1 Thiab nim no tau muaj tias nyob hauv xyoo xya caum ob ntawm cov neeg txiav txim txoj kev kav tej kev sib cav sib ceg muaj ntau tuaj, thiaj li muaj kev ua rog thoob plaws hauv thaj av nyob hauv tag nrho Nifais cov neeg.

2 Thiab twb yog pab neeg tub sab ntsiag to no uas coj txoj hauj lwm ntawm kev puas tsuaj thiab kev phem no. Thiab npluav rog no muaj nyob tag nrho xyoo ntawd; thiab kuj muaj nyob hauv tag nrho xyoo xya caum peb.

3 Thiab tau muaj tias nyob hauv xyoo no Nifais thov tus Tswv hais tias:

4 Auj tus Tswv es, tsis txhob cia cov neeg no raug puas tsuaj los ntawm rab ntaj; tiam sis auj tus Tswv es, cia kom muaj ib txoj kev tshaib nqhis nyob hauv thaj av, kom txhaub lawv rau txoj kev nco txog tus Tswv lawv tus Vajtswv, thiab tej zaum lawv yuav hloov siab lees txim thiab tig rov los cuag koj.

5 Thiab tau muaj raws li Nifais tej lus. Thiab tau muaj ib txoj kev tshaib nqhis loj heev nyob hauv thaj av, nyob hauv tag nrho Nifais cov neeg. Thiab nyob hauv xyoo xya caum plaub txoj kev tshaib nqhis kuj muaj ntxiv zoo li no, thiab txoj hauj lwm ntawm kev puas tsuaj uas yog los ntawm rab ntaj tau tsum tiam sis kev tshaib nqhis tau ua rau txoj hauj lwm ntawd mob heev.

6 Thiab txoj hauj lwm ntawm kev puas tsuaj no kuj muaj ntxiv nyob hauv xyoo xya caum tsib. Vim lub ntiaj teb raug foom ua rau cov av qhuav qhawv, thiab tsis muaj qoob loo nyob hauv lub caij sau qoob loos; thiab tag nrho lub ntiaj teb raug foom, uas twb yog nyob hauv cov Neeg Lamas tib yam li nyob hauv cov Neeg Nifais, lawv raug foom li ntawd ua rau txhiab txhiab leej nyob hauv tej feem uas phem zog ntawm thaj av tau piam sij.

7 Thiab tau muaj tias cov neeg pom tias lawv twb yuav piam sij los ntawm kev tshaib nqhis, thiab lawv pib nco qab txog tus Tswv lawv tus Vajtswv; thiab lawv pib nco qab txog Nifais tej lus.

8 Thiab cov neeg pib thov lawv cov thawj txiav txim thiab lawv cov thawj coj, kom lawv hais rau Nifais tias: Saib seb, peb paub tias koj yog ib tug neeg ntawm Vajtswv, thiab yog li ntawd cia li thov tus Tswv peb tus Vajtswv kom nws tig txoj kev tshaib nqhis no ntawm peb mus, ntshai tsam yuav muaj raws li tag nrho tej lus uas koj tau hais txog peb txoj kev puas tsuaj.

9 Thiab tau muaj tias cov neeg txiav txim hais rau Nifais, raws li tej lus uas cov neeg xav kom hais. Thiab tau muaj tias thaum Nifais pom tias cov neeg tau hloov siab lees txim thiab txo hwj chim hnav ntaub tsaj, nws rov thov tus Tswv dua, hais tias:

10 Auj tus Tswv es, saib seb cov neeg no tau hloov siab lees txim; thiab lawv tau tshoob Nkadi-atoos pab neeg tawm hauv lawv mus lawm twb ua rau lawv tu noob, thiab lawv tau muab lawv tej tswv yim ntsiag to npog rau hauv av.

11 Nim no, auj tus Tswv es, vim yog lawv txoj kev txo hwj chim no koj puas kam tshem koj txoj kev npau taws mus, thiab cia kom txoj kev puas tsuaj ntawm cov neeg phem uas koj twb tau ua rau puas tsuaj tas lawm txaus rau koj txoj kev npau taws.

12 Auj tus Tswv es, koj puas kam tshem koj txoj kev npau taws mus, muaj tseeb tiag, koj txoj kev npau taws heev, thiab ua kom txoj kev tshaib nqhis no tsum nyob rau hauv thaj av no.

13 Auj tus Tswv es, koj puas kam mloog kuv, thiab ua kom yuav muaj raws li kuv tej lus, thiab tso nag los rau saum lub ntiaj teb, xwv kom nws yuav txi taus nws tej txiv, thiab nws tej noob qoob loo txi rau lub caij sau qoob loo.

14 Auj tus Tswv es, koj twb mloog kuv tej lus thaum kuv hais tias, Cia kom muaj ib txoj kev tshaib nqhis, xwv kom txoj kev ploj tuag los ntawm rab ntaj tsum; thiab kuv paub tias koj yeej kam mloog kuv tej lus, nyob rau lub sij hawm no, vim koj tau hais tias: Yog cov neeg no hloov siab lees txim kuv yuav tseg lawv txoj sia.

15 Muaj tseeb tiag, auj tus Tswv es, thiab koj pom tias lawv twb hloov siab lees txim lawm, vim yog txoj kev tshaib nqhis thiab tej kab mob phem thiab txoj kev puas tsuaj uas tau los rau lawv.

16 Thiab nim no, auj tus Tswv es, koj puas kam tshem koj txoj kev npau taws mus, thiab sim dua saib lawv puas teev tiam koj? Thiab yog muaj li ntawd, auj tus Tswv es, koj mam foom koob hmoov rau lawv raws li koj tej lus uas koj tau hais lawm.

17 Thiab tau muaj tias nyob hauv xyoo xya caum rau tus Tswv thiaj tshem nws txoj kev npau taws ntawm cov neeg mus, thiab ua rau nag los rau lub ntiaj teb, ua rau nws txi tau txiv nyob rau lub caij uas nws txi txiv. Thiab tau muaj tias nws txi tau noob qoob loo nyob rau lub caij uas sau qoob loo.

18 Thiab saib seb, cov neeg zoo siab thiab qhuas Vajtswv, thiab tag nrho hauv thaj av muaj kev zoo siab puv nkaus; thiab lawv tsis nrhiav kev ua kom Nifais puas tsuaj ntxiv lawm, tiam sis lawv muab nws saib yam li ib tug yaj saub uas muaj hwj chim, thiab ib tug neeg ntawm Vajtswv, uas Vajtswv tau muab hwj chim thiab txoj cai loj rau nws.

19 Thiab saib seb, Lihais, nws tus kwv, los kuj tsis poob nws qab luaj twg hais txog ntawm kev ncaj ncees.

20 Thiab yog li ntawd tau muaj tias Nifais cov neeg tau pib vam meej dua nyob hauv thaj av, thiab pib txhim kho lawv tej chaw uas piam lawm, thiab pib huaj vam thiab ri mus, txog rau thaum lawv mus nyob thoob plaws rau hauv thaj av, nyob rau sab qaum teb thiab nyob rau sab qab teb, txij li tus dej hiav txwv sab hnub poob mus rau tus dej hiav txwv sab hnub tuaj.

21 Thiab tau muaj tias xyoo xya caum rau tau xaus muaj kev thaj yeeb. Thiab muaj kev thaj yeeb thaum xyoo xya caum xya pib; thiab lub koom txoos ri mus thoob plaws hauv tag nrho thaj av; thiab feem coob ntawm cov neeg, tsis hais cov Neeg Nifais thiab cov Neeg Lamas, puav leej yog mej zeej nyob hauv lub koom txoos; thiab lawv muaj kev thaj yeeb heev nyob hauv thaj av; thiab xyoo xya caum xya tau xaus li no.

22 Thiab lawv kuj muaj kev thaj yeeb nyob hauv xyoo xya caum yim, tsuas yog muaj qhov me ntsis kev sib cav sib ceg txog tej yam ntawm txoj lus qhuab qhia uas cov yaj saub tau muab los.

23 Thiab nyob hauv xyoo xya caum cuaj pib muaj kev sib ceg ntau. Tiam sis tau muaj tias Nifais thiab Lihais, thiab coob leej ntawm nkawd cov kwv tij uas paub txog tej ntsiab cai tseeb ntawm txoj lus qhuab qhia, vim lawv tau txais kev tshwm sim ntau txhua hnub, yog li ntawd lawv tau qhuab qhia rau cov neeg, lawv thiaj ua rau txoj kev sib cav sib ceg nyob rau tib xyoos ntawd tsum.

24 Thiab tau muaj tias nyob hauv xyoo yim caum ntawm cov neeg txiav txim txoj kev kav cov neeg Nifais, muaj ib co neeg ntxeev siab ntawm cov Neeg Nifais, uas ob peb xyoos ua ntej ntawd tau khiav mus rau tom cov Neeg Lamas, thiab muab lawv tus kheej hu ua cov Neeg Lamas, thiab kuj muaj ib co neeg uas yog cov Neeg Lamas tej xeeb leej xeeb ntxwv, vim cov neeg ntxeev siab ntawd tau txhaub kom lawv npau taws, yog li ntawd lawv thiaj pib muaj ib npluav rog nrog lawv cov kwv tij.

25 Thiab lawv tua neeg thiab tua txeeb tej khoom; thiab tom qab ntawd lawv ho thim rov qab mus rau pem roob, thiab mus rau hauv tej hav zoov thiab tej chaw tsis muaj neeg paub, mus nkaum lawv tus kheej xwv kom txhob muaj neeg nrhiav tau, thiab niaj hnub muaj neeg mus ntxiv rau lawv, rau qhov muaj cov neeg ntxeev siab mus rau lawv.

26 Thiab yog li ntawd tsis ntev, muaj tseeb tiag, twb tsis muaj ntau xyoo, lawv hloov los ua ib pab tub sab loj heev kawg nkaus li; thiab lawv tshawb nrhiav tag nrho Nkadi-atoos tej tswv yim ntsiag to; thiab li no lawv tau hloov los ua cov neeg tub sab Nkadi-atoos.

27 Nim no saib seb, cov neeg tub sab no tau ua kev kub ntxhov ntau heev, muaj tseeb tiag, twb yog kev puas tsuaj loj heev nyob hauv Nifais cov neeg, thiab kuj yog nyob hauv cov Neeg Lamas thiab.

28 Thiab tau muaj tias yeej tsim nyog kom muab txoj hauj lwm puas tsuaj no tsum; yog li ntawd lawv thiaj xa ib pab tub rog uas yog neeg muaj zog mus rau hauv hav zoov thiab mus pem roob mus tshawb nrhiav pab tub sab no, thiab mus ua kom lawv puas tsuaj mus.

29 Tiam sis saib seb, tau muaj tias nyob rau tib xyoos ntawd lawv raug raws rov qab los rau hauv lawv thaj av. Thiab xyoo yim caum ntawm cov neeg txiav txim txoj kev kav Nifais cov neeg tau xaus li no.

30 Thiab tau muaj tias nyob rau thaum pib ntawm xyoo yim caum ib lawv tau rov qab mus tawm tsam pab tub sab no dua, thiab ua rau coob leej puas tsuaj; thiab lawv los kuj tau kev puas tsuaj ntau thiab.

31 Thiab lawv rov qab raug yuam tawm ntawm hav zoov thiab ntawm cov roob rov los rau lawv thaj av, vim yog cov tub sab ntawd muaj coob heev, uas nyob pem roob thiab nyob hauv hav zoov.

32 Thiab tau muaj tias xyoo no tau xaus li no. Thiab cov tub sab tseem muaj coob ntxiv thiab muaj zog zuj zus tuaj, ua rau lawv txheem tau tag nrho cov Neeg Nifais cov tub rog, thiab cov Neeg Lamas li thiab; thiab lawv ua rau cov neeg nyob hauv tag nrho thaj av ntshai heev.

33 Muaj tseeb tiag, vim lawv tau mus xyuas ntau feem ntawm thaj av, thiab tau ua kev puas tsuaj loj rau lawv; muaj tseeb tiag, tau tua coob leej, thiab tau cab lwm cov mus ua qhev rau hauv hav zoov, muaj tseeb tiag, thiab feem coob yog lawv cov poj niam thiab lawv cov me nyuam.

34 Nim no txoj kev phem loj no, uas tau los rau cov neeg twb vim yog lawv txoj kev ua phem, rov txhaub lawv dua kom nco txog tus Tswv lawv tus Vajtswv.

35 Thiab xyoo yim caum ib ntawm cov neeg txiav txim txoj kev kav tau xaus li no.

36 Thiab nyob hauv xyoo yim caum ob lawv rov pib hnov qab txog tus Tswv lawv tus Vajtswv. Thiab nyob hauv xyoo yim caum peb lawv pib muaj zog zuj zus ntawm kev ua phem ntxiv. Thiab nyob hauv xyoo yim caum plaub lawv tseem tsis tau kho lawv tej kev.

37 Thiab tau muaj tias nyob hauv xyoo yim caum tsib lawv muaj zog zuj zus tuaj ntawm lawv txoj kev muab hlob, thiab ntawm lawv txoj kev phem; thiab yog li ntawd lawv tab tom siav dua rau txoj kev puas tsuaj.

38 Thiab xyoo yim caum tsib tau xaus zoo li no.