Tshooj 5
Nifais thiab Lihais nkawd rau siab mus qhuab qhia—Nkawd ob lub npe qhia kom nkawd ua nkawd lub neej raws li nkawd cov yawg koob—Khetos txhiv cov uas hloov siab lees txim dim—Nifais thiab Lihais coj tau coob leej hloov siab los ntseeg tshiab thiab raug kaw, thiab hluav taws vij nkawd—Ib tauv huab tsaus tsaus los roos peb puas leej neeg—Lub ntiaj teb co qeeg txoog, thiab ib lub suab txib kom tib neeg hloov siab lees txim—Nifais thiab Lihais tham nrog cov tim tswv, thiab hluav taws vij neeg coob coob. Kwv yees li 30 xyoo ua ntej Yexus yug los.
1 Thiab tau muaj tias nyob rau tib xyoos no, saib seb, Nifais tau muab lub rooj txiav txim rau ib tug neeg uas npe hu ua Xixaulas.
2 Vim lawv tej kev cai thiab lawv lub tsoom fwv yog tsim los ntawm cov neeg lub suab, thiab lawv cov uas xaiv qhov phem coob tshaj lawv cov uas xaiv qhov zoo, yog li ntawd lawv tab tom siav rau txoj kev puas tsuaj, vim txoj kev cai raug muab hloov ua tsis ncaj.
3 Muaj tseeb tiag, thiab tsis tas li no xwb; lawv yog ib co neeg tawv ncauj, ua rau txoj kev cai thiab txoj kev txim lij tsis muaj peev xwm kav tau lawv, tsuas yog ua kom lawv puas tsuaj xwb.
4 Thiab tau muaj tias Nifais tau poob siab heev vim yog lawv txoj kev ua phem; thiab nws tso lub rooj txiav txim tseg, thiab nws cia li mus tshaj tawm Vajtswv txoj lus nyob hauv tag nrho nws lub neej uas tseem tshuav, thiab nws tus kwv Lihais thiab, tag nrho nws lub neej uas tseem tshuav;
5 Vim nkawd nco qab ntsoov tej lus uas nkawd txiv Hilamas hais rau nkawd. Thiab cov no yog cov lus uas nws tau hais:
6 Saib seb, kuv ob tug tub es, kuv thov kom neb yuav nco ntsoov ua raws li Vajtswv tej lus txib; thiab kuv xav kom neb qhia tej lus no rau cov neeg. Saib seb, kuv tau muab ob lub npe ntawm peb thawj cov yawg koob uas tau tawm tim thaj av Yeluxalees tuaj tis rau neb; thiab kuv tau ua li no xwv kom thaum neb nco txog neb ob lub npe neb yuav nco txog nkawd; thiab thaum neb nco txog nkawd neb yuav nco txog tej uas nkawd tau ua; thiab thaum neb nco txog tej uas nkawd tau ua neb yuav paub tias cov neeg tau hais tseg, thiab tau sau tseg tias, nkawd yeej ua zoo.
7 Yog li ntawd, kuv ob tug tub es, kuv xav kom neb ua tej uas zoo, xwv kom cov neeg yuav hais, thiab sau txog neb, ib yam li cov neeg tau hais thiab sau txog nkawd.
8 Thiab nim no kuv ob tug tub es, saib seb kuv muaj me ntsis ntxiv uas thov kom neb ua, qhov uas hais tias, tsis yog kom neb ua tej yam no xwv kom neb yuav tau khav, tiam sis kom neb ua tej yam no kom khaws tau tej uas muaj nqis cia rau neb tus kheej nyob saum ntuj ceeb tsheej, muaj tseeb tiag, tej uas yuav nyob mus ib txhis, thiab tej uas yuav tsis txawj ploj mus; muaj tseeb tiag, xwv kom neb yuav tau lub txiaj ntsim uas muaj nqis ntawm txoj sia nyob mus ib txhis, qhov uas peb xav tias Vajtswv twb muab rau peb cov yawg koob lawm.
9 Auj nco ntsoov, nco ntsoov, kuv ob tug tub, tej lus uas vaj ntxwv Npeyamis tau hais rau nws cov neeg; muaj tseeb tiag, nco ntsoov tias yeej tsis muaj dua lwm txoj kev los sis lwm yam uas yuav cawm tau neeg dim, tsuas yog los ntawm Yexus Khetos, tus uas yuav los, cov ntshav theej txhoj xwb; muaj tseeb tiag, nco ntsoov tias nws yuav los txhiv neeg ntiaj teb dim.
10 Thiab kuj nco ntsoov tej lus uas Amulej tau hais rau Xi-elas, nyob hauv lub nroog Amaunaihas; vim nws tau hais rau Xi-elas hais tias tus Tswv yeej yuav los txhiv nws cov neeg, tiam sis nws yuav tsis los txhiv lawv dim thaum lawv tseem muaj kev txhaum, tiam sis los txhiv lawv dim ntawm lawv tej kev txhaum.
11 Thiab Leej Txiv tau muab hwj chim rau nws los txhiv lawv dim ntawm lawv tej kev txhaum vim yog txoj kev hloov siab lees txim; yog li ntawd nws thiaj xa nws cov tim tswv los tshaj tawm tej moo zoo ntawm tej kev cai txog kev hloov siab lees txim, uas coj tau tib neeg los rau tus Txhiv Dim lub hwj chim, mus rau txoj kev cawm seej ntawm lawv tus ntsuj plig.
12 Thiab nim no, kuv ob tug tub es, nco ntsoov, nco ntsoov tias twb yog nyob rau saum lub pob zeb uas yog peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb lub hauv paus; xwv kom thaum tus dab phem yuav xa nws tej cua muaj zog, muaj tseeb tiag, nws tej xub nyob hauv tej khaub zig cua, muaj tseeb tiag, thaum tag nrho nws tej lawg thiab nws tej cua daj cua dub uas muaj zog yuav los raug neb, tej ntawd yuav tsis muaj hwj chim kov yeej neb kom cab tau neb mus rau hauv tus kwj tob tob ntawm kev nyuaj siab thiab kev txom nyem uas tsis muaj qhov kawg, vim yog lub pob zeb uas neb tau cog rau saud, uas yog lub hauv paus ruaj nrees, ib lub hauv paus uas yog neeg cog rau saud lawv yuav tsis vau.
13 Thiab tau muaj tias tej no yog tej lus uas Hilamas qhia rau nws ob tug tub; muaj tseeb tiag, nws tau qhia nkawd ntau yam uas tsis tau muab sau, thiab kuj ntau yam uas tau muab sau.
14 Thiab nkawd nco ntsoov nws tej lus; thiab yog li ntawd nkawd tau tawm mus, ua raws li Vajtswv tej lus txib, mus qhia Vajtswv txoj lus nyob hauv tag nrho Nifais cov neeg, pib ntawm lub nroog Huaj Vam;
15 Thiab ntawm qhov chaw ntawd mus rau lub nroog Nkis; thiab ntawm lub nroog Nkis mus rau lub nroog Mules;
16 Thiab twb yog ntawm ib lub nroog mus rau lwm lub, txog rau thaum nkawd tau tawm mus rau tag nrho hauv Nifais cov neeg uas nyob hauv thaj av sab qab teb; thiab ntawm qhov chaw ntawd mus rau hauv thaj av Xalahelas, nyob hauv cov Neeg Lamas.
17 Thiab tau muaj tias nkawd tau qhuab qhia nrog lub hwj chim loj heev, nkawd thiaj ua rau coob leej ntawm cov neeg ntxeev siab uas tau khiav ntawm cov Neeg Nifais mus poob ntsej muag, ua rau lawv tawm los thiab lees lawv tej kev txhaum thiab ua kev cai raus dej rau txoj kev hloov siab lees txim, thiab rov qab nrawm nroos mus rau cov Neeg Nifais mus kho tej uas lawv tau ua txhaum rau lawv.
18 Thiab tau muaj tias Nifais thiab Lihais tau qhuab qhia rau cov Neeg Lamas nrog hwj chim thiab txoj cai loj heev, vim Vajtswv tau muab hwj chim thiab txoj cai rau nkawd xwv kom nkawd yuav txawj hais, thiab kuj tau muab rau nkawd tej uas nkawd yuav tsum hais—
19 Yog li ntawd nkawd tau hais ua rau cov Neeg Lamas xav tsis thoob li, yaum tau lawv los ntseeg, thiaj li muaj cov Neeg Lamas yim txhiab leej nyob hauv thaj av Xalahelas thiab ib puag ncig ntawd tau ua kev cai raus dej rau txoj kev hloov siab lees txim, thiab los paub txog txoj kev phem ntawm lawv cov yawg koob tej kab lis kev cai.
20 Thiab tau muaj tias Nifais thiab Lihais tau mus ntxiv ntawm qhov chaw ntawd mus rau tom thaj av Nifais.
21 Thiab tau muaj tias nkawd raug cov Neeg Lamas ib pab tub rog muab txhom thiab tso rau hauv lub tsev kaw; muaj tseeb tiag, twb yog tib lub lub tsev kaw uas Leehais cov tub qhe tau muab Amoos thiab nws cov kwv tij tso rau haud.
22 Thiab tom qab nkawd raug muab tso rau hauv lub tsev kaw tau ntau hnub tsis tau zaub mov noj, saib seb, lawv tau mus rau hauv lub tsev kaw mus coj nkawd los xwv kom lawv yuav muab nkawd tua.
23 Thiab tau muaj tias zoo li hluav taws khaub zig Nifais thiab Lihais, lawv thiaj tsis kam xuas lawv tes ntsiab nthos nkawd vim ntshai tsam lawv kub hnyiab. Txawm li ntawd los, Nifais thiab Lihais twb tsis kub hnyiab; thiab nkawd zoo li sawv ntsug nyob hauv nruab nrab cub tawg thiab twb tsis kub hnyiab.
24 Thiab thaum nkawd pom tias ib tug ncej nplaim hluav taws khaub zig nkawd, thiab pom tias tus nplaim hluav taws twb tsis kub nkawd, nkawd lub siab thiaj muaj zog tuaj.
25 Vim nkawd pom tias cov Neeg Lamas tsis kam xuas lawv tes ntsiab nthos nkawd; thiab lawv tsis kam los ze nkawd, tiam sis sawv zoo li lawv hais tsis tau lus xav tsis thoob.
26 Thiab tau muaj tias Nifais thiab Lihais txav zog mus thiab pib hais rau lawv, hais tias: Tsis txhob ntshai, vim saib seb, twb yog Vajtswv uas tau ua yam uas zoo kawg nkaus no rau nej pom, uas tau ua rau nej pom tias nej tsis muaj peev xwm xuas nej tes ntsiab nthos wb kom muab wb tua.
27 Thiab saib seb, thaum nkawd hais tej lus no tas, av qeeg heev kawg nkaus, thiab tej phab ntsa ntawm lub tsev kaw co qeg txoog zoo li twb yuav vau rau hauv av; tiam sis saib seb, tej phab ntsa ntawd twb tsis vau. Thiab saib seb, lawv cov uas nyob hauv lub tsev kaw yog cov Neeg Lamas thiab cov Neeg Nifais uas tau ntxeev siab.
28 Thiab tau muaj tias muaj ib tauv huab tsaus tsaus los roos lawv, thiab txoj kev ntshai uas phem heev los raug lawv.
29 Thiab tau muaj tias muaj ib lub suab zoo li nrov saum tauv huab tsaus tsaus sab saud tuaj, hais tias: Nej cia li hloov siab lees txim, nej cia li hloov siab lees txim, thiab tsis txhob nrhiav kev ua kom kuv ob tug tub qhe uas kuv tau xa tuaj qhia tej moo zoo rau nej puas tsuaj ntxiv lawm.
30 Thiab tau muaj tias thaum lawv hnov lub suab no, thiab pom tias lub suab twb tsis yog ib lub suab xob quaj, thiab pom tias lub suab twb tsis yog ib lub suab uas nrov nrov, tiam sis saib seb, yog ib lub suab uas meej mos muag kawg nkaus li, zoo li yog ib lub suab ntxhi, thiab lub suab no chob txog ntua nruab siab—
31 Thiab txawm tias lub suab mos muag los, saib seb av qeeg heev kawg nkaus li, thiab tej phab ntsa ntawm lub tsev kaw rov tshee hnyo, zoo li twb yuav vau rau hauv av; thiab saib seb tauv huab tsaus tsaus, uas roos lawv, twb tsis yaj—
32 Thiab saib seb lub suab rov qab hais dua, hais tias: Nej cia li hloov siab lees txim, nej cia li hloov siab lees txim, vim twb yuav txog lub sij hawm rau lub nceeg vaj ceeb tsheej; thiab tsis txhob nrhiav kev ua kom kuv ob tug tub qhe puas tsuaj ntxiv lawm. Thiab tau muaj tias rov qab muaj av qeeg dua, thiab tej ntsa loog tshee hnyo.
33 Thiab lub suab rov qab hais dua zaum peb, thiab hais rau lawv tej lus zoo kawg nkaus uas neeg tsis muaj peev xwm hais tau; thiab tej ntsa loog rov tshee hnyo dua, thiab av qeeg zoo li cov av yuav tawg ua ob sab.
34 Thiab tau muaj tias cov Neeg Lamas tsis muaj peev xwm khiav vim yog tauv huab tsaus tsaus uas roos lawv; muaj tseeb tiag, thiab lawv kuj tsis muaj cuab kav txav vim yog txoj kev ntshai uas tau los raug lawv.
35 Nim no muaj ib tug nyob hauv lawv uas yog ib tug Neeg Nifais, tus uas ua ntej ntawd twb zwm rau Vajtswv lub koom txoos tiam sis tau ntxeev siab khiav tawm ntawm lawv mus.
36 Thiab tau muaj tias nws tig ib puag ncig, thiab saib seb, nws ntsia dhau ntawm tauv huab tsaus tsaus mus pom Nifais thiab Lihais ob lub ntsej muag; thiab saib seb, nkawd ob lub ntsej muag ci ntsa iab, uas twb zoo li tus tim tswv lub ntsej muag. Thiab nws pom tias nkawd tsa nkawd qhov muag ntsia rau saum ntuj ceeb tsheej; thiab zoo li nkawd tab tom tham nrog los sis tsa nkawd lub suab rau ib tug twg uas nkawd pom.
37 Thiab tau muaj tias tus txiv neej no tau tshaj tawm rau cov neeg coob coob, xwv kom lawv yuav tig los thiab ntsia. Thiab saib seb, Vajtswv muab hwj chim rau lawv kom lawv tig los thiab ntsia; thiab lawv pom Nifais thiab Lihais lub ntsej muag.
38 Thiab lawv hais rau tus txiv neej tias: Saib seb, tag nrho tej yam no txhais li cas, thiab ob tug neeg no nrog leej twg tham?
39 Nim no tus txiv neej ntawd npe hu ua Aminadas. Thiab Aminadas hais rau lawv tias: Nkawd nrog Vajtswv cov tim tswv tham.
40 Thiab tau muaj tias cov Neeg Lamas hais rau nws tias: Peb yuav ua li cas, es thiaj tshem tau tauv huab tsaus tsaus uas roos peb no?
41 Thiab Aminadas hais rau lawv tias: Nej yuav tsum hloov siab lees txim, thiab thov rau lub suab, kom txog thaum nej yuav muaj kev ntseeg Khetos, tus uas Amas, thiab Amulej, thiab Xi-elas tau qhia rau nej; thiab thaum nej yuav ua li no, Vajtswv yuav tshem tauv huab tsaus tsaus uas roos nej.
42 Thiab tau muaj tias lawv sawv daws pib thov rau lub suab ntawm tus uas tau ua rau lub ntiaj teb co qeg txoog; muaj tseeb tiag, lawv thov txog rau thaum Vajtswv ua rau tauv huab tsaus tsaus yaj mus.
43 Thiab tau muaj tias thaum lawv ntsia ntawm lawv ib puag ncig, thiab pom tias Vajtswv tau ua rau tauv huab tsaus tsaus uas roos lawv yaj mus lawm, saib seb, lawv pom tias ib tug ncej nplaim hluav taws khaub zig lawv, muaj tseeb tiag lawv txhua tus neeg.
44 Thiab Nifais thiab Lihais nyob hauv nruab nrab ntawm cov Neeg Lamas; muaj tseeb tiag, khaub zig lawv ib puag ncig; muaj tseeb tiag, zoo li lawv nyob hauv nruab nrab ntawm ib lub cub tawg, tiam sis tsis kub lawv, thiab twb tsis kub tej phab ntsa ntawm lub tsev kaw; thiab lawv muaj txoj kev xyiv fab uas piav tsis tau thiab muaj yeeb koob puv npo.
45 Thiab saib seb, Vajtswv tus Ntsuj Plig Dawb Huv tau nqis saum ntuj ceeb tsheej los, thiab tau nkag rau hauv lawv lub siab, thiab zoo li muaj hluav taws puv nkaus nyob hauv lawv, thiab lawv muaj peev xwm hais tawm tej lus uas xav tsis thoob.
46 Thiab tau muaj tias muaj ib lub suab los rau lawv, muaj tseeb tiag, ib lub suab uas zoo kawg li, zoo li ib lub suab ntxhi, hais tias:
47 Kev kaj siab lug, nej cia li muaj kev kaj siab lug, vim yog nej txoj kev ntseeg tus uas kuv Hlub Heev, tus uas yeej nyob txij puag thaum ntuj tsim teb raug los.
48 Thiab nim no, thaum lawv hnov qhov no lawv tsa lawv qhov muag ntsia rau qhov uas lub suab ntawd nrov tuaj; thiab saib seb, lawv pom rooj ntug qhib; thiab cov tim tswv nqis saum ntuj ceeb tsheej los thiab txhawb pab lawv.
49 Thiab muaj kwv yees li peb puas leej uas pom thiab hnov tej yam no; thiab cov tim tswv hais kom lawv tawm mus thiab kom txhob xav tsis thoob, thiab kom lawv tsis txhob ua xyem xyav.
50 Thiab tau muaj tias lawv tau tawm mus, thiab qhuab qhia cov neeg, thiab tshaj tawm tag nrho tej yam uas lawv tau hnov thiab tau pom thoob plaws rau txhua thaj tsam nyob ib ncig, lawv thiaj yaum tau feem coob ntawm cov Neeg Lamas los ntseeg, vim yog tej pov thawj loj uas lawv tau txais.
51 Thiab tag nrho cov uas lawv yaum tau los ntseeg tau tso lawv tej cuab yeej ua rog tseg, thiab lawv tej kev ntxub, thiab lawv cov yawg koob txoj kab lis kev cai.
52 Thiab tau muaj tias lawv muab tej av uas yog lawv li rau cov Neeg Nifais.