1 Thiab tau muaj tias nyob hauv xyoo thib plaub caug ob ntawm cov neeg txiav txim txoj kev kav, tom qab Maulaunaihas tau txhim tsa kev thaj yeeb dua rau cov Neeg Nifais thiab cov Neeg Lamas, saib seb tsis muaj leej twg los zaum saum lub rooj txiav txim; yog li ntawd rov pib muaj kev sib cav sib ceg dua nyob hauv cov neeg saib leej twg yuav los zaum saum lub rooj txiav txim.

2 Thiab tau muaj tias cov neeg lub suab tsa Hilamas, uas yog Hilamas tus tub, los zaum saum lub rooj txiav txim.

3 Tiam sis saib seb, Kisawkhumas, tus uas tau tua Pehaulas, kuj nyas ntsoov yuav ua kom Hilamas puas tsuaj thiab; thiab nws pab neeg tau txhawb nqa nws, pab uas ua kev khi lus tias yuav tsis pub leej twg paub txog nws txoj kev phem.

4 Vim muaj ib tug uas npe hu ua Nkadi-atoos, tus uas txawj hais lus heev, thiab txawj dag ntxias heev, los coj txoj hauj lwm tua neeg thiab ua tub sab tub nyiag ntsiag to; yog li ntawd nws tau los ua tus thawj coj ntawm Kisawkhumas pab neeg.

5 Yog li ntawd nws ntxias lawv, thiab Kisawkhumas hais tias, yog lawv pab kom nws tau zaum saum lub rooj txiav txim nws yuav pub rau cov uas zwm rau Kisawkhumas pab neeg kom lawv tau hwj chim thiab muaj cai nyob hauv cov neeg; yog li ntawd Kisawkhumas thiaj nrhiav kev ua kom Hilamas puas tsuaj.

6 Thiab tau muaj tias thaum nws tawm mus rau tom lub rooj txiav txim mus ua kom Hilamas puas tsuaj, saib seb Hilamas ib tug tub qhe, vim nws mus yos thaum hmo ntuj, thiab rau qhov nws zais ntsej muag kom txhob muaj neeg paub, nws txais tau kev paub txog Kisawkhumas pab neeg lub tom txwv uas tau npaj los ua kom Hilamas puas tsuaj—

7 Thiab tau muaj tias nws mus ntsib Kisawkhumas, thiab nws ua ib lub cim rau Kisawkhumas; yog li ntawd Kisawkhumas thiaj ua rau nws paub txog lub hom phiaj ntawm qhov uas nws xav ua, thiab nws thov kom Hilamas tus tub qhe coj nws mus rau ntawm lub rooj txiav txim xwv kom nws yuav tua tau Hilamas.

8 Thiab thaum Hilamas tus tub qhe paub tag nrho tej uas nyob hauv Kisawkhumas lub siab, thiab paub tias nws lub hom phiaj yog tua neeg, thiab paub tias lub hom phiaj ntawm tag nrho cov uas zwm rau nws pab neeg yog tua neeg, thiab ua tub sab, thiab ua kom muaj hwj chim, (thiab qhov no yog lawv lub tom txwv ntsiag to, thiab lawv tej kev tuav hauv) Hilamas tus tub qhe hais rau Kisawkhumas tias: Cia wb mus rau tom lub rooj txiav txim.

9 Nim no qhov no ua rau Kisawkhumas zoo siab heev, vim nws xav tias nws yuav ua tau li nws siab xav; tiam sis saib seb, thaum nkawd tab tom mus rau tom lub rooj txiav txim, Hilamas tus tub qhe tib nkaug riam rau Kisawkhumas lub plawv, ua rau nws vau hlo tuag kiag tsis nroo li. Thiab Hilamas tus tub qhe khiav thiab mus qhia rau Hilamas txhua yam uas nws pom, thiab hnov, thiab ua.

10 Thiab tau muaj tias Hilamas xa neeg tawm mus txhom pab neeg tub sab thiab cov neeg tua neeg ntsiag to no, xwv kom yuav muab lawv tua raws li txoj kev cai.

11 Tiam sis saib seb, thaum Nkadi-atoos pom tias Kisawkhumas tsis rov qab los nws tau ntshai nyob tsam nws yuav raug puas tsuaj; yog li ntawd nws hais kom nws pab neeg raws nws mus. Thiab lawv khiav tawm ntawm thaj av, los ntawm ib txoj kev uas tsis muaj neeg paub, mus rau hauv hav zoov; thiab yog li ntawd thaum Hilamas xa neeg mus txhom lawv thiaj nrhiav tsis tau lawv qhov twg hlo li.

12 Thiab yuav hais txog tus Nkadi-atoos no ntxiv mus tom ntej no. Thiab xyoo thib plaub caug ob ntawm cov neeg txiav txim txoj kev kav Nifais cov neeg tau xaus li no.

13 Thiab saib seb, nyob rau tom kawg ntawm phau ntawv no nej yuav pom tias tus Nkadi-atoos no yog tus uas ntxeev, muaj tseeb tiag, ua rau Nifais cov neeg puas tsuaj yuav luag tas.

14 Saib seb kuv tsis yog hais txog tom kawg ntawm phau ntawv Hilamas, tiam sis kuv hais txog tom kawg ntawm phau ntawv Nifais, phau uas kuv tau muab tag nrho tej zaj uas kuv tau sau ntawd los.