1 Thiab nim no tau muaj tias nyob hauv xyoo thib plaub caug peb ntawm cov neeg txiav txim txoj kev kav, twb tsis muaj kev sib cav sib ceg nyob hauv Nifais cov neeg tsuas yog muaj me ntsis kev muab hlob nyob hauv lub koom txoos, uas tau ua rau muaj me ntsis kev tsis sib haum xeeb nyob hauv cov neeg, uas tau muab daws tiav rau thaum kawg ntawm xyoo thib plaub caug peb.

2 Thiab nyob hauv xyoo thib plaub caug plaub cov neeg twb tsis muaj kev sib cav sib ceg; thiab nyob hauv xyoo thib plaub caug tsib los cov neeg kuj tsis muaj kev sib cav sib ceg ntau.

3 Thiab tau muaj tias nyob hauv xyoo thib plaub caug rau, muaj tseeb tiag, tau muaj kev sib cav sib ceg ntau thiab kev ntxeev siab ntau; thiab los ntawm tej ntawd tau muaj coob leej ncaim tawm ntawm thaj av Xalahelas, thiab tawm mus rau pem thaj av sab qaum teb mus txais thaj av ua lawv tug.

4 Thiab lawv tau mus deb heev kawg nkaus li, ua rau lawv thiaj mus txog cov dej loj heev thiab ntau tus dej ntws.

5 Muaj tseeb tiag, thiab lawv tau faib mus rau hauv txhua feem ntawm thaj av, mus rau txhua feem uas cov neeg tsis tau ua rau ciaj quav poj thiab tsis muaj ntoo, vim yog cov neeg coob heev uas tau nyob hauv thaj av ua ntej ntawd.

6 Thiab nim no thaj av kuj tsis ciaj quav poj luaj twg, tsuas yog tias tsis muaj ntoo xwb; tiam sis vim yog txoj kev puas tsuaj uas loj heev ntawm cov neeg uas tau nyob hauv thaj av ua ntej ntawd thiaj muab hu ua thaj av quav poj.

7 Thiab vim tsis muaj ntoo ntau nyob rau hauv thaj av, yog li ntawd cov neeg uas mus rau ped tau los ua cov neeg uas txawj siv hmoov zeb cib heev; yog li ntawd lawv xuas hmoov zeb cib los ua tej tsev uas lawv nyob.

8 Thiab tau muaj tias lawv tau huaj vam thiab ri mus, thiab tau tawm ntawm thaj av sab qab teb mus rau thaj av sab qaum teb, thiab ri mus ua rau lawv pib puv mus thoob plaws hauv lub ntiaj teb, txij ntawm tus dej hiav txwv sab qab teb mus rau tus dej hiav txwv sab qaum teb, txij ntawm tus dej hiav txwv sab hnub poob mus rau tus dej hiav txwv sab hnub tuaj.

9 Thiab cov neeg uas nyob hauv thaj av sab qaum teb lawv nyob hauv tej tsev pheeb suab ntaub, thiab hauv tej tsev hmoov zeb cib, thiab lawv cia txhua tsob ntoo uas nthaw kaus tuaj kom loj hlob, xwv kom tsis ntev lawv yuav muaj ntoo los ua lawv tej tsev, muaj tseeb tiag, ua lawv tej nroog, thiab lawv tej tuam tsev, thiab lawv tej tsev sab laj, thiab lawv tej chaw dawb huv, thiab ua txhua yam ntawm lawv tej tsev.

10 Thiab tau muaj tias vim muaj ntoo tsawg heev nyob hauv thaj av sab qaum teb, lawv thiaj tau xuas nkoj xa ntoo ntau mus.

11 Thiab xws li no lawv pab tau cov neeg uas nyob hauv thaj av sab qaum teb xwv kom lawv yuav ua tau ntau lub nroog, uas yog xuas ntoo thiab hmoov zeb cib ua.

12 Thiab tau muaj tias Amoos cov neeg coob leej, uas yog cov Neeg Lamas yug, kuj tau mus rau pem thaj av no thiab.

13 Thiab nim no coob leej ntawm cov neeg no tau sau ntau phau ceev xwm txheej txog tej keeb kwm ntawm cov neeg no, uas sau tau ntau yam thiab ntau phau.

14 Tiam sis saib seb, ib feem pua ntawm cov neeg no zaj keeb kwm, muaj tseeb tiag, zaj uas hais txog cov Neeg Lamas thiab cov Neeg Nifais, thiab lawv tej kev ua rog, thiab tej kev sib cav sib ceg, thiab tej kev ntxeev siab, thiab lawv tej kev qhuab qhia, thiab lawv tej kev qhia tej yuav muaj los yav tom ntej, thiab lawv tej kev siv lub nkoj thauj khoom thiab lawv tej kev ua nkoj, thiab lawv tej kev ua tuam tsev, thiab tej tsev sab laj thiab lawv tej chaw dawb huv, thiab lawv tej kev ncaj ncees, thiab lawv tej kev phem, thiab lawv tej kev tua neeg, thiab lawv tej kev ua tub sab, thiab lawv tej kev tua txeeb tej khoom, thiab txhua yam kev qias thiab kev sib daj sib dee, phau ntawv no twb ntim tsis tas.

15 Tiam sis saib seb, muaj ntau phau ntawv thiab ntau phau ceev xwm txheej txhua yam, thiab feem ntau cov Neeg Nifais yog cov khaws cov ceev xwm txheej ntawd.

16 Thiab cov Neeg Nifais yog cov uas muab cov ceev xwm txheej ntawd cev ntawm ib tiam neeg mus rau ib tiam, twb mus txog rau thaum lawv poob mus rau kev ua txhaum thiab raug muab tua, raug tua txeeb tej khoom, thiab raug plob tua, thiab raug raws khiav, thiab raug tua, thiab tawg khiav ri niab mus rau hauv lub ntiaj teb, thiab xyaw nrog cov Neeg Lamas txog rau thaum twb tsis hu lawv ua cov Neeg Nifais ntxiv lawm, vim lawv tau hloov los ua neeg phem, thiab neeg qus, thiab neeg tsiv heev, muaj tseeb tiag, lawv twb hloov ua zoo li cov Neeg Lamas.

17 Thiab nim no kuv rov qab hais kuv zaj dua; yog li ntawd, yam uas kuv tau hais twb dhau lawm tom qab uas tau muaj tej kev sib cav sib ceg loj, thiab tej kev sib thab, thiab tej kev ua rog, thiab tej kev ntxeev siab, nyob hauv Nifais cov neeg.

18 Xyoo thib plaub caug rau ntawm cov neeg txiav txim txoj kev kav tau xaus;

19 Thiab tau muaj tias tseem muaj kev sib cav sib ceg loj heev nyob hauv thaj av, muaj tseeb tiag, nyob hauv xyoo thib plaub caug xya, thiab nyob hauv xyoo thib plaub caug yim.

20 Txawm li ntawd los Hilamas tau zaum saum lub rooj txiav txim nrog kev txim lij thiab kev sib txig; muaj tseeb tiag, nws mob siab coj raws li tej kev cai, thiab tej kev txiav txim, thiab Vajtswv tej lus txib; thiab nws tau ua tej uas yog rau Vajtswv lub qhov muag pom tsis tu ncua; thiab nws taug tej kev uas nws txiv taug, ua rau nws vam meej nyob rau hauv thaj av.

21 Thiab tau muaj tias nws muaj ob tug tub. Nws muab lub npe Nifais rau tus hlob, thiab muab lub npe Lihais rau tus ntxawg. Thiab nkawd pib loj hlob rau tus Tswv.

22 Thiab tau muaj tias tej kev ua rog thiab tej kev sib cav sib ceg tau pib tsum, me ntsis, nyob hauv cov Neeg Nifais, nyob rau thaum yuav kawg ntawm xyoo thib plaub caug yim ntawm cov neeg txiav txim txoj kev kav Nifais cov neeg.

23 Thiab tau muaj tias nyob hauv xyoo thib plaub caug cuaj ntawm cov neeg txiav txim txoj kev kav, txhim tsa tau kev thaj yeeb tsis tu ncua nyob hauv thaj av, tag nrho thaj av tsuas yog tej kev tuav hauv ntsiag to uas tus tub sab Nkadi-atoos tau txhim tsa nyob hauv feem av uas neeg nyob coob zog, uas lub sij hawm ntawd cov nom tswv tseem tsis tau paub txog; yog li ntawd lawv thiaj tsis raug ua kom puas tsuaj tawm ntawm thaj av mus.

24 Thiab tau muaj tias nyob rau tib xyoos no tau muaj kev vam meej heev nyob hauv lub koom txoos, thiaj li muaj txhiab txhiab leej uas tau los koom rau lub koom txoos thiab tau ua kev cai raus dej rau kev hloov siab lees txim.

25 Thiab txoj kev vam meej ntawm lub koom txoos loj kawg nkaus, thiab cov koob hmoov nplua mias uas los rau cov neeg ntau kawg nkaus, ua rau cov pov thawj hlob thiab cov xib hwb lawv tus kheej twb xav tsis thoob li.

26 Thiab tau muaj tias tus Tswv txoj hauj lwm tau vam meej thiaj li muaj coob leej los ua kev cai raus dej thiab koom nrog Vajtswv lub koom txoos, muaj tseeb tiag, twb muaj kaum tawm txhiab leej.

27 Yog li ntawd peb pom tias tus Tswv yeej hlub tshua txhua tus uas yuav muaj lub siab tiag tiag, hu txog nws lub npe dawb huv.

28 Muaj tseeb tiag, yog li ntawd peb pom tias lub rooj ntug ceeb tsheej qhib rau txhua tus, yeej qhib rau cov uas yuav ntseeg Yexus Khetos lub npe, tus uas yog Vajtswv Leej Tub.

29 Muaj tseeb tiag, peb pom tias txhua tus uas xav tau, yuav tuav tau Vajtswv txoj lus, uas muaj sia zees nyob thiab muaj hwj chim, uas yuav muab tag nrho tus dab phem tej kev dag ntxias thiab tej ntxiab thiab tej kev npaj ua phem faib hlo ua ob sab, thiab coj tus uas ntseeg Khetos nyob hauv txoj kev ti thiab nqaim kom hla dhau tus kwj tob tob ntawm kev nyuaj siab uas kav ib txhis uas tau npaj los nqos cov neeg phem—

30 Thiab lawv tej ntsuj plig mus txog, muaj tseeb tiag, lawv tej ntsuj plig uas tsis txawj tuag, mus txog rau ntawm Vajtswv sab tes xis nyob hauv lub nceeg vaj ceeb tsheej, mus zaum nrog Anplaham, thiab Ixaj, thiab Yakhauj, thiab nrog tag nrho peb cov yawg koob dawb huv, tsis tawm mus ib zaug ntxiv li lawm.

31 Thiab nyob hauv xyoo no tau muaj kev zoo siab tsis tu ncua nyob hauv thaj av Xalahelas, thiab nyob hauv tag nrho tej thaj tsam ib puag ncig, twb nyob tag nrho hauv tej av uas cov Neeg Nifais nyob.

32 Thiab tau muaj tias muaj kev thaj yeeb thiab kev xyiv fab heev kawg nkaus nyob hauv lub caij uas tseem tshuav ntawm xyoo thib plaub caug cuaj; muaj tseeb tiag, thiab kuj muaj kev thaj yeeb tsis tu ncua thiab kev xyiv fab heev nyob hauv xyoo thib tsib caug ntawm cov neeg txiav txim txoj kev kav.

33 Thiab nyob hauv xyoo thib tsib caug ib ntawm cov neeg txiav txim txoj kev kav kuj muaj kev thaj yeeb thiab, tsuas yog txoj kev muab hlob uas tau pib nkag los rau hauv lub koom txoos—tsis yog los rau hauv Vajtswv lub koom txoos, tiam sis yog los rau hauv cov neeg lub siab uas hais tias lawv zwm rau Vajtswv lub koom txoos—

34 Thiab lawv muab hlob heev, ua rau lawv thiaj li pib tsim txom lawv cov kwv tij coob leej. Nim no qhov no yog ib qho kev phem loj heev, uas ua rau cov uas txo hwj chim zog raug kev tsim txom hnyav, thiab tiv kev txom nyem ntau.

35 Txawm li ntawd los lawv yoo mov thiab thov Vajtswv tsis tu tsis tseg, thiab lawv txoj kev txo hwj chim loj hlob muaj zog zuj zus tuaj, thiab lawv txoj kev ntseeg Khetos ruaj khov zuj zus tuaj, txog rau thaum lawv muaj kev xyiv fab thiab kev nplij siab puv nkaus, muaj tseeb tiag, twb txog rau thaum ua rau lawv lub siab hloov ua ntshiab thiab dawb huv, kev hloov ua dawb huv uas tau muaj vim yog lawv ywj lawv lub siab rau Vajtswv.

36 Thiab tau muaj tias xyoo thib tsib caug ob kuj tau xaus muaj kev thaj yeeb thiab, tsuas yog txoj kev muab hlob heev uas tau los rau hauv cov neeg lub siab; thiab muaj li ntawd los twb vim yog lawv txoj kev nplua nuj thiab lawv txoj kev vam meej heev nyob hauv thaj av; thiab qhov ntawd loj hlob rau hauv lawv ib hnub dhau ib hnub.

37 Thiab tau muaj tias nyob hauv xyoo thib tsib caug peb ntawm cov neeg txiav txim txoj kev kav, Hilamas tau tuag, thiab nws tus tub hlob Nifais pib pauv nws qhov chaw los kav. Thiab tau muaj tias nws los zaum saum lub rooj txiav txim yam ncaj ncees thiab sib txig; muaj tseeb tiag, nws tau ua raws li Vajtswv tej lus txib, thiab taug mus raws li nws txiv tej kev.