ntxias peb thawj nkawm niam txiv kom noj cov txiv ntoo uas txwv tsis pub noj—

27 Muaj tseeb tiag, tib tug ntawd uas ntaus tswv yim nrog Kayees tias, yog nws tua nws tus kwv Anpees neeg ntiaj teb yuav tsis paub txog. Thiab nws tau ntaus tswv yim nrog Kayees thiab cov uas coj raws li nws txij lub sij hawm ntawd los.

28 Thiab twb yog tib tug ntawd uas tau muab tswv yim tso rau hauv cov neeg lub siab kom ua ib tug pej thuam siab txaus xwv kom lawv yuav nce mus txog rau saum ntuj ceeb tsheej. Thiab twb yog tib tug ntawd uas tau ntxias cov neeg uas tau tuaj ntawm tus pej thuam tuaj rau thaj av no; tus uas nthuav tawm tej hauj lwm ntawm kev tsaus ntuj thiab kev qias mus thoob plaws rau hauv thaj av, txog rau thaum nws cab tau cov neeg mus rau ib txoj kev puas tsuaj tag nrho, thiab nqis mus rau ib lub ntuj txiag teb tsaus uas kav ib txhis.

29 Muaj tseeb tiag, twb yog tib tug ntawd uas tau muab tswv yim tso rau hauv Nkadi-atoos lub siab kom kav tsij ua txoj hauj lwm ntawm kev tsaus ntuj, thiab kev tua neeg ntsiag to; thiab nws tau ua rau tej ntawd tawm los txij puag thaum neeg chiv keeb los txog rau lub sij hawm no.

30 Thiab saib seb, twb yog tus uas yog tus tswv ntawm tag nrho tej kev txhaum. Thiab saib seb, nws tseem ua nws txoj hauj lwm ntawm kev tsaus ntuj thiab kev tua neeg ntsiag to, thiab muab lawv tej tswv yim, thiab lawv tej kev lav lus, thiab lawv tej kev khi lus, thiab lawv tej tom txwv ntawm kev phem heev, cev ntawm ib tiam neeg mus rau ib tiam raws li nws muaj peev xwm tuav tau noob neej lub siab.

31 Thiab nim no saib seb, nws tuav tau cov Neeg Nifais lub siab ruaj heev; muaj tseeb tiag, ua rau lawv hloov los ua ib co neeg phem heev kawg nkaus li; muaj tseeb tiag, feem coob ntawm lawv tau tig mus deb ntawm kev ncaj ncees, thiab tau muab Vajtswv tej lus txib tsuj rau hauv lawv qab xib taws, thiab tau tig mus rau lawv tus kheej tej kev, thiab xuas lawv tej kub thiab lawv tej nyiaj dawb los nchuav ua mlom rau lawv tus kheej.

32 Thiab tau muaj tias txhua yam kev ua phem no tau los rau lawv nyob hauv ib ntus uas twb tsis muaj ntau xyoo, ib feem ntau ntawd thiaj tau los rau lawv nyob hauv xyoo rau caum xya ntawm cov neeg txiav txim txoj kev kav Nifais cov neeg.

33 Thiab nyob hauv xyoo rau caum yim los lawv tej kev ua phem loj tuaj thiab, ua rau cov neeg ncaj ncees muaj kev tu siab thiab kev nyiav loj.

34 Thiab yog li ntawd peb pom tias cov Neeg Nifais pib tso txoj kev ntseeg tseg zuj zus, thiab ua kev phem thiab kev qias ntau zog, tiam sis cov Neeg Lamas pib paub ntau txog lawv tus Vajtswv; muaj tseeb tiag, lawv pib ua raws li nws tej kev cai thiab tej lus txib, thiab taug kev raws li kev tseeb thiab kev ncaj rau ntawm nws.

35 Thiab yog li ntawd peb pom tias tus Tswv tus Ntsuj Plig pib thim ntawm cov Neeg Nifais mus, vim yog txoj kev phem thiab txoj kev tawv ntawm lawv lub siab.

36 Thiab yog li ntawd peb pom tias tus Tswv pib pub nws tus Ntsuj Plig nplua mias rau cov Neeg Lamas, vim lawv txoj kev yooj yim thiab txaus siab los ntseeg nws tej lus.

37 Thiab tau muaj tias cov Neeg Lamas plob nrhiav Nkadi-atoos pab neeg tub sab; thiab lawv tshaj tawm Vajtswv txoj lus rau feem uas phem zog ntawm lawv, ua rau pab neeg tub sab no raug puas tsuaj huv tib si tawm ntawm cov Neeg Lamas mus.

38 Thiab tau muaj tias nyob rau lwm sab, cov Neeg Nifais txhawb lawv thiab pab lawv, uas yog pib nyob hauv feem uas phem zog ntawm lawv, txog rau thaum pab neeg tub sab ri mus thoob plaws rau cov Neeg Nifais thaj av, thiab ntxias tau feem coob ntawm cov neeg ncaj ncees txog rau thaum lawv los ntseeg tej uas Nkadi-atoos pab neeg tub sab ua thiab nrog lawv faib tej khoom uas lawv txeeb tau, thiab los koom nrog lawv nyob hauv lawv tej kev tua neeg ntsiag to thiab tej kev tuav hauv.

39 Thiab Nkadi-atoos pab neeg tub sab txeeb tau lub hauv paus coj tuav ntawm lub tsoom fwv li no, ua rau cov neeg pluag thiab cov neeg siab mos siab muag, thiab cov neeg txo hwj chim uas coj raws li Vajtswv raug lawv muab tsuj rau hauv qab xib taws thiab muab ntaus thiab ua saib tsis taus thiab tsis quav ntsej txog.

40 Thiab yog li ntawd peb pom tias lawv nyob hauv kev phem, thiab tab tom siav rau ib txoj kev puas tsuaj uas kav ib txhis.

41 Thiab tau muaj tias xyoo rau caum yim ntawm cov neeg txiav txim txoj kev kav Nifais cov neeg tau xaus li no.