1 Thiab nim no tau muaj tias nyob hauv xyoo yim caum rau, cov Neeg Nifais tseem tau ua kev phem, muaj tseeb tiag, ua kev phem heev, hos cov Neeg Lamas tau coj ua raws li Vajtswv tej lus txib nruj heev, raws li Mauxes txoj kev cai.

2 Thiab tau muaj tias nyob hauv xyoo no tau muaj ib tug hu ua Xamuyees, uas yog Neeg Lamas, tuaj rau hauv thaj av Xalahelas, thiab pib qhuab qhia rau cov neeg. Thiab tau muaj tias nws tshaj tawm, tau ntau hnub, txog kev hloov siab lees txim rau cov neeg, thiab lawv muab nws ntiab tawm, thiab nws twb yuav luag rov mus rau nws thaj av.

3 Tiam sis saib seb, tus Tswv lub suab los rau nws, kom nws rov qab mus, thiab qhia tej yuav muaj los yav tom ntej txog txhua yam uas yuav los rau hauv nws lub siab rau cov neeg.

4 Thiab tau muaj tias lawv tsis kam cia nws nkag mus rau hauv lub nroog; yog li ntawd nws thiaj tau mus thiab nce rau saum cov ntsa loog, thiab xyab nws txhais tes thiab tshaj nrog ib lub suab nrov nrov, thiab qhia tej yuav muaj los yav tom ntej txog txhua yam uas tus Tswv muab tso rau hauv nws lub siab rau cov neeg.

5 Thiab nws hais rau lawv tias: Saib seb, kuv, Xamuyees, uas yog ib tug Neeg Lamas, hais tus Tswv tej lus uas nws muab tso rau hauv kuv lub siab; thiab saib seb nws tau muab tso rau hauv kuv lub siab kom hais rau cov neeg no tias rab ntaj ntawm kev txim lij twb dai rawv ntawm cov neeg no sab saud; thiab tsis dhau plaub puas xyoo rab ntaj ntawm kev txim lij yuav hlais cov neeg no.

6 Muaj tseeb tiag, kev puas tsuaj uas hnyav heev twb tos ntsoov cov neeg no, thiab yuav los rau cov neeg no tseeb tseeb, thiab twb tsis muaj ib yam dab tsi uas yuav cawm tau cov neeg no dim tsuas yog kev hloov siab lees txim thiab kev ntseeg tus Tswv Yexus Khetos xwb, tus uas yuav los rau hauv lub ntiaj teb tiag tiag, thiab yuav tau tiv ntau yam thiab raug tua rau nws cov neeg.

7 Thiab saib seb, tus Tswv ib tug tim tswv tau tshaj tawm rau kuv, thiab nws tau coj tej moo zoo siab los rau kuv tus ntsuj plig. Thiab saib seb, tus Tswv tau xa kuv tuaj tshaj tawm rau nej, xwv kom nej yuav muaj tej moo zoo siab; tiam sis saib seb nej twb tsis kam txais kuv.

8 Yog li ntawd, tus Tswv hais li no: Vim yog cov Neeg Nifais txoj kev siab tawv, tsuas yog lawv hloov siab lees txim xwb tsis li ntawd kuv yuav tshem kuv txoj lus ntawm lawv mus, thiab kuv yuav thim kuv tus Ntsuj Plig ntawm lawv mus, thiab kuv yuav tsis ua siab ntev rau lawv ntxiv lawm, thiab kuv yuav tig lawv cov kwv tij lub siab tawm tsam lawv.

9 Thiab yuav tsis dhau plaub puas xyoo ua ntej kuv yuav ua kom lawv raug nplawm; muaj tseeb tiag, kuv yuav los xyuas lawv nrog rab ntaj thiab kev tshaib nqhis thiab tej kab mob phem.

10 Muaj tseeb tiag, kuv yuav los xyuas lawv nrog kuv txoj kev npau taws heev, thiab yuav muaj ib txhia ntawm tiam neeg thib plaub ntawm nej cov yeeb ncuab uas tseem muaj sia nyob pom nej txoj kev puas tsuaj huv tib si; thiab qhov no yeej yuav muaj los tiag yog nej tsis hloov siab lees txim xwb, tus Tswv hais li; thiab cov neeg ntawm tiam neeg thib plaub yuav tuaj xyuas kom nej raug puas tsuaj.

11 Tiam sis yog nej yuav hloov siab lees txim thiab tig rov mus cuag tus Tswv nej tus Vajtswv kuv yuav tshem kuv txoj kev npau taws mus, tus Tswv hais li; muaj tseeb tiag, tus Tswv hais li no tias, cov uas yuav hloov siab lees txim thiab tig los cuag kuv tau koob hmoov, tiam sis kev txom nyem yuav raug tus uas tsis kam hloov siab lees txim.

12 Muaj tseeb tiag, kev txom nyem yuav raug lub nroog Xalahelas loj no; vim saib seb, twb yog vim cov neeg ncaj ncees es thiaj li cia lub nroog no dim; muaj tseeb tiag, kev txom nyem yuav raug lub nroog loj no, tus Tswv hais tias, vim kuv pom tias, muaj coob leej, muaj tseeb tiag, uas twb yog feem coob ntawm lub nroog loj no, uas yuav ua lawv lub siab tawv qhawv rau kuv, tus Tswv hais li.

13 Tiam sis cov uas yuav hloov siab lees txim tau koob hmoov, vim kuv yuav tseg lawv. Tiam sis saib seb, yog tias tsis yog rau cov neeg ncaj ncees uas nyob hauv lub nroog loj no, saib seb, ntshai kuv twb ua kom hluav taws nqis tawm saum ntuj los thiab ua rau lub nroog puas tsuaj lawm.

14 Tiam sis saib seb, twb yog vim cov neeg ncaj ncees es thiaj li tseg lub nroog no. Tiam sis saib seb, lub sij hawm yuav los, tus Tswv hais tias, thaum nej ntiab cov neeg ncaj ncees tawm hauv nej mus, thaum ntawd nej twb siav rau txoj kev puas tsuaj; muaj tseeb tiag, kev txom nyem yuav raug lub nroog loj no, vim yog txoj kev phem thiab tej kev qias uas nyob haud.

15 Muaj tseeb tiag, thiab kev txom nyem yuav raug lub nroog Nkide-oos, vim txoj kev phem thiab tej kev qias uas nyob haud.

16 Muaj tseeb tiag, thiab kev txom nyem yuav raug tag nrho tej nroog uas nyob hauv thaj av ib puag ncig, uas cov Neeg Nifais nyob, vim yog txoj kev phem thiab tej kev qias uas nyob hauv tej nroog ntawd.

17 Thiab saib seb, ib txoj kev foom tsis zoo yuav los rau hauv thaj av, Ib Tsoom Tub Rog tus Tswv hais li, vim yog rau cov neeg uas nyob hauv thaj av, muaj tseeb tiag, vim yog lawv tej kev phem thiab lawv tej kev qias.

18 Thiab yuav muaj li, muaj tseeb tiag, Ib Tsoom Tub Rog tus Tswv, peb tus Vajtswv tseeb thiab muaj hwj chim hais tias, leej twg uas muab tej nyiaj txiag zais rau hauv av yuav rov nrhiav tsis tau tej ntawd ntxiv li lawm, vim yog txoj kev foom tsis zoo heev ntawm thaj av, tsuas yog tias nws yog ib tug neeg ncaj ncees thiab yuav muab tej nyiaj txiag ntawd zais rau tus Tswv xwb.

19 Tus Tswv hais tias, vim kuv xav kom lawv yuav muab lawv tej nyiaj txiag zais cia rau kuv; thiab cov uas tsis muab lawv tej nyiaj txiag zais cia rau kuv raug foom tsis zoo; vim twb tsis muaj leej twg yuav muab lawv tej nyiaj txiag zais cia rau kuv tsuas yog cov neeg ncaj ncees xwb; thiab tus uas tsis kam muab nws tej nyiaj txiag zais cia rau kuv, nws yog tus raug foom tsis zoo, thiab cov nyiaj txiag los tib yam nkaus, thiab yuav tsis muaj leej twg txhiv tau cov nyiaj txiag ntawd vim yog txoj kev foom tsis zoo ntawm thaj av.

20 Thiab hnub ntawd yuav los uas lawv yuav muab lawv tej nyiaj txiag zais, vim lawv tau muab lawv lub siab tso rau tej kev nplua nuj; thiab vim lawv tau muab lawv lub siab tso rau lawv tej kev nplua nuj, thiab yuav muab lawv tej nyiaj txiag zais thaum lawv khiav ntawm lawv cov yeeb ncuab mus; vim lawv tsis muab tej ntawd zais cia rau kuv, lawv yuav raug foom tsis zoo thiab lawv tej nyiaj txiag los tib yam; thiab tus Tswv hais tias, nyob rau hnub ntawd lawv yuav raug nplawm.

21 Nej saib seb, cov neeg ntawm lub nroog loj no, thiab cia li mloog kuv cov lus; muaj tseeb tiag, cia li mloog tej lus uas tus Tswv hais; vim saib seb, nws hais tias nej raug foom tsis zoo vim yog nej tej kev nplua nuj, thiab nej tej nyiaj txiag los kuj raug foom tsis zoo vim nej tau muab nej lub siab tso rau tej ntawd, thiab twb tsis mloog tej lus ntawm tus uas muab tej nyiaj txiag ntawd rau nej.

22 Nej twb tsis nco qab txog tus Tswv nej tus Vajtswv hais txog tej uas nws tau foom koob hmoov rau nej, tiam sis nej nco qab ntsoov nej tej kev nplua nuj, tsis ua tus Tswv nej tus Vajtswv tsaug rau tej ntawd; muaj tseeb tiag, nej twb tsis muab nej lub siab npuab tus Tswv, tiam sis nej lub siab tsuas tsau npo rau txoj kev muab hlob, rau txoj kev khav theeb, thiab rau txoj kev siab ceev, kev ntshaw luag tug, kev sib cav sib ceg, kev xav ua kom lwm tus puas tsuaj, kev tsim txom, thiab kev tua neeg, thiab txhua yam kev phem.

23 Vim qhov no tus Tswv uas yog Vajtswv thiaj ua kom muaj ib txoj kev foom tsis zoo los rau hauv thaj av, thiab los rau nej tej kev nplua nuj, thiab li no los vim yog nej tej kev ua phem.

24 Muaj tseeb tiag, kev txom nyem yuav raug cov neeg no, vim yog lub sij hawm no uas tau los txog lawm, uas nej tau ntiab cov yaj saub tawm, thiab thuam lawv, thiab txawb pob zeb rau lawv, thiab muab lawv tua, thiab ua txhua yam kev phem rau lawv, ua li lawv ua puag thaum ub.

25 Thiab nim no thaum nej hais lus, nej hais tias: Yog peb nyob rau txheej puag thaum peb cov yawg koob nyob, peb yuav tsis muab cov yaj saub tua; peb yuav tsis xuas pob zeb ntaus lawv, thiab ntiab lawv tawm.

26 Saib seb nej tseem phem tshaj lawv; vim tib yam li tus Tswv muaj txoj sia nyob, yog muaj ib tug yaj saub tuaj rau hauv nej thiab tshaj tawm tus Tswv txoj lus rau nej, uas ua tim khawv txog nej tej kev txhaum thiab tej kev ua phem, ces nej npau taws rau nws, thiab ntiab nws tawm thiab nrhiav txhua txoj kev los ua kom nws puas tsuaj; muaj tseeb tiag, nej yuav hais tias nws yog ib tug yaj saub cuav, thiab hais tias nws yog ib tug neeg ua txhaum, thiab yog tus dab phem li, vim nws ua tim khawv tias nej tej hauj lwm phem.

27 Tiam sis saib seb, yog muaj ib tug neeg tuaj rau hauv nej thiab hais tias: Ua qhov no, thiab twb tsis ua phem; ua qhov ntawd thiab nej yuav tsis raug dab tsi; muaj tseeb tiag, nws yuav hais tias: Taug kev raws li nej lub siab muab hlob; muaj tseeb tiag, taug kev raws li nej qhov muag muab hlob, thiab ua txhua yam raws li nej lub siab xav ua—thiab yog muaj ib tug neeg tuaj rau hauv nej thiab hais li no, nej yuav txais tos nws, thiab hais tias nws yog ib tug yaj saub.

28 Muaj tseeb tiag, nej yuav txhawb nqa nws, thiab nej yuav muab nej tej khoom rau nws; nej yuav muab nej tej kub thiab tej nyiaj dawb rau nws, thiab nej yuav muab tej ris tsho kim kim rau nws hnav; thiab vim yog nws hais tej lus dag ntxias rau nej, thiab nws hais tias txhua yam tsuas muaj zoo xwb, yog li ntawd nej thiaj tsis pom tias nws muaj txhaum.

29 Auj niag tiam neeg uas phem thiab tsis yuav lus es; nej cov niag neeg siab tawv thiab tawv ncauj, nej xav tias tus Tswv tseem yuav ua siab ntev rau nej ntev npaum li cas? Muaj tseeb tiag, nej tseem yuav cia cov neeg coj kev uas ruam thiab dig muag coj nej ntev npaum li cas? Muaj tseeb tiag, nej tseem yuav xum xaiv kev tsaus ntuj dua kev kaj ntev npaum li cas?

30 Muaj tseeb tiag, saib seb, tus Tswv txoj kev npau taws twb npau tawm tsam nej lawm; saib seb, nws twb foom tsis zoo rau thaj av vim yog nej txoj kev ua phem.

31 Thiab saib seb, lub sij hawm yuav los uas nws yuav foom tsis zoo rau nej tej kev nplua nuj, xwv kom yuav hloov los nplua npleev, xwv kom nej yuav tsis muaj peev xwm tuav tau tej ntawd; thiab nyob rau thaum lub caij uas nej txom nyem nej yuav tsis muaj peev xwm ceev tau tej ntawd.

32 Thiab nyob rau thaum lub caij uas nej txom nyem nej yuav thov tus Tswv; thiab nej yuav thov tsis muaj nuj nqis, vim nej txoj kev puas ntsoog twb los raug nej lawm, thiab nej txoj kev puas tsuaj yeej yuav muaj tiag tiag; thiab thaum ntawd nej yuav quaj ntsuag thiab quaj nrov nrov nyob rau hnub ntawd, Ib Tsoom Tub Rog tus Tswv hais li. Thiab thaum ntawd nej yuav quaj nyiav, thiab hais tias:

33 Auj kheev lam kuv hloov siab lees txim, thiab tsis txhob muab cov yaj saub tua, thiab xuas pob zeb ntaus lawv, thiab muab lawv ntiab tawm. Muaj tseeb tiag, nyob rau hnub ntawd nej yuav hais tias: Auj kheev lam peb nco txog tus Tswv peb tus Vajtswv nyob rau lub caij thaum nws muab peb tej kev nplua nuj rau peb, thiab yog li ntawd ntshe twb tsis hloov los nplua npleev kom peb plam tej ntawd mus; vim saib seb, peb tej kev nplua nuj tau ploj ntawm peb mus lawm.

34 Saib seb, peb tso ib rab cuab yeej rau qhov no thiab hnub tom qab xwb nws ploj lawm; thiab saib seb, peb tej ntaj raug muab tshem ntawm peb mus thaum lub caij uas peb nrhiav tej ntawd los ua rog.

35 Muaj tseeb tiag, peb tau muab peb tej nyiaj txiag zais thiab tej nyiaj txiag ntawd tau plam ntawm peb mus, vim yog txoj kev foom tsis zoo ntawm thaj av.

36 Auj kheev lam peb hloov siab lees txim thaum lub caij uas tus Tswv txoj lus los rau peb; vim saib seb thaj av twb raug foom tsis zoo, thiab txhua yam hloov los ua nplua npleev, thiab peb tsis muaj peev xwm tuav tau txhua yam.

37 Saib seb, cov dab phem muab peb vij tag, muaj tseeb tiag, peb raug khaub zig los ntawm cov tim tswv ntawm tus uas tau nrhiav kev ua kom peb tus ntsuj plig puas tsuaj. Saib seb, peb tej kev ua phem loj heev. Auj tus Tswv es, koj puas tshem tau koj txoj kev npau taws ntawm peb mus? Thiab nej cov lus nyob rau lub sij hawm ntawd yuav muaj li no.

38 Tiam sis saib seb, nej lub caij sim siab twb dhau lawm; nej tau laug lub caij ntawm nej txoj kev cawm seej txog rau thaum uas twb lig heev mus ib txhis li lawm, thiab nej txoj kev puas tsuaj twb yuav muaj tseeb; muaj tseeb tiag, vim nej tau nrhiav tag nrho nej lub neej rau tej uas nej tsis muaj peev xwm muab tau; thiab nej tau nrhiav kev zoo siab los ntawm kev ua phem, qhov uas twb tsis raws li txoj kev ncaj ncees ntawd ntawm peb tus Thawj uas Nyob Mus Ib Txhis uas muaj hwj chim loj.

39 Auj nej cov neeg ntawm thaj av es, xav kom nej yuav mloog kuv tej lus! Thiab kuv thov Vajtswv kom tus Tswv yuav tshem nws txoj kev npau taws ntawm nej mus, thiab kom nej yuav hloov siab lees txim thiab txais kev cawm dim.