Phau Ntawv Hilamas

1 Thiab nim no saib seb, tau muaj tias nyob rau thaum pib ntawm xyoo thib plaub caug ntawm cov neeg txiav txim txoj kev kav Nifais cov neeg, pib muaj teeb meem nyuaj heev nyob hauv cov Neeg Nifais.

2 Vim saib seb, Pehaulas tau tuag, thiab mus rau txoj kev uas txhua tus neeg hauv lub ntiaj teb mus; yog li ntawd cov kwv tij, uas yog Pehaulas cov tub, pib muaj ib txoj kev sib cav sib ceg uas nyuaj heev ntsig txog tus uas yuav los zaum saum lub rooj txiav txim.

3 Nim no cov uas sib txeeb lub rooj txiav txim, cov uas kuj ua rau cov neeg sib cav sib ceg, muaj npe xws li no: Pehaulas, Pa-eekhais, thiab Pakhumenais.

4 Nim no Pehaulas cov tub tsis yog tas li no xwb (vim nws muaj coob leej), tiam sis cov no yog cov uas sib txeeb lub rooj txiav txim; yog li ntawd, lawv ua rau cov neeg tawg ua peb pab.

5 Txawm li ntawd los, cov neeg lub suab muab Pehaulas tsa los ua tus thawj txiav txim thiab tus tswv xeev kav Nifais cov neeg.

6 Thiab tau muaj tias Pakhumenais, thaum nws pom tias nws txeeb tsis tau lub rooj txiav txim, nws los koom siab nrog cov neeg lub suab.

7 Tiam sis saib seb, Pa-eekhais, thiab feem ntawm cov neeg uas xav kom nws ua lawv tus tswv xeev, npau taws heev; yog li ntawd, nws twb yuav luag yaum kom cov neeg ntawd sawv ntxeev siab tawm tsam lawv cov kwv tij.

8 Thiab tau muaj tias thaum nws yuav luag ua li no, saib seb, cov neeg muab nws txhom, thiab coj nws los hais plaub raws li cov neeg lub suab, thiab phua txim tuag rau nws; vim nws tau sawv ntxeev siab thiab nrhiav kev los rhuav cov neeg txoj kev ywj pheej.

9 Nim no thaum cov neeg uas xav kom nws ua lawv tus tswv xeev pom tias nws raug txim tuag, yog li ntawd lawv npau taws, thiab saib seb, lawv xa ib tug hu ua Kisawkhumas mus rau ntawm Pehaulas lub rooj txiav txim, thiab muab Pehaulas tua thaum nws zaum saum lub rooj txiav txim.

10 Thiab Pehaulas cov tub qhe muab nws raws; tiam sis saib seb, Kisawkhumas khiav ceev heev kom tsis muaj neeg caum tau nws.

11 Thiab nws mus cuag cov uas tau xa nws, thiab lawv txhua tus ua kev khi lus, muaj tseeb tiag, thiab cog lus los ntawm tus uas Tsim lawv uas kav ib txhis, hais tias lawv yuav tsis qhia leej twg tias Kisawkhumas tau tua Pehaulas.

12 Yog li ntawd Nifais cov neeg tsis muaj leej twg paub txog Kisawkhumas, vim nws tau zais ntsej muag kom txhob muaj neeg paub thaum nws tua Pehaulas. Thiab Kisawkhumas thiab nws pab neeg, uas tau khi lus nrog nws, nyob sib xyaws nrog cov neeg, kom txhob muaj neeg nrhiav tau lawv txhua tus; tiam sis tag nrho cov uas Nifais cov neeg nrhiav tau, lawv raug txim tuag.

13 Thiab nim no saib seb, raws li cov neeg lub suab, lawv muab Pakhumenais tsa los ua tus thawj txiav txim thiab tus tswv xeev, pauv nws tus tij laug Pehaulas qhov chaw los kav; thiab qhov ntawd yeej yog raws li qhov nws muaj cai. Thiab tau ua txhua yam no nyob hauv xyoo thib plaub caug ntawm cov neeg txiav txim txoj kev kav; thiab xyoo ntawd tau xaus.

14 Thiab tau muaj tias nyob hauv xyoo thib plaub caug ib ntawm cov neeg txiav txim txoj kev kav, cov Neeg Lamas sau tau ib pab tub rog uas suav tsis txheeb tuaj ua ke, thiab lawv muab ntaj, thiab liag thiab hneev, thiab xub, thiab tej phiaj thaiv taub hau, thiab tej daim thaiv hauv siab, thiab txhua yam phiaj huv tib si rau lawv.

15 Thiab lawv rov qab dua tuaj xwv kom lawv yuav tau ua rog tawm tsam cov Neeg Nifais. Thiab ib tug txiv neej uas npe hu ua Khauli-athumaws yog tus coj lawv; thiab nws yog Xalahelas ib tug xeeb ntxwv; thiab nws yog ib tug uas ntxeev siab khiav ntawm cov Neeg Nifais mus; thiab nws yog ib tug txiv neej uas loj thiab muaj zog.

16 Yog li ntawd, cov Neeg Lamas tus vaj ntxwv, uas npe hu ua Thunpalos, tus uas yog Amauloos tus tub, xav tias Khauli-athumaws, vim nws yog ib tug neeg muaj zog, yuav muaj peev xwm sawv tawm tsam cov Neeg Nifais, nrog nws lub zog thiab nrog nws lub tswv yim loj, xav tias yog xa nws tuaj ces nws yuav kov yeej cov Neeg Nifais—

17 Yog li ntawd Thunpalos txhaub kom cov Neeg Lamas npau taws, thiab nws sau nws cov tub rog tuaj ua ke, thiab nws tsa Khauli-athumaws ua lawv tus thawj coj, thiab hais kom lawv mus rau nram thaj av Xalahelas mus ua rog tawm tsam cov Neeg Nifais.

18 Thiab tau muaj tias vim yog muaj kev sib cav sib ceg ntau thiab muaj teeb meem ntau nyob hauv tej nom tswv, uas lawv tsis tau tso tej neeg saib xyuas txaus rau hauv thaj av Xalahelas; vim lawv xav tias cov Neeg Lamas yuav tsis tuaj rau hauv plawv ntawm lawv thaj av tuaj tawm tsam lub nroog Xalahelas uas loj ntawd.

19 Tiam sis tau muaj tias Khauli-athumaws taug kev mus ua ntej nws cov tub rog uas coob coob, thiab tuaj tawm tsam cov neeg ntawm lub nroog, thiab lawv taug kev tuaj nrawm heev ua rau cov Neeg Nifais tsis muaj sij hawm sau lawv cov tub rog tuaj ua ke.

20 Yog li ntawd Khauli-athumaws muab cov uas zov lub rooj vag ntawm lub nroog txiav vau, thiab taug kev nrog tag nrho nws cov tub rog mus rau hauv lub nroog, thiab lawv muab txhua tus uas tawm tsam lawv tua, lawv thiaj txeeb tau tag nrho lub nroog.

21 Thiab tau muaj tias Pakhumenais, uas yog tus thawj txiav txim, tau khiav ua ntej Khauli-athumaws, mus rau tom cov ntsa loog ntawm lub nroog. Thiab tau muaj tias Khauli-athumaws muab nws tua teem sab ntsa loog, ua rau nws tuag. Thiab Pakhumenais lub neej xaus li no.

22 Thiab nim no thaum Khauli-athumaws pom tias nws txeeb tau lub nroog Xalahelas, thiab pom tias cov Neeg Nifais tau khiav ua ntej lawv, thiab raug tua, thiab raug txhom, thiab raug tso rau hauv lub tsev kaw, thiab pom tias nws txeeb tau qhov chaw uas muaj zog tshaj plaws nyob hauv tag nrho thaj av, nws lub siab muaj zog tuaj ua rau nws tseem yuav mus tawm tsam tag nrho thaj av.

23 Thiab nim no nws tsis nyob twj ywm hauv thaj av Xalahelas, tiam sis nws taug kev tawm mus nrog ib pab tub rog coob coob, twb mus rau tom lub nroog Huaj Vam; vim nws tau txiav txim siab tawm mus thiab xuas ntaj tho nws txoj kev, xwv kom nws yuav txeeb tau sab qaum teb ntawm thaj av.

24 Thiab, vim nws xav tias cov Neeg Nifais qhov chaw uas muaj zog tshaj yog nyob hauv nruab nrab ntawm thaj av, yog li ntawd nws thiaj taug kev tawm mus, thiab tsis pub sij hawm rau lawv sib sau tuaj ua ke tsuas yog sib sau tau ua tej pab tsawg tsawg xwb; thiab zoo li no lawv thiaj tawm tsam cov Neeg Nifais thiab muab lawv txiav vau rau hauv av.

25 Tiam sis saib seb, qhov uas Khauli-athumaws taug kev mus hla hauv nruab nrab ntawm thaj av cia rau Maulaunaihas muaj peev xwm kov yeej lawv, txawm tias cov Neeg Nifais coob leej heev tau raug tua.

26 Vim saib seb, Maulaunaihas xav tias cov Neeg Lamas yuav tsis tuaj rau hauv nruab nrab ntawm thaj av, tiam sis xav tias lawv yuav tawm tsam tej nroog uas nyob ib ncig ntawm tej ciam teb ib yam li lawv tau ua yav tas los; yog li ntawd Maulaunaihas thiaj kom lawv cov tub rog uas muaj zog tswj tuav tej feem nyob ib ncig ntawm tej ciam teb.

27 Tiam sis saib seb, cov Neeg Lamas twb tsis ntshai raws li Maulaunaihas siab xav, tiam sis lawv tau tuaj rau hauv nruab nrab ntawm thaj av, thiab txeeb tau lub tuam ceeb nroog uas yog lub nroog Xalahelas, thiab tab tom taug kev hla feem av uas tseem ceeb tshaj plaws ntawm thaj av, tua neeg tuag coob heev, tag nrho txiv neej, poj niam, thiab me nyuam yaus, txeeb tau ntau lub nroog thiab ntau qhov chaw muaj zog.

28 Tiam sis thaum Maulaunaihas paub li no, nws xa kiag Lihais tam sim ntawd nrog ib pab tub rog lug kev mus txiav lawv kev ua ntej lawv mus txog tom thaj av Huaj Vam.

29 Thiab Lihais tau ua li no; thiab nws txiav tau lawv txoj kev ua ntej lawv mus txog tom thaj av Huaj Vam, thiab ua rog rau lawv, lawv thiaj pib thim rov qab mus rau tom thaj av Xalahelas.

30 Thiab tau muaj tias Maulaunaihas mus txiav lawv kev thaum lawv thim rov qab, thiab ua rog rau lawv thiaj li tau hloov ua ib npluav rog uas muaj nqaij ntuag ntshav nrog ntau heev; muaj tseeb tiag, coob leej raug tua tuag, thiab kuj nrhiav pom Khauli-athumaws nyob hauv cov uas raug tua tuag.

31 Thiab nim no, saib seb, cov Neeg Lamas thim tsis tau mus sab twg li, mus tsis tau rau sab qaum teb, los sis sab qab teb, los sis sab hnub tuaj, los sis sab hnub poob, vim cov Neeg Nifais muab lawv vij nyob txhua sab.

32 Thiab xws li no Khauli-athumaws tau coj cov Neeg Lamas tsoo mus rau hauv nruab nrab ntawm cov Neeg Nifais, ua rau lawv raug cov Neeg Nifais lub hwj chim, thiab nws tus kheej raug tua tuag, thiab cov Neeg Lamas ywj lawv tus kheej rau cov Neeg Nifais txhais tes.

33 Thiab tau muaj tias Maulaunaihas rov txeeb tau lub nroog Xalahelas, thiab hais kom cov Neeg Lamas uas raug txhom ua neeg raug txim cia li ncaim ntawm thaj av mus nrog txoj kev thaj yeeb.

34 Thiab xyoo thib plaub caug ib ntawm cov neeg txiav txim txoj kev kav tau xaus li no.