1 Saib seb, nim no tau muaj tias thaum Nifais tau hais tej lus no tas lawm, ib co neeg uas nyob hauv lawv tau khiav mus rau tom lub rooj txiav txim; muaj tseeb tiag, twb muaj tsib tug uas tau mus, thiab thaum lawv mus lawv hais rau lawv tus kheej hais tias:

2 Saib seb, nim no peb yuav paub ntawm qhov tseeb saib tus neeg no puas yog ib tug yaj saub thiab Vajtswv puas tau txib nws los qhia rau peb txog tej uas yuav muaj los yav tom ntej uas neeg xav tsis thoob. Saib seb, peb tsis ntseeg tias nws tau ua li ntawd; muaj tseeb tiag, peb tsis ntseeg tias nws yog ib tug yaj saub; txawm li ntawd los, yog tias qhov uas nws tau hais txog tus thawj txiav txim no muaj tseeb, es nws tuag lawm, ces peb yuav ntseeg tias tej lus ntxiv uas nws tau hais yeej muaj tseeb.

3 Thiab tau muaj tias lawv khiav tas lawv lub zog, thiab los rau hauv lub rooj txiav txim; thiab saib seb, tus thawj txiav txim tau vau rau hauv av, thiab pw tsau nws cov ntshav.

4 Thiab nim no saib seb, thaum lawv pom qhov no lawv xav tsis thoob heev kawg li, npaum li uas lawv cia li vau rau hauv av; vim lawv twb tsis ntseeg tej lus uas Nifais tau hais txog tus thawj txiav txim.

5 Tiam sis nim no, thaum lawv pom lawm lawv thiaj ntseeg, thiab txoj kev ntshai tau los rau lawv nyob tsam tag nrho tej kev txiav txim uas Nifais tau hais yuav los raug cov neeg; yog li ntawd lawv thiaj tshee hnyo, thiab tau vau rau hauv av.

6 Nim no, kiag thaum uas tus thawj txiav txim raug tua—thiab nws tus kwv hnav tsoos tsho kom txhob muaj neeg paub mus muab nws nkaug, thiab nws tus kwv tau khiav lawm, thiab cov tub qhe tau khiav mus qhia rau cov neeg, tsa suab qw txog tub sab tua neeg nyob hauv lawv;

7 Thiab saib seb cov neeg sib sau lawv tus kheej tuaj ua ke rau ntawm qhov chaw ntawm lub rooj txiav txim—thiab saib seb, ua rau lawv xav tsis thoob thaum lawv pom tsib tug neeg uas tau vau rau hauv av ntawd.

8 Thiab nim no saib seb, cov neeg twb tsis paub dab tsi ntsig txog cov neeg coob coob uas tau sib sau tuaj ua ke rau tom Nifais lub vaj; yog li ntawd lawv hais nyob hauv lawv tias: Cov neeg no yog cov uas tua tus txiav txim, thiab Vajtswv tau ntaus lawv xwv kom lawv tsis muaj peev xwm khiav ntawm peb mus.

9 Thiab tau muaj tias cov neeg muab lawv txhom, thiab muab lawv khi thiab muab lawv tso rau hauv lub tsev kaw. Thiab xa ib zaj lus tshaj tawm mus rau qhov txhia chaw hais tias tus thawj txiav txim raug tua lawm, thiab hais tias twb txhom tau cov uas tua nws thiab twb muab lawv tso rau hauv lub tsev kaw.

10 Thiab tau muaj tias hnub tom qab cov neeg sib sau lawv tus kheej tuaj ua ke tuaj quaj ntsuag thiab yoo mov, nyob rau tom lub ntees ntawm tus thawj txiav txim uas muaj hwj chim, tus uas raug tua lawm.

11 Thiab yog li ntawd cov neeg txiav txim uas tuaj rau tom Nifais lub vaj, thiab hnov nws tej lus, los kuj sib sau tuaj ua ke rau tom lub ntees tib yam.

12 Thiab tau muaj tias lawv nug cov neeg, hais tias: Tsib tug uas tau xa tuaj nug txog tus thawj txiav txim saib nws puas tuag los tsis tuag dua twg lawm? Thiab lawv teb thiab hais tias: Hais txog tsib tug uas nej hais tias nej tau xa tuaj, peb tsis paub; tiam sis muaj tsib tug uas yog cov tua, cov uas peb tau muab tso rau hauv lub tsev kaw.

13 Thiab tau muaj tias cov neeg txiav txim hais kom coj lawv los; thiab cov neeg coj lawv los, thiab saib seb lawv twb yog tsib tug uas tau xa tuaj; thiab saib seb cov neeg txiav txim nug lawv kom paub ntsig txog qhov xwm txheej no, thiab lawv qhia rau cov neeg txiav txim tag nrho tej uas lawv tau ua, hais tias:

14 Peb khiav thiab los rau qhov chaw ntawm lub rooj txiav txim, thiab thaum peb pom txhua yam raws nraim li Nifais tau ua tim khawv, peb xav tsis thoob heev ua rau peb cia li vau rau hauv av; thiab thaum peb tsim ntawm peb txoj kev xav tsis thoob los, saib seb lawv tau muab peb tso rau hauv lub tsev kaw.

15 Nim no, hais txog qhov uas tus txiv neej no raug tua, peb twb tsis paub xyov leej twg yog tus tua; thiab peb tsuas paub li no xwb, peb tau khiav thiab tuaj raws li nej hais, thiab pom tias nws tuag lawm, raws li Nifais tej lus.

16 Thiab nim no tau muaj tias cov neeg txiav txim muab qhov xwm coj los piav rau cov neeg, thiab qw tawm tsam Nifais, hais tias: Saib seb, peb paub tias tus Nifais no yeej tau sib yeem nrog lwm tus kom tuaj tua tus thawj txiav txim, thiab tom qab ntawd nws mam li tshaj rau peb, xwv kom nws yuav hloov peb lub siab rau nws txoj kev ntseeg, xwv kom nws yuav tsa tau nws tus kheej los ua ib tug neeg muaj hwj chim, uas yog Vajtswv xaiv los, thiab yog ib tug yaj saub.

17 Thiab nim no saib seb, peb yuav soj ntsuam tus neeg no, thiab nws yuav lees nws txoj kev txhaum thiab qhia rau peb seb leej twg yog tus tua tus thawj txiav txim no tiag tiag.

18 Thiab tau muaj tias cov neeg muab tsib tug ntawd tso nyob rau hnub uas sam sab. Txawm li ntawd los, lawv cem cov neeg txiav txim rau tej lus uas lawv tau hais tawm tsam Nifais, thiab sib cav nrog cov neeg txiav txim ib tug dhau ib tug, lawv thiaj ua rau cov neeg txiav txim tsis paub hais.

19 Txawm li ntawd los, cov neeg txiav txim tau hais kom muab Nifais txhom thiab khi thiab coj los rau ntawm cov neeg coob coob, thiab lawv pib nug nws ntau yam lus nug xwv kom lawv yuav ua rau nws yuam kev, xwv kom lawv yuav ntxo tau nws rau txoj kev tuag—

20 Hais rau nws tias: Koj yeej tuav tswv yim nrog lwm tus; leej twg yog tus uas tua tus thawj txiav txim no? Nim no cia li qhia peb, thiab cia li lees koj txoj kev txhaum; thiab lawv hais rau Nifais tias, Saib seb ntawm no yog nyiaj txiag; thiab peb kuj yuav pub koj txoj sia rau koj yog koj yuav qhia peb, thiab lees tej lus sib yeem uas koj tau cog nrog nws.

21 Tiam sis Nifais hais rau lawv tias: Auj nej cov niag neeg ruam es, nej cov uas tsis tau ua kev cai txiav hauv nej lub siab, nej cov uas dig muag, thiab nej cov neeg tawv ncauj, nej puas paub tus Tswv nej tus Vajtswv yuav cia nej ua neej txhaum li no ntev npaum li cas ntxiv?

22 Auj tsim nyog rau nej pib qw thiab quaj ntsuag, vim yog txoj kev puas tsuaj loj twb tos ntsoov nej lub sij hawm no, tsuas yog nej yuav hloov siab lees txim xwb.

23 Saib seb nej hais tias kuv tau sib yeem nrog ib tug neeg kom nws tua Xixaulas, uas yog peb tus thawj txiav txim. Tiam sis saib seb, kuv hais rau nej tias, nej hais li no twb vim yog kuv ua tim khawv rau nej xwv kom nej yuav paub ntsig txog qhov no; muaj tseeb tiag, twb yog kev ua pov thawj rau nej, hais tias kuv twb paub txog txoj kev phem thiab kev qias uas nyob hauv nej.

24 Thiab vim kuv tau ua li no, nej hais tias kuv tau sib yeem nrog ib tug neeg kom nws yuav ua tej yam no; muaj tseeb tiag, vim yog kuv ua lub cim no rau nej pom nej thiaj npau taws rau kuv, thiab nrhiav kev ua kom kuv txoj sia puas tsuaj.

25 Thiab nim no saib seb, kuv yuav qhia dua ib lub cim rau nej, thiab saib seb nej puas yuav nrhiav kev ua kom kuv puas tsuaj vim ua li no.

26 Saib seb kuv hais rau nej tias: Cia li mus rau tom Xi-atoos, tus uas yog Xixaulas tus kwv, thiab hais rau nws tias—

27 Nifais, tus uas ua txuj tias yog tus yaj saub, tus uas tau qhia tej yuav muaj los yav tom ntej ntau yam phem heev txog cov neeg no, puas tau sib yeem nrog koj, ntawm qhov uas koj tau tua Xixaulas, tus uas yog koj tus tij laug?

28 Thiab saib seb, nws yuav hais rau nej tias, Tsis tau.

29 Thiab nej yuav hais rau nws tias: Koj puas tau tua koj tus tij laug?

30 Thiab nws yuav sawv ntshai heev, thiab tsis paub yuav hais dab tsi. Thiab saib seb, nws yuav tsis lees rau nej; thiab nws yuav ua zoo li nws xav tsis thoob li; txawm li ntawd los, nws yuav hais rau nej tias nws tsis muaj txim.

31 Tiam sis saib seb, nej cia li txheeb xyuas nws, thiab nej yuav pom ntshav lo ntawm nws lub tw tsho.

32 Thiab thaum nej pom li no, nej yuav hais tias: Cov ntshav no los qhov twg los? Peb yeej paub lawm, puas yog, hais tias cov ntshav no yog koj tus tij laug cov ntshav?

33 Thiab tom qab ntawd nws yuav tshee hnyo, thiab ntsej muag yuav daj tag, twb zoo li kev tuag tau los rau nws.

34 Thiab tom qab ntawd nej yuav hais tias: Vim txoj kev ntshai no thiab txoj kev ntsej muag daj tag no uas tau los rau koj lub ntsej muag, saib seb, peb paub tias yeej yog koj muaj txim.

35 Thiab tom qab ntawd txoj kev ntshai uas loj dua yuav los rau nws; thiab tom qab ntawd nws yuav lees rau nej, thiab yuav tsis xyeej ntxiv lawm tias nws yog tus tua neeg.

36 Thiab tom qab ntawd nws yuav hais rau nej tias, kuv, Nifais, twb tsis paub dab tsi txog qhov xwm txheej no tsuas yog Vajtswv lub hwj chim muab rau kuv xwb. Thiab thaum ntawd nej yuav paub tias kuv yog ib tug neeg siab ncaj, thiab paub tias yog Vajtswv xa kuv los rau nej.

37 Thiab tau muaj tias lawv mus thiab ua, raws li Nifais tau hais rau lawv. Thiab saib seb, tej lus uas nws tau hais yeej muaj tseeb; vim Xi-atoos xyeej raws nraim li tau hais; thiab nws kuj lees raws nraim li tau hais.

38 Thiab cov neeg txiav txim coj tau nws los txheeb xyuas pom tias nws tus kheej twb yog tus uas tua ntag, thiaj li tau muab tsib tug ntawd tso, thiab Nifais los kuj tib yam.

39 Thiab muaj ib txhia ntawm cov Neeg Nifais ntseeg Nifais tej lus; thiab muaj ib txhia, kuj ntseeg vim yog tsib tug ntawd cov lus tim khawv, vim lawv hloov siab los ntseeg thaum lawv nyob hauv lub tsev kaw.

40 Thiab nim no muaj ib txhia nyob hauv cov neeg, uas hais tias Nifais yog ib tug yaj saub.

41 Thiab muaj lwm cov uas hais tias: Saib seb, nws yog ib tug vaj tswv, tsuas yog tias nws yog ib tug vaj tswv xwb tsis li ntawd nws yuav tsis muaj peev xwm paub txhua yam. Vim saib seb, nws tau qhia tej kev xav ntawm peb lub siab rau peb, thiab kuj tau qhia rau peb tej yam; thiab nws twb tau ua rau peb paub tus neeg uas tua peb tus thawj txiav txim.