1 Thiab tau muaj tias muaj kev sib faib nyob hauv cov neeg, ua rau lawv sib faib rau ub rau no thiab lawv nyias mus nyias txoj kev, cia Nifais nyob ib leeg, thaum uas nws tseem sawv nyob hauv lawv nruab nrab.

2 Thiab tau muaj tias Nifais mus rau tom nws lub tsev, xav ntsoov txog tej uas tus Tswv tau ua rau nws paub.

3 Thiab tau muaj tias thaum nws tseem tab tom xav ntsoov li no—thiab nws poob siab heev vim yog txoj kev phem ntawm cov Neeg Nifais, tej uas lawv ua ntsiag to hauv kev tsaus ntuj, thiab lawv tej kev tua neeg, thiab lawv tej kev tua txeeb tej khoom, thiab txhua yam kev phem—thiab tau muaj tias thaum nws tseem tab tom xav ntsoov li no hauv nws lub siab, saib seb, muaj ib lub suab los hais rau nws tias:

4 Koj tau koob hmoov, Nifais, rau tej uas koj tau ua; vim kuv pom tias koj tau tshaj tawm txoj lus, uas kuv tau muab rau koj, rau cov neeg no, yam tsis nkees kiag li. Thiab koj tsis ntshai lawv, thiab koj tsis khuv xim koj txoj sia, tiam sis koj nrhiav ua raws li kuv lub siab nyiam, thiab ua raws li kuv tej lus txib.

5 Thiab nim no, vim koj tau ua li no yam tsis nkees kiag li, saib seb, kuv yuav foom koob hmoov rau koj mus ib txhis; thiab kuv yuav ua kom koj muaj hwj chim hais lus thiab muaj hwj chim ua taus, muaj kev ntseeg loj thiab muaj hwj chim ua hauj lwm; muaj tseeb tiag, kom ua tau txhua yam rau koj raws li koj tej lus, vim koj yuav tsis thov yam uas tsis raws li kuv lub siab nyiam.

6 Saib seb, koj yog Nifais, thiab kuv yog Vajtswv. Saib seb, kuv tshaj tawm rau koj nyob ntawm kuv cov tim tswv xub ntiag, hais tias koj yuav muaj hwj chim kav cov neeg no, thiab yuav foom kom lub ntiaj teb muaj kev tshaib nqhis, thiab muaj kab mob phem, thiab kev puas tsuaj, raws li txoj kev phem ntawm cov neeg no.

7 Saib seb, kuv muab hwj chim rau koj, kom yam uas koj yuav khi cia nyob hauv ntiaj teb yuav muab yam ntawd khi cia nyob saum ntuj ceeb tsheej; thiab yam uas koj yuav daws nyob hauv ntiaj teb yuav muab yam ntawd daws nyob saum ntuj ceeb tsheej; thiab yog li ntawd koj yuav muaj hwj chim nyob hauv cov neeg no.

8 Thiab yog li ntawd, yog koj hais rau lub tuam tsev no kom ntuag rhe ua ob sab, ces yuav muaj li ntawd.

9 Thiab yog koj hais rau lub roob no, cia li qis thiab cia li tiaj, ces yuav muaj li ntawd.

10 Thiab saib seb, yog koj hais tias Vajtswv yuav nplawm cov neeg no, ces yuav muaj li ntawd.

11 Thiab nim no saib seb, kuv txib koj, kom koj cia li mus thiab tshaj tawm rau cov neeg no hais tias, tus Tswv uas yog Vajtswv, tus uas Muaj Hwj Chim Tag Nrho hais li no tias: Yog nej tsis hloov siab lees txim ces nej yuav raug foom tsis zoo, mus rau txoj kev puas tsuaj.

12 Thiab saib seb, nim no tau muaj tias thaum tus Tswv tau hais tej lus no rau Nifais tas, nws tau nres thiab tsis mus rau tom nws lub tsev, tiam sis rov qab mus rau tom cov neeg coob coob uas nyob ub nyob no ib ncig hauv thaj av, thiab pib tshaj tawm txoj lus uas tus Tswv tau hais rau nws rau lawv, ntsig txog lawv txoj kev puas tsuaj yog lawv tsis hloov siab lees txim.

13 Nim no saib seb, txawm hais tias Nifais tau ua qhov txuj ci tseem ceeb ntawd qhia rau lawv ntsig txog txoj kev tuag ntawm tus thawj txiav txim los, lawv tseem ua lawv lub siab tawv thiab tsis kam mloog tus Tswv tej lus.

14 Yog li ntawd Nifais tau tshaj tawm tus Tswv txoj lus rau lawv, hais tias: Tus Tswv hais li no tias, yog nej tsis hloov siab lees txim, nej yuav raug foom tsis zoo mus rau txoj kev puas tsuaj.

15 Thiab tau muaj tias thaum Nifais tshaj tawm txoj lus rau lawv tas lawm, saib seb, lawv tseem ua lawv lub siab tawv thiab tsis kam mloog nws tej lus; yog li ntawd lawv hais lus cem tawm tsam nws, thiab nrhiav kev xuas lawv txhais tes ntsiab nthos nws xwv kom lawv yuav tau muab nws tso rau hauv lub tsev kaw.

16 Tiam sis saib seb, Vajtswv lub hwj chim nrog nws nyob, thiab lawv tsis muaj peev xwm txhom nws muab nws tso rau hauv lub tsev kaw, vim tus Ntsuj Plig tau coj thiab nqa nws tawm ntawm lawv mus.

17 Thiab tau muaj tias nws tawm mus ntawm ib pab neeg rau ib pab neeg los ntawm tus Ntsuj Plig zoo li no, tshaj tawm Vajtswv txoj lus, txog rau thaum nws tshaj tawm txoj lus rau lawv txhua tus, los sis xa txoj lus tawm mus rau tag nrho cov neeg.

18 Thiab tau muaj tias lawv tsis kam mloog nws tej lus; thiab pib muaj tej kev sib cav sib ceg, ua rau lawv thiaj sib faib lawv tus kheej thiab pib xuas ntaj ib leeg tua ib leeg.

19 Thiab xyoo xya caum ib ntawm cov neeg txiav txim txoj kev kav Nifais cov Neeg tau xaus li no.